Read Binukid Lucas 24 Bible Online

Lucas 24 - Binukid bible

Lucas 24

¹Su kaaldawen en hu Dominggo sa mga bahi ha tag-uwit hu pig-andam dan ha mga pahumut duminuun ku piglebengan ki Jesus.

²Su makauma sidan duun ku lebeng naahà dan ha naawà en su batu ha in-ipel duun.

³Ba su sumeled sidan hurà dan kaahà sa lawa hi Jesus

⁴aman nangalibeg sidan ku inu sa nahitabù. Dayun tigkan nakahiwal diyà ta kandan sa daruwa ha maama ha tagpinaksuy hu tagpangaluanlag.

⁵Saena ha mga bahi luminuhud ha nakadunghuy ta nangahaldek, ba inikagiyan sidan ku mga maama hu “Imbà nuy duun taini ha lebeng agpan-ahaa sa bubuhay ha etaw?

⁶Saena hurà en dini ta nabanhaw en. Henhenaa nuy haena sa inikagi din inyu su diyà kaw pa ta Galilea

⁷ha kinahanglan ha sa Suled hu Lucas 24:1-2 Kaet-etawan itugyan duun hu mga makasasalà ha etaw daw ilansang duun hu krus ba duun hu ikatulu ha aldaw mabanhaw dà.”

⁸Dayun nahenhenaan dan haena sa mga lalang hi Jesus.

⁹Su lumikù sidan tinultulan dan su sampulù daw sabuwa ha apostoles daw sa duma pa ha mga etaw.

¹⁰Saini ha mga bahi ha nanunultul duun hu mga apostoles iyan si Maria Magdalena daw si Juana, si Maria ha inay hi Santiago daw amin pa duma ha mga bahi.

¹¹Ba hurà tuu su mga apostoles ta bà su kenà laus ha tultul.

¹²Ba si Pedro minulalaguy dayun payanaen duun ku lebeng. Sinil-ip din su lebeng ba iyan din dà naahà su maputì ha manggad ha nakaugsak. Dayun minulì ha nabeleng gayed taena ha nahitabù. Sa Pagpaahà Hi Jesus Duun Hu Daruwa Ha Etaw

¹³Duun taena ha aldaw amin daruwa ha sumusunud hi Jesus ha napuun ta Jerusalem daw tagdiyà ta banuwa ta Emaus, sampulù daw tatulu ha kilomitro sa pig-elangan taini.

¹⁴Su taghipanaw sidan tagsubayen dan su nahitabù.

¹⁵Tigkan nakaduma kandan si Jesus

¹⁶ba hurà magpakilala kandan.

¹⁷Ininsaan sidan hi Jesus hu “Inu sa tagsubayen nuy?” Tuminaleen sidan sa tagmaleleng.

¹⁸Sa sabuwa kandan ha si Cleopas tuminubag hu “Sabubuwa ka dà gid ha nakadini ta Jerusalem ha hurà makatuen hu naul-ulahan iman dini.”

¹⁹Nanginginsà si Jesus hu “Inu man diay sa nahitabù?” Saena inikagiyan dan hu “Mahitenged ki Jesus ha taga-Nazaret sa sabuwa ha propita daw tinuuwan hu mga etaw tumenged hu belenganen ha binuhat din daw hu mga pagtudlù din ha amin duun gahem.

²⁰Ba intugyan hu mga labaw ha sinaligan hu paghalad daw hu duma ha mga punuan taw ta daw mahukuman hu kamatayen dayun inlansang duun hu krus.

²¹Taghinam kay en ngaay ha iyan en haena maglibri hu mga kaliwatan hi Israel ba iman ikatulu en ha aldaw hu kahitabù taena.

²²Nangabeleng kay daan ta amin day mga duma ha bahi ha duminuun ku lebeng din ganin ha kaaldawen

²³ba hurà dan kaahà sa lawa din. Aman luminikù sidan dini ta kanay daw tultuli kay kandan ha amin mga balinsuguen hu Dios ha nakahiwal diyà ta kandan daw mig-ikagi ha nabanhaw en si Jesus.

²⁴Amin day pa gayed mga duma ha duminuun ku lebeng daw naahà dan ha laus gayed sa inikagi ku mga bahi ta hurà dan kaahà sa lawa hi Jesus.”

²⁵Dayun inikagiyan sidan hi Jesus hu “Mga buang-buang kaw ha mga etaw, imbà kaw harì agtuu taena ha inikagi su anay hu mga propita?

