Read Birifor, Malba Matie Sɛbɛ 19 Bible Online

Matie Sɛbɛ 19 - Birifor, Malba bible

Matie Sɛbɛ 19

¹A mɩnɛ a *Jeeju na baar a ana jaanfʋ, ʋ yi na a Galile wɩɛr ɩ̃ cen na ta a Jude wɩɛr nʋɔr a Jʋrdɛ̃ man gaan.

²A nɩ-yaw tuure ʋ na ʋ kpaar a wʋlɩ̃sɩ deme a be.

³A *Farɩsɩ nɩbɛ ŋmɛɛ taw na ta ʋ, bɩɩrɛ ʋ yele nɩ: “Sɔr be na be a nɩrɛ na tʋɔ diw a ʋ pɔw bar bom kãw ɩnɛ lɛ mɩɩ?”

⁴Ʋ mɩ lɩɛb soor ba: “Nyaa ꞌwuor nyɛ a mɩnɛ a na yel a Naaŋmɩn Sɛbɛ pʋɔ wa? Áa korĩ-cɛ jaa a ʋlɔ na ɩ a Yel-mɩɛrɛ mɛ ba na a daba nɩ a pɔw,

⁵ɩ̃ yel, áa ala ɩnɛ a daba na barʼã a ʋ sãa nɩ a ʋ mã, ɩ̃ mar taa nɩ a ʋ pɔw a ba lɩɛb ɩ nɩ-bõ-ƴen.

⁶A lɛ, baa lɛ cãa ɩ ayi go wa, ɩ̃-cɛ nɩ-bõ-ƴen ba ɩ. Ala-ɩ̃-sɔ, a nɩrɛ ʋ taa wa ŋmara a ala a Naaŋmɩn na ɓã taa bar wa.”

⁷A Farɩsɩ nɩbɛ lɛ soor ʋ: “Ɩ̃ bõ ɩnɛ a Mowisi ƴɔ̃w sɩ a sɩ ma kʋ a pɔw a diwfʋ sɛbɛ ɩ̃ pãa diw ʋ bar?”

⁸A Jeeju yel ba: “A Mowisi kʋ nyɩ na a sɔr a nyɩ ma diw a nyɩ pɔɔbɔ bar, a-na-ɩ a nyɩ sube kpɛmɛ na. Ɩ̃-cɛ a korĩ-cɛ, aa dãa be a lɛ wa.

⁹Ɩ̃ yele nyɩ na, a ala ɩ a nɩrɛ diw na a ʋ pɔw bar na ma maala a burbur wa, ɩ̃ lɩɛb kul a pɔw kpee, ʋ maalʼã fãa.”

¹⁰A ʋ *par-tuurbe yel ʋ: “A ala ɩ lɛ a be a daba nɩ a ʋ pɔw jie, a kulfʋ barfʋ sa na.”

¹¹A Jeeju yel ba: “Aa ɩ a dabsɩ ba jaa ɩ̃ tʋɔrɔ sɔwrɔ a ƴɛrɩ̃ naa wa, ɩ̃-cɛ a bala tɛw a Naaŋmɩn na kʋ a tʋɔfʋ.

¹²A-na-ɩ a ŋmɛɛ be na be a ba dɔw ba a ba ab, a ŋmɛɛ mɩ be be a ɩ nɩbɛ ɩ̃ maal ba a ba ab, ɩ̃ a ŋmɛɛ mɩ jɛ a lɛ a saa juu fãw ɩnɛ. A ʋlɔ na tʋɔrɔ sɔwrɔ, ú sɔw.”

¹³Ɩ̃ ba wɩ nɩ na a bibi-bil a *Jeeju sɛ̃, a ʋ dɔɔl ba a nuu sɩɩrʼɩ̃ a Naaŋmɩn ƴɔ̃w ba, ɩ̃-cɛ a ʋ *par-tuurbe gala ba na.

¹⁴A Jeeju lɩɛb yel ba: “Nyɩ́ bar a bibiir a ba wa a ɩ̃ sɛ̃. Nyɩ taa mɔ̃wnɔ ba bar wa, a-na-ɩ a bala na wɔ̃ a ba kaarɩ̃, bala sɔ a saa juu fãw.”

¹⁵Ɩ̃ a mɩnɛ ʋ na dɔɔl ba a nur baar, ʋ irʼã a be cen.

