Read Birifor, Malba Matie Sɛbɛ 12 Bible Online

Matie Sɛbɛ 12 - Birifor, Malba bible

Matie Sɛbɛ 12

¹A ʋna daarʼãa pʋɔ a *Jeeju tɔlɔ na a ci puo pʋɔ a *bibi-ciiraa dayen, a kɔ̃ nyɔw a ʋ *par-tuurbe a ba nyɔw a ci ɩ̃ fɔrɔ ꞌwɔbɔ cere nɩ.

²Ɩ̃ a mɩnɛ a *Farɩsɩ nɩbɛ na nyɛ a lɛ, ba yelʼã a Jeeju: “Je kãa! A fʋ par-tuurbe maala na a ala na ma sɛw a bibi-ciiraa dayen wa.”

³Ʋ mɩ yel ba: “Nyaa ꞌwuor a Naaŋmɩn Sɛbɛ pʋɔ nyɛ a ala a Davɩtɩ na dãa maal, nɩ a ʋ nɩbɛ, a lɛ a kɔ̃ na dãa wa nyɔw ba wa mɩɩ?

⁴Ba kpɛ na a Naaŋmɩn yir, de a buru ba na bin a Naaŋmɩn ꞌwɔb, ɩ̃-cɛ a Davɩtɩ nɩ a ʋ nɩbɛ bala, ma dãa tɛrɛ sɔr wa, a-na-ɩ a baar-lorbo tɛw ɩ̃ ma ꞌwɔb a ana buru.

⁵Mɩɩ, nyaa ꞌwuor a Mowisi ƴɛr-kpɛn sɛbɛ pʋɔ nyɛ, a bibi-ciiraa dayen, a baar-lorbo bala na tʋnɔ a Naaŋmɩn puor-yir kpɛ̃ɛ pʋɔ maa tʋɔ ciir a ʋna bibir, ɩ̃ ma mɩ sãw wa?

⁶Ɩ̃-cɛ ɩ̃ yele nyɩ na, a ʋlɔ na gãw a Naaŋmɩn puor-yir kpɛ̃ɛ be na ka.

⁷A ala ɩ nyɩ dãa na sɩrɩ̃ bɔ̃w a sɛb-bie ala na yel: ‘Maa bʋɔrɔ a baar lofʋ wa, ɩ̃-cɛ a nã-bɔ̃wfʋ ɩ̃ bʋɔrɔ,’ nyɩ kɔ̃ɔ dãa ƴɔ̃w a nɩ-sono a ƴɛrɩ̃ wa.

⁸A-na-ɩ a *Nɩbɛ Bie ɩ na a bibi-ciiraa Nɩ-kpɛ̃ɛ.”

⁹A mɩnɛ a *Jeeju na yi a be, ʋ cenʼã a ba *puorfʋ yir pʋɔ.

¹⁰Ɩ̃ a ba pʋɔ, daba be na be a nuu na kpi, a ba soor ʋ, á sɔr be na be a ba na kpaar a wʋlɩ̃ sʋbɔ a *bibi-ciiraa dayen mɩɩ? A-na-ɩ ba bʋɔrɔ na ba ƴɔ̃w ʋ a ƴɛrɩ̃

¹¹A Jeeju mɩ soor ba: “A ala ɩ a nyɩ pʋɔ, nɩrɛ tɛrɛ na a pɛr bõ-ƴen tɛw, ʋ lo a ɩ̃ bɔw kpolo pʋɔ a bibi-ciiraa dayen, ꞌwaa cere nyɔwrɔ ʋ bara, ʋ yire wa mɩɩ?

¹²Wa yele nɩ, nɩrɛ na gãw a pɛr! Ala-ɩ̃-sɔ sɔr be na be a vɩlaa maalfʋ a bibi-ciiraa dayen.”

¹³Ɩ̃ a Jeeju yelʼã a daba: “Tur a fʋ nuu,” ʋ tur, ɩ̃ a nu-kũu lɩɛb wɔ̃ taa nɩ a nu-son.

¹⁴A *Farɩsɩ nɩbɛ yi na cen na gor taa, a mɩnɛ ba na ɩrɛ ɩ̃ bũbure a Jeeju bara.

