Read Binukid Marcos 16 Bible Online

Marcos 16 - Binukid bible

Marcos 16

¹Su maiwas en sa Aldaw hu Paghimlay daw suminibwal en sa aldaw duun hu Dominggo, si Maria Magdalena, si Salome, daw si Maria sa inay hi Santiago duminuun ku piglebengan ki Jesus sa tag-uuwit hu pahumut ha pinalit dan ta ighaplas dan haena hu lawa hi Jesus.

³Su tagdiyà en sidan migpainsaay sidan ha tagyanaen “Sin-u sa umawà taena ha in-ipel ha batu duun ku lebeng?” Ba su makauma sidan duun ku lebeng naahà dan ha naawà en su adagi ha batu.

⁵Su sumeled sidan duun naahà dan sa maama ha tagpinuu diyà dapit ta kawanan ha sa pinaksuy din tungkay maputì aman nangahaldek gayed sidan.

⁶Ba inikagiyan sidan taena ha “Harì kaw agkangahaldek. Tagpan-ahaen nuy si Jesus ha taga-Nazaret sa inlansang duun hu krus ba hurà en dini ta nabanhaw en. Ahaa nuy haini sa naugsakan din.

⁷Aman agpasa nuy elegi sa mga tinun-an din labi en si Pedro daw ikagiyi sidan ha si Jesus ag-una kandan diyà ta Galilea. Maahà nuy haena diyà sumalà hu inikagi din inyu.”

⁸Su mga bahi pighugdunan hu kahaldek daw nangabeleng aman guminuwà sidan duun ku lebeng daw pulalaguy. Harì sidan agpakaikagi diyà ta dalan ta agkangahaldek sidan. Sa Pagpaahà Hi Jesus Diyà Ki Maria Magdalena

⁹Su mabanhaw en si Jesus hu kaaldawen hu Dominggo iyan una ha pigpaahaan din diyà si Maria Magdalena su naulian din ha inulinan su anay hu pitu ha busaw.

¹⁰Dayun inelegan hi Maria sa mga duma din ha nakigduma-duma daan ki Jesus daw tultuli sidan sa tag-agalaay hu paglugul.

¹¹Su mapaliman dan ha nabanhaw en si Jesus daw naahà haena hi Maria hurà sidan tuu. Sa Pagpaahà Hi Jesus Duun Hu Daruwa Ha Etaw

¹²Su maiwas haena migpaahà dà si Jesus duun hu daruwa ha taghipanaw payanaen duun hu sabuwa ha banuwa ba hurà dan kakilala si Jesus.

¹³Su makilala dan en haena tinultulan dan sa mga duma dan ba hurà daan sidan tuu. Sa Pagpaahà Hi Jesus Duun Hu Mga Tinun-an Din

¹⁴Migpaahà si Jesus duun ku sampulù daw sabuwa ha tinun-an su tagkaen sidan. Sinaway din sidan ta harì sidan agtuu daw madesen gayed sa henà-henà dan ta hurà dan tuuwi sa nakaahà kandin ha nabanhaw.

¹⁵Inikagiyan din sidan hu “Hipanaw kaw dini ta tibuuk ha kalibutan daw isangyaw nuy sa Maayad ha Tultulanen duun hu alan ha kaet-etawan.

¹⁶Bisan sin-u sa tumuu daw magpabautismu maluwas, ba sa harì tumuu agsilutan gayed.

¹⁷Saena ha agtuu magaheman ta daw makabuhat sidan hu mga belenganen. Pinaagi hu ngaran ku makabugaw sidan hu mga busaw daw makaikagi daan sidan hu harì agkasabut ha inikagiyan.

¹⁸Ku makaibit sidan hu bunsalagan daw ku makainum sidan hu hilu harì sidan mainu, daw ku dampaen dan sa agkangadaluwan mangaulian daan.” Sa Pagligtu Hi Jesus Diyà Ta Langit

¹⁹Su maiwas haena ikagiya hi Jesus luminigtu diyà ta langit daw pinuu duun hu kawanan hu Dios.

²⁰Dayun namanhipanaw sa mga tinun-an din daw nanunultul duun hu bisan hindu. Sa Dios migbulig kandan daw pinaagi hu mga belenganen nakapaahà dan ha laus gayed sa lalang ha intultul dan.