Read Birifor, Malba Matie Sɛbɛ 23 Bible Online

Matie Sɛbɛ 23 - Birifor, Malba bible

Matie Sɛbɛ 23

¹A ala ɩ̃ baar, a *Jeeju ƴɛrɛ na na a nɩbɛ ba jaa na a ʋ *par-tuurbe,

²ɩ̃ yel: “A *ƴɛr-kpɛn-bɔɔnbɔ na a *Farɩsɩ nɩbɛ de na a Mowisi ƴɛr-kpɛn jaanfʋ jaana nyɩ.

³Ala-ɩ̃-sɔ a bom jaa lɛ ba na yele nyɩ, nyɩ́ sɔw ɩ̃ maala, ɩ̃-cɛ nyɩ taa wa tɔɔnɔ ba wa, a-na-ɩ ba ma ƴɛrɛ na ɩ̃ maa maala wa.

⁴Ba ma lũ na a to-bɛrɛ, ɩ̃ ma ɓɔw dɔɔl a nɩbɛ bɔ̃wmɩ, ɩ̃-cɛ baa sɩɩrɛ na a ba nuu fɩ̃ɩ wa.

⁵Ɩ̃ a ba tʋmɔ a jaa ba na maala, ba ma maala na a nɩbɛ na ꞌwuoro ba. Ba ma maalʼã a ƴɛr-kpɛn wɔ-bɛrɛ[4] lũ ƴɔ̃w a ba diirɩ̃ mɩɩ a ba nurɩ̃, ɩ̃ mɩ ƴɔ̃w a yel-gbɛ̃gbɛɛlsɩ bɛ̃bɛrɛ a ba cẽcen nʋɔr cere na.

⁶A bala cen a fɛtɩ jie, a ma nʋmɔ ba na a ba na ma jɛ a dakɔɔ-dɩɛlsɩ jur na a nii-sɔw dakɔɔr a ba *puorfʋ yie pʋɔ, a nɩbɛ na tʋɔ nyɛ ba.

⁷A bala kpɛ a daa pʋɔ, a ma nʋmɔ ba na a nɩbɛ ba jaa na puoro ba, bʋɔlɔ na ba a ‘Jãjaana’.

⁸Ɩ̃-cɛ a nyɩmɩ, nyɩ taa ɩ a ba bʋɔlɔ nyɩ ‘Jãjaana’ wa, a-na-ɩ nyɩ jaa ɩ na yɛɛr, ɩ̃ bõ-ƴen tɛw ɩ̃ ɩ a nyɩ Jãjaana.

⁹Ɩ̃ nyɩ taa bʋɔlɔ nɩrɛ a ‘sãa’ ka a tẽw pʋɔ wa, a-na-ɩ Sãa bõ-ƴen nyɩ tɛrɛ, a ʋlɔ na be a saa juu.

¹⁰Nyɩ taa mɩ ɩ a ba bʋɔlɔ nyɩ a ‘ni-diere’ wa, a-na-ɩ Ni-diere bõ-ƴen nyɩ tɛrɛ, a ʋlɔ ɩ̃ ɩ a *Kirisi,

¹¹A ʋlɔ na ɩ a kpɛ̃ɛ a nyɩ sɔ̃w na ɩ na a nyɩ tʋ̃tʋnɔ.

¹²Ɩ̃ a ʋlɔ na bʋɔrɔ a yo-yifʋ, a ʋ yuor na suu na, ɩ̃-cɛ a ʋlɔ na pab a ʋ mɩ̃ɛ, a ʋ yuor na do na.”

¹³“Nabier na pɔw na a nyɩmɩ *ƴɛr-kpɛn-bɔɔnbɔ na a *Farɩsɩ nɩbɛ. Nyɩ ɩ na bɛbɛlbɛ! A-na-ɩ nyɩ ma piw na a saa juu fãw tɛɛlɛ a nɩbɛ kpɛfʋ ɩnɛ. A nyɩmɩ mɩ̃ɛ ma kpɛɛrɛ wa, ɩ̃ ma mɩ bara a bala na bʋɔrɔ a ba na kpɛ wa. [

¹⁴“Nabier na pɔw na a nyɩmɩ ƴɛr-kpɛn-bɔɔnbɔ na a Farɩsɩ nɩbɛ. Nyɩ ma ŋmama na a kpɩ̃ɩ-pɔɔbɔ yele diere a jaa, ɩ̃ ma bɛlɩ̃ puoro kama na, a nɩbɛ na nyɛ nyɩ. Ala-ɩ̃-sɔ nyɩ na pɔw na a kpãafʋ ʋ bɛlɩ̃.]

