Read Bima WAHYU 8 Bible Online

WAHYU 8 - Bima bible

WAHYU 8

¹Wakatu Ana Jimba ede b̄i'ana bece ma kapidukaina ede, saroga ndad̄i lingi kira-kira tolu mpuru meni ntoina.

²Edempara eda b̄a nahu pidu mala'eka ma kid̄i d̄i tando Ruma Hatalla, ro siad̄oho rambei pidu mbua tarompe.

³ Sab̄ua mala'eka makalaina, ma wa'a sab̄ua hid̄i d̄upa randawi kai masa, mai ro kid̄ina d̄i tando mezeba. D̄i sia rambei mboto poda kamaya d̄ipuri d̄i do'a-do'a sara'a ela Ruma Hatalla ro d̄id̄onggo ra mbei d̄i mezeba masa ma wara d̄i tando dohokai sangaji.

⁴Sama-sama lab̄o do'a-do'a dou-dou ela Ruma Hatalla, ob̄u d̄upa ma wunga kalea ede matambua teka rad̄i rima mala'eka ma kid̄i d̄i tando Ruma Hatalla ede.

⁵ Edempara mala'eka ede wehana hid̄i d̄upakai ede, ro isina kai afi rad̄i mezebana, edempara tob̄ana ese wawo dunia. Edempara karece ai ma'eli riu ro kakila ai tuwu-tuwu angina, ro ndad̄impara epu.

⁶Sawa'u b̄a ede, pidu mala'eka ma nenti pidu mbua tarompe ede nasadia-dia d̄ima'ufi.

⁷ Mala'eka ma saramba ufina tarompena, ndad̄i ura es ro afi campo lab̄o ra'a mab̄ua na'e poda ese wawo dunia. Cengga tolu dunia ngga'a mpoi; ndede rau cengga tolu rad̄i fu'u-fu'u haju, ro sanikina mpori ma moro.

⁸Edempara mala'eka makad̄uakaina ufina tarompena, ndad̄i wara ma tada ma ipi na'e b̄une doro ma kalea rab̄ale tau d̄i ade moti. Cengga tolu tolu moti rungka ndad̄i ra'a,

⁹ro made lalompa sara'a racengga tolu mahluk d̄i moti; ndede rau leli racengga tolu rad̄i kapa-kapa.

¹⁰ Edempara mala'eka makatolukaina ufina tarompena, ndad̄i sab̄ua ntara ma na'e, ma kalea-lea b̄une obo, mab̄u rad̄i langi, edempara mab̄u b̄ohana cengga tolu rad̄i sori-sori lab̄o mada-mada oi.

¹¹ (Ngara ntara ede ”Pa'i”.) Ndad̄i cengga tolu rad̄i oi ede ndad̄i pa'i, ro madempara dou mamboto b̄ara nonona oi ma wa'ura ndad̄i pa'i ede.

¹² Edempara mala'eka maka'upakaina ufina tarompena. Ndad̄i b̄oha b̄a b̄oe cengga tolu rad̄i liro, cengga tolu rad̄i wura ro cengga tolu rad̄i ntara-ntara ndad̄ina mbora cengga tolu rad̄i tenggo ra wale kalea mataroa siad̄oho. Cengga tolu rau rad̄i aimarai wati taroana ro ndede rau cengga tolu rad̄i aimangad̄i.

¹³Edempara eda b̄a nahu, ndad̄i ringa b̄a nahu sab̄ua nasi b̄angga mbaru ma wunga ngemo ese woha ai ma nggahi, ”Iha! Iha! Ihara sara'ana dou d̄i dunia naringasi tolu dou mala'eka makalaina na'ufisi tarompena peade!”