Read Bima WAHYU 2 Bible Online

WAHYU 2 - Bima bible

WAHYU 2

¹”D̄iru'u b̄a mala'eka ela Ruma d̄i Efesus, tunti ndakepu: Akeku rangoa wi'i b̄a Sia ma nenti pidu mbua ntara d̄i rima wana-Na, ro malampa d̄i hela pidu mbua ed̄i ilo masa ede.

²Nahu b̄ade au rakarawi b̄a nggomid̄oho: Nggomid̄oho makarawi kapoda ade ro nggomid̄oho lembo poda ademu. Nahu b̄ade b̄a one nggomid̄oho wati mbeimu ade d̄i dou madab̄ae. Ro dou-dou ma kanahu wekina rasu sapodakaina laina, wa'ura uji b̄a nggomid̄oho, ro nggomid̄oho rakamu b̄ade b̄a one siad̄oho dou macowa.

³Nggomid̄oho saba ro nggomid̄oho masusa ra ncoki b̄ara Nahu, ro nggomid̄oho wati kompo kananumu.

⁴Pala ake wati kau b̄a Nahu d̄i nggomid̄oho: Nggomid̄oho wati walira meci ra ca'umu Nahu b̄une aipu sarambana.

⁵B̄ara ndedena, kawarapu nawa'ura ipi d̄o'ona nggomid̄oho mab̄umu! Tobara rad̄i dosa-dosamu, ro karawipu au rakarawi b̄a nggomid̄oho ra'aipu sarambana. Nggara watisi, Nahu d̄imamai d̄i nggomid̄oho ro d̄imawonto ed̄i ilomu ede rad̄i hid̄ina.

⁶Pala wara ma taho d̄i nggomid̄oho, eded̄u: Nggomid̄oho wati ca'umu d̄i ruku ra rawi dou-dou mab̄atu Nikolaus, sama b̄une nahu ma daca'u ruku ra rawi dou-dou mab̄atu Nikolaus.

⁷ Cou-cou maloa ringa, pab̄uaku kade'e kab̄aena au ranggahi b̄a Roh Allah d̄i ru'u b̄a ele-ela Ruma! Siad̄oho ma ngolu, d̄ikaukaib̄a Nahu ngaha wua haju rad̄i fu'u mori ra woko ma woko d̄i nggaro Ruma Hatalla.”

⁸ ”D̄i ru'u b̄a mala'eka ela Ruma d̄i Smirna, tunti ndakepu: Akeku rangoa wi'i b̄a Sia ma sarambana ro ma cumpukaina — ma wa'ura made ro mamori mbali.

⁹Nahu kab̄ade susa-susa nggomid̄oho; Nahu kab̄ade nggomid̄oho ncoki morimu — pala sapodakaina nggomid̄oho mantau ra wara! Nahu kab̄ade fitina-fitina ra lo'o d̄i nggomid̄oho b̄a dou-dou makanahu weki ndaina Yahudi, sapodakaina laina; siad̄oho eded̄u ela Ibilis!

¹⁰Aina dahumu d̄i susa ra ncoki ma wati ntoi walina d̄i pab̄ua iu b̄a nggomid̄oho. Kawarapu. Ibilis d̄imakalu'u sarundena rad̄i nggomid̄oho d̄i ade uma bui d̄i cobakaina nggomid̄oho. Nggomid̄oho d̄imasusa ra ncoki sampuru nai ntoina. Pab̄uapu nggomid̄oho to'a d̄i Nahu sampe made, ndad̄i Nahu d̄imambeimu mori masapodakaina ro ma'ederahid̄i ru'u ufa ngolukai.

¹¹ Cou-cou maloa ringa, pab̄uaku kade'e kab̄aena au ranggahi b̄a Roh Allah d̄i ela Ruma! Siad̄oho ma ngolu wati d̄ima'iu poda susa ra ncoki au-au b̄ara made kad̄ua kalikaina.”

¹²”D̄i ru'u b̄a mala'eka ela Ruma d̄i Pergamus, tunti ndakepu: Akeku rangoa wi'i b̄a Sia ma nenti peda mangaha ma ntau woi b̄ali b̄ae.

¹³Nahu kab̄ade tab̄e ngge'ekai nggomid̄oho, eded̄u d̄i hid̄i kuasakai Ibilis. Nggomid̄oho ma to'a d̄i Nahu. Mala wakatu Antipas, sakasi-Ku ma to'a ede, rahade d̄i tando nggomid̄oho d̄i hid̄i kuasakai Ibilis, nggomid̄oho wati kawatimu b̄a one nggomid̄oho ma'imbi d̄i Nahu.

