Read Binukid 1 Taga-Tesalonica 5 Bible Online

1 Taga-Tesalonica 5 - Binukid bible

1 Taga-Tesalonica 5

¹Mga suled, kenà en kinahanglan ha sulatan day pa inyu mahitenged hu katumanan taini ha panahun

²ta natun-an nuy en gayed ha sa paglikù hu Ginuu agkailing hu agpanakaw ha tigkan pakauma ku daleman.

³Duun taena mag-ikagi sa mga etaw hu “Malinawen en iman sa pagtimà taw” ba tigkan makauma diyà ta kandan sa silut ha harì dan mapulaguyan iling hu bahi ha agbalilitan.

⁴Ba sikuy mga suled, kenà kuy en duun hu kasukileman aman harì kuy en makignat ku makauma sa silut hu Dios.

⁵Iyan kuy iman taghipanaw duun hu kapawaan daw sa masukilem hurà dini ta kanuy.

⁶Aman kinahanglan ha harì kuy magtiduga iling hu duma iman dini ta kalibutan ba magbantay kuy daw magpugung kuy gayed,

⁷ta sa mga tagtiduga daw sa beleng-beleng duun gayed hu kasukileman.

⁸Ba tumenged ta duun kuy hu kapawaan magpugung kuy gayed. Isul-ub taw sa limbutung ha iyan sa pagtuu daw sa pagpalanggà taw hu mga duma taw, daw isuup ta ulu taw sa kalù ha puthaw ha iyan sa adagi ha hinam taw hu katumanan hu kaluwasan taw.

⁹Ta hurà kuy itagana hu Dios hu silut ba pinilì kuy kandin ha maluwas pinaagi ki Jesu Cristo ha Ginuu taw

¹⁰ha iyan migpakamatay para kanuy ta daw bisan ku matay kuy en daw ku bubuhay kuy pa ku lumikù asem haena makaamul kuy gayed kandin hu hinangturan.

¹¹Aman maglinipayà kaw daw lig-eni nuy sa pagtuu hu kada sabuwa inyu iling hu tagbuhaten nuy en iman. Mga Panugun

¹²Mga suled, aghangyuen day inyu ha tahuran nuy gayed haena sa pinilì hu Ginuu ha pangulu nuy ha agpaniguru hu pagtudlù.

¹³Isipa sidan ha mahal tumenged hu pagtanul dan inyu. Siguruwi nuy ha malinawen sa pagdapità nuy.

¹⁴Mga suled, aghangyuen day daan inyu ha sambagan nuy sa mga pugulen ha magtalabahu en sidan, dasigen nuy sa agluyahan daw buligan nuy daan sa maluya pa hu pagtuu. Magpailub kaw duun hu alan ha mga etaw.

¹⁵Harì nuy gayed balesan hu madaet haena sa tagbuhat hu madaet diyan ta inyu, ba iyan nuy gayed sigi buhaten sa maayad duun hu bisan sin-u.

¹⁶Sigi kaw dà gayed magmalipayen

¹⁷daw harì kaw tagluya hu pag-ampù.

¹⁸Sigi kaw magpasalamat duun hu bisan inu ha maul-ulahan nuy ta iyan haini agkabayaan hu Dios ha buhaten nuy sinyu sa nakigsabuwa en ki Jesu Cristo.

¹⁹Harì nuy agsupaka sa Balaan ha Ispiritu

²⁰daw harì nuy daan agtameyesa sa impaikagi din

²¹ba susiya nuy sa alan. Iyan nuy dawata sa maayad duun

²²daw magpakadiyù kaw gayed duun hu alan ha madaet.

²³Sa Dios ha tag-ila hu kalinaw maghimpit inyu ta daw harì kaw gayed asem masaway ku lumikù si Jesu Cristo ha Ginuu taw.

²⁴Sa Dios ha iyan mighimu inyu ha tumutuu buhaten din haena ta kasaligan gayed.

²⁵Mga suled, ampui kay daan inyu.

²⁶Magkinamustahay kaw gayed ha malipayen.

²⁷Saini ha sulat kinahanglan gayed ha basahen duun hu alan ha mga suled taw diyan.

²⁸Panalanginan kaw hi Jesu Cristo ha Ginuu taw.