Read Bima WAHYU 6 Bible Online

WAHYU 6 - Bima bible

WAHYU 6

¹Sawa'u b̄a ede eda b̄a nahu Ana Jimba ede b̄i'ana bece masarambana rad̄i kapidu mbua bece ede. Edempara ringa b̄a nahu sab̄ua rad̄i ka'upa mbua mahluk ede manggahi, ”Maira!” Elina b̄une eli karece ai.

² Ndad̄i eda b̄a nahu, edempara wara d̄i edamu sab̄ua jara b̄ura. Dou manentena nanentiku sab̄ua ana fana, ro d̄i sia rambei sab̄ua songko sangaji. Sia majuna kai dou mangolu ma lao weha rampa ngoluna.

³Edempara Ana Jimba ede b̄i'ana bece ma kad̄uakaina, ro ringa b̄a nahu mahluk ma kad̄uakaina manggahi, ”Maira!”

⁴ Edempara losa sab̄ua jara makalai walina. Jara ede warana kala. Dou manentena rambei kuasa d̄imakamborana ka'ada'ana dame d̄i dunia, loakud̄u manusia cua-cua hade angi. Edempara sia rambei sab̄ua peda ma na'e.

⁵ Edempara Ana Jimba ede b̄i'ana, bece ma katolukaina. Ro ringa b̄a nahu mahluk ma katolukaina manggahi, ”Maira!” Nahu edaku, ndad̄i tada sab̄ua jara me'e. Dou manentena manenti d̄ua mbua daci d̄i rimana.

⁶Ro ringa b̄a nahu wara ma eli d̄i ringamu b̄une eli ma nggahi d̄i woha upa mbua mahluk ede. Eli ede manggahi, ”Salite gando ma taho co'ina b̄une mboto ufakai dou sanai, ro tolu lite gando makalai pahu co'ina b̄une mboto ufakai dou sana rau. Pala aina ka'ihamu fu'u-fu'u zaitun ro nggaro anggo!”

⁷Edempara Ana Jimba ede b̄i'ana bece ma ka'upakaina. Ro ringa b̄a nahu mahluk ma ka'upakaina manggahi, ”Mai!”

⁸ Eda b̄a nahu, edempara tada sab̄ua jara mbera. Dou manentena mangara Madekai. Ta ari kontuna, sia lampa b̄atu d̄eni-d̄eni poda b̄a Dunia Madekai. Siad̄oho d̄i mbei kuasa rad̄i cengga upa dunia ake rad̄onggo d̄i siad̄oho, loakud̄u siad̄oho laokaina hade kai ncai lewa ra laka, kai ncai sarahid̄o, kai mboto pahu supukai ro kai binata-binata manggange.

⁹Sawa'u b̄a ede Ana Jimba ede b̄i'ana bece ma kalimakaina. Edempara eda b̄a nahu ta awa mai b̄a mezeba wara nawa dou-dou ma made rahade b̄a dou b̄ara siad̄oho makatenggona ragoa b̄a Ruma Hatalla kai ncai nuntu ra nggahi siad̄oho.

¹⁰Siad̄oho kanggica kana'e podana, ”Io Ruma Mawancu kuasa, ma raso ro mapoda! Sab̄une waliku ntoina Ita ampomu b̄ab̄u kai hukuma dou-dou mawara d̄i dunia ro mahukumna siad̄oho b̄ara wa'ura hadena madad̄oho?”

¹¹Siad̄oho cua-cua rambei sando'o jumba lanta. Edempara siad̄oho rakau sanawa samporo wali, sampe wa'ura raka sara'a weki lenga karawi lab̄ona ro cina ra angi siad̄oho ma d̄i hade b̄une siad̄oho.

¹² Edempara eda b̄a nahu Ana Jimba ede b̄i'ana bece ma ka'inikaina. Ndad̄ira epu ma heba poda. Liro ndad̄i me'e b̄une kaen me'e ma kasa, ro wura ndad̄i kala b̄une ra'a.

¹³ Ntara-ntara mamab̄u mbari mbura rad̄i langi mab̄u d̄i dunia b̄une wua ara ma watipu ntasana horo rad̄i fu'una wakatu karuku b̄a angi na'e.

¹⁴ Langi mborana b̄une lub̄a raluru, ro sara'a doro ro pulau rakiri peso rad̄i hid̄ina.

¹⁵ Edempara sangaji-sangaji dunia, dou-dou mana'ekaina, dou-dou mana'ekai tentara ro palisi, dou-dou mantau ra wara ro dou-dou mana'e kuasa, ro dou-dou makalaina, nataho ada ro dou rahori kalosa, sara'ana naciliku wekina d̄i ade karombo-karombo doro ro d̄i hela wadu-wadu doro.

¹⁶ Siad̄oho nggahina d̄i doro-doro ro d̄i wadu-wadu ede, siad̄oho kanggicana, ”Ndumba pitapu nami! Cili weapu nami rad̄i ntanda Sia ma doho ese hid̄i dohokai sangaji, ro d̄i ade mbanikai Ana Jimba ede!

¹⁷ Ainaina maheba wa'ura mai, ake siad̄oho b̄ohona mbanina, ro wati kone sab̄ua dou rau mawa'una taha d̄i tando siad̄oho!”