¹⁵“Nabier na pɔw na a nyɩmɩ ƴɛr-kpɛn-bɔɔnbɔ na a Farɩsɩ nɩbɛ. Nyɩ ma yʋɔrɔ na a jiir a jaa a ten a jaa pʋɔ, bʋɔrɔ nyɩ lɩɛb nɩ-bõ-ƴen ʋ puoro a nyɩ kaarɩ̃. Ɩ̃-cɛ a ʋlɔ wa sɔw, nyɩ ma maal ʋ na ʋ ɩ nɩrɛ na sɛw na a wɛfʋ vũu pʋɔ kpɛfʋ, gãw nyɩ gbɛɛ ayi.

¹⁶“Nabier na pɔw na a nyɩmɩ tɔtɔɔrbɔ. Nyɩ ɩ na jɔn. Nyɩ ma yelʼã, áa nɩrɛ wa pɔ na a Naaŋmɩn puor-yir kpɛ̃ɛ, áa nyɔwrɔ ʋ wa, ɩ̃-cɛ a ʋlɔ wa pɔ na a sɛlmɛ ʋlɔ na be a Naaŋmɩn puor-yir kpɛ̃ɛ pʋɔ, áa na nyɔw ʋ na.

¹⁷Nyɩ ɩ na gẽgemsɩ na jɔn! Buor ɩ̃ ɩ a kpɛ̃ɛ? A sɛlmɛ ʋ mɩɩ a Naaŋmɩn puor-yir kpɛ̃ɛ na lɩɛb ʋ ʋ ɩ a bõ-ciiraa?

¹⁸Nyɩ ma lɛ yelʼã, áa nɩrɛ wa pɔ na a baar lofʋ jie, áa nyɔwrɔ ʋ wa, ɩ̃-cɛ a ʋlɔ wa pɔ na a baar-lo-bom, áa na nyɔw ʋ na.

¹⁹Nyɩna jɔn naa! Buor ɩ̃ ɩ a kpɛ̃ɛ? A baar-lo-bom ʋ mɩɩ a baar lofʋ jie na maal ʋ ʋ ɩ a bõ-ciiraa?

²⁰Ala-ɩ̃-sɔ, a ʋlɔ na pɔ na a baar lofʋ jie, ʋ pɔ na na a ʋlɔ na a baar-lo-yele a jaa na be a ʋ juu.

²¹Ɩ̃ a ʋlɔ na pɔ na a Naaŋmɩn puor-yir kpɛ̃ɛ, ʋ pɔ na na a yir na a Naaŋmɩn.

²²A ʋlɔ mɩ na mɩ pɔ na a saa juu, ʋ pɔ na na a Naaŋmɩn tẽw na a Naaŋmɩn na be a be.

²³“Nabier na pɔw na a nyɩmɩ ƴɛr-kpɛn-bɔɔnbɔ na a Farɩsɩ nɩbɛ. Nyɩ ɩ na bɛbɛlbɛ! Nyɩ ma irʼã a Naaŋmɩn ben a nyɩ jɛɛ-yele pʋɔ, wɔ̃ taa na a sãɓaan na a bir na a gbẽ-vaar, ɩ̃ ma lɛ bar a ala na lɛ ɩ a kpɛ̃ɛ a ƴɛr-kpɛn pʋɔ, wɔ̃ taa nɩ a torfʋ, a son ɩfʋ na a dẽdẽ ɩfʋ. A asɩmɛ ɩ̃ dãa sɛw a maalfʋ, ɩ̃-cɛ a yel-bil pãa tuure.

²⁴Nyɩna tɔtɔɔr-jɔn naa! Nyɩ ma corĩ na a dʋ̃bil bar a nyɩ kʋ̃ɔ pʋɔ, ɩ̃ ma lɛ vɔl a nyʋɔmɩ!

²⁵“Nabier na pɔw na a nyɩmɩ ƴɛr-kpɛn-bɔɔnbɔ na a Farɩsɩ nɩbɛ. Nyɩ ɩ na bɛbɛlbɛ! Nyɩ ma pɛw na a nyɩ ŋman na a nyɩ lakpow puo-sɔw bar, ɩ̃-cɛ a ba pʋʋr, a nyɩ nyanyu-yele na a nyɩ burbur maalfʋ ɩ̃ sɛɛr.

²⁶Fʋna Farɩsɩ nɩ-jɔ̃w naa! Pɛw a fʋ ŋman pʋ̃ɔ sɛr, ɩ̃ fʋ na nyɛ na a puo-sɔw ʋ mɩ vɩɛlɛ.

²⁷“Nabier na pɔw na a nyɩmɩ ƴɛr-kpɛn-bɔɔnbɔ nɩ a Farɩsɩ nɩbɛ. Nyɩ ɩ na bɛbɛlbɛ! Nyɩ wɔ̃ na taa nɩ a yar ba na pã a vɩɛlɛ a ꞌwuorfʋ, ɩ̃-cɛ a pʋ̃ɔ a kũu kɔbɔ nɩ a yel-kpansɩ bʋrɔ bʋrɔ ɩ̃ sɛw.

