Read Binukid Lucas 1 Bible Online

Lucas 1 - Binukid bible

Lucas 1

¹Minahal ha Teofilo, madakel en sa migsulat hu naul-ulahan su anay dini ta kanuy daw sa insulat dan iyan sa inikagi kandan hu mga etaw ha nakaahà taena ha iyan daan migsangyaw duun hu kaet-etawan. Tumenged ta sinusi ku gayed sa alan sugud su anay nahenhenaan ku ha maayad ku ipanday ku isulat haini

³(null)

⁴ta daw matun-an nu gayed sa kamatuuran ha intudlù inyu. Sa Pagsangyaw Hu Kabataa Ki Juan Ha Bautista

⁵Duun taena ha panahun ha si Herodes iyan harì diyà ta Judea amin sinaligan hu paghalad ha tagngaranan ki Zacarias saena kaliwat hi Abias sa sinaligan daan hu paghalad. Sa asawa hi Zacarias iyan si Elisabet ha kaliwat daan hi Aaron.

⁶Si Zacarias daw si Elisabet inisip hu Dios ha matareng daw tinuman dan gayed sa alan ha Kasuguan hu Dios.

⁷Ba hurà dan gayed batà ta si Elisabet harì agpamatà daw mga laas en daan sidan.

⁸Kandan en ha panahun ki Zacarias daw hu mga duma din ha sinaligan hu paghalad sa pag-alagad hu Dios duun hu Timplo.

⁹Sumalà hu batasan hu mga sinaligan hu paghalad iyan dan naripahan si Zacarias ha sumeled duun ku Timplo hu pagsunug hu insenso.

¹⁰Su panahun hu pagsunug taena ha insenso madakel daan sa mga etaw diyà ta guwà ha tag-ampù.

¹¹Dayun amin balinsuguen hu Dios ha nakahiwal diyà ki Zacarias ha tuminiyadeg duun hu kawanan ku halaran ha kamulu daan tagkasunug sa insenso duun.

¹²Su maahà haena hi Zacarias nakignat gayed daw nahaldek.

¹³Ba inikagiyan ku balinsuguen hu Dios hu “Zacarias, harì ka agkahaldek ta sa pag-ampù nu napaliman hu Dios aman sa asawa nu ha si Elisabet magbatà hu maama daw sa ingaran nu asem taena iyan si Juan.

¹⁴Makapalipay haena ikaw daw malipay daan sa kaet-etawan ku ibatà asem haena

¹⁵ta bantugan gayed ha batà duun hu atubangan hu Dios. Harì haena uminum hu binu daw bisan inu ha inumen daw ulinan hu Balaan ha Ispiritu sugud hu kabataa taena.

¹⁶Pinaagi kandin madakel ha mga kaliwatan hi Israel sa lumikù duun hu Dios ha iyan Magbabayà dan.

¹⁷Iyan haena agkauna dì hu Ginuu daw sa gahem din iling ki Elias ha propita ta daw makag-uliay sa maayad ha pagdapità hu mga batà duun hu mga laas dan, daw sa mga etaw ha masinupaken makaghinulsul daan dayun makalikù duun hu maayad ha panghenà-henà. Iyan haena makapangandam hu kaet-etawan hu pagpakauma hu Ginuu.”

¹⁸Nakaikagi si Zacarias hu “Inu sa ipakatuu ku tayana ha magulang kay en man ki Asawa ku?”

¹⁹Tuminubag su balinsuguen hu Dios ha “Iyan a si Gabriel ha sinaligan hu Dios diyà ta langit. Sinugù a kandin dini ta daw matultulan ku ikaw taini ha maayad ha tultulanen.

²⁰Ba tumenged ta harì ka man agtuu hu inikagi ku ikaw sugud iman maemaw ka taman ha matuman en haena.”

²¹Agkangabeleng sa mga etaw ha tag-angat diyà ta guwà ku imbà agkalugay si Zacarias diyà ta seled.

²²Su gumuwà en si Zacarias harì en pakaikagi diyà ta kandan. Natun-an dan dayun ha amin din naahà diyà ta seled taena ha Timplo ta bà dà paman pakagsingyas kandan.

²³Su maiwas en sa kandan ha panahun hu pag-alagad uminulì dayun si Zacarias.