¹⁵Ɩ̃-cɛ a-na-ɩ a *Jeeju bɔ̃w nɩ ba na, ʋ yi na cere, ɩ̃ a nɩ-yaw tuure ʋ, ʋ kpaar a ba wʋlɩ̃sɩ deme ba jaa,

¹⁶ɩ̃ kpãa ba a ba taa wa yele a ala ʋ na ɩ wa.

¹⁷A ta na a lɛ a na ɩ a ƴɛr-hiere Ejayi ƴɛrɩ̃sɩ na dãa yel:

¹⁸“Nyɩ́ nyɛ a ɩ̃ Tʋ̃tʋnɔ ɩ̃ na vɛl ir, a ʋlɔ ɩ̃ na nʋnɔ, na mɩ kpɛ ma a nyãa. Ɩ̃ na ƴɔ̃w ʋ na a ɩ̃ Sɩɛ, ɩ̃ ʋ na mana na a ɩ̃ ƴɛrɩ̃ guorfʋ kʋrɔ a nɩ-bʋlsɩ.

¹⁹ꞌWaa wa jɛbɛ nɩ nɩrɛ mɩɩ tana nɩrɛ wa. Baa mɩ wa wono a ʋlɔ nɩ nɩrɛ cɩɩrɛ taa a sɔr pʋɔ wa.

²⁰A kakɩr na ka jɛ̃jɛɛlɩ̃, ʋ kɔ̃ wa baar ʋ ka bar wa. A lãpa na bʋɔrɔ a kpiinfʋ, ʋ kɔ̃ wa mɩ baar ʋ kpiin bar wa. A lɛ ʋ na maal wa ta nɩ a daar ʋlɔ a torfʋ nɔɔ pɔwrɔ a tʋɔfʋ.

²¹A nɩ-bʋlsɩ ba jaa nɔɔ tɛrɛ nɩ ʋ na a tɩɛrɩ̃-son.”

²²Ba wɩ nɩ na a kɔ̃tɔn-ire na jɔ̃w lãa wõw nɩ a *Jeeju sɛ̃ a Jeeju kpaar ʋ, ʋ lɛ nyɛrɛ wono nɩ.

²³A nʋɔr kpalʼã a nɩbɛ ba jaa a ba yele: “A nanɩ, ú wa ɩ a Davɩtɩ bie mɩɩ?”

²⁴Ɩ̃ a lɛ a *Farɩsɩ nɩbɛ na wõ a ala, ba yelʼã: “A daba na, ꞌwaa diwre a kɔ̃tɔnsɩ pɔrɔ, ɩ̃ a ala ma ɩ a kɔ̃tɔnsɩ nɩ-kpɛ̃ɛ *Bɛɛjɛbul ɩ̃ kʋ ʋ a tʋɔfʋ wa.”

²⁵A Jeeju bɔ̃w a ba tɩɛrɩ̃sɩ ɩ̃ yel ba: “A tẽw ʋlɔ na ŋma ayi jɛbɛ taa na wɛlʼã ʋ jaa. Tẽw kãw ma be be, mɩɩ a yir kãw ʋ, ŋma ayi jɛbɛ taa ɩ̃ cãa beree be wa.

²⁶A ala ɩ a Satã diw a Satã bar, ʋ ŋma na ayi jɛbɛ taa ʋ yẽ. Mɩnɛ a ʋ fãw na tʋɔ ɩ ɩ̃ cãa be be?

²⁷A ala ɩ nyɩ yelʼã a maa, a Bɛɛjɛbul tʋɔfʋ ɩ̃ diwre nɩ a kɔ̃tɔnsɩ bara, ɩ̃ a bala na tuure nyɩ, ala tʋɔfʋ ba mɩ diwre nɩ ba? Ala-ɩ̃-sɔ, a nɩbɛ bala na tuure nyɩ, bala nɔɔ ɩ a nyɩ ƴɛr-guorbo.

²⁸Ɩ̃-cɛ a ala ɩ a Naaŋmɩn Sɩɛ ɩ̃ diwre nɩ a kɔ̃tɔnsɩ, a lɛ yelʼã a Naaŋmɩn fãw ta na a nyɩ jie.

