Read Birifor, Malba Matie Sɛbɛ 1 Bible Online

Matie Sɛbɛ 1 - Birifor, Malba bible

Matie Sɛbɛ 1

¹A *Jeeju-Kirisi sãa-kʋnbɔ nɩ a basɩmɛ ba na sɛb, wa nyɔw nɩ a Abʋraham wa ta nɩ a Davɩtɩ ɩ̃ cen na ta a Jeeju-Kirisi.

²A Abʋraham dɔw na a Ɩjakɩ, a Ɩjakɩ mɩ dɔw a Jakɔb, a Jakɔb mɩ ɩraa ɩ̃ dɔw a Juda nɩ a ʋ yɛɛr,

³a Juda mɩ lɛ dɔw a ɩ nɩ a Jara (a ba mã ɩ̃ dɩ a Tamaar), a Farɛsɩ mɩ dɔw a Ɛsɩrɔ̃, a Ɛsɩrɔ̃ mɩ ɩraa ɩ̃ dɔw a Aram,

⁴a Aram mɩ lɛ dɔw a Aminadab, a Aminadab mɩ dɔw a Naasõ, a Naasõ mɩ ɩraa ɩ̃ dɔw a Salmɔ̃,

⁵a Salmɔ̃ mɩ lɛ dɔw a Booji (a ʋ ma dɩ na a Arahab), a Booji mɩ dɔw a Obɛdɩ (a ʋ mã dɩ na a Uruti), a Obɛdɩ mɩ ɩraa ɩ̃ dɔw a Jɛsɩ,

⁶a Jɛsɩ mɩ lɛ dɔw a jamana Davɩtɩ. A Davɩtɩ dɔw na a Salʋmɔ̃ (a ʋ mã ɩ̃ dãa ɩ̃ a Uri pɔw),

⁷a Salʋmɔ̃ mɩ dɔw a Orobom, a Orobom mɩ ɩraa ɩ̃ dɔw a Abiya, a Abiya mɩ lɛ dɔw a Asafi,

⁸a Asafi mɩ dɔw a Jojafati, a Jojafati mɩ ɩraa ɩ̃ dɔw a Joram, a Joram mɩ lɛ dɔw a Ojaasi,

⁹a Ojaasi mɩ dɔw a Jowatam, a Jowatam mɩ ɩraa ɩ̃ dɔw a Akaji, a Akaji mɩ lɛ dɔw a Ejekasi,

¹⁰a Ejekasi mɩ dɔw a Manase, a Manase mɩ ɩraa ɩ̃ dɔw a Amɔ̃, a Amɔ̃ mɩ lɛ dɔw a Jojiya,

¹¹a Jojiya mɩ dɔw a Jekɔnya nɩ a ʋ yɛɛr a daar ʋlɔ ba na nyɔɔr a *Ɩsɩrayɛl nɩbɛ cenʼɩ̃ a *Babɩlɔ̃-tẽw.

¹²A mɩnɛ ba na nyɔɔr a Ɩsɩrayɛl nɩbɛ cenʼɩ̃ a Babɩlɔ̃-tẽw baar, a Jɛkɔnya dɔw na a Salatɩɛl a be, a Salatɩɛl mɩ dɔw a Jorobabɛl,

¹³a Jorobabɛl mɩ ɩraa ɩ̃ dɔw a Abudi, a Abudi mɩ lɛ dɔw a Elaakɩm, a Elaakɩm mɩ dɔw a Ajɔɔr,

¹⁴a Ajɔɔr mɩ ɩraa ɩ̃ dɔw a Sadɔkɩ, a Sadɔkɩ mɩ lɛ dɔw a Akɩm, a Akɩm mɩ dɔw a Eludi,

¹⁵a Eludi mɩ ɩraa ɩ̃ dɔw a Elajaar, a Elajaar mɩ lɛ dɔw a Matã, a Matã mɩ dɔw a Jakɔb,

¹⁶a Jakɔb mɩ ɩraa ɩ̃ dɔw a Jojɛfʋ na ɩ a Maarɩɩ sɩrɛ, a Maarɩɩ ʋlɔ na dɔw a *Jeeju ba na bʋɔlɔ a *Kirisi.

¹⁷A nɔhɔ̃ a sãa-kʋnbɔ tu-taa dãa na ɩ a pie-nʼanuu for bir, wa nyɔw nɩ a Abʋraham daar cenʼɩ̃ na ta a Davɩtɩ. Wa mɩ nyɔw nɩ a Davɩtɩ daar cenʼɩ̃ wa ta nɩ a Ɩsɩrayɛl nɩbɛ Babɩlɔ̃-tẽw cenfʋ daar mɩ lɛ ɩ a tu-taa gbɛɛ pie-nʼanuu for bir. Wa mɩ nyɔw nɩ a ʋna daarʼãa wa ta nɩ a Kirisi dɔwfʋ daar lɛ ɩ na a tu-taa gbɛɛ pie-nʼanuu for bir go.

¹⁸Nyɛ a mɩnɛ a *Jeeju-Kirisi dɔwfʋ ƴɛrɩ̃ na be. A ʋ mã Maarɩɩ nɩ a Jojɛfʋ dãa na ŋma a ba. Ɩ̃-cɛ a lɛ ba na ma kul taa sɛr wa, ba nyɛ ʋ na ʋ tɛrɛ a pʋɔ na yi a Naaŋmɩn Sɩɛ jie.

¹⁹A ʋ baraa Jojɛfʋ ɩ na nɩ-dẽdẽ ɩ̃ ma bʋɔrɔ a ƴɛrɩ̃ ʋlɔ ʋ yi yɔ̃w a Maarɩɩ a vĩ wa, ala-ɩ̃-sɔ ʋ tɩɛrɛ a ʋ suur pʋɔ a mɩnɛ ba na ɩrɛ ɩ̃ ŋmara a ba ba ɩfʋ.

²⁰Ɩ̃ a mɩnɛ ʋ na cãa tɛrɛ a ala, a Naaŋmɩn sɩ-tʋnaa nyɩr ʋ na a jãasʋlɩ̃ pʋɔ ɩ̃ yel ʋ: “Davɩtɩ bie Jojɛfʋ! Taa jɔrɔ dãbɩ̃ɛ a Maarɩɩ kulfʋ ɩnɛ wa, a-na-ɩ a pʋɔ ʋ na tɛrɛ yi na a Naaŋmɩn Sɩɛ jie.

²¹Ʋ na dɔw na dabile ɩ̃ a fʋ pʋr ʋ a yuor *Jeeju, a-na-ɩ a ʋlɔ nɔɔ faa a ʋ nɩbɛ a ba maal-faar pʋɔ.”

²²A ana yele a jaa ta na, a na ɩ a ala a Nɩ-kpɛ̃ɛ na dãa yel a ʋ ƴɛr-hiere nʋɔr pʋɔ. Ʋ dãa na yel:

²³“Pɔsa-bile na tɛrɛ na a pʋɔ dɔw a dabile a ba pʋr ʋ a yuor, Emanʋwɛl.” A lɛ yelʼã, áa Naaŋmɩn be nɩ sɩ na.

²⁴A mɩnɛ a Jojɛfʋ na jaw, ʋ sɔw na a ala a Nɩ-kpɛ̃ɛ sɩ-tʋnaa na yel ʋ, ɩ̃ taw a ʋ baraa kulʼɩ̃ a ʋ yir,

²⁵ɩ̃-cɛ baa gã taa wa, wa ta nɩ a lɛ ʋ na dɔw a bie baar. Ɩ̃ a Jojɛfʋ pʋrʼã a bie yuor a Jeeju.