Read Birifor, Malba Matie Sɛbɛ 15 Bible Online

Matie Sɛbɛ 15 - Birifor, Malba bible

Matie Sɛbɛ 15

¹A ala ɩ̃ baar, a Jerujalɛm *Farɩsɩ nɩbɛ nɩ a *ƴɛr-kpɛn-bɔɔnbɔ wɩ na a *Jeeju sɛ̃ ɩ̃ soor ʋ:

²“Bõ ɩ a fʋ *par-tuurbe ma sãwna a sɩ tẽkorɩ̃ nɩ-bɛrɛ ƴɛrɩ̃sɩ a lɛ? A-na-ɩ a bala dɩrɛ a dɩb, ba maa pɛw a ba nur a mɩnɛ a puorfʋ ƴɛrɩ̃ na yel wa.”

³A Jeeju mɩ lɩɛb soor ba: “Ɩ̃ a nyɩmɩ, bõ ɩ a nyɩ ma de a nyɩ tẽkorɩ̃ ƴɛrɩ̃sɩ sãw nɩ a *Naaŋmɩn ƴɛr-kpɛn?

⁴A-na-ɩ a Naaŋmɩn ƴɛrɩ̃ yelʼã: ‘Yɔnɔ a fʋ sãa nɩ a fʋ mã,’ ɩ̃ lɛ yel: ‘A ʋlɔ na tʋrɔ a ʋ sãa mɩɩ a ʋ mã, a *sɛw na a ba na kú ʋ.’

⁵Ɩ̃-cɛ a nyɩmɩ, nyɩ yelʼã, áa nɩrɛ wa yel a ʋ sãa, mɩɩ a ʋ mã, áa bom lɛ ʋ naa dãa sũo nɩ ba, á ʋ de na kʋ a Naaŋmɩn,

⁶áa nɩrɛ ʋlɔ ma lɛ tɛrɛ sɔr na sũo a ʋ sãa nɩ a ʋ mã go wa. A nɔhɔ̃ nyɩ ma de a nyɩ tẽkorɩ̃ ƴɛrɩ̃ sãw nɩ a Naaŋmɩn ƴɛrɩ̃ bar.

⁷Nyɩna bɛbɛlbɛ naa! A Naaŋmɩn ƴɛr-hiere Ejayi dãa na sɩrɩ̃ tɛrɛ yel-mɩ̃ɛ a mɩnɛ ʋ na dãa yel a nyɩ ɩnɛ:

⁸‘Nʋɔr tɛw a nɩbɛ basɩmɛ ƴɔnɔ nɩ ma, ɩ̃-cɛ a ba suur jãa nɩ ma na.

⁹A ba puorfʋ ba na puoro ma ma tɛrɛ par wa, ɩ̃ a ba jaanfʋ ba na jaana a nɩbɛ ɩ na a nɩbɛ ƴɛrɩ̃sɩ tɛw.’ ”

¹⁰A *Jeeju bʋɔlʼã a nɩbɛ ba jaa a ba wɩ a ʋ sɛ̃, ʋ yel ba: “Nyɩ́ cɛl wõ a ƴɛrɩ̃ nanɩ.

¹¹Aa ɩ a ala na kpɛɛrɛ a nɩrɛ nʋɔr pʋɔ ɩ̃ sãwna ʋ wa, ɩ̃-cɛ a ala na yire a nɩrɛ nʋɔr pʋɔ, ala sãwna ʋ.”

¹²Ɩ̃ a mɩnɛ ʋ na ƴɛr a lɛ baar, a ʋ *par-tuurbe taw na ta ʋ ɩ̃ yel ʋ: “Fʋ bɔ̃w ka a mɩnɛ fʋ na ƴɛrɛ a lɛ, a cɛ na a Farɩsɩ nɩbɛ mɩɩ?”

¹³A Jeeju yel ba: “A tɩɛ lɛ a ɩ̃ saa juu Sãa na ma sɛl wa, na vʋ̃ɔ na.

¹⁴Nyɩ́ bar ba be! Jɔn ɩ̃ tawra taa. Ɩ̃ a ala ɩ a jɔ̃w tawra na a jɔ̃w, ba jaa ayi na lo na bɔw kpolo pʋɔ.”

¹⁵A Pɩɛr de na a ƴɛrɩ̃ ɩ̃ yel ʋ: “Man sɩ a sʋkpa naa par.”

¹⁶A Jeeju yel: “Nyɩmɩ mɩ, nyaa tɛrɛ a yɛ̃ na bɔ̃w a par wa?

¹⁷Nyaa bɔ̃w ka a bom lɛ na kpɛɛrɛ a nɩrɛ nʋɔr pʋɔ ma suu na a puorɩ̃, ɩ̃ lɛ lɩɛb yi a sãɓanɩ̃ wa?

¹⁸Ɩ̃-cɛ a ala na yire a nɩrɛ nʋɔrɩ̃ yi na a ʋ suur pʋɔ; ala sãw na a nɩrɛ.

¹⁹A-na-ɩ a tɩɛrɩ̃-faar, a nɩrɛ kúfʋ, a pɔɔ-kpee nɩ a dab-kpee ganifʋ, a pebfʋ, a jufʋ, a mɩl-taa, nɩ a korfʋ,

²⁰ala yire a nɩrɛ suur pʋɔ sãwna ʋ. Ɩ̃-cɛ a dɩb dɩfʋ nɩ a nu-dɛɛr ala a puorfʋ ƴɛrɩ̃ na ciire ma sãwna nɩrɛ wa.”

²¹A mɩnɛ a *Jeeju na yi a be, ʋ cenʼã a Tɩɩr nɩ a Sɩdɔ̃-ten nɔɛ.

²²Ɩ̃ a Kana-tẽw pɔw kãw na be a be yi na wuure tuoro nɩ ʋ: “Nɩ-kpɛ̃ɛ yaa! *Davɩtɩ Bie wee! Bɔ̃w ma nãw! A kɔ̃tɔn ire na a ɩ̃ bi-pɔw, a nyɩrɩ̃ wono ʋ.”

²³Ɩ̃ a Jeeju ma yel ʋ bom wa. A ʋ *par-tuurbe taw ta ʋ ɩ̃ sʋɔrɔ ʋ a ʋ diw a pɔw bar, a-na-ɩ ʋ wuure na tuure nɩ ba.

²⁴A Jeeju yel: “A *Ɩsɩrayɛl nɩbɛ na bɔr a piir kaarɩ̃, bala ɩnɛ tɛw ba tʋ̃ ma.”

²⁵Ɩ̃-cɛ a pɔw wa na lo gburĩ a dume a ʋ nii-sɔw ɩ̃ yel: “Nɩ-kpɛ̃ɛ, sũo ma!”

²⁶A Jeeju yel ʋ: “Aa vɩɛlɛ a ba na de a bibiir dɩb lɔb ƴɔ̃w a baar wa.”

²⁷A pɔw yel ʋ: “Nɩ-kpɛ̃ɛ, sɩrɛ jaa ʋ, ɩ̃ má a baar ma dɩrɛ na a dɩb ŋmara ala na loro a ba súɔrbɔ pulẽe.”

²⁸A Jeeju yel ʋ: “Pɔw, a fʋ yɔ̃w-nyãa bɛrmɛ na. A na maalʼã a fʋ jie a mɩnɛ fʋ na bʋɔrɔ.” Ɩ̃ a daar ʋlɔ pʋɔ a ʋ bi-pɔw kpaarʼã.

²⁹A mɩnɛ a *Jeeju na yi a be, ʋ cenʼã a Galile man nʋɔr ɩ̃ do a tãw jɛ.

³⁰A nɩbɛ yayaw wɩ na a ʋ sɛ̃ tɛrɛ nɩ a gbɛɛ, a ɩ̃gan saansɩ deme, a jɔn, a won, nɩ a wʋlɩ̃sɩ deme ŋmɛɛ yaw go, na bin a ʋ pulẽe, ɩ̃ ʋ kpaar ba.

³¹A nɩbɛ nʋɔr ko ba a mɩnɛ ba na nyɛ a won a ba ƴɛrɛ, a ɩ̃gan saansɩ deme kpaar, a gbɛɛ cere, ɩ̃ a jɔn mɩ nyɛrɛ, ɩ̃ ba nyɔw na ɩ̃ pɛwrɛ a *Ɩsɩrayɛl Naaŋmɩn.

³²A *Jeeju bʋɔlʼã a ʋ *par-tuurbe a ba wɩ, ʋ yel ba: “A nãw nyɔw ma na a nɩbɛ basɩmɛ ɩnɛ, a-na-ɩ ba be nɩ ma na a bibie ata, ɩ̃ baa cãa tɛrɛ dɩb dɩrɛ wa. Maa bʋɔrɔ ɩ̃ bar ba a lɛ nɩ a kɔ̃ wa, a mɩnɛ ba kɔ̃ wa lo sɔr pʋɔ wa.”

³³A ʋ par-tuurbe soor ʋ: “Nyɩnɛ sɩ na tʋɔ nyɛ a bõ-dɩraa a na sɛw a nɩ-par-bʋrɔ na, a ka a wɛkarʼã pʋɔ?”

³⁴A Jeeju lɩɛb soor ba: “Bur-bie amɩnɛ nyɩ tɛrɛ?” a ba yel: “Sɩ tɛrɛ na bur-bie anuu-nʼayi, ɓã jɩm-bil ŋmɛɛ.”

³⁵Ʋ ƴɔ̃w na a nɩbɛ a ba jɛ a tene,

³⁶ʋ de a bur-bie anuu-nʼayi nɩ a jɩmɛ, ɩ̃ a mɩnɛ ʋ na puor a Naaŋmɩn ƴɔ̃w, ʋ ŋma na kʋ a ʋ par-tuurbe, a ba de po a nɩbɛ,

³⁷a ba ꞌwɔb pi ba jaa, ɩ̃ cɛ a bõ-ŋmara na cɛ, a par-tuurbe nɩɩr sɛw pur anuu-nʼayi.

³⁸A bala na ꞌwɔb a buru, ba ɩ na dabsɩ ture anaan, ɩ̃ a pɔɔbɔ nɩ a bibiir ma be tɔ wa.

³⁹Ɩ̃ a mɩnɛ a Jeeju na bar a nɩbɛ a ba kul, ʋ kpɛ na a gbor cen a Magadã-tẽw nʋɔr.