Read Birifor, Malba Matie Sɛbɛ 14 Bible Online

Matie Sɛbɛ 14 - Birifor, Malba bible

Matie Sɛbɛ 14

¹A ʋna daarʼãa a *Ɛrɔdɩ na ɩ a Galile jamana wõ na a *Jeeju ƴɛrɩ̃

²ɩ̃ yel a ʋ tʋ̃tʋnbɔ: “A Jã-Batii nɩ a nanɩ. Ʋ irʼã a kũu pʋɔ, ala-ɩ̃-sɔ ʋ tɛrɛ a fãgã tʋnɔ nɩ a nɔ-kofʋ tʋmɔ a lɛ.”

³A-na-ɩ a Jã dãa na yel a Ɛrɔdɩ áa ƴɛr-kpɛn ma kʋ ʋ sɔr ʋ na faa a ʋ yɛbɛ Fɩlɩpɩ pɔw Ɛrɔdɩya kul wa. Ala-ɩ̃-sɔ a Ɛrɔdɩ ƴɔ̃w na a ba nyɔw a Jã lũ ƴɔ̃w a kasu pʋɔ.

⁵Ʋ dãa na bʋɔrɔ ʋ kú ʋ, ɩ̃-cɛ dãbɩ̃ɛ nyɔw ʋ na a nɩbɛ ɩnɛ, a-na-ɩ ba bɔ̃w ka a Jã ɩ na a Naaŋmɩn ƴɛr-hiere.

⁶A mɩnɛ a Ɛrɔdɩ dɔwfʋ bibir fɛtɩ na ta, a Ɛrɔdɩya bi-pɔw sɛ na a bɩnɛ a ba nii-sɔw, a nʋ̃ɔ nyɩrɩ̃ nyɔw a Ɛrɔdɩ,

⁷ʋ ir pɔ yelʼɩ̃, á ʋ na kʋ na a poole a bom lɛ ʋ na sʋɔrɔ ʋ.

⁸Ɩ̃ a mɩnɛ a poole mã na kpãa ʋ baar, ʋ cenʼã na yel a Ɛrɔdɩ á ʋ ƴɔ̃w a Jã-Batii juu a lagbaal pʋɔ kʋ ʋ.

⁹A jamana suur sãw, ɩ̃-cɛ a ʋ pɔfʋ ʋ na pɔ a ʋ lãa-dɩrbɛ nii-sɔw saa, ʋ sɔw,

¹⁰ɩ̃ ƴɔ̃w a ba cen na ŋmaa a Jã juu a kasu pʋɔ.

¹¹Ba wɩ nɩ na a Jã juu a lagbaal pʋɔ kʋ a poole, ʋ de kʋ a ʋ ma.

¹²A Jã *par-tuurbe cenʼã na de a kũu ũu, ɩ̃ pãa cen na man a Jeeju a ala na ta.

¹³A mɩnɛ a *Jeeju na wõ a ala na ta a Jã, ʋ yi na cen na kpɛ a gbor nɩ a ʋ *par-tuurbe á ba cen na sɔɔlɩ̃ a wɛkar pʋɔ a man gaan. Ɩ̃ a mɩnɛ a nɩbɛ na wõ a lɛ, ba yi na a ba ten pʋʋr lara a man gbẽgbere bɩɛrɛ ʋ.

¹⁴A mɩnɛ a Jeeju na ta a man gaan ʋ nyɛ na a nɩ-yaw, a nãw nyɔw ʋ, ʋ kpaar a bala na ɩ a baalsɩ.

¹⁵A lɛ a jaanʋɔr na ta a ʋ par-tuurbe taw na ta ʋ ɩ̃ yel: “Wɛkar pʋɔ sɩ be, ɩ̃ a mɔtɔ̃w mʋrɔ. Wɛl a nɩbɛ bar a ba cen a tẽw pʋɔ na da a bõ-dɩraa.”

¹⁶Ɩ̃-cɛ a Jeeju yel ba: “Aa sɛw a ba na cen wa. Nyɩ mɩ̃ɛ, nyɩ́ kʋ ba a bõ-dɩraa.”

¹⁷A ba yel ʋ: “Saa tɛrɛ bom ka, ɩ̃ a ala ma ɩ bur-bie anuu nɩ jɩmɛ ayi tɛw wa.”