²⁹“Mɩnɛ a nɩrɛ na ɩ ɩ̃ kpɛ a gãdaa yir faa ʋ a yele, ɩ̃ a ala ma ɩ ʋ de na nĩe lũ ʋ wa? Ɩ̃-cɛ a ala ɩ ʋ lũ ʋ na, ala ʋ na tʋɔ wob a ʋ yele.

³⁰“A ʋlɔ na ma be nɩ ma wa, ʋ ɩ na a ɩ̃ san-sʋbɔ, ɩ̃ a ʋlɔ na ma sũono ma a sɩ lãa kaala wa, ʋ yɛ̃yɛlɛ na bara.

³¹Ala-ɩ̃-sɔ ɩ̃ yele nyɩ na, a maal-faar a jaa, nɩ a Naaŋmɩn yo-sãwfʋ a jaa, a Naaŋmɩn na tʋɔ na de bar kʋ a nɩbɛ. Ɩ̃-cɛ a nɩrɛ wa sãw a Naaŋmɩn Sɩɛ yuor, aa be a Naaŋmɩn na de bar kʋ ʋ wa.

³²Ɩ̃ a nɩrɛ lɛ wa ƴɛrɛ a ƴɛr-fãa ƴɔnɔ a *Nɩbɛ Bie, a Naaŋmɩn na tʋɔ na de bar kʋ ʋ. Ɩ̃-cɛ a nɩrɛ lɛ wa ƴɛrɛ a ƴɛr-fãa ƴɔnɔ a Naaŋmɩn Sɩɛ, aa be a Naaŋmɩn na de bar kʋ ʋ a ƴɛ̃ƴɛrɩ̃ daar nɩ a daar ʋlɔ nɔɔ waara wa.

³³“A fʋ̃ʋ tɛrɛ a tɩ-son, fʋ na pɔw na a wɔ̃-sono, ɩ̃-cɛ a fʋ̃ʋ tɛrɛ a tɩ-kpana, a wɔ̃-kpansɩ fʋ na mɩ pɔw, a-na-ɩ a wɔmɔ ba ma bɔ̃w nɩ a tɩɛ.

³⁴Nyɩna waab bibiir yaa! Mɩnɛ nyɩ na ɩ ɩ̃ ɩ a nɩ-faar ɩ̃ ƴɛrɛ a ƴɛr-sono? A-na-ɩ a ala na sɛw a fʋ suur pʋɔ, ala yire a fʋ nʋɔrɩ̃

³⁵A ala ɩ a nɩ-son tɛrɛ na a yel-vɛlɛ, a yel-vɛlɛ ʋ na de po a nɩbɛ, ɩ̃ a ala mɩ ɩ a nɩ-fãa tɛrɛ na a yel-kpansɩ, a ala ʋ na mɩ de po a nɩbɛ.

³⁶Ɩ̃ ɩ̃ yele nyɩ na, a ƴɛrɩ̃ guorfʋ dayen, ba na soorʼã a nɩbɛ ba jaa a ba ƴɛr-pɔrsɩ ba na ƴɛrɛ a jaa.

³⁷A-na-ɩ a fʋ ƴɛr-bie nɔɔ miile a fʋ torfʋ, ɩ̃ a fʋ ƴɛr-bie ɩnɛ ba nɔɔ mɩ ƴɔ̃w fʋ a ƴɛrɩ̃.”

³⁸A *ƴɛr-kpɛn-bɔɔnbɔ nɩ a *Farɩsɩ nɩbɛ ŋmɛɛ yelʼã a *Jeeju: “Jãjaana, sɩ bʋɔrɔ na sɩ nyɛ a nɔ-kofʋ tʋn ʋ ɩ sɩ a jɩbaa.”

³⁹Ʋ yel ba: “A ƴɛ̃ƴɛrɩ̃ nɩbɛ na ɩ a nɩ-faar nɩ a nɩ-burbur, ba bʋɔrɔ na ba nyɛ a nɔ-kofʋ tʋn ʋ ɩ ba a jɩbaa. Ɩ̃-cɛ ba kɔ̃ nyɛ bom kpee ɩ̃ a ala ma ɩ a ƴɛr-hiere Jonasɩ ƴɛrɩ̃ wa.