²⁴Hurà kalugay nabedes si Elisabet sa asawa din daw hurà magguwà-guwà diyà ta balay dan seled hu lalima ha bulan.

²⁵Nakahenà-henà si Elisabet hu “Binuligan a gayed hu Dios ta human ad en magbatà na harì ad en magayhà hu mga duma ku.” Sa Pagsangyaw Hu Kabataa Ki Jesus

²⁶Su haenem en ha bulan sa tigkabedes hi Elisabet sinugù hu Dios sa balinsuguen din ha si Gabriel diyà ta Nazaret ha sakup ta Galilea

²⁷ta pinaikagiyan duun sa sabuwa ha laga ha si Maria sa kinagunan en ki Jose ha kaliwat hi David.

²⁸Su makauma en sa balinsuguen diyà ki Maria inikagiyan din haena hu “Maria, napanalanginan ka gayed hu Dios. Sa Dios duma ikaw.”

²⁹Su mapaliman haena hi Maria tungkay gayed nasamuk daw pighenhenaay din ku inu sa kahulugan taena.

³⁰Ba inikagiyan ku balinsuguen hu “Maria, harì ka agkasamuk ta napanalanginan ka gayed hu Dios.

³¹Mabedes ka asem daw magbatà ka hu maama, daw sa ingaran nu duun iyan si Jesus.

³²Mabantug gayed daw ngaranan haena ha Batà hu Dios sa Magbabayà hu alan. Ipagharì hu Dios iling hu gin-apuan din ha si David

³³daw sa pagharì din duun hu mga kaliwatan hi Jacob hurà din gayed katapusan.”

³⁴Tuminubag si Maria hu “In-inuwen man hayana sa hurà a pa man makakilala hu maama?”

³⁵Ba inikagiyan hu balinsuguen hu “Mabedes ka pinaagi hu Balaan ha Ispiritu daw sa gahem hu Dios ha Magbabayà hu alan iyan mag-ulin ikaw. Iyan haini hinengdan ha sa batà nu asem ngaranan ha balaan ha Batà hu Dios.

³⁶Bisan sa idang nu ha si Elisabet ha laas en daw harì agpamatà ba haenem en iman ha bulan sa tigkabedes din.

³⁷Ta hurà gayed harì mahimu hu Dios.”

³⁸Nakaikagi si Maria ha “Suluguen a hu Dios aman sa inikagi nu matuman gayed.” Dayun uminawà su balinsuguen hu Dios diyà ta kandin. Sa Pagdiyà Hi Maria Ki Elisabet

³⁹Duun taena ha panahun uminagpas si Maria duminuun hu buntud ha sakup ta Judea.

⁴⁰Su makauma diyà ta balay hay Zacarias inumaw din si Elisabet.

⁴¹Su mapaliman hi Elisabet sa lageng hi Maria sagunà kuminayug-kayug sa batà diyà ta getek hi Elisabet. Inulinan si Elisabet hu Balaan ha Ispiritu

⁴²dayun minikagi ha “Hurà en gayed bahi ha mailing ikaw ta pigpanalanginan ka hu Dios daw mapanalanginan daan sa batà nu asem.

⁴³Pigpanalanginan a daan hu Dios ta sa inay hu Ginuu ku duminini gayed ta kanak.

⁴⁴Su mapaliman ku gan sa lageng nu sagunà kuminayug-kayug sa batà dini ta getek ku tumenged hu kalipay din.

⁴⁵Pigpanalanginan ka gayed ta tinuuwan nu ha matuman sa impadayag hu Dios diyan ta ikaw.” Sa Pagdayè Hi Maria

⁴⁶Minikagi si Maria ha tagyanaen“Dayeen ku gayed sa Dios

⁴⁷ha Manluluwas ku daw iyan tigkabayà-bayà ku

⁴⁸ta bisan pa ku tungkay ubus sa kahimtang ku iman ba hurà a kandin kalipati. Sugud iman makaikagi sa kaet-etawan ha iyan a bahi ha pigpanalanginan hu Dios

⁴⁹ta mga belenganen sa binuhat din kanak. Balaan gayed sa ngaran din.

⁵⁰Amin din kahid-u hu alan ha tagtahud kandin sugud dà hu nauna ha etaw bisan iman.

⁵¹Impadayag hu Dios sa pagkagamhanan din ta sinamuk din sa henà-henà hu galbuwen ha etaw.

