Read Bima WAHYU 22 Bible Online

WAHYU 22 - Bima bible

WAHYU 22

¹ Mala'eka ede turu tei rauna d̄i nahu sori ma oina mambei mori ra woko. Sori ede kancilo ntika b̄une kaca ro raikaina rad̄i dohokai Ruma Hatalla ro Ana Jimba ede,

² d̄i woha ncai kota ede. D̄i kengge sori ede, d̄i b̄ali b̄aena wara fu'u d̄i maikai mori ra woko, ma mbua sampuru d̄ua kali samba'a, eded̄u sakali sawura. Ro'ona d̄i kani d̄imakataho kai supu bangsa-bangsa.

³ D̄i ade kota ede wati wara au-au ma hina b̄a b̄a'a Ruma Hatalla. Hid̄i dohokai Ruma Hatalla ro Ana Jimba ede d̄imawara d̄i ade kota ede. Adad̄oho-Na d̄imato'a d̄i Sia,

⁴ro d̄ima'eda pahu-Na. Ngara-Na d̄i tunti d̄i tantangga siad̄oho.

⁵ Siad̄oho wati d̄imaparalu walina ilo atao kalea liro, b̄ara aimangad̄i watid̄u wara walina, ro ndai Ruma Hatalla d̄imakataroana siad̄oho. Ndad̄i siad̄oho d̄i maparenta kai sangaji kaina d̄i ru'u santoi-ntoina.

⁶Edempara nggahi mala'eka ede d̄i nahu, ”Nggahi ra eli-nggahi ra eli ake napodaku ro loa d̄i imbi. Ruma Hatalla ma mbei Roh-Na d̄i nabi-nabi, wa'ura nggaduna mala'eka-Na d̄imaturu teina d̄i adad̄oho-Na au d̄imapab̄ua ndad̄i roci.”

⁷”Kade'e kab̄aepu ake!” nggahi Ruma Isa, ”Nahu d̄imamai roci. Taho ra ntikara dou ma to'akai d̄i nggahi ra eli ranggahi b̄a Ruma Hatalla d̄i ade buku ake!”

⁸Nahu, Yahya, mawa'ura ringa ro ma'eda sara'ana ake. Sawa'u b̄a nahu nggori ringa ro edaku nahu sujuku d̄i tando mala'eka ma wa'ura turu tei sara'ana ede d̄i nahu, ro nahu ne'eku nemba sia,

⁹pala sia nggahina d̄i nahu, ”Aina! Aina nembamu nahu! Nembapu Ruma Hatalla! B̄ara nahu rau ada b̄une nggomi, ro b̄une cina ra angimu, nabi-nabi ro sara'a dou ma to'akai d̄i rangoa wi'i d̄i ade buku ake!”

¹⁰Edempara sia nggahi walina, ”Aina ilimu nggahi ra eli ranggahi b̄a Ruma d̄i ade buku ake, b̄ara wa'ura d̄eni wakatuna sara'ana ake d̄imandad̄i.

¹¹ Dou ma dab̄ae, co'opu karawina madab̄ae ncau; dou ma najis, co'opu kanajisna weki ndaina; dou ma b̄atu rakane'e b̄a Ruma Hatalla, co'opu b̄atu ncauna rakane'e b̄a Ruma Hatalla, ro dou ma mori d̄i ru'u b̄a Ruma Hatalla mpoa, co'opu mori ncauna d̄i ru'u b̄a Ruma Hatalla mpoampa.”

¹² ”Kade'e kab̄aepu ake!” nggahi Ruma Isa, ”Watid̄u ntoi walina Nahu d̄imamai kai wa'aku ufa d̄i colakaiku d̄i sanikina dou b̄une au rakarawina.

¹³ Nahuku ma sarambakaina ro ma cumpukaina; Nahuku Ruma ra'aipu saramba wa'una sampe sacumpukaina.”

¹⁴ Taho ra ntika dou ma dub̄a jumbana sampe rasona ndad̄ina siad̄oho mantau hak ngaha wua rad̄i fu'u mori ra woko ro lu'u d̄i ade kota ede kai ncai tad̄a lawana.

¹⁵Pala dou-dou ma karawi lampa rawi ma dab̄ae poda, ma kani ilimu-ilimu seta, dou-dou ma karawi lampa rawi ma dab̄ae, ma hade dou, ma nemba berhala-berhala ro dou-dou ma ca'u cowa, nataho kai nuntu ra nggahina ro ruku ra rawina, samenana dou ede hid̄ina ari mai b̄a kota ede.

¹⁶ ”Nahu Ruma Isa, wa'ura nggaduku mala'eka-Ku d̄i ru'u nggomid̄oho loakud̄u Sia ngoana lampa rawi ake d̄i ru'u pentikai ela-ela Ruma. Nahu ake londo ra mai la Daud; Nahuku b̄ombo b̄ala ma taroa ede.”

¹⁷ Roh Allah ro B̄unti Siwe manggahi, ”Maira!” Sanikina dou ma ringana ake pab̄ua rauku nggahina, ”Maira!” Cou ma mango wo'o, pab̄uaku sia maina! Ro cou ma ne'e, pab̄uaku sia weha mpoana oi ma mbei mori ra woko ede.

¹⁸ D̄i sanikina dou ma ringa ra kade'ena nggahi ra eli Ruma d̄i ade buku ake nahu, la Yahya, mangoa ra kawara ake nggara nasala'isi b̄a dou d̄i ade nggahi ra eli rakarongga b̄a Ruma Hatalla ake, ndad̄i Ruma Hatalla d̄imasala'ina hukumana dou ede kai bala-bala ratunti d̄i ade buku ake.

¹⁹Ro nakakurasi b̄a dou d̄i ade nggahi ra eli rakarongga b̄a Ruma Hatalla ake, ndad̄i Ruma Hatalla d̄imakakura rauna d̄i ru'una ratunti d̄i ade buku ake — eded̄u ru'u d̄i fu'u mori ra woko ro rad̄i kota maraso ede.

²⁰Sia ma karongga sara'a haba ake manggahi, ”Poda, Nahu d̄i mamai roci!” Amin! Maira, io Ruma Isa!

²¹Raho-raho to'impa Ruma Isa mbeina bareka-Na d̄i ru'u sara'a ela Ruma Hatalla!