Read Birifor, Malba Matie Sɛbɛ 20 Bible Online

Matie Sɛbɛ 20 - Birifor, Malba bible

Matie Sɛbɛ 20

¹“A-na-ɩ a saa juu fãw wɔ̃ na taa nɩ a da-yi-kpɛɛrɛ na yi a dʋ̃ꞌwʋlɩ̃ ɓaaraa bʋɔrɔ a tʋ̃tʋnbɔ ƴɔnɔ a ʋ dɩvɛ̃ tɩɩr puo pʋɔ.

²Ɩ̃ a mɩnɛ ʋ na nyɛ ba, a ba sɔr taa a libie ala na sɛw nɩ a bibir bõ-ƴen tʋn, ʋ ƴɔ̃w ba na a ba cen a ʋ puo pʋɔ.

³Ʋ lɛ yi na a mɩnɛ a mɔtɔ̃w na pur duoro, na ʋ lɛ nyɛ a nɩbɛ ŋmɛɛ a ba ɩraa a daa pʋɔ a pɔrɔ,

⁴ʋ yel ba: ‘A nyɩmɩ mɩ, nyɩ́ cen a dɩvɛ̃ tɩɩr puo pʋɔ ɩ̃ ɩ̃ na ya nyɩ na a ala na sɛw nyɩ,’

⁵a ba cen. A ʋna yi-kpɛɛrɛ lɛ yi na a mɔtɔ̃-tuo nɩ a mɔtɔ̃w gɔrfʋ daar lɛ maal a lɛ go.

⁶A mɔtɔ̃w balfʋ daar, ʋ lɛ yi na nyɛ a nɩŋmɛɛ a ba ɩraa, ʋ soor ba: ‘Bõ ɩ a nyɩ ɩraa a ka a mɔtɔ̃w jaa a pɔrɔ?’

⁷A ba yel ʋ: ‘A-na-ɩ saa tɛrɛ tʋn wa.’ Ʋ yel ba: ‘A nyɩmɩ mɩ, nyɩ́ cen a ɩ̃ dɩvɛ̃ tɩɩr puo pʋɔ.’

⁸“A lɛ a jaanʋɔr na ta, a yi-kpɛɛrɛ yelʼã a ʋlɔ na ꞌwuoro a ʋ tʋmɔ á ʋ bʋɔl a tʋ̃tʋnbɔ ɩ̃ ya ba. A ʋ de nĩe ya a par-pɔɔrbɔ, wa ta nɩ a bala na dãa de nĩe cen.

⁹A bala na bɩɛr cen a mɔtɔ̃w balfʋ daar, ba mɩ pɔw na a bibir bõ-ƴen yar nɩ a dʋ̃ꞌwʋlɩ̃ deme.

¹⁰Ɩ̃-cɛ a mɩnɛ ʋ na ya wa ta a dãdãw nɩbɛ, ba tɩɛrʼã beeka a ba yar na gãw na a lɛ, ɩ̃-cɛ a bala mɩ, a ʋna yar bõ-ƴen ba mɩ pɔw ba jaa.

¹¹A lɛ ba na pɔw a ba libie baar, ba hũhune na a yi-kpɛɛrɛ

¹²yele nɩ: ‘A basɩmɛ na bɩɛr wɩ, a lɛɛr-bõ-ƴen tʋn ba tʋ̃ ɩ̃ a fʋ ya ba a sɩ jɛ̃ tar, ɩ̃-cɛ a sɩmɩ, a mɔtɔ̃w jaa sɩ tʋ̃ a tʋn a mɔtɔ̃w wõ sɩ.’

¹³Ɩ̃ a yi-kpɛɛrɛ yelʼã a kãw: ‘Ɩ̃ baraa! Maa bɛlɩ̃ fʋ wa. Aa ɩ a nɔhɔ̃ sɩ dãa sɔr taa wa?

¹⁴De a fʋ ben cere nɩ. A nʋmɔ ma na ɩ̃ na kʋ a ʋlɔ na bɩɛr cen a mɩnɛ ɩ̃ na mɩ kʋ fʋ.

¹⁵Maa tɛrɛ sɔr na maalʼɩ̃ a ɩ̃ yele a mɩnɛ ɩ̃ na ƴɔ̃w nyãa wa? Mɩɩ nyuur fʋ tɛrɛ a ɩ̃ pʋ-pɩlaa ɩnɛ?’ ”

¹⁶Ɩ̃ a *Jeeju pãa yel: “A nɔhɔ̃ a nɔɔ wɔ̃. A par-pɔɔrbɔ nɔɔ ɩ na a ni-dierbe, ɩ̃ a ni-dierbe lɛ ɩ a par-pɔɔrbɔ.”