⁵²Impaus-us din daan sa bantugan ha harì ba saena ha ubus sa kahimtang din impatangkaw din.

⁵³Sa tagkinahanglan inilahan din ba sa sapian hurà din en ilahi.

⁵⁴Binuligan din sa mga kaliwatan hi Israel ta nahenhenaan din sa insaad din duun hu mga kaliwatan hi Abraham ha agkahid-uwan din sidan hu hurà din katapusan. Inikagi din en haini duun hu mga gin-apuan taw.”

⁵⁵(null)

⁵⁶Si Maria migtimà diyà ki Elisabet duun hu tatulu ha bulan daw human ulì. Sa Kabataa Hi Juan Ha Bautista

⁵⁷Su magbatà en si Elisabet maama sa batà din.

⁵⁸Sa kahid-u hu Dios diyà ki Elisabet napaliman hu mga kadumahan daw mga silingan din aman nakalagkes sidan hu kalipay din.

⁵⁹Su mauma en sa ikawalu ha aldaw pigpasirkunsidahan dan su batà. Sa agkabayaan ngaay hu mga etaw ha ingaran taena ha batà iyan si Zacarias ta iyan haena ngaran hi Amay din,

⁶⁰ba si Elisabet hurà kabayà ta sa igngaran din duun iyan si Juan.

⁶¹Ba tinubag dan ha “Hurà nu man kadumahan ha iyan hayana ngaran din.”

⁶²Dayun migsingyas sidan diyà ki Zacarias ku inu sa kandin ha igngaran taena ha batà.

⁶³Aman migsingyas daan haena ha ilahan hu agsulatan din, dayun insulat din ha “Iyan ngaran taena si Juan.” Nangabeleng gayed sa alan ha mga etaw.

⁶⁴Sagunà dayun nakaikagi si Zacarias aman dinayè dan gayed sa Dios.

⁶⁵Nangabeleng gayed su mga silingan din daw saini ha tultulanen nakalekep duun hu kaet-etawan duun hu mga buntud ha sakup ta Judea.

⁶⁶Sa alan ha nakapaliman taena mighenhenaay ku inu sa mapayanan-an taena ha batà ta ginaheman gayed haena hu Dios. Sa Tagnà Hi Zacarias

⁶⁷Si Zacarias inulinan hu Balaan ha Ispiritu dayun minikagi ha tagyanaen

⁶⁸“Dayeen gayed sa Dios ha Magbabayà taw sikuy sa mga kaliwatan hi Israel ta duminini ta kanuy hu paglibri kanuy.

⁶⁹Agsuguen din dini ta kanuy sa Manluluwas ha kaliwat hi David sa suluguen din

⁷⁰ta iyan haena inikagi kanuy hu Dios pinaagi hu mga propita din.

⁷¹Agbuligan kuy kandin ta daw harì kuy madaeg hu mga kuntra taw.

⁷²Agkahid-uwan din sa mga gin-apuan taw daw harì haena agkalipat hu kasabutan dan.

⁷³Sa impanumpà hu Dios diyà ki Abraham ha gin-apuan taw iyan

⁷⁴sa sikuy sa mga kaliwatan din libriyen kuy kandin ta daw harì kuy madaeg hu mga kuntra taw daw harì kuy daan mahaldek hu pag-alagad kandin

⁷⁵tumenged ta mahimpit daw matareng kuy duun hu atubangan din iman ha bubuhay kuy pa.” Dayun inikagiyan hi Zacarias su batà din hu

⁷⁶“Ngaranan ka gayed asem ha propita hu Dios ha Magbabayà hu alan ta iyan ka igpauna dì hu Ginuu hu pagpangandam hu ag-agiyan din.

⁷⁷Ikagiyan nu sa kaet-etawan ha pinaagi hu pagpasaylu hu mga salà dan maluwas sidan

⁷⁸tumenged ta maluluy-en sa Dios. Saena makailaw hu henà-henà hu mga etaw ha duun tagtimà hu kasukileman hu kamatayen daw iyan daan haena panulù duun hu kalinaw.”

⁷⁹(null)

⁸⁰Uminadagi daw matatau gayed su batà hi Zacarias. Su makagulang en haena duun migtimà hu pinakabulung-bulung ha lugar hangtud ha mauma sa panahun ha matudluan din en sa mga duma din ha kaliwatan hi Israel.