Read Binukid Mga Hebrohanen 1 Bible Online

Mga Hebrohanen 1 - Binukid bible

Mga Hebrohanen 1

¹Su anay sa Dios mig-ikagi duun hu mga gin-apuan taw pinaagi hu mga propita duun hu hurà mag-iling ha mga paagi,

²ba iman taini ha panahun mig-ikagi dini ta kanuy pinaagi hu Batà din. Pinaagi kandin tinanghagà hu Dios sa alan daw iyan daan haena tinaganahan din hu alan.

³Sa pagpangaluanlag hu Dios impadayag pinaagi hu Batà din ta iling dà gayed sidan, daw iyan sa Batà din tagbayà hu alan ha tinanghagà pinaagi hu gahem hu pag-ikagi din. Su mapalas din en sa mga salà hu kaet-etawan pinaagi hu kamatayen din, luminikù diyà ta langit daw duun mininuu hu kawanan hu Dios ha gamhanan.

⁴Aman sa Batà hu Dios nadayag ha labaw gayed dì hu mga balinsuguen hu Dios, daw sa ngaran hu Batà hu Dios gamhanan pa dì hu ngaran hu mga balinsuguen.

⁵Hurà gayed balinsuguen ha inikagiyan hu Dios ha“Batà ku ikaw na iman taini ha aldaw igpadayag ku ha iyan a Amay nu.” Daw hurà daan balinsuguen ha sinubay din ha“Iyan a Amay din daw Batà ku daan.”

⁶Ba su ipadini hu Dios sa gamhanan ha Batà din ta kalibutan minikagi haena hu“Sa alan ha mga balinsuguen ku sumimba gayed kandin.”

⁷Mig-ikagi daan sa Dios mahitenged hu mga balinsuguen din hu“Sa mga balinsuguen ku maalistu gayed hu pagtuman kanak daw iling sidan hu kalamag daw hu tagkalayab-layab ha legdeg.”

⁸Ba sa inikagi hu Dios duun hu Batà din iyan haini“Sikaw sa Dios, hurà gayed katapusan hu pagharì nu daw sa pagkaharì nu matareng gayed.

⁹Babayaen nu sa pagkamatareng daw agtambagan nu sa pagkamasinupaken. Tumenged taini siak sa Dios ha iyan Magbabayà nu binuhat ku ha labaw ka dì hu mga duma nu daw malipayen ka gayed.”

¹⁰Daw minikagi daan sa Dios hu“Sikaw sa Ginuu, iyan ka migtanghagà ta langit daw ta kalibutan.

¹¹Saini mangahanaw dà ba sikaw magpabilin ka gayed. Malegdak daan haini iling hu pinaksuy

¹²daw ilisan hu bag-u, ba sikaw harì ka gayed mabalhin daw hurà nu gayed katapusan.”

¹³Ba sa mga balinsuguen hu Dios hurà din ikagiyi hu“Dini ka pinuu ta kawanan ku hangtud ha madaeg ku sa mga kuntra nu.”

¹⁴Sa mga balinsuguen bà dà sinugù hu Dios hu pagbulig taena ha agluwasen.