Read Birifor, Malba Matie Sɛbɛ 24 Bible Online

Matie Sɛbɛ 24 - Birifor, Malba bible

Matie Sɛbɛ 24

¹A mɩnɛ a *Jeeju na yi a Naaŋmɩn puor-yir kpɛ̃ɛ pʋɔ ɩ̃ cere, a v *par-tuurbe taw na ta v, na ba miile ʋ a mɩnɛ ba na mɛ a Naaŋmɩn yir v vɩɛlɛ.

²A Jeeju yel ba: “Nyɩ nyɛ na a asɩmɛ a jaa? Yel-mɩ̃ɛ ɩ̃ yele nyɩ, kubir kãw kɔ̃ lɔɔ tʋɔ ɩraa dɔɔl a v tɔ sʋbɔ juu wa. A na wɛlʼã a jaa.”

³Ɩ̃ a mɩnɛ a *Jeeju na do jɛ a *Olivi-tɩɩr tãw juu, a v *par-tuurbe taw na ta v ba yẽ ɩ̃ sooro v: “Man sɩ a dabor a yele ala nɔɔ tara, ɩ̃ jɩbaa buor na miile a fʋ lɩɛb-wafʋ nɩ a tẽw baarfʋ daar.”

⁴A Jeeju yel ba: “Nyɩ́ tɛrɛ nyɩ mɩ̃ɛ a mɩnɛ a nɩrɛ kɔ̃ wa bɛlɩ̃ nyɩ wa.

⁵A-na-ɩ a nɩ-yaw nɔɔ wa na nɩ a ɩ̃ yuor, na ba yele nɩ a bala ɩ a *Kirisi, ɩ̃ ba na bɛlɩ̃ na a nɩ-yaw.

⁶Nyɩ na wõ na a jɛb ƴɛrɩ̃sɩ nɩ a ten nɩdaa damfʋ, ɩ̃ nyɩ taa wa ɩ a dama nyɩ wa, a-na-ɩ a sɛw na a na ta a lɛ, ɩ̃-cɛ a kɔ̃ ɩ a tẽw baarfʋ daar sɛr wa.

⁷A tẽw na nɩbɛ nɔɔ irʼã jɛbɛ nɩ a tẽ-kpee nɩbɛ, ɩ̃ a jamana kãw na mɩ irʼã jɛbɛ nɩ jaman-kpee. A tẽw nɔɔ miine na a ji-bʋrɔ bʋrɔ, ɩ̃ a kɔ̃ kpee nɔɔ lo na.

⁸Ɩ̃-cɛ a ana yele a jaa na wɔ̃ na taa nɩ a walfʋ na nyɔw a pɔw.

⁹“A ʋna daarʼãa, ba na nyɔw nyɩ na ƴɔ̃w a hʋɔlfʋ pʋɔ ɩ̃ kúrɔ nyɩ, ɩ̃ a ten a jaa na mɩ ꞌlaar nyɩ na a ɩ̃ ɩnɛ.

¹⁰A lɛdaar mɩ, a nɩ-yaw na barʼã a puorfʋ, ɩ̃ ꞌlaar taa cile nɩ taa a ba sama-deme jie.

¹¹A ƴɛr-hierbe yaw na mɩ wa na na ŋmara a jirsɩ, bɛlɛ nɩ a nɩ-yaw.

¹²A bier maalfʋ na dɔɔlɔ taa, na saa na a nɩ-yaw nʋfʋ naa ɓãa,

¹³ɩ̃-cɛ a ʋlɔ na tɛrɛ a su-varkpara ɩraa nɩ wa ta nɩ a baarfʋ daar nɔɔ pɔw na a faafʋ.

¹⁴A tẽw ʋ jaa nɔɔ wõ na a Naaŋmɩn fãw ƴɛr-son naa, ʋ ɩ a yel-mɩ̃ɛ manfʋ a ten nɩbɛ ba jaa jie, ɩ̃ a baarfʋ daar pãa ta.

¹⁵“Ala-ɩ̃-sɔ, a lɛdaar nyɩ nɔɔ nyɛrɛ a bõ-ciiraa ʋlɔ na sãwna a bom, na ɩ a ʋlɔ ƴɛrɩ̃ a Naaŋmɩn ƴɛr-hiere Danɩɛl na dãa ƴɛr, ʋ be a ji-ciiraa pʋɔ, a bala na be a Jude wɩɛr pʋɔ bá jɔrɔ duoro a tan jur. (A ʋlɔ na ꞌwuoro a sɛbɛ, ú bɔ̃w bɔ̃w a ƴɛrɩ̃ na par).