⁴⁰A-na-ɩ a mɩnɛ a Jonasɩ na dãa maal a bibie ata a jɩm-kpɛ̃ɛ pʋɔ, a lɛ ʋ mɩ, a *Nɩbɛ Bie na mɩ maal a bibie ata a yaa pʋɔ.

⁴¹A Nɩnɩvɩ-tẽ-deme nɔɔ ƴɔ̃w na a ƴɛ̃ƴɛrɩ̃ nɩbɛ a ƴɛrɩ̃ a ƴɛrɩ̃ guorfʋ dayen, a-na-ɩ a daar ʋlɔ a Jonasɩ na dãa hier a Naaŋmɩn ƴɛrɩ̃ a ba tẽw pʋɔ, ba lɩɛbʼã a ba yɛ̃, ɩ̃ a nyɩmɩ, nyɩ nyɛ na a ʋlɔ na gãw a Jonasɩ a nyɩ pʋɔ.

⁴²A ƴɛrɩ̃ guorfʋ dayen mɩ, a tẽ-nɩdaa pɔw jamana nɔɔ mɩ ƴɔ̃w na a ƴɛ̃ƴɛrɩ̃ nɩbɛ a ƴɛrɩ̃, a-na-ɩ ʋ yi na a tẽ-nɩdaa ɩ̃ wa cɛl a jamana Salʋmɔ̃ yɛ̃, ɩ̃ a nyɩmɩ, nyɩ nyɛ na a ʋlɔ na gãw a Salʋmɔ̃ a nyɩ pʋɔ.

⁴³“A lɛ a kɔ̃tɔn bier na yi a nɩrɛ pʋɔ, ʋ ma cenʼã na yʋɔrɔ a wɛ-kon pʋʋr bʋɔrɔ a jie ʋlɔ ʋ na tʋɔrɔ pɩɛnɛ, ɩ̃ ma faa,

⁴⁴Ɩ̃ ma lɛ yel a ʋ mɩ̃ɛ: ‘Ɩ̃ na lɩɛbʼã kul a ɩ̃ yir pʋɔ ɩ̃ na dãa yi.’ A ʋlɔ wa kul, ʋ ma nyɛ na a yir ʋ ɩ bõ-jaalaa ba na pɩɩr gbɛɛrɩ̃ bar.

⁴⁵Ʋ ma lɩɛbʼã cen na bɔ a ʋ tɔ deme anuu-nʼayi na nyɩrɩ̃ ɩ a kɔ̃tɔn-faar gãw ʋ, kulʼɩ̃, a ba jɛ a be. A ala ɩ̃ baar, a daba ʋlɔ ben ma nyɩrɩ̃ na bɛlɩ̃ gãw a dãdãw. A lɛ a nɔɔ mɩ wɔ̃ a ƴɛ̃ƴɛrɩ̃ nɩ-faar jie.”

⁴⁶A mɩnɛ a *Jeeju na cãa ƴɛrɛ nɩ a nɩbɛ, a ʋ mã nɩ a ʋ yɛɛr wɩ na ɩraa a yẽw, ɩ̃ bʋɔrɔ ba ƴɛrʼɩ̃ ʋ.

⁴⁷A nɩrɛ kãw yel a Jeeju: “A fʋ mã nɩ a fʋ yɛɛr ɩraa na be yẽw bʋɔrɔ nyɩ ƴɛr taa.”

⁴⁸Ʋ yel a ʋna nɩrɛ: “Ala ɩ̃ ɩ a ɩ̃ mã, ɩ̃ babõ mɩ ɩ a ɩ̃ yɛɛr?”

⁴⁹Ɩ̃ tur a ʋ *par-tuurbe a nuu ɩ̃ yel: “Nyɩ́ nyɛ a ɩ̃ mã nɩ a ɩ̃ yɛɛr.

⁵⁰A-na-ɩ a nɩrɛ lɛ na maala a ɩ̃ Sãa na be a saa juu pʋ-tɩɛrʋ̃, ʋlɔ ɩ̃ ɩ a ɩ̃ yɛbɛ, a ɩ̃ yɛ-pɔw, mɩɩ a ɩ̃ mã.”