Read Bima WAHYU 5 Bible Online

WAHYU 5 - Bima bible

WAHYU 5

¹ Edempara eda b̄a nahu sab̄ua buku raluru d̄i rima Sia ma doho d̄i hid̄i dohokai sangaji ede. Buku ede b̄inikai b̄a ratunti d̄i b̄ali b̄aena ro rakunci kai pidu mbua bece.

²Edempara eda b̄a nahu sab̄ua mala'eka ma na'e ro kante'e manggahi kai eli ma na'e, ”Couku mapatu d̄imakambi'a bece-bece ake ro d̄imahenggana buku ake?”

³Pala nataho d̄i saroga, ro d̄i dunia, atao kone awa mai b̄a dana rau wati wara sab̄ua dou rau ma sanggona hengga buku ede, ro ma'eda ta d̄eina.

⁴Edempara nangi sased̄iku b̄ara wati wara kone sab̄ua dou rau ma patu hengga buku ede, ro maloana eda ta d̄eina.

⁵ Edempara sab̄ua dou d̄i ade weki mana'ekaina ede manggahi d̄i nahu, ”Aina nangi! Tiopu! Singa rad̄i suku bangsa Yehuda, londo ra mai la Daud ma na'e, wa'ura ngolu. Sia nasanggo b̄i'a pidu mbua bece ro mahengga buku ede.”

⁶ Edempara nahu edaku sab̄ua Ana Jimba makid̄i d̄i woha dohokai sangaji ede, raheko b̄a upa mbua mahluk ede ro sara'a mana'ekaina ede. Ana Jimba ede d̄i edamu b̄une rawa'u sambele. Sia nantau pidu mbua wanga ro pidu mbua mada: eded̄u pidu roh rad̄i Ruma Hatalla rawa'u nggadu aka sara'a dunia.

⁷Edempara Ana Jimba ede maju ro wehana buku raluru ede rad̄i rima wana dou ma doho d̄i wawo hid̄i dohokai sangaji.

⁸ Wunga mbuipu Ana Jimba ede karawi ndedena ede, mab̄u suncu lalompa upa mbua mahluk lab̄o mad̄ua mpuru upa mana'ekai d̄i tandona. Siad̄oho cua-cua nentina kecapi na'e ro mangko masa ma wara isina kamaya, eded̄u do'a-do'a ela Ruma Hatalla.

⁹ Siad̄oho rawana sab̄ua rawa ma b̄ou: ”Ita patu mawehana buku ede ro mab̄i'ana bece-becena. B̄ara Ita wa'ura hade, ro kai made Ita, manusia rad̄i sara'a suku, bahasa, negara ro bangsa wa'ura welimu d̄i ru'u b̄a Ruma Hatalla.

¹⁰ Ita wa'ura kandad̄imu siad̄oho sab̄ua karaja'an lab̄o mandad̄i imam-imam d̄i ru'u b̄a Ruma Hatalla, ro maparenta ese wawo dunia.”

¹¹ Edempara eda b̄a nahu wali. Nahu ringaku eli mala'eka ma riwu-riwu ro ma juta-juta mbotona. Siad̄oho kid̄i hekona hid̄i dohokai sangaji ro upa mbua mahluk ede ro ma na'ekaina ede.

¹²Ro siad̄oho rawana kai eli ma tenggo, ”Ana Jimba rawa'u sambele ede, patu d̄imatarima kuasa, ntau ra wara, timba ra lemba ro tenggo ra wale; Sia patu d̄i lia ra horoma, d̄i kad̄ese ra kantasa, ro d̄i roi ra wadi!”

¹³Edempara ringa b̄a nahu sara'a mahluk d̄i langi, d̄i dana, ta awa mai b̄a dana ro d̄i ade moti — porona sara'a mahluk mawara d̄i dunia ake — marawa, ”Sia ma doho ese dohokai sangaji, ro Sang Ana Jimba ede, eded̄u roi ra wadi ro lia ra horoma ro d̄ese ra ntasa ro kuasa sampe santoi-ntoina!”

¹⁴Edempara upa mbua mahluk ede macambe, ”Amin!” Ro mana'ekai-mana'ekaina ede rau sujuna ro nembana.