Read Bima WAHYU 3 Bible Online

WAHYU 3 - Bima bible

WAHYU 3

¹”D̄i ru'u b̄a mala'eka ela Ruma d̄i Sardis, tunti ndakepu: Akeku rangoa wi'i b̄a Sia ma ntau pidu mbua roh rad̄i Ruma Hatalla ro pidu mbua ntara ede. Nahu kab̄ade au rakarawi b̄a nggomid̄oho. Nggahi dou nggomid̄oho mori, sapodakaina nggomid̄oho made!

²B̄ara ndedena, tu'ura, ro katenggopu au ma mbuipu wara d̄i nggomid̄oho sawatipu ede made sara'ana. B̄ara Nahu rakaku eda b̄a one au rakarawi b̄a nggomid̄oho, wati wara kone sab̄ua rau ma mpuruna d̄i tando Ruma Hatalla.

³ Ndad̄i, kawara mbalipu au rangoa ra tei d̄i nggomid̄oho ntoina ro au raringa b̄a nggomid̄oho. Karawipu ede ro tobara rad̄i dosa-dosamu. Nggomid̄oho nggara watisi tu'umu, Nahu d̄imamai d̄i nggomid̄oho b̄une dou mampanga; ro nggomid̄oho wati d̄imab̄ade b̄une aiku wakatuna mai kai Nahu.

⁴Pala d̄i woha-woha nggomid̄oho d̄i Sardis mbuipu warana dou ma sandaka loakud̄u kani ra lombona ngge'empa rasona. Siad̄oho ede d̄imalampa sama-sama lab̄o Nahu kai kani ra lombo malanta, b̄ara siad̄oho ncihi ncao d̄i ru'u b̄a ede.

⁵ D̄i ru'u b̄a siad̄oho ma ngolu d̄i kakani kai jumba lanta. Ngara siad̄oho wati d̄ihade b̄a Nahu rad̄i ade Buku Dou Mamori. Ro d̄i tando Ama-Ku ro mala'eka-mala'eka-Na Nahu d̄imamangakuna b̄a one siad̄oho ntau Nahu.

⁶Cou-cou maloa ringa, pab̄uaku kade'e kab̄aena au ranggahi b̄a Roh Allah d̄i ela-ela Ruma!”

⁷ ”D̄i ru'u b̄a mala'eka ela Ruma d̄i Filadelfia, tunti ndakepu: Akeku rangoa wi'i b̄a Sia ma raso ro masapodakaina. Siaku manentina kunci rantau la Daud; nahenggasi b̄a Sia, wati kone sab̄ua dou rau maloana kab̄u, ro nakab̄usi b̄a Sia, wati kone sab̄ua dou maloana hengga.

⁸Nahu kab̄ade au rakarawi b̄a nggomid̄oho. Nahu kab̄ade b̄a one nggomid̄oho wati sab̄une tenggomu; nggomid̄oho wa'ura b̄atumu ngoa ra tei b̄a Nahu ro to'amu d̄i Nahu. D̄i ru'u b̄a nggomid̄oho wa'ura hengga b̄a Nahu sab̄ua tad̄a, ma wati loa d̄ikab̄u b̄a cou-cou rau.

⁹ Kawarapu ake: Dou-dou ma ndad̄i ela Ibilis ede, dou-dou manuntu ra nggahi cowa ma kanahu wekina dou Yahudi sapodakaina laina, Nahu d̄imandawi ndad̄ina siad̄oho mai sujuna d̄i tando nggomid̄oho. Ro siad̄oho d̄imab̄ade b̄a one Nahu mameci ra ca'umu.

¹⁰B̄ara nggomid̄oho wa'ura b̄atumu parenta Nahu loakud̄u to'akaimu, Nahu rau d̄imasandakamu d̄i jamana susa d̄i iu b̄a sara'a dunia. Lampa rawi ede d̄imandad̄i d̄i cobakaina sara'ana dou d̄i dunia.

