Read Bima WAHYU 21 Bible Online

WAHYU 21 - Bima bible

WAHYU 21

¹ Edempara nahu edaku langi ma b̄ou ro dunia ma b̄ou. Langi masarambana ro dunia masaramba rauna mbora, ro moti rau mbora.

² Edempara nahu edaku kota maraso ede, eded̄u Yerusalem ma b̄ou, malondo rad̄i saroga ma ramai ta Ruma Hatalla. Kota ede wa'ura sadia b̄une sab̄ua dou b̄unti siwe rakantika d̄i edakai angi lab̄o b̄unti mone.

³ Edempara nahu ringaku eli d̄i hid̄i dohokai sangaji ede manggahi kana'e, ”Ake hid̄i ngge'e kai Ruma Hatalla eded̄u sama-sama lab̄o manusia! Sia d̄imamori sama lab̄o siad̄oho, ro siad̄oho d̄imandad̄i ela-Na. Ndai Ruma Hatalla d̄imawara lab̄o siad̄oho ro d̄imandad̄i Ruma Hatalla siad̄oho.

⁴ Sia d̄ima'osana sara'a oi mada rad̄i mada siad̄oho. Made wati d̄imawara wali, ncoki ade, nangi, atao pili wati d̄imawara rau. Lampa rawi-lampa rawi mantoina wa'ura mbora.”

⁵Edempara Sia ma doho ese dohokai ede nggahina, ”Ake Nahu d̄imandawi sara'ana b̄ou!” Sia nggahi rauna d̄i nahu, ”Tuntipu ake, b̄ara nggahi ra eli ake napodaku ro loa d̄i imbi.”

⁶ Edempara Sia nggahina, ”Wa'ura nggori! Nahuku ma sarambana ro ma cumpukaina; Nahuku Ruma ra'aipu Saramba wa'una sampe Cumpukaina. Sanikina dou ma mango wo'o, d̄i mbei mpoa b̄a Nahu nono rad̄i mada oi ma mbei mori.

⁷ Dou-dou ma ngolu d̄imatarima lampa rawi ede rad̄i Nahu. Nahu d̄imandad̄i Ruma Hatallana, ro sia d̄imandad̄i ana-Ku.

⁸Pala dou ma dahu, dou ma b̄ab̄u dou makalai, dou madab̄ae, mahade dou, dou ma'iha, dou ma kani ilimu-ilimu seta, manemba berhala, ro sara'a dou manuntu ra nggahi cowa, d̄i paki d̄i ade afi mana'e ro pure ma kalea fampa, eded̄u made makad̄uakaina.”

⁹Sab̄ua d̄i ade weki pidu mala'eka ma wa'ura nenti hid̄i taukai-hid̄i taukai ma b̄ini kai b̄a pidu mbua bala macumpukaina ede maina d̄i nahu ro nggahina, ”Maira! Nahu d̄imaturu teina d̄i nggomi B̄unti, eded̄u wei Ana Jimba.”

¹⁰ Edempara Roh Allah kuasakaina nahu, ro mala'eka ede wa'ana nahu ese wawo doro ma d̄ese poda. Sia turu teina nahu Yerusalem, kota maraso ede, kota ede ralondona rad̄i saroga, rad̄i Ruma Hatalla,

¹¹kai ndiha ro d̄ese ra ntasa Ruma Hatalla. Kota ede nakakila-kila b̄une wadu permata, b̄une wadu baiduri fanda ma noa raso b̄une kaca.

¹² Kuta tembo ma rahekona na'e d̄ese, kai sampuru d̄ua tad̄a lawa, ro jaga b̄a sampuru d̄ua mala'eka. D̄i tad̄a-tad̄a lawana ratunti ngara-ngara sampuru d̄ua suku bangsa Israel.

¹³Wara tolu mbua tad̄a lawa ma satando aka sanikina wela: tolu mbua sab̄ae elena, tolu mbua sab̄ae d̄ona, tolu mbua sab̄ae d̄ana, ro tolu mbua sab̄ae d̄ina.

¹⁴Tembo kota ede ratu'u d̄i wawo sampuru d̄ua mbua wadu dasa. D̄i wadu-wadu dasa ede ratunti kai ngara-ngara sampuru d̄ua rasu Ana Jimba ede.

¹⁵ Mala'eka ma nuntu ra nggahi lab̄o nahu nantau tiki uku randawi kai masa, d̄i ukukaina kota ede, tad̄a-tad̄a lawana ro tembona.

¹⁶Kota ede napado upa — naruna sama lab̄o lembona. Edempara mala'eka ede ukuna kota ede kai tiki ukuna; palasi naruna 2400 kilomete; lembo ro d̄esena sama b̄une naruna.

¹⁷Wakatu uku b̄a mala'eka ede tembona, palasi d̄ese tembo ede ini mpuru mete. Ra'ukukai b̄a mala'eka ede eded̄u ra'ukukai b̄a manusia.

¹⁸ Tembo kota ede randawi kai wadu baiduri fanda, ndai kotana ra ndawi kai masa ngganga, noa b̄une kaca.

¹⁹Wadu-wadu dasa kota ede rakantika kai sara'a pahu wadu permata. Wadu dasa ma sarambana randawi kai wadu baiduri fanda, ma kad̄uakaina randawi kai wadu marmer, makatolukaina randawi kai wadu yakut, maka'upakaina randawi kai wadu zamrud,

²⁰makalimakaina randawi kai wadu baiduri nana, maka'inikaina randawi kai wadu delima, makapidukaina randawi kai wadu ratna cempaka, makawarukaina rad̄i pirus, makaciwikaina rad̄i wadu topas, makasampurukaina rad̄i wadu krisopras, makasampuru sab̄uakaina randawi kai wadu lazuardi, ro ma kasampuru d̄uakaina randawi kai wadu kecubung.

²¹Sampuru d̄ua tad̄a lawana wara sampuru d̄ua mutiara, cua-cua tad̄a lawa randawi kai sab̄ua mutiara. Ncai d̄i kota ede randawi kai masa ngganga, noa b̄une kaca ma niu.

²²Nahu wati edaku Bait Allah d̄i ade kota eded̄u, b̄ara Bait Allah eded̄i ndai Ruma, Ruma Hatalla Ma Wancu kuasa, ro Ana Jimba ede.

²³ Kota ede wati paraluna kataroa b̄a liro atao wura, b̄ara d̄ese ra ntasa Ruma Hatalla makataroana, ro Ana Jimba ede eded̄u ilona.

²⁴ Bangsa-bangsa d̄i dunia d̄imalampa d̄i ade kaleana, ro sangaji-sangaji rau d̄imawa'a ntau ra wara siad̄oho d̄i ade kota ede.

²⁵ Tad̄a-tad̄a lawa kota ede d̄imahengga weki sanaru ainaina; wati d̄i kempa, b̄ara wati wara aimangad̄i ta ede.

²⁶Na'e ra ntoru ro ntau ra wara bangsa-bangsa d̄i wa'a d̄i ade kota ede.

²⁷ Pala dou ma karawi lampa rawi-lampa rawi ma ni'ikai b̄a ade, atao dou ma cowa — porona au-au ma najis wati d̄imalu'u ta d̄eina. Ma d̄imalu'u eded̄u dou ma ntau ngara d̄i ade Buku Dou Mamori, buku Ana Jimba ede.