²⁸A nyɩmɩ, a lɛ nyɩ mɩ wɔ̃. A nɩbɛ nii-sɔw nyɩ wɔ̃ na taa nɩ nyɩ torʼã, ɩ̃-cɛ a nyɩ pʋ̃ɔ, nyɩ sɛw nɩ na a bɛlɩ̃fʋ nɩ a maal-faar.

²⁹“Nabier na pɔw na a nyɩmɩ *ƴɛr-kpɛn-bɔɔnbɔ nɩ a *Farɩsɩ nɩbɛ. Nyɩ ɩ na bɛbɛlbɛ! Nyɩ ma mɛ na a dacin kolĩ a Naaŋmɩn ƴɛr-hierbe ũufʋ jiir, ɩ̃ ma mɩ yaarɩ̃ a nɩ-torisɩ yar,

³⁰ɩ̃ ma yel: ‘A ala ɩ sɩ dãa na be ka a sɩ sãa-kʋnbɔ daar, sɩ kɔ̃ɔ dãa pɔw ba lãa kú nɩ a Naaŋmɩn ƴɛr-hierbe wa.’

³¹A nyɩ ƴɛrɩ̃sɩ miile na áa bala na dãa kú a Naaŋmɩn ƴɛr-hierbe, á ba bibiir nyɩ ɩ.

³²Ɩ̃-cɛ nyɩ́ cãa maala a ala a nyɩ sãa-kʋnbɔ na dãa maala, wa baar!

³³Nyɩna wɩɩrʼãa! Nyɩ ɩ na dɔ̃pan bal! Mɩnɛ nyɩ na ɩ ɩ̃ tʋɔ faa a nyɩ mɩ̃ɛ a ƴɛrɩ̃ ʋlɔ jie na wa ƴɔnɔ nyɩ a wɛfʋ vũu pʋɔ?

³⁴Ala-ɩ̃-sɔ nyɩ́ nyɛ, ɩ̃ na tʋ̃ na a Naaŋmɩn ƴɛr-hierbe nɩ a nɩsaa kpaarsɩ nɩ a ƴɛr-kpɛn-bɔɔnbɔ a nyɩ jie. Nyɩ na kú na a ŋmɛɛ, ɩ̃ kpa a ŋmɛɛ yaal a nɩ-kʋ-daa juu, ɩ̃ mɩ fɔb a ŋmɛɛ nɩ a kpaarsɩ a nyɩ *puorfʋ yie pʋʋr, ɩ̃ hʋɔlɔ a ŋmɛɛ go yʋɔrɔ nɩ a ten ten.

³⁵Ala-ɩ̃-sɔ, a Naaŋmɩn kpãafʋ na lo na a nyɩ juu a nɩ-torisɩ bala ba jaa nyɩ na kú a tẽw pʋɔ ɩnɛ, wa nyɔw nɩ a nɩ-toraa Abɛl kúfʋ, wa ta nɩ a Barasɩ bie Jakarɩ nyɩ na dãa kú a Naaŋmɩn puor-yir kpɛ̃ɛ nɩ a baar lofʋ jie sɔɔlɩ̃sɔw.

³⁶Yel-mɩ̃ɛ ɩ̃ yele nyɩ, a ana yele a jaa nyɩ na dãa maal, a ba kpãafʋ na lo na a ƴɛ̃ƴɛrɩ̃ nɩbɛ juu.

³⁷“A nyɩmɩ Jerujalɛm tẽ-deme na ma kú a Naaŋmɩn ƴɛr-hierbe, ɩ̃ ma lɔb a bala a Naaŋmɩn na tʋ̃ a fʋ jie nɩ a kubie kúrɔ, gbɛɛ amɩnɛ ɩ̃ dãa bʋɔrɔ ɩ̃ kpaarɩ̃ nyɩ ƴɔ̃w a ɩ̃ pulẽe wɔ̃ taa nɩ a mɩnɛ a nʋ̃ɔ na ma kpaarɩ̃ a ʋ bil ƴɔ̃w a ʋ pɩrɛ pʋɔ, ɩ̃ a nyaa sɔw wa.

³⁸Nyɩ́ nyɛ, a nyɩ yir na lɩɛbʼã ɩ dakpolo.

³⁹Ɩ̃ yele nyɩ na, wa nyɔw nɩ a ƴɛ̃ƴɛrɩ̃, nyɩ kɔ̃ lɛ nyɛ ma wa ta nɩ a lɛdaar nyɩ nɔɔ yele: ‘A Naaŋmɩn ú be nɩ a ʋlɔ na de a Nɩ-kpɛ̃ɛ yuor waara nɩ.’ ”