Read Birifor, Malba Matie Sɛbɛ 25 Bible Online

Matie Sɛbɛ 25 - Birifor, Malba bible

Matie Sɛbɛ 25

¹“A ʋna daarʼãa pʋɔ, a saa juu fãw nɔɔ wɔ̃ na taa nɩ a pɔsabil pie na de a ba lãpar, yi cenʼɩ̃ a pɔw sɩrɛ tuorfʋ jie.

²A ba pʋɔ, anuu be na be ɩ a dãbolo ɩ̃