Read Birifor, Malba Matie Sɛbɛ 2 Bible Online

Matie Sɛbɛ 2 - Birifor, Malba bible

Matie Sɛbɛ 2

¹Ba dɔw na a *Jeeju a Bɛtɩlɛm na be a Jude wɩɛr. A ʋna daarʼãa a *Ɛrɔdɩ ɩ̃ dãa ɩ a jamana. A ɩ na fɩ̃ɩ a bɔ̃bɔɔnbɔ na ma ꞌwuoro a ŋmarbie yi na a tẽw parɩ̃ ɩ̃ wɩ a Jerujalɛm-tẽw pʋɔ

²ɩ̃ sooro: “Nyɩnɛ ba dɔw a bibile ʋlɔ na ɩ a Jufisɩ jamana? A-na-ɩ sɩ nyɛ na a ʋ ŋmarbir a tẽw parɩ̃ ɩ̃ wa bʋɔrɔ sɩ puor ʋ.”

³A lɛ a jamana Ɛrɔdɩ na wõ a ƴɛrɩ̃ ʋlɔ, a dama ʋ na nɩ a Jerujalɛm tẽ-deme ba jaa,

⁴ʋ bʋɔl a Naaŋmɩn yir *baar-lo-nɩ-bɛrɛ, nɩ a *ƴɛr-kpɛn-bɔɔnbɔ kpaarɩ̃ taa ɩ̃ soor ba: “Nyɩnɛ ba dɔw a *Kirisi?”

⁵A ba yel ʋ: “A Bɛtɩlɛm na be a Jude wɩɛr pʋɔ ʋ. A-na-ɩ a yelʼã a ƴɛr-hiere sɛbɛ pʋɔ:

⁶‘A fʋ̃ʋ Jude Bɛtɩlɛm, faa nyɩrɩ̃ pab a Jude nɩ-bɛrɛ jie wa, a-na-ɩ a fʋ pʋɔ a ni-diere nɔɔ yi Ɩ̃ ɩrɛɛ a dɔ-cɩɩnaa a ɩ̃ nɩbɛ *Ɩsɩrayɛl jie.’ ”

⁷A Ɛrɔdɩ sɔɔlɩ̃ na bʋɔl a bɔ̃bɔɔnbɔ bala ɩ̃ soor ba a ba miil ʋ a bibir ʋlɔ a ŋmarbir na nyɩr ba.

⁸Ɩ̃ ʋ tʋ̃ ba na a ba cen a Bɛtɩlɛm ɩ̃ yel: “Nyɩ́ cen na bɔ̃w ꞌwuor bɔ̃w a jie ʋlɔ a bibile na be. A nyɩmɩ wa nyɛ ʋ, nyɩ́ wa yel ma ɩ̃ mɩ cen na puor ʋ.”

⁹A lɛ ba na cɛl a jamana ƴɛrɩ̃ baar, ba cenʼã. Ɩ̃ a lɛ ba na cere, ba nyɛ na a ŋmarbir ʋlɔ na yi a tẽw parɩ̃ ʋ be a ba nii-sɔw cere. A ŋmarbir cenʼã lɛɛ na ta a jie ʋlɔ a bibile na be ɩ̃ ɩraa a ʋ ju-sɔ̃w.

¹⁰A lɛ ba na nyɛ a ŋmarbir, nʋ̃ɔ kpɛ̃ɛ nyɔw ba na a ba cɩlɛ.

¹¹Ba kpɛ na a yir pʋɔ na nyɛ a bibile ɩ̃ lo gburĩ a dume puor ʋ, ɩ̃ yuo a ba wʋʋr ir a ba bom-pɔrsɩ kʋ ʋ. Ba kʋ ʋ na a sɛlmɛ, nɩ a *tɩ̃ɩ-nyu-vɩlaa, nɩ a tɩ̃ɩ ʋlɔ ba na bʋɔlɔ a *mɩɩr.

¹²A Naaŋmɩn yel ba na a jãasʋlɩ̃ pʋɔ, a ba taa lɛ lɩɛb cen a Ɛrɔdɩ sɛ̃ wa, ala-ɩ̃-sɔ a ba de a sɔr kpee kul a ba tẽw.

