Read Bima WAHYU 20 Bible Online

WAHYU 20 - Bima bible

WAHYU 20

¹Sawa'u b̄a ede nahu edaku sab̄ua mala'eka malondo rad̄i saroga. D̄i rimana sia nentina kunci dembi made ro sab̄ua rante ma na'e.

² Edempara sia wa'una naga ede, sawa tua, — eded̄u Ibilis atao Roh Seta ede — ro ndantena d̄i ru'u sariwu mba'a ntoina.

³Edempara mala'eka ede pakina naga ede d̄i ade dembi made ro becena loakud̄u naga ede watid̄u loa walina tipu bangsa-bangsa sawatipu b̄a wakatu sariwu mba'a ede nggorina. Sawa'u b̄a ede sia d̄i pab̄ua hori d̄i wakatu samporo.

⁴ Edempara nahu edaku hid̄i-hid̄i dohokai sangaji ro dou-dou ma doho d̄i hid̄i dohokai ede rambei kuasa d̄imambeina hukumana. Nahu eda rauku nawa dou-dou rawa'u dompo tutana b̄ara siad̄oho mambei sakasi mab̄oha Ruma Isa, ro mangoa ra kahabana rangoa wi'i b̄a Ruma Hatalla. Dou-dou ede wati nembana binata, atao patungna. Siad̄oho rau watipu iuna tarima tanda-tanda binata ede d̄i tantangga atao d̄i rima siad̄oho. Edempara siad̄oho mori mbalina ro parentana kai sangaji kaina masama-sama lab̄o Al Masih sariwu mba'a ntoina.

⁵Akeku masarambakaina dou-dou mamade rakamori mbali. (Pala dou-dou mamade makalaina wati d̄i kamori mbali santoi wakatu sariwu mba'a.)

⁶Taho ra ntika dou-dou rakamori mbali rau d̄i wakatu sarambakaina ede. Siad̄oho patu d̄imandad̄i ntau Ruma Hatalla. Made makad̄ua kalikaina wati ntauna kuasa d̄i siad̄oho. Siad̄oho d̄imandad̄i imam-imam Ruma Hatalla ro imam-imam Al Masih; ro siad̄oho d̄imaparenta lab̄o Sia sariwu mba'a ntoina.

⁷Sawa'u b̄a nggori wakatu sariwu mba'a ede, Ibilis d̄i hori rad̄i ade uma buina,

⁸ ro sia d̄imalao tipu bangsa-bangsa mawara d̄i sara'a dunia eded̄u Gog ro Magog. Ibilis kab̄orona siad̄oho d̄imalewa, jumulana ma ore poda, samboto sarae d̄i moti.

⁹Edempara siad̄oho rau mbari mbura d̄i sara'a dunia, edempara lao dei hekona hid̄i kemakai ela Ruma Hatalla ro kota rameci ra ca'u b̄a Ruma Hatalla. Pala afi ma ralondo rad̄i langi ro kampoina siad̄oho.

¹⁰Edempara Ibilis ma tipu siad̄oho ede, d̄i b̄ale tau d̄i ade afi na'e ro pure. Ta edeku hid̄i binata ro nabi palasu ede rapaki ulukai. Siad̄oho d̄i kancoki aimarai aimangad̄i ru'u santoi-ntoina.

¹¹ Sawa'u b̄a ede nahu edaku sab̄ua hid̄i dohokai sangaji mab̄ura ma na'e ro Sia ma doho ta esena. Langi ro dunia mbora rad̄i tando-Na ndad̄ina wati d̄i eda walimu.

¹²Ro nahu edaku dou-dou mamade, mana'e ro mato'i, makid̄i d̄i tando hid̄i dohokai sangaji ede. Edempara buku-buku rau d̄i hengga. Edempara sab̄ua buku ma kalai d̄i hengga, eded̄u Buku Dou Mamori. Edempara hukuma d̄ib̄ab̄u d̄i ru'u b̄a dou mamade, nancihi ncao lab̄o ruku ra rawi siad̄oho b̄une ratunti d̄i ade buku-buku ede.

¹³Edempara moti d̄onggona dou-dou mamade ma wara ta d̄eina. Made ro Dunia Made rau ma d̄onggona dou-dou mamade ma wara d̄i sia. Ro dou-dou mamade ede sara'ana b̄ab̄u kai hukuma mancihi ncao lab̄o ruku ra rawi siad̄oho.

¹⁴Edempara Made ro Dunia Made b̄ale tau ade afi. (Afi mana'e ake eded̄u made makad̄uakaina.)

¹⁵Dou-dou ma wati wara ratunti ngarana d̄i ade Buku Dou Mamori, d̄i paki d̄i ade afi mana'e.