¹⁴ Pala ade ndedekaina wara pila-pila mbua lampa rawi ma wati ca'u b̄a Nahu d̄i nggomid̄oho: Wara sarunde dou d̄i weki nggomid̄oho ma b̄atu au rangoa ra tei b̄a Bileam. La Bileam ngoa ra teina Balak b̄uneku carana b̄ab̄u ka'iha ela Israel d̄i ade dosa; kai siwina siad̄oho ngaha ngaha ra nono rawa'u d̄onggo ra mbei d̄i ru'u berhala ro karawi lampa rawi-lampa rawi madab̄ae.

¹⁵Ndede rau wara d̄i ade weki nggomid̄oho dou-dou ma nenti d̄i ngoa ra tei dou-dou mab̄atu la Nikolaus.

¹⁶B̄ara ndedena, tobara rad̄i dosa-dosamu! Nggara watisi, samporo wali Nahu d̄imamai d̄i nggomid̄oho ro d̄imadei dou-dou ede kai peda ma wara d̄i asa-Ku.

¹⁷ Cou-cou maloa ringa, pab̄uaku kade'e kab̄aena au ranggahi b̄a Roh Allah d̄i ru'u ela-ela Ruma! Siad̄oho ma ngolu, d̄i kaukai b̄a Nahu ngaha manna ma ili weki, ro cua-cua d̄imatarima d̄i Nahu sab̄ua wadu b̄ura. D̄i wadu ede wara ratunti sab̄ua ngara ma b̄ou, ma wati d̄i b̄ade b̄a cou-cou rau, selasi b̄a dou ma tarimana.”

¹⁸”D̄i ru'u b̄a mala'eka ela Ruma d̄i Tiatira, tunti ndakepu: Akeku rangoa b̄a Ana Ruma Hatalla, ma kalea mada-Na b̄une afi, ro ed̄i-Na makancilo b̄une romba raka'a.

¹⁹Nahu kab̄ade sara'a rakarawi b̄a nggomid̄oho — Nahu kab̄ade nggomid̄oho mameci ra ca'u sasamamu, nggomid̄oho mato'a, nggomid̄oho makarawi, ro nggomid̄oho malembo ade d̄i susa ra ncoki. Nahu kab̄ade nggomid̄oho ake makarawi mboto ntewi kaisi ma rawa'u.

²⁰ Pala ake d̄i daca'u b̄a Nahu d̄i nggomid̄oho: Nggomid̄oho mambei ade d̄i la Izebel, dou siwe ma kanahu weki rakakai b̄a Ruma Hatalla ede. Wa'ura mboto ada-ada-Ku rakekona ro rangoa ra teina d̄imakarawi madab̄ae ro d̄imangaha ngaha ra nono rawa'u d̄onggo ra mbei d̄i berhala.

²¹Wa'ura mbei b̄a Nahu d̄i sia wakatu d̄i tobakaina rad̄i dosa-dosana, pala sia wati ne'ena dengga karawi lampa rawi-lampa rawi ma dab̄ae ede.

²²Kawarapu! Nahu d̄imab̄atena sia sampe supukaina d̄i hid̄i marukaina. Ta ede sia ro dou-dou ma karawi jina lab̄o sia d̄imasusa ra ncoki poda. Sara'ana ede d̄i karawi b̄a Nahu ake — selasi nggara siad̄oho nadenggasi karawi lampa rawi-lampa rawi ma dab̄ae sama-sama lab̄o sia.

²³ Dou-dou mab̄atuna d̄i hade rau b̄a Nahu loakud̄u sara'ana ela Ruma kawarana weki b̄a one Nahura Sia mab̄adena fiki ra kananu ro ade manusia. Nggomid̄oho d̄i cepe wea b̄a Nahu b̄unera karawi b̄a cua-cua nggomid̄oho.

²⁴Pala nggomid̄oho ma kalai-laina d̄i Tiatira wati b̄atumu ngoa ra tei ma dab̄ae ede, ro wati tana'omu ilimu-ilimu Ibilis. Nahu manggahi b̄a one Nahu wati d̄imasala'ina d̄i nggomid̄oho wua matani.

²⁵Pala sampe wakatu maikai Nahu pea ede, pab̄uapu nggomid̄oho ngge'empa b̄atumu au rawa'u kantau b̄a nggomid̄oho.

²⁶ Siad̄oho ma ngolu, ro sampe cumpukaina karawi ncauna au rad̄ine'e b̄a Nahu, d̄imbei b̄a Nahu kuasa ma sama b̄une ratarima b̄a Nahu rad̄i Ama-Ku. Siad̄oho d̄imatarima kuasa rad̄i Nahu d̄i parentakai bangsa-bangsa kai tiki b̄esi, ro d̄imakaleli bangsa-bangsa ede b̄une roa dana.

²⁸Siad̄oho d̄imatarima b̄ombo b̄ala d̄i Nahu.

²⁹Cou-cou maloa ringa, pab̄uaku kade'ena au ranggahi b̄a Roh Allah d̄i ela Ruma!”