¹⁷A lɛ a *Jeeju na duoro a Jerujalɛm, ʋ ŋmaa na a ʋ *par-tuurbe pie-nʼayi kpee ɩ̃ mana kʋrɔ ba cere nɩ:

¹⁸“Nyɩ́ nyɛ, sɩ duoro na a Jerujalɛm, ɩ̃ ba na nyɔw na a *Nɩbɛ Bie ƴɔ̃w a Naaŋmɩn *baar-lo-nɩ-bɛrɛ nɩ a *ƴɛr-kpɛn-bɔɔnbɔ nuu pʋɔ, ɩ̃ a bala, ba na ƴɔ̃w na a ba na kʋ ʋ,

¹⁹ɩ̃ taw ʋ cenʼɩ̃ na kʋ a nɩ-bʋlsɩ a ba na la ʋ, ɩ̃ fɔb v nɩ a kpaarsɩ, ɩ̃ kpa ʋ a nɩ-kʋ-daa juu, ɩ̃-cɛ a bibie ata pʋɔ v na lɛ irʼã a kũu pʋɔ.”

²⁰A Jebede pɔw taw na a v bi-dabsɩ cenʼɩ̃ a *Jeeju sɛ̃, ɩ̃ lo gburĩ a dume bʋɔrɔ ʋ sʋɔr ʋ bom.

²¹A Jeeju soor v: “Bõ fʋ bʋɔrɔ?” Ʋ yel: “A ɩ̃ bi-dabsɩ ayi basɩmɛ fʋ na nyɛ, sɔw a bõ-ƴen na jɛ a fʋ dʋrɩ̃ loor ɩ̃ a kãw a fʋ gʋbaa loor a lɛdaar fʋ na ɩrɛɛ a jamana.”

²²A Jeeju yel ba: “Nyaa bɔ̃w a ala nyɩ na sʋɔrɔ wa. Nyɩ na tʋɔ na nyu nɩ a ŋman tuo ʋlɔ ɩ̃ na wa nyuure nɩ mɩɩ?” A ba yel á ɔɔ, á ba na tʋɔ na.

²³A Jeeju lɛ yel ba: “Nyɩ na sɩrɩ̃ na nyu nɩ a ɩ̃ ŋman tuo ʋlɔ; ɩ̃-cɛ a ɩ̃ dʋrɩ̃ nɩ a ɩ̃ gʋbaa loor jɛfʋ, aa ɩ maa sɛw na tɩɩr wa. A na ɩ na a bala ɩnɛ a ɩ̃ Sãa na gbɛɛrɩ̃.”

²⁴A lɛ a *par-tuurbe pie ŋmɛɛ na wõ a ala, nyuur nyɔw ba na a ba yɛɛr ayi bala ɩnɛ.

²⁵A Jeeju bʋɔl ba ba jaa ɩ̃ yel: “Nyɩ bɔ̃w ka a ten bʋrɔ bʋrɔ jamansɩ ma fɛrɛ na a ba nɩbɛ, ɩ̃ a ba nɩ-bɛrɛ ma fule ba.

²⁶Ɩ̃ aa ɩ lɛ a na wɔ̃ a nyɩ jie wa. Ɩ̃-cɛ a nɩrɛ ʋlɔ na ɛ̃ɛ bʋɔrɔ v ɩ a kpɛ̃ɛ a nyɩ pʋɔ, v sɛw na na ɩ a nyɩ tʋ̃tʋnɔ,

²⁷ɩ̃ a ʋlɔ na bʋɔrɔ v ɩ a dãdãw sʋbɔ, v sɛw na na ɩ a nyɩ gbãgbaa.

²⁸A-na-ɩ a *Nɩbɛ Bie ma mɩ wa a ba na tʋnɔ kʋrɔ v wa, ɩ̃-cɛ v wa na na tʋnɔ kʋrɔ a nɩbɛ ɩ̃ naa v tɩɩr a v baafʋ tɛ̃w nɩ a nɩ-yaw baafʋ ɩ̃ faa ba.”

²⁹A mɩnɛ ba na yire a Jeriko-tẽw pʋɔ, a nɩ-yaw tuure v na.

³⁰Jɔn ayi jɛ na be a sɔr nʋɔr, ɩ̃ a mɩnɛ ba na wõ áa *Jeeju ɩ̃ tɔlɔ, ba wuure na yele nɩ: “Nɩ-kpɛ̃ɛ yaa! *Davɩtɩ Bie wee! Bɔ̃w sɩ nãw!”

³¹Ɩ̃ a nɩbɛ tana ba yele nɩ á ba sine gɔn, ɩ̃-cɛ a ba jaar ɩ̃ wuure nɩ kpɛ̃w: “Nɩ-kpɛ̃ɛ yaa! Davɩtɩ Bie wee! Bɔ̃w sɩ nãw!”

³²A Jeeju ɩraa, ɩ̃ bʋɔl ba soor: “Bõ nyɩ bʋɔrɔ ɩ̃ maal nyɩ?”

³³a ba yel: “Nɩ-kpɛ̃ɛ, maal a sɩ mimie a nyɛrɛ,”

³⁴a nãw nyɔw a Jeeju, v sɩɩr a ba mimie, a ba lɛ nyɛrɛ a jie naan ɩ̃ tuure ʋ.