¹⁶

¹⁷Ɩ̃ a ʋna daarʼãa, a ʋlɔ na be a garɩ̃, ʋ taa bʋɔrɔ ʋ suu a diem a bom defʋ wa,

¹⁸ɩ̃ a ʋlɔ na mɩ be a puo pʋɔ, ʋ taa wa lɩɛb kule a kparʋ defʋ wa.

¹⁹Nabier na nyɩrɩ̃ na ta a pɔɔ-pʋʋr deme nɩ a bala na tɛrɛ a bi-pɩɩlsɩ a lɛdaar.

²⁰Nyɩ́ sʋɔrɔ a Naaŋmɩn a nyɩ jɔfʋ kɔ̃ wa ta a sɩ̃ɛw mɩɩ a *bibi-ciiraa dayen wa.

²¹A-na-ɩ a daarʼãa pʋɔ, a won na nyɩrɩ̃ na kpɛmɛ gãw a ala sɩ na bɔ̃w, a tẽw nyɔwfʋ daar wa ta nɩ a ƴɛ̃ƴɛrɩ̃ na, ɩ̃ a kɔ̃ lɔɔ ta a lɛ go wa.

²²Nɩrɛ ma be na cɩ̃ɛnɛ, ɩ̃ a ala ma ɩ ba ŋmaa na a bibie ala bar wa. Ɩ̃-cɛ a bala a Naaŋmɩn na vɛl ir ɩnɛ, ʋ na ŋmaa na a bibie ala bar.

²³“Ala-ɩ̃-sɔ a nɩrɛ wa yel nyɩ á nyɩ nyɛ a *Kirisi a ka, mɩɩ á beka ʋ be, nyɩ taa wa sɔɔrɔ wa.

²⁴A-na-ɩ a jir-ŋma-Kirisisɩ nɩ a jir-ŋma-ƴɛr-hierbe nɔɔ wa na tʋnɔ a nɔ-kofʋ tʋ̃-bɛrɛ miile nɩ a ba kpɛ̃w, bʋɔrɔ ba bɛlɛ nɩ a bala a Naaŋmɩn na vɛl ir.

²⁵Ɩ̃ nyɩ́ nyɛ, ɩ̃ de na nĩe man kʋ nyɩ.

²⁶“Ala-ɩ̃-sɔ a bala wa yel nyɩ á nyɩ nyɛ ʋ beka wɛkar pʋɔ, nyɩ taa wa cere be wa, mɩɩ a bala wa yel nyɩ á nyɩ nyɛ ʋ a be a sɔɔlɩ̃fʋ jie, nyɩ taa wa sɔwrɔ wa.

²⁷A mɩnɛ a saa nyɩɩlɩ̃fʋ na ma pilpil pɔw a saꞌlon wa nyɔw nɩ a tẽw parɩ̃ wa ta nɩ a tẽw iin, a lɛ a *Nɩbɛ Bie lɛb waa nɔɔ wɔ̃.

²⁸A wɩɛr ʋlɔ a bom na kpi, be a sidume ma loro.

²⁹“A mɩnɛ a bibie ala won nɔɔ baara, a jie naan a mɔtɔ̃w na ka na ɓʋrɩ̃, ɩ̃ a cuu ma lɛ caarɛɛ wa. A ŋmarbie na pɔrʼã lo, ɩ̃ a fãgã ala na be a saꞌlon iin na dama na,

³⁰ɩ̃-cɛ a *Nɩbɛ Bie jɩbaa na nyɩrʼã a saꞌlon. A tẽw pʋɔ nɩ-bʋrɔ bʋrɔ ba jaa na waala na, ɩ̃ ba na nyɛ na a Nɩbɛ Bie ʋ yi a saꞌlon waara a dɔ̃dɔrɩ̃sɩ puor nɩ a ʋ fãw nyɩrɩ̃ nyɩnyɩlɛ nɩ.

³¹Ba na pɛɛlʼã a ɩl kpɛ̃ɛ, ɩ̃ a v sɩ-tʋnɩsɩ na kpaarɩ̃ na a nɩbɛ bala a Naaŋmɩn na vɛl ir a tẽw lõbobo pʋɔ a jaa, wa ta nɩ a saꞌlon bɛwfʋ jie.

³²“Nyɩ́ bɔ̃w a fɩgɩ tɩɛ jaanfʋ par. A lɛ nyɩ na nyɛ ʋ ʋ tɔbɔ a vaꞌwolo nyɩ ma bɔ̃w ka a susuur daar tara na.

³³A lɛ ʋ mɩ, a nyɩmɩ wa nyɛ a yele asɩmɛ a jaa a maala, nyɩ́ bɔ̃w ka a *Nɩbɛ Bie waa daar tara na.