¹³A lɛ ba na lɩɛb kul baar, a Nɩ-kpɛ̃ɛ sɩ-tʋnaa nyɩrʼã a Jojɛfʋ a jãasʋlɩ̃ pʋɔ ɩ̃ yel ʋ: “Ir de a bibile nɩ a ʋ mã jɔ cenʼɩ̃ a Ejibti-tẽw na fʋ jɛ a be wa ta nɩ a daar ʋlɔ ɩ̃ na ƴɔ̃w fʋ, a-na-ɩ a *Ɛrɔdɩ nɔɔ bʋɔrɔ na ʋ kú a bibile.”

¹⁴Ala-ɩ̃-sɔ a Jojɛfʋ irʼã a tɩsɔw de a bibile nɩ a ʋ mã cere nɩ a Ejibti-tẽw,

¹⁵a ba be a be wa ta nɩ a Ɛrɔdɩ kũu daar. A lɛ a ta, a na ɩ a ala a Nɩ-kpɛ̃ɛ na dãa yel a ʋ ƴɛr-hiere nʋɔr pʋɔ: “Ɩ̃ bʋɔlʼã a ɩ̃ bi-daba ʋ yi a Ejibti-tẽw pʋɔ.”

¹⁶A mɩnɛ a *Ɛrɔdɩ na nyɛ bɔ̃w ka a bana bɔ̃bɔɔnbɔ na yi a tẽw parɩ̃ wa, a ba bɛlɩ̃ ʋ na, ʋ nyɛ na suur yaw. Ʋ ƴɔ̃w na a ba kú a da-bil ba na dɔwrɔ ba jaa, wa ta nɩ a bala na pɔw a yomo ayi, a Bɛtɩlɛm nɩ a ten ala na be a ʋ lõbobo pʋʋr. Ʋ maalʼã a ala tu nɩ a mɩnɛ ʋ na dãa wõ a saanba jie a ŋmarbir nyɩrfʋ daar.

¹⁷Ɩ̃ a lɛ a maal a ɩ a mɩnɛ a ƴɛr-hiere Jeremi ƴɛrɩ̃ na dãa yel:

¹⁸“Ba wõ na a kɔkɩr na wuure a Arama-tẽw pʋɔ sɔrɔ nɩ a kõ-yelbie kono nɩ yaw. A Arasɛl kono a ʋ bibiir ɩnɛ, a ba ma ƴɛw ʋ ʋ jaar, a-na-ɩ a ʋ bibiir ma cãa be wa.”

¹⁹A lɛ a *Ɛrɔdɩ na kpi baar, a Jojɛfʋ nyɛ na a Nɩ-kpɛ̃ɛ sɩ-tʋnaa a jãasʋlɩ̃ pʋɔ a Ejibti-tẽw pʋɔ. A sɩ-tʋnaa yel ʋ:

²⁰“Ir de a bibile nɩ a ʋ mã na fʋ lɛ lɩɛb kulʼɩ̃ a *Ɩsirayɛl-tẽw pʋɔ, a-na-ɩ a bala na dãa bʋɔrɔ ba kú a bibile, ba kpi na.”

²¹A Jojɛfʋ irʼã a lɛ, de a bibile nɩ a ʋ mã, lɩɛb kulʼɩ̃ a Ɩsɩrayɛl-tẽw pʋɔ.

²²Ɩ̃-cɛ a mɩnɛ ʋ na wõ a Akɛlaasɩ na de a ʋ sãa Ɛrɔdɩ jɩnaafʋ jie ɩ a jamana a Jude-tẽw pʋɔ, dãbɩ̃ɛ nyɔw ʋ na a be kpɛfʋ. Ɩ̃ a lɛ ʋ na dãa wõ a ƴɛr-manaa a jãasʋlɩ̃ pʋɔ, a Galile-tẽw wɩɛr ʋ cen naa ʋ jɛ a tẽw ʋlɔ ba na bʋɔlɔ a Najarɛtɩ.

²³A maalʼã a lɛ a mɩnɛ a ƴɛr-hierbe ƴɛrɩ̃ na ɩrɛɛ a sɩrɛ: “Ba na bʋɔlɔ ʋ na a Najarɛtɩ nɩrɛ.”