Read Bima WAHYU 18 Bible Online

WAHYU 18 - Bima bible

WAHYU 18

¹Sawa'u b̄a ede nahu edaku sab̄ua mala'eka makalaina malondo rad̄i saroga. Sia nantau kuasa ma na'e, ro taroa masambura nandawiku sara'a dunia ndad̄i taroa.

² Kai eli ma na'e, nggahi sia, ”Wa'ura mab̄u! Babel mana'e wa'ura mab̄u! Ake sia ndad̄i hid̄i seta-seta ro roh-roh madab̄ae. Ta d̄eina mori sara'a pahu nasi manajis ro ma daca'u b̄a dou.

³ B̄ara sara'a bangsa wa'ura nonona anggo nawasu dab̄aena. Sangaji-sangaji dunia karawina madab̄ae lab̄o sia, ro dou malanda ra lajo d̄i dunia ndad̄i ntau ra wara b̄a nawasuna mawati wa'u d̄i tapa ede.”

⁴ Edempara nahu ringaku eli makalaina rad̄i saroga manggahi, ”Losara, ela-Ku! Losara rad̄i ta d̄eina! Aina nggomid̄oho b̄atumu dosa-dosana, ro b̄atumu lemba hukumana!

⁵ B̄ara dosana wa'ura b̄ini rase sampe ese langi, ro Ruma Hatalla nakawaraku ruku ra rawi sia madab̄ae.

⁶ Karawipu d̄i sia b̄une rakarawi b̄a sia d̄i nggomid̄oho; cepepu d̄i sia d̄ua kali lipa d̄i samenana rakarawina. Isipu d̄i mangkona kai nono ma d̄ua kali ncewi toku ntewi kaisi nono rasadiana d̄i ru'u nggomid̄oho.

⁷ Mbeipu d̄i sia susa ra ncoki ro susa iu ma sama orena lab̄o na'e ra ntoru ro ntau ra wara rambeina d̄i ru'u ndaina. B̄ara sia naca'u nggahi d̄i weki ndaina, ’Nahu ake sangaji siwe maparenta! Nahu laina dou siwe mbaru mboha; nahu wati d̄ima'iu susa ade!’

⁸B̄ara lampa rawi edeku, ndad̄i d̄i ade sanai mpoampa sia d̄imab̄oha b̄a bala — supu, susa ade, ro sarahid̄o. Ro sia d̄i kampangi kai afi, b̄ara kuasana Ruma Hatalla ma hukumna ede.”

⁹ Sangaji-sangaji dunia ma b̄atu d̄i ade ruku ra rawi madab̄aena ro nawasu dou siwe ede d̄imanangi wea ro d̄imanangi d̄uru ra d̄ala kota ede na'edasi b̄a siad̄oho ob̄u manggulu weki rad̄i ade afi ma kampangina ede.

¹⁰Siad̄oho d̄imakid̄i sando'o b̄a one siad̄oho nadahuku hina b̄a susa ra ncokina. Nggahi siad̄oho, ”Alae, nawancuku ipi ihana kota ma rambou ngara ake — kota Babel ma tenggo! D̄i ade sajam mpoampa hukuma nggomi wa'ura kalampa!”

¹¹ Dou-dou malanda ra lajo d̄i dunia rau manangi ro masusa ade b̄ara dou siwe ede, b̄ara watid̄u wara kone sab̄ua dou rau ma weli barang-barang ralanda siad̄oho.

¹² Wati wara dou ma weli masa, salaka, permata ro mutiara siad̄oho, ro kaen lenan, kaen keta, sutera, ro kaen kala keta; ro sara'a pahu haju ma nggonggi d̄i raka, barang-barang rad̄i gading, ro rad̄i haju ma nggali-nggali, rad̄i romba, b̄esi ro marmer;

¹³rope haju maci, marakani, kamaya mangolo mengi, ro kamaya; anggo ro mina, mub̄u ro gando; capi ro jimba, jara ro kareta, ada-ada, nawa manusia rau.

¹⁴Dou-dou malanda ra lajo manggahi d̄i dou siwe ede, ”Sara'ana rane'emu kantau watid̄u wara walina, ro sara'ana ntau rawaramu ma'ipi ro mboumu wa'ura mbora. Nggomi wati d̄i maraka eda wali!”

¹⁵ Dou-dou malanda ra lajo ma wa'ura ntau ra wara b̄ara ambana d̄i kota ede d̄imakid̄i sando'o, b̄ara siad̄oho nadahuku hina b̄a susa ra ncokina. Siad̄oho d̄imanangi lab̄o iha adena,

¹⁶edempara nggahina, ”Ala, na'ipi podaku ihana kota ma mbou ake! Ranginakai sia nakaniku kani ra lombo lenan, kaena keta ro kaena kala keta; ranginakai sia b̄ini b̄a masa rakantika, permata ro mutiara!

¹⁷ Pala d̄i ade sajam mpoampa, sia wa'ura moda sara'a ntau ra warana ede!” Sara'a dou mawa'a kapa, dou manentena, ro dou ma b̄atu kapa, ro sara'ana dou ma ngupa ngaha d̄i moti, makid̄i sando'o.

¹⁸ Ro kanggicana wakatu siad̄oho edana ob̄u mateka wule ma ramai ta afi ma ka'a kota ede. Nggahi siad̄oho, ”Watipu warana kota makalai b̄une kota ma na'e ake!”

¹⁹ Edempara siad̄oho wurana kalub̄u d̄i tuta siad̄oho kai tandana siad̄oho masusa ade, edempara nangi ro kanggicana, ”Ala, na'ipi podaku ihana kota ma na'e ake! Ntau ra warana wa'ura kandad̄ina sara'a dou-dou ma ntau kapa-kapa d̄i moti ndad̄i ntau ra wara! Pala d̄i ade sajam mpoampa sia wa'ura mbora sara'a ntauna!”

²⁰ Oe saroga, kad̄ihira ademu b̄a iha lelina kota ede! Oe ela Ruma Hatalla, rasu-rasu, ro nabi-nabi kad̄ihira ademu! B̄ara Ruma Hatalla wa'ura hukumna sia kai colana d̄i au rakarawina d̄i nggomid̄oho!

²¹ Sawa'u b̄a ede, sab̄ua mala'eka ma na'e kante'e mahanta sab̄ua wadu — b̄une na'e wadu nggirukai ma na'e — edempara b̄ale tauna d̄i ade moti ro nggahina, ”Ndakeku carana kota Babel ma mbou ede d̄i b̄ale ka'ipi ndad̄ina wati d̄i raka eda wali.

²² Eli musik, rad̄i dou mampa'a kecapi, rad̄i dou-dou marawana, rad̄i dou ma'ufi jalitu ro rad̄i dou ma'ufi tarompe, wati d̄i ringa wali d̄i nggomi! Watid̄u d̄i eda wali raumu sab̄ua dou maloa karawi poda rau ta ede, ro eli wadu nggirukai rau wati d̄i ringa wali.

²³Dou wati d̄ima'eda wali kalea ilo ta d̄eimu; ro wati rau d̄imaringa wali eli ndiha nika ta ede. Dou-dou malanda ra lajo eded̄u dou-dou ma ipi penti d̄i dunia, ro kai ilimu-ilimu sihi nggomi tipu sara'amu bangsa d̄i dunia!”

²⁴ B̄abel d̄i hukum b̄ara d̄i ade kota ede wa'ura raka ra'a nabi-nabi, ra'a ela Ruma Hatalla — porona ra'a sara'ana dou rawa'u hade ese wawo dunia.