³⁴Yel-mɩ̃ɛ ɩ̃ yele nyɩ, a ƴɛ̃ƴɛrɩ̃ nɩbɛ pʋɔ, ŋmɛɛ kɔ̃ wa kpi wa, wa ta nɩ a ana yele a jaa nɔɔ maala.

³⁵A saꞌlon nɩ a tene na tɔlʼã, ɩ̃-cɛ a ɩ̃ ƴɛrɩ̃ ma tɔlɔ fɩ̃ɩ wa.

³⁶“Nɩrɛ ma bɔ̃w a *Nɩbɛ Bie waa bibir ʋlɔ nɩ a daar wa. A saa juu sɩ-tʋnɩsɩ nɩ a Bie ma mɩ bɔ̃w wa, ɩ̃ a ala ma ɩ a Sãa tɛw ʋ wa.

³⁷A-na-ɩ a mɩnɛ a na dãa be a Nowe daar, a lɛ a na lɛ be a Nɩbɛ Bie waa daar.

³⁸A lɛdaar a kʋ̃ɔ kpɛ̃ɛ na ma dãa wa sɛr wa, nɩbɛ dãa na dɩrɛ nyuure nɩ, kule taa ɩ̃ mɩ ture a ba bi-pɔɔbɔ a ba kule, wa ta nɩ a ʋna bibir a Nowe na kpɛ a gbor kpɛ̃ɛ pʋɔ.

³⁹Baa dãa bɔ̃w bom, wa ta nɩ a ʋna bibir a kʋ̃ɔ kpɛ̃ɛ na wa wob ba ba jaa. A lɛ a na mɩ be a Nɩbɛ Bie waa daar mɩ.

⁴⁰Dabsɩ ayi na be na a puo pʋɔ, ɩ̃ ba na de na a bõ-ƴen ɩ̃ cɛ a kãw bar.

⁴¹Pɔɔbɔ ayi na ƴɛrɛ na a jɔ̃ a nɩɛr juu a ba de a bõ-ƴen ɩ̃ cɛ a kãw bar.

⁴²Ala-ɩ̃-sɔ, nyɩ́ bɔ̃w jʋʋrɔ, a-na-ɩ nyaa bɔ̃w a bibir ʋlɔ a nyɩ Nɩ-kpɛ̃ɛ na waara wa.

⁴³Nyɩ́ bɔ̃wnaa, a ala ɩ a yir sʋbɔ dãa na bɔ̃w a tɩsɔw ʋlɔ daar a nyanyuur nɔɔ waara, ʋ naa dãa na jɛ gu, ɩ̃ kɔ̃ɔ bar ʋ ʋ wa faa kpɛ a ʋ yir pʋɔ wa.

⁴⁴A lɛ ʋ mɩ a nyɩmɩ mɩ, nyɩ́ bɔ̃w gbɛɛrɩ̃ a nyɩ mɩ̃ɛ, a-na-ɩ a Nɩbɛ Bie na wa na a daar ʋlɔ nyɩ na ma gure ʋ wa.

⁴⁵“Tʋtʋ̃-buor ɩ̃ ɩ a dẽdẽ sʋbɔ na tɛrɛ a yɛ̃? Ʋ ɩ na a ʋlɔ a ʋ nɩ-kpɛ̃ɛ na ƴɔ̃w a ʋ ꞌwuoro a ʋ yir deme kʋrɔ ba a dɩb a daar ʋlɔ na sɛw.

⁴⁶Nũɔ ma be na a ʋna tʋ̃tʋnɔ jie, a mɩnɛ a ʋ nɩ-kpɛ̃ɛ na lɩɛbɛ waara nyɛrɛ ʋ ʋ maala a lɛ.

⁴⁷Yel-mɩ̃ɛ ɩ̃ yele nyɩ, a ʋ nɩ-kpɛ̃ɛ na kʋ ʋ na a ʋ yele a jaa ʋ ꞌwuoro.

⁴⁸Ɩ̃ a ala ɩ a ʋna tʋ̃tʋnɔ ɩ na a nɩ-fãa, ɩ̃ yel a ʋ mɩ̃ɛ á ʋ nɩ-kpɛ̃ɛ kama na,

⁴⁹ɩ̃ nyɔw a ʋ lãa-tʋnbɔ pɔbɔ, ɩ̃ mɩ dɩrɛ nyuure nɩ a dã-kʋrbɔ,

⁵⁰a ʋ nɩ-kpɛ̃ɛ nɔɔ wa na a bibir nɩ a daar ʋlɔ ʋ na ma bɔ̃w wa,

⁵¹ɩ̃ ŋma ʋ ayi ƴɔ̃w a bɛbɛlbɛ pʋɔ, a ba lãa pɔw a kpãafʋ, a jie ʋlɔ ba na kono nyɩrɛ nɩ a nyɩmɛ.