²⁶Kenà ba kinahanglan ha su Mesiyas makaagi hu mga alantusen daw human magharì?”

²⁷Dayun insaysay hi Jesus diyà ta kandan sa mahitenged hu kaugalingen din ha nakasulat duun hu lalang hu Dios pinaagi ki Moises daw hu alan ha mga propita.

²⁸Su makauma sidan duun ku banuwa ha agpayanan-an dan agdayun ngaay si Jesus,

²⁹ba hinawidan dan haena hu kagi dan “Dini ka dà magtimà ta kanay ta agkadaleman en.” Aman diyà dà si Jesus migtimà ta kandan.

³⁰Su agkaen en sidan tinimù din su supas daw ampui dayun pinangebing din haena daw ipan-ila kandan.

³¹Dayun human dan nakilala si Jesus ba tigkan dan dà nahanaw.

³²Migpainsaay sidan hu “Iyan gid diay gan tungkay ta igkabayà-bayà su tagtudluan ki kandin hu insulat ha lalang hu Dios su diyà kuy pa ta dalan.”

³³Sagunà sidan luminikù diyà ta Jerusalem daw elegi su tag-amul-amulan ku mga apostoles daw hu mga duma dan.

³⁴Saena ha mig-amul-amul naman-ikagi hu “Laus gayed ha nabanhaw sa Ginuu ta migpaahà haena diyà ki Simon.”

³⁵Dayun su daruwa ha etaw nanunultul daan hu nahitabù diyà ta dalan daw hu pagkakilala dan ki Jesus su pangebingen din en su supas. Sa Pagpaahà Hi Jesus Duun Hu Mga Apostoles

³⁶Su kamulu pa tag-ikagi sa mga apostoles migpaahà si Jesus diyà ta taliwarà dan daw ikagi hu “Magmalinawen kaw.”

³⁷Nakignat sidan daw nangahaldek ta abi dan ha kalag haena.

³⁸Ba inikagiyan sidan hi Jesus hu “Imbà kaw agkasamuk daw imbà kaw tagduwa-duwa mahitenged kanak?

³⁹Iyan ad en haini. Ahaa sa alima ku daw sa paa ku. Ibiti a inyu ta sa kalag hurà din lawa ha iling iman kanak.”

⁴⁰Su maikagi din haena impaahà din kandan sa alima din daw sa paa din.

⁴¹Nangabayà-bayà sidan daw nangabeleng ba tagduwa-duwa pa sidan ku iyan en ba gayed haena, aman nanginginsà si Jesus hu “Amin nuy ba agkakaen dini?”

⁴²Inilahan dan haena hu inanag ha sedà

⁴³dayun kinaen din duun hu atubangan dan.

⁴⁴Inikagiyan din sidan hu “Iyan en haini inikagi ku inyu su anay ha tagduma-dumahà kuy sa kinahanglan ha matuman gayed sa alan ha nakasulat mahitenged kanak duun hu Kasuguan hi Moises daw hu mga insulat hu propita daw duun hu mga Salmo.”

⁴⁵Dayun impasabut din kandan sa alan ha insulat ha lalang hu Dios.

⁴⁶Minikagi haena hu “Sa insulat ha lalang hu Dios tagyanaen ‘Su Mesiyas kinahanglan ha makaagi hu mga alantusen daw matay gayed ba duun hu ikatulu ha aldaw mabanhaw dà.’

⁴⁷Aman agsuguen ku inyu ha isangyaw nuy duun hu kaet-etawan sugud ta Jerusalem payanaen hu alan ha mga nasud ha ku maghinulsul sidan mapasaylu gayed sa mga salà dan.

⁴⁸Iyan kaw iman mga tistigus taena ha katumanan hu mga tagnà.

⁴⁹Ba magtimà kaw pa enà dini ta Jerusalem daw angati nuy sa Balaan ha Ispiritu ha insaad hu Dios ta agsuguen ku haena diyan ta inyu daw gaheman kaw kandin.” Sa Pagligtu Hi Jesus Diyà Ta Langit

⁵⁰Su mauma en hi Jesus su mga apostoles din diyà ta Betania imbayaw din sa mga alima din daw panalangini sidan.

⁵¹Su kamulu din pa sidan tagpanalangini nabatun haena payanaen diyà ta langit.

⁵²Dayun suminimba kandin su mga apostoles daw likù diyà ta Jerusalem ha malipayen gayed.

⁵³Aldaw-aldaw agdiyà sidan ta Timplo hu pagdayè hu Dios.