Read Bima WAHYU 7 Bible Online

WAHYU 7 - Bima bible

WAHYU 7

¹ Sawa'u b̄a ede, nahu edaku upa mala'eka makid̄i d̄i upa mbua wela dunia. Siad̄oho tahana upa mbua angi d̄i dunia loakud̄u aina wara angi d̄i dunia atao d̄i moti, atao d̄i fu'u-fu'u haju.

²Edempara eda b̄a nahu sab̄ua mala'eka ma kalaina mawontu tawela elena. Sia wa'ana bece rad̄i Ruma Hatalla ma mori. Kai eli ma na'e mala'eka ede ouna upa dou mala'eka ma wa'ura raka kuasa rad̄i Ruma Hatalla d̄imakalelina dana ro moti.

³ Nggahi mala'eka ede, ”Aina kaleli wa'u dana atao moti, atao fu'u-fu'u haju nggara watipusi mbei b̄a nami tanda bece d̄i ntantangga ada-ada Ruma Hatalla ndai.”

⁴Edempara nahu rangoana b̄a one wara 144.000 dou orena rambei tanda bece b̄a Ruma Hatalla d̄i ntantangga siad̄oho. Dou-dou ede raweha rad̄i ade sampuru d̄ua suku bangsa Israel;

⁵d̄i sanikina suku 12.000 dou. Eded̄u rad̄i suku: Yehuda, Ruben, Gad,

⁶Asyer, Naftali, Manasye,

⁷Simeon, Lewi, Isakhar,

⁸Zebulon, Yusuf, ro Benyamin.

⁹Sawa'u b̄a ede nahu eda waliku, edempara edaku manusia ma wancu mboto poda — wati wara kone sab̄ua dou rau ma loana reke orena. Siad̄oho eded̄u dou-dou rad̄i sanikina bangsa, suku, negara, ro bahasa. Kai kanina jumba ma lanta-lanta ro nentina sanga-sanga haju palem d̄i rimana, dou-dou mamboto ede kid̄ina d̄i tando dohokai sangaji ro satandona d̄i Ana Jimba ede.

¹⁰Edempara kai eli matenggo siad̄oho nggahina, ”Salamakai ndai ramaina ta Ruma Hatalla, Ruma ndaita, ma doho ese dohokai sangaji, ro rad̄i Ana Jimba ede!”

¹¹Sara'a mala'eka makid̄i heko hid̄i dohokai sangaji ro dou-dou mana'ekaina ro upa mbua mahluk ede. Mala'eka-mala'eka ede sujuna d̄i tando dohokai sangaji, edempara nembana Ruma Hatalla.

¹²Nggahi siad̄oho, ”Amin! D̄ese ra ntasa Ruma Hatalla ndai ma na'e ra ntoru ro ma loa timba ra lemba. Sia patu d̄imatarima mboto renta-renta syuku ro lia ra horoma. Sia makuasa ro matenggo ru'u santoi-ntoina! Amin.”

¹³Sab̄ua dou d̄i ade dou-dou mana'ekaina ede masod̄i d̄i nahu, ”Dou-dou ma kani jumba lanta ake, cou siad̄oho ro rad̄i b̄e maikaina siad̄oho?”

¹⁴ ”Mada wati b̄adeku Ruma. Ndai Ita ma b̄adena,” cambe b̄a nahu. Ndad̄i nggahi sia d̄i nahu, ”Akeku dou-dou ma wa'ura kai salama kai ncai wakatu kancoki ma heba. Siad̄oho wa'ura dub̄ana jumba siad̄oho ro ndawina ndad̄i lanta kai ra'a Ana Jimba ede.

¹⁵B̄ara ndedena siad̄oho kid̄ina d̄i tando dohokai Ruma Hatalla, ro sambeana d̄i Sia aimarai aimangad̄i d̄i ade Bait Allah. Ro Sia ma doho ese hid̄i dohokai sangaji ede d̄imawara lab̄o siad̄oho d̄imajaga ra sandakana siad̄oho.

¹⁶ Siad̄oho wati d̄ima'iu wali hid̄o atao mango wo'o; liro atao pana liro wati d̄imaka'a siad̄oho wali,

¹⁷ b̄ara Ana Jimba ma doho d̄i woha-woha hid̄i dohokai sangaji ede d̄ima'ompukaina siad̄oho. Sia d̄imad̄ende ra wa'ana siad̄oho d̄i hid̄i mada oi ma mbei mori ra woko. Ro Ruma Hatalla d̄ima'osa sara'ana oi mada rad̄i mada siad̄oho.”