¹¹Nahu d̄imamai roci! Jaga katahopu au rakantau b̄a nggomid̄oho, loakud̄u wati kone sab̄ua dou rau maweha rampana hadia rangolukaimu.

¹² Dou ma ngolu, d̄i kandad̄i b̄a Nahu kai tandi'i d̄i ade Uma Maraso Ruma Hatalla-Ku, ro sia d̄imangge'e d̄i hid̄i ede santoi-ntoina. Ngara Ruma Hatalla-Ku, ro ngara kota Ruma Hatalla-Ku — eded̄u Yerusalem b̄ou d̄imalondo rad̄i saroga, rad̄i Ruma Hatalla-Ku — d̄i tunti b̄a Nahu d̄i sarumbu dou ede. Ngara Nahu rau ma b̄ou d̄i tunti b̄a Nahu d̄i sia.

¹³Cou-cou maloa ringa, pab̄uaku kade'e kab̄aena au ranggahi b̄a Roh Allah d̄i ela-ela Ruma!”

¹⁴ ”D̄i ru'u b̄a mala'eka ela Ruma d̄i Laodikia, tunti ndakepu: Akeku rangoa wi'i rad̄i Sang Amin, Sakasi ma to'a ro mapoda, fu'una b̄a sara'ana au-au rakandad̄i b̄a Ruma Hatalla.

¹⁵Nahu kab̄ade au rakarawi b̄a nggomid̄oho; Nahu kab̄ade nggomid̄oho wati b̄usimu ro wati pana raumu. Natahopu nggomid̄oho b̄usi mpoa atao pana mpoa!

¹⁶Pala nggomid̄oho rana-ranampa; pana wati, b̄usi rau wati. B̄ara ndedena nggomid̄oho d̄ilohi kalosa b̄a Nahu rad̄i ade asa-Ku.

¹⁷Nggomid̄oho manggahi, ’Nami ntau ra wara ro ncihi mena-mena, nami wati wara madancihimu.’ Pala nggomid̄oho wati b̄ademu nawancuku ncoki mori ro na'ipiku susa mori ra wokomu! Nggomid̄oho ncoki mori, maronda, ro mbuda.

¹⁸B̄ara ndedena Nahu mangoa ra tei kataho nggomid̄oho loakud̄u welimu d̄i Nahu masa, eded̄u masa ngganga, loakud̄u nggomid̄oho ndad̄i ntau ra wara. Weli raupu kani ra lombo malanta rad̄i Nahu loakud̄u nggomid̄oho ntaumu kani ra lombo ro mab̄onto mori ra woko nggomid̄oho ma ronda ro d̄i majakai. Ro weli raupu lo'i d̄i kandaikai d̄i madamu loakud̄u nggomid̄oho loamu eda.

¹⁹ Dou-dou rameci b̄a Nahu, siad̄ohoku d̄i rojo b̄a Nahu rawina ro d̄i cambo b̄a Nahu. B̄ara ndedena pab̄uapu nggomid̄oho kapodapu ademu, ro tobara rad̄i dosa-dosamu.

²⁰Tiopu! Nahu makid̄i d̄i tando tad̄a ro tokeku. Nawarasi dou ma ringana eli Nahu, ro henggana tad̄a, Nahu d̄imalu'u eda angi lab̄o sia; Nahu d̄imangaha sama-sama lab̄o sia, ro sia d̄imangaha sama-sama lab̄o Nahu.

²¹Siad̄oho ma ngolu, d̄i kau b̄a Nahu doho d̄i hid̄i dohokai Nahu sama-sama lab̄o Nahu, sama b̄une ndai Nahu rau mawa'ura ngolu ro ake madoho sama lab̄o Ama-Ku d̄i hid̄i dohokai-Na.

²²Cou-cou maloa ringa, pab̄uaku kade'ena au ranggahi b̄a Roh Allah d̄i ela-ela Ruma!”