Read Binukid 2 Juan 1 Bible Online

2 Juan 1 - Binukid bible

2 Juan 1

¹Iyan a sabuwa ha pangulu hu mga tumutuu sa migsulat taini. Sinulatan ku ikaw sa bahi ha pinilì hu Dios daw sa mga batà nu ha mga pinalanggà ku. Sa alan ha nakatuu hu kamatuuran tagpalanggà daan inyu

²tumenged ta sa kamatuuran didini en ta kanuy iman daw hangtud en hu hurà din katapusan.

³Sa Dios ha Amay taw daw si Jesu Cristo sa Batà din mahid-u inyu daw mag-ila inyu hu grasya daw kalinaw tumenged ta didini daan ta kanuy sa kamatuuran daw sa pagpalanggà.

⁴Adagi gayed sa kalipay ku su mapaliman ku ha sa mga duma ha batà nu tagsunud en hu kamatuuran sumalà hu sugù hu Dios ha Amay taw.

⁵Saini ha insulat ku diyan ta inyu iman kenà bag-u ha sugù ta napaliman taw en haini su anay kuy makatuu ki Jesus ha magpinalanggaay kuy gayed.

⁶Saini ha pagpalanggà iyan sa pagtuman taw hu mga sugù hu Dios. Napaliman nuy en haini su anay kaw makatuu aman alan kuy gayed magpinalanggaay.

⁷Nakalekep en dini ta kalibutan sa mga biduen ha manunudlù ha tag-ikagi ha si Jesu Cristo hurà magpakaetaw. Saini sidan iyan maglimbung hu kaet-etawan daw mga kuntra sidan hi Cristo.

⁸Aman mag-andam kaw gayed ha harì malaag sa bales asem hu pagpaniguru nuy iman.

⁹Bisan sin-u sa harì dumayun duun hu katudluanan hi Cristo suminuway duun hu Dios, ba saena ha tagpadayun duun taena ha katudluanan iyan nakigsabuwa duun hu Dios ha Amay taw daw hu Batà din.

¹⁰Ku amin makadiyan ta inyu ha tagtudlù hu kenà kamatuuran harì nuy agdawata

¹¹ta sa dumawat kandin makalagkes hu buhat din ha madaet.

¹²Madakel pa ngaay sa agkabayaan ku ag-ikagiya inyu, ba harì kud en igsulat ta taghinam a ha makadiyan a asem daw makaglalang kuy dà daw malipay kuy gayed.

¹³Agpangamusta daan ikaw sa mga batà hu suled nu ha pinilì daan hu Dios.