¹⁸A Jeeju yel ba: “Nyɩ́ de wa nɩ kʋ ma ka”,

¹⁹ɩ̃ yel a nɩbɛ á ba jɛ a mʋ̃ɔ juu. Ʋ de na a buru anuu nɩ a jɩmɛ ayi ala, dʋɔ ꞌwuoro nɩ a saa juu puorʼɩ̃ a Naaŋmɩn, ɩ̃ ŋma a buru kʋ a ʋ par-tuurbe a ba de po a nɩbɛ.

²⁰A ba jaa bõ-ƴene-ƴene ꞌwɔbʼã pi, ɩ̃ a par-tuurbe nɩɩr a bõ-ŋmara ala na cɛ sɛw pur pie-nʼayi.

²¹A bala na ꞌwɔb a buru na ta na dabsɩ ture anuu, ɩ̃ a pɔɔbɔ nɩ a bibiir ma be tɔ wa.

²²A jie naan a *Jeeju ƴɔ̃w na a ʋ *par-tuurbe a ba kpɛ a gbor pʋɔ de nĩe gãwna ʋ a man gaan, ɩ̃ ʋ wɛlɛ a nɩbɛ bara.

²³Ɩ̃ a mɩnɛ ʋ na wɛl ba bar baar, ʋ do na a tãw lõkor pʋɔ sɔɔlɩ̃, sʋɔrɔ a Naaŋmɩn. A jaanʋɔr ta na pɔw ʋ a be a ʋ yẽ,

²⁴ɩ̃-cɛ a gbor ʋlɔ dãa na cen jãa nɩ a gbẽgbere, a kʋ̃ɔ cara dama ʋ, a-na-ɩ sɛsɛb fure na tuoro ba.

²⁵A nɔraa kuon daar a Jeeju cere na a kʋ̃ɔ juu wɩɛrɛ a ʋ par-tuurbe sɛ̃.

²⁶A lɛ ba na nyɛ ʋ, ʋ cere a kʋ̃ɔ juu a lɛ, a nyɩrɩ̃ na dama ba a ba yel: “Kpɩɩn ʋ!” ɩ̃ wuure a dãbɛ̃-wuurfʋ.

²⁷Ɩ̃ a jie naan a Jeeju yel ba: “Nyɩ́ bar nyãa! Maa ʋ. Nyɩ taa ɩ a dãbɩ̃ɛ nyɔw nyɩ wa.”

²⁸A Pɩɛr yel ʋ: “Nɩ-kpɛ̃ɛ, a ala ɩ fʋ̃ʋ ʋ, ɩ ɩ̃ mɩ cen a kʋ̃ɔ juu wɩ a fʋ sɛ̃.”

²⁹A Jeeju yel ʋ: “Wa!” a Pɩɛr yi a gbor pʋɔ cere a kʋ̃ɔ juu wɩɛrɛ a Jeeju sɛ̃.

³⁰Ɩ̃-cɛ a mɩnɛ ʋ na nyɛ a sɛsɛb ʋ fure, dãbɩ̃ɛ nyɔw ʋ na, ʋ nyɔw ɩ̃ mʋrɔ a kʋ̃ɔ pʋɔ, ɩ̃ wuur yel: “Nɩ-kpɛ̃ɛ, faa ma!”

³¹A jie naan a Jeeju turʼã a nuu nyɔw nɩ ʋ ɩ̃ yel: “A fʋna ƴɔ̃w-nyãa pabaa sʋbɔ naa, bõ ɩ a fʋ baalɩ̃?”

³²Ɩ̃ a mɩnɛ ba na kpɛ a gbor pʋɔ baar, a sɛsɛb ŋmaa na.

³³A bala na be a gbor pʋɔ lo na gburĩ a dume puoro nɩ ʋ, yele nɩ: “Fʋ sɩrɩ̃ na ɩ a Naaŋmɩn Bie.”

³⁴A lɛ ba na gãw a man baar, ba ta na á Jenejarɛ-tẽw.

³⁵Ɩ̃ a mɩnɛ a ʋna tẽw nɩbɛ na nyɛ ʋ bɔ̃w ka a *Jeeju ʋ, ba tʋ̃ na yel a ten cẽcen deme ba jaa, a ba wɩ nɩ a wʋlɩ̃sɩ deme ba jaa,

³⁶ɩ̃ sʋɔrɔ ʋ a ʋ bar ba a ba sɩɩr a ʋ cẽcen nʋɔr tɛw, ɩ̃ a bala ba jaa na sɩɩr, ba kpaarʼã.