Read Bima WAHYU 19 Bible Online

WAHYU 19 - Bima bible

WAHYU 19

¹Sawa'u b̄a ede nahu wara ringaku eli b̄une eli kambimbi dou mamboto rad̄i saroga ma nggahi, ”Roi ra wadipu Ruma Hatalla! Ruma Hatalla ndai eded̄u Ruma Hatalla ma mbei salama; Sia Ruma Hatalla ma na'e ra ntoru ro makuasa!

² Hukuma-Na na'adi ro maloa timba ra lemba! Sia wa'ura b̄ab̄ukaina hukuma d̄i dou ma ipi sunda, maka'ihana dunia kai rawina madab̄ae. Ruma Hatalla wa'ura hukumna masunda ede, b̄ara sia hadena ada-ada Ruma Hatalla.”

³ Edempara eli dou mamboto ede manggahi wali, ”Roi ra wadira Ruma Hatalla! Ob̄u rad̄i afi ma kampangina kota na'e ede d̄imawule wati dengga-denggana!”

⁴Ndad̄i d̄ua mpuru upa mana'ekaina ro upa mbua mahluk ma heko hid̄i dohokai ede suju ro nembana Ruma Hatalla ma doho ese wawo dohokaina. Nggahi siad̄oho, ”Amin! D̄ese ra ntasa Ruma Hatalla!”

⁵ Edempara wara ringa eli ma ramai rad̄i hid̄i dohokai ede eli ma nggahi, ”Roi ra wadipu Ruma Hatalla, oe sara'ana ada Ruma Hatalla, ro sara'ana dou — mana'e ro mato'i — ma nemba Ruma Hatalla!”

⁶ Sawa'u b̄a ede nahu ringaku wara ma'eli b̄une eli sakalompo dou ma mboto poda; elina b̄une balumba na'e ro b̄une eli karece ai makambimbi. Nahu ringaku siad̄oho nggahina, ”D̄ese ra ntasa Ruma Hatalla! B̄ara Ruma, Ruma Hatalla ndai Mawancu kuasa ede ake maparenta!

⁷Maira ndaita kad̄ihiku ade ro kaneo ade; maira ndai taroi ra wadiku na'e ra ntoru-Na! B̄ara wa'ura raka ainaina nikakai Ana Jimba ede, ro b̄unti-Na wa'ura sadia d̄i nikakai-Na.

⁸Kani ra lombo lenan ma kakila wa'ura mbei d̄i sia d̄i kanina.” (Kani ra lombo lenan eded̄u ruku ra rawi mataho rakarawi b̄a ela Ruma Hatalla.)

⁹ Edempara nggahi mala'eka ede d̄i nahu, ”Tuntipu ake: ’Taho ra ntikara dou ra'unda d̄i nika ndiha Ana Jimba ede.’ ” Edempara nggahi wali mala'eka ede, ”Akeku haba mancihi rad̄i Ruma Hatalla.”

¹⁰Nahu sujuku d̄i tando mala'eka ede ne'eku nemba sia, pala sia nggahina d̄i nahu, ”Aina! Aina nembamu nahu, nembapu Ruma Hatalla! B̄ara nahu rau ada sama b̄une nggomi ro sama b̄une sara'a cina ra angimu ma tenggo imbi d̄i nuntu ra nggahi Isa!” B̄ara nuntu ra nggahi Isa edeku ma kaloana dou-dou makarongga nggahi ra eli Ruma Hatalla.

¹¹ Edempara nahu edaku saroga mahengga weki, edempara tada sab̄ua jara b̄ura. Ma nentena mangara Sang To'a ro Sang Ncihi. Sia na'adi d̄i ade b̄ab̄ukaina hukuma ro d̄i ade lewa ra laka rakarawi-Na.

¹² Mada-Na b̄une kalea afi ro d̄i tuta-Na, Sia kanina songko sangaji mamboto. D̄i sarumbu-Na wara ratunti sab̄ua ngara; ndai Sia mpoampa ma b̄ade ngara ede.

¹³Jumba rakani-Na wa'u rad̄eta d̄i ade ra'a. Ro Sia d̄i pehekai ”Nggahi ra eli Ruma Hatalla”.

¹⁴Tentara saroga ma b̄atuna Sia kai nentena jara-jara b̄ura, ro kani ra lombona lenan ma lanta raso.

¹⁵ Rad̄i asa-Na losa sab̄ua peda ma ngaha ro kai peda ede Sia d̄imakakoa bangsa-bangsa, ro Sia d̄imaparenta siad̄oho kai tiki b̄esi. Sia d̄imapua anggo d̄i ade hid̄i puakai anggo mbani Ruma Hatalla Ma Wancu kuasa.

¹⁶D̄i jumba-Na ro d̄i wangga-Na ratunti ngara ake, ”Sangaji samenana sangaji, ro Ruma d̄i samenana ruma.”

¹⁷ Edempara nahu edaku sab̄ua mala'eka makid̄i ese wawo liro. Kai eli ma na'e sia nggahina d̄i samenana nasi ma ngemo ese woha ai, ”Maira kab̄orora weki d̄i laokai aka ndiha ma na'e rakandiha b̄a Ruma Hatalla!

¹⁸Maira ngaha hi'i sangaji-sangaji, ro hi'i panglima-panglima ro hi'i pahlawan-pahlawan; maira ngaha hi'i dou-dou manente jara lab̄o hi'i jarana ro hi'i sara'a manusia, mana'e ro mato'i, ada dou ro dou mahori weki!”

¹⁹Edempara nahu edaku binata ede, ro sangaji-sangaji dunia, ro tentara siad̄oho, makab̄oro weki mane'e lewa lab̄o Sia ma nente jara b̄ura ede ro tentara-Na.

²⁰ Edempara binata ede raraka wa'u sama-sama lab̄o nabi palasu ma rawa'u ndawi rawi ma b̄isa ra guna d̄i tando binata ede. (Kai rawi ma b̄isa ra guna edeku binata ede tipukaina dou-dou ma ntau tanda binata ede, ro dou-dou ma nemba patung binata ede.) Edempara binata ede ro nabi palasu ede paki samori d̄i ade afi na'e ma kalea lab̄o pure.

²¹Ro tentara siad̄oho hade kai peda ma ralosa ta'asa dou manente jara b̄ura ede. Ndad̄i nasi-nasi rau mai ro ngaha kapodana hi'i siad̄oho rahade ede.