Read Bima WAHYU 9 Bible Online

WAHYU 9 - Bima bible

WAHYU 9

¹Edempara mala'eka makalimakaina ufina tarompena, ro eda b̄a nahu sab̄ua ntara rad̄i langi mamab̄u awa dana. Ntara ede rambei kunci dembi made.

² Edempara ntara ede henggana dembi madekai ede, edempara losa ob̄una b̄une ob̄u rad̄i riha ma na'e. Liro ro woha riru ndad̄i rindi b̄a ob̄u rad̄i dembi ede.

³ Edempara rad̄i ade ob̄u ede losa kamoa-kamoa ma londo awa dunia. Kamoa-kamoa ede rambei kuasa ma sama b̄une rambei d̄i meti.

⁴ Siad̄oho rakanta ka'iha mpori, atao fu'u-fu'u haju, atao ranggud̄a ra congge makalaina. Siad̄oho cuma loana dei dou-dou ma d̄i ntantanggana mawati wara tanda bece rad̄i Ruma Hatalla.

⁵Kamoa-kamoa ede wati rakau hade dou-dou ede, malaisi kancoki mpoampa siad̄oho lima wura ntoina. Duha d̄i iumu b̄ara kancoki b̄a kamoa-kamoa ede sama b̄une duha rapa'e b̄a meti.

⁶ Santoi lima wura ede, dou-dou ede na'usahaku loakud̄u made, pala siad̄oho wati loana made; siad̄oho nane'e madeku, pala made ede nad̄o'oku lab̄o siad̄oho.

⁷ Pahu kamoa-kamoa ede b̄une jara ma sadia d̄imalewa. D̄i tuta siad̄oho wara d̄i edamu b̄une songko sangaji randawi kai masa. Pahu siad̄oho b̄une pahu manusia.

⁸ Honggo siad̄oho b̄une honggo dou siwe, ro woi siad̄oho b̄une woi singa,

⁹ Lawili siad̄oho rab̄onto kai ma pahuna sarai b̄aju b̄esi. Eli kaletena b̄une eli mboto kareta jara ma wunga lao dei ade lewa ra laka.

¹⁰Siad̄oho nantau keto ro pa'ekaina b̄une meti. Ro d̄i ade keto siad̄oho edeku wara tenggo ra wale d̄i kancokikaina manusia lima wura ntoina.

¹¹Siad̄oho nantau sangaji ma parentana siad̄oho, ro sangaji ede eded̄u mala'eka mantau su'u ratunduna d̄i dembi made. Ngarana d̄i ade bahasa Ibrani eded̄u Abadon; ro d̄i ade bahasa Yunani Apolion (aona ”Maka'ihana”).

¹²Bala ma saramba wa'ura kalalo. Sawa'u b̄a ede wara d̄ua mbua bala wali ma pab̄ua mai.

¹³ Edempara mala'eka ma ka'inikaina ufina tarompena. Ndad̄i ringa b̄a nahu eli ma mai rad̄i upa mbua pado mezeba masa ma wara d̄i tando Ruma Hatalla.

¹⁴Nggahi eli ede d̄i mala'eka maka'inikaina ede, ”Horipu mala'eka upana rad̄iki d̄i Sori Efrat ede!”

¹⁵Mala'eka upana ede rahori rau. Siad̄oho wa'ura sadia kalai d̄i ru'u jam, ainaina, wura, ro mba'ana ede d̄imahade cengga tolu rad̄i samenana ela manusia.

¹⁶Nahu rangoa b̄a one mboto tentara-tentara manente jara ede mbotona d̄ua ratu juta.

¹⁷Ro d̄i ade ra'edaku ede, nahu edaku jara-jara ede ro dou-dou manentena. Dou-dou manentena kanina b̄aju b̄esi ma warana kala balea, owa b̄une wadu nilam, ro monca b̄une pure. Tuta jara-jara ede b̄une tuta singa, ro rad̄i asana losa afi, ob̄u ro pure.

¹⁸Cengga tolu rad̄i ela manusia made b̄ara hade b̄a tolu bala ede; eded̄u afi, ob̄u ro pure ma ralosa d̄i asa jara-jara ede.

¹⁹Tenggo ra wale jara-jara ede wara d̄i asana ro d̄i keto rauna. Keto-ketona b̄une sawa mantau tuta. Kai ketona ede, jara-jara ede kancokina manusia.

²⁰ Pala sewi rad̄i ela manusia ma wati rahade b̄a bala ede, wati tu'u wi'i rauna ruku ra rawi rima ndai siad̄oho. Siad̄oho wati dengga-denggana nemba roh seta ro berhala-berhala masa, salaka, romba, wadu ro haju ma wati loa eda atao ringa, atao lampa rau.

²¹Siad̄oho wati tu'u wi'i rauna ruku ra rawi siad̄oho ma dab̄ae, eded̄u hadena dou, ilimu-ilimu sihi, rawi madab̄ae ro mpanga.