Read Binukid 1 Taga-Corinto 2 Bible Online

1 Taga-Corinto 2 - Binukid bible

1 Taga-Corinto 2

¹Mga suled, su dumiyan a ta inyu hu pagpanunultul hu lalang hu Dios hurà a gamit hu madagway ha mga lalang daw hu kaalam ha kalibutanen dà,

²ta tinuyù ku ha hurà en lain ha makatudlù ku inyu ba iyan dà gayed si Jesu Cristo sa inlansang duun hu krus.

³Duun taena nahaldek a gayed ku harì ku mahimu sa igpabuhat kanak hu Dios.

⁴Aman su makiglalang a daw su magtudlù a diyan ta inyu hurà a maggamit hu mga lalang hu matatau, ba sa mga lalang ku ginaheman gayed hu Balaan ha Ispiritu

⁵ta daw sa pagtuu nuy kenà pinaagi dà hu katatau hu etaw ba pinaagi gayed hu gahem hu Dios. Sa Impadayag Hu Balaan Ha Ispiritu

⁶Sa mga magulang ha tumutuu agtudluan day hu mga madalem en daan ha katudluanan ba saena hurà duun dà kapuun hu etaw daw hu mga punuan dini ta kalibutan, ta sa kandan ha gahem agkahanaw dà.

⁷Ba sa mga tigtudlù day iyan sa henà-henà hu Dios ha inlilung su anay ha daan din en intagana su hurà pa tanghagaa sa bisan inu ta daw madayè kuy asem.

⁸Sa mga punuan duun taini ha panahun hurà gayed makasabut taena, ta ku natun-an dan pa harì dan ngaay ilansang sa Ginuu duun hu krus ha iyan labaw hu alan.

⁹Ba sa insulat ha lalang hu Dios tagyanaen“Sa hurà pa kaahà daw kapaliman hu etaw daw sa hurà pa paghenhenaa hu etaw iyan en intagana ha ig-ila hu Dios hu mga etaw ha tagpalanggà kandin.”

¹⁰Saini impadayag iman kanuy hu Dios pinaagi hu Balaan ha Ispiritu. Agkasusi hu Balaan ha Ispiritu sa alan bisan sa henà-henà hu Dios.

¹¹Henhenaa nuy ha sa etaw iyan dà nakatuen hu kaugalingen din. Iling daan sa Balaan ha Ispiritu ha iyan dà nakatuen hu henà-henà hu Dios.

¹²Ba inulinan kuy hu Balaan ha Ispiritu sa napuun duun hu Dios kenà duun hu etaw dà ta daw masabut taw sa alan ha in-ila kanuy hu Dios.

¹³Aman ku magtudlù kay duun hu mga etaw ha inulinan hu Balaan ha Ispiritu harì kay tag-ikagi hu kalibutanen dà ha kaalam ba pinaagi gayed hu Balaan ha Ispiritu.

¹⁴Sa etaw ha kalibutanen harì agdawat hu tigtudlù hu Balaan ha Ispiritu ha sinugù hu Dios ta harì din haini agkasabut daw ag-isipen din daan ha bà dà binuang, ta sa tagpasabut taini iyan dà gayed sa inulinan hu Balaan ha Ispiritu.

¹⁵Sa etaw ha inulinan hu Balaan ha Ispiritu agkatun-an din ku inu sa mapuslanen daw sa hurà din pulus, ba saena ha etaw harì gayed mahukuman hu kenà tumutuu ku inu sa duun hu henà-henà din.

¹⁶Ta sa lalang hu Dios tagyanaen“Hurà gayed nakatuen ku inu sa taghenhenaen hu Dios daw hurà en daan makagsambag kandin.” Ba sikuy sa nakatuu impadayag kanuy sa henà-henà hi Cristo.