Read Bima WAHYU 4 Bible Online

WAHYU 4 - Bima bible

WAHYU 4

¹Sawa'u b̄a ede nahu rakaku eda wali. Nahu edaku sab̄ua tad̄a mahengga weki d̄i saroga. Edempara ringa waliku eli ma saramba wa'una wa'ura nuntu ra nggahi d̄i nahu b̄une eli tarompe. Eli ede nggahina, ”Mai ne'epu ta ake. Nahu d̄imateina d̄i nggomi au d̄imandad̄i peade.”

² Nahu kuasakai lalo b̄a Roh Allah. Edempara eda b̄a nahu d̄i saroga wara sab̄ua hid̄i dohokai sangaji, ro wara sab̄ua dou madoho d̄i hid̄i dohokai ede.

³Pahu dou ede nakancilo b̄une wadu mata baiduri fanda ro wadu mata delima. Sab̄ua afi ala mawarana sajao-jao maheko hid̄i dohokai ede.

⁴D̄i ade hekona hid̄i doho kai sangaji ede wara d̄ua mpuru upa hid̄i dohokai sangaji ma kalai. Ta ede doho d̄ua mpuru upa dou mana'ekaina ma kani ra lombo malanta, ro makani songko masa sangaji.

⁵ Rad̄i hid̄i dohokai sangaji ede losa kalea kakila ro losa eli karece ai ma karuku sara'a dana. Ro d̄i tando hid̄i dohokai sangaji ede wara pidu mbua obo ma kalea; edeku pidu mbua Roh Allah.

⁶ Wara rau d̄i tando dohokai sangaji ede wara d̄i edamu b̄une kaca mana'e poda ma lembo b̄une moti, b̄urana b̄une kaca noa. D̄i heko b̄a dohokai sangaji, d̄i saniki welana, wara upa mbua mahluk, ma tawela tando ro tawela kontuna b̄ini b̄a isi mada.

⁷Mahluk ma sarambana d̄i edamu b̄une singa. Ma kad̄uakaina b̄une capi rangga. Ma katolukaina nantau pahu b̄une pahu manusia. Ma ka'upakaina d̄i edamu b̄une nasi b̄angga mbaru ma wunga ngemo.

⁸ Upa mbua mahluk ede, cua-cua nantau ini mbua kalete, ro ma hekona ro d̄i sab̄ae d̄eina b̄inikai b̄a isi mada. Aimarai aimangad̄i mahluk ede wati dengga-denggana rawa, ”Raso, raso, rasora Ruma, Ruma Hatalla Mawancu Kuasa, ma wara, ma wa'ura wara, ro ma wara santoi-ntoina.”

⁹Upa mbua mahluk ede rawana rawa ma roi ra wadi, horoma ro syuku d̄i Sia ma doho d̄i hid̄i dohokai sangaji ede, eded̄u Sia ma mori ru'u santoi-ntoina. Ro d̄i wakatu mahluk-mahluk ede rawana,

¹⁰d̄ua mpuru upa mana'ekaina ede suncuna d̄i tando dou ma doho d̄i hid̄i dohokai sangaji ede, edempara nembana Sia ma mori santoi-ntoina. Edempara siad̄oho tob̄ana songko-songko siad̄oho d̄i tando dohokai sangaji ede ro nggahina,

¹¹”Io Ruma, io Ruma Hatalla madad̄oho! Ita mpoampa ma patu tarima roi ra wadi, horoma ro kuasa. B̄ara Itaku makandad̄ina sara'a au-au, ro kai rakane'e rau b̄a Ita sara'a au-au ramawara ede wa'ura ndad̄ina ro mori.”