Read Bima WAHYU 17 Bible Online

WAHYU 17 - Bima bible

WAHYU 17

¹ Sawa'u b̄a ede sab̄ua rad̄i pidu mala'eka ma nenti pidu mbua hid̄i taukai ede maina d̄i nahu ro nggahina, ”Maira, nahu d̄imaturu teina d̄i nggomi b̄uneku ma'ipi poda sunda ede d̄ihukum, eded̄u kota mana'e ede ratu'u d̄i kompe sori-sori.

² Sangaji-sangaji dunia karawina madab̄ae lab̄o sia, ro dou-dou mangge'e d̄i dunia ndad̄i mawu b̄ara nonona anggo dab̄aena.”

³ Edempara Roh Allah kuasakaina nahu, ro wa'a b̄a mala'eka ede nahu aka so sarae. Ta aka nahu edaku sab̄ua dou siwe madoho ese wawo sab̄ua binata ma waranana kala keta, ro ma b̄inikai b̄a tunti ngara-ngara makab̄awa ra katuna d̄i ru'u b̄a Ruma Hatalla. Binata ede mantau pidu mbua tuta ro sampuru mbua wanga.

⁴ Dou siwe ede kanina b̄aju warana keta ro kala keta, ro kantika kai masa, permata-permata, ro mutiara. D̄i rimana sia nentina sab̄ua mangko masa ma b̄ini b̄a lampa rawi ma sumpu awa dab̄ae ro najis, hasi rakarawina madab̄ae.

⁵D̄i tantanggana ratunti sab̄ua ngara ma ntau aona marahasia. Ngara ede eded̄u ”Babel Ma Na'e, ina b̄a samenana dou masunda ro dou ma'ipi dab̄ae d̄i dunia.”

⁶Edempara nahu edaku b̄a one dou siwe ede mawu kai ra'a ela Ruma Hatalla ro ra'a dou-dou rahade b̄ara to'ana d̄i Ruma Isa. Wakatu eda b̄a nahu dou siwe ede, nahu ndad̄i mbora poda akaku.

⁷Edempara nggahi mala'eka ede d̄i nahu, ”B̄ab̄auku nggomi mbora podakai akamu! Taho nahu d̄imangoana d̄i nggomi rahasia dou siwe ede ro rahasia binata ranentena, eded̄u binata ma ntau pidu mbua tuta ro sampuru mbua wanga.

⁸ Binata ede ntoina ra'iuna mori, pala ake watid̄u mori walina. Sia samporo wali d̄imalosa d̄i ade dembi made, ro d̄imalao aka ncai lelikai. Dou-dou ma mori d̄i dunia, ma ngarana wati radafta d̄i ade Buku Dou Mamori sawatipu b̄a dunia rakandad̄i d̄imambora aka na'edasi binata ede. B̄ara binata ede ntoina ra'iuna mori. Ake sia watid̄u mori walina, pala sia d̄imawontu mbali.

⁹D̄i ade lampa rawi ake pab̄uaku wara hikima ro loa ka'ao. Pidu mbua tuta ede eded̄u pidu mbua doro to'i; eded̄u doro to'i-doro to'i hid̄i dohokai dou siwe ede. Ro pidu mbua tuta ede rau eded̄u pidu sangaji:

¹⁰lima d̄i ade weki siad̄oho wa'ura mab̄u, sab̄ua mbuipu parentana, ro ma sab̄ua walina watipu maina. Namaisi sia peade, sia pab̄uaku parentana samporo mpoampa.

¹¹Ro binata ntoina parana morina, pala ake watid̄u mori walina, eded̄u sangaji makawarukaina. Sia eded̄u sab̄ua d̄i ade weki pidu sangaji ede rau, ma ake wunga laona aka lelikaina.

¹² Sampuru mbua wanga ra'eda b̄a nggomi ede, eded̄u sampuru sangaji ma watipu tampu'u parenta. Pala siad̄oho d̄i mbei kuasa d̄imaparentakai sangaji kaina sama-sama lab̄o binata ede sajam ntoina.

¹³D̄i sampuru sangaji ake sara'ana nantau ne'e ma sama; siad̄oho sara'a d̄onggona tenggo ra wale ro kuasa siad̄oho d̄i binata ede.

¹⁴Siad̄oho d̄imalewa ao Ana Jimba ede. Pala Ana Jimba ede lab̄o anamori-Na ma to'a rawa'u ouna ro rakad̄ale-Na ede d̄imakakoa-Na sangaji-sangaji ede, b̄ara Sia Ruma d̄i sara'ana ruma, ro Sangaji d̄i ade sara'ana sangaji.”

¹⁵Nggahi mala'eka ede rau, ”Oi ra'eda b̄a nggomi ede, hid̄i dohokai dou masunda ede, eded̄u bangsa-bangsa, ela ra dou-ela ra dou, negara-negara ro bahasa-bahasa.

¹⁶Sampuru mbua wanga ra'eda b̄a nggomi ro binata ede d̄imadaca'u dou masunda ede. Siad̄oho d̄imaweha rampa samenana ntauna, ro ndawina sia ndad̄i ronda. Siad̄oho d̄imangaha hi'ina ro kalelina kai afi.

¹⁷B̄ara Ruma Hatalla wa'ura karukuna ade siad̄oho d̄i kalampakaina nia Ruma Hatalla. Ruma Hatalla ndawina siad̄oho kasab̄ua ade d̄imad̄onggo mbei kuasakai siad̄oho d̄i binata ede, loakud̄u binata ede parentana sampe ndad̄ikaina au ranggahi b̄a Ruma Hatalla.

¹⁸Dou siwe ra'eda b̄a nggomi ede eded̄u kota mana'e, ma parenta sangaji-sangaji d̄i dunia.”