¹⁶Daba kãw taw na ta a *Jeeju ɩ̃ soor ʋ: “Jãjaana, bõ-son buor ɩ̃ na maal wa pɔw a baa-kɔ̃-tɛw?”

¹⁷A Jeeju lɩɛb soor ʋ: “Bõ ɩ a fʋ sooro ma a bõ-son ɩnɛ? Bõ-ƴen tɛw ɩ̃ ɩ a son. Ɩ̃-cɛ a fʋ̃ʋ bʋɔrɔ fʋ pɔw a baafʋ, fú jɔrɔ a ƴɛr-kpɛn.”

¹⁸Ʋ soor ʋ, á abõ? A Jeeju yel ʋ: “Taa kʋrɔ nɩrɛ wa, taa gana nɩ pɔɔ-kpee wa, taa jure wa, taa ŋmara a jir-kara ƴɔnɔ a nɩrɛ wa,

¹⁹ƴɔnɔ a fʋ sãa nɩ a fʋ mã, ɩ̃ nʋnɔ a fʋ tɔ-sʋbɔ a fʋ kaarɩ̃.”

²⁰A polbile yel ʋ: “Ɩ̃ maalʼã a ala a jaa fɛw. Ɩ̃ bõ lɛ cɛ ma go?”

²¹A Jeeju yel ʋ: “A fʋ̃ʋ bʋɔrɔ fʋ ɩ a cɛcɛ, cen na woor a fʋ yele da, de a libie po a nãw deme, ɩ̃ wa tuure ma, ɩ̃ fʋ na pɔw na a na-yele a saa juu.”

²²A mɩnɛ a polbile na wõ a ana ƴɛrɩ̃sɩ, a ʋ suur sãw ʋ na, ʋ cere, a-na-ɩ naaba ʋ ɩ.

²³Ala-ɩ̃-sɔ a Jeeju yel a ʋ *par-tuurbe: “Yel-mɩ̃ɛ ɩ̃ yele nyɩ, a kpɛmɛ na a naaba na kpɛɛrɛ a saa juu fãw pʋɔ.

²⁴Ɩ̃ lɛ yele nyɩ na, a yɔw na a nyʋɔmɩ na tɔlɔ a mɩsɩn bɔw pʋɔ gãw a naaba na kpɛɛrɛ a Naaŋmɩn fãw pʋɔ.”

²⁵A lɛ a ʋ par-tuurbe na wõ a ala, a ba nɔɛ nyɩrɩ̃ na ko ba a ba yel: “A ala ɩ lɛ ʋ, ala na tʋɔ pɔw a faafʋ?”

²⁶A Jeeju ꞌwuor ba ɩ̃ yel ba: “A kpɛmɛ na a nɩbɛ jie, ɩ̃-cɛ a Naaŋmɩn jie bom ma kpɛmɛ wa.”

²⁷A Pɩɛr yel ʋ: “Nyɛ a sɩmɩ, sɩ barʼã a yele a jaa ɩ̃ tuure fʋ; bõ sɩ nɔɔ wa pɔw?”

²⁸A Jeeju yel ba: “Yel-mɩ̃ɛ ɩ̃ yele nyɩ, a tẽ-paalaa daar, a lɛ a Nɩbɛ Bie nɔɔ jɩnɛɛ a ʋ yo-yifʋ naa-dakɔw juu, a nyɩmɩ mɩ na tuure ma, nyɩ nɔɔ mɩ jɛ na a naa-dakɔɔr pie-nʼayi jur nyɩ jaa, ɩ̃ guoro a *Ɩsɩrayɛl bal pie-nʼayi ƴɛrɩ̃sɩ.

²⁹Ɩ̃ a bala ba jaa na bar a ba yie, a ba yɛɛr, a ba yɛ-pɔɔbɔ, a ba saanba, a ba mã nʋmɔ, a ba bibiir mɩɩ a ba por, ba nɔɔ pɔw na a dɔɔlaa gbɛɛ kʋbaa, ɩ̃ cãa lɛ pɔw a baa-kɔ̃-tɛw.

³⁰Ɩ̃-cɛ a yaw jie na ɩ a ni-dierbe nɔɔ ɩ na a par-pɔɔrbɔ, ɩ̃ a bala na ɩ a par-pɔɔrbɔ nɔɔ lɛ ɩ na a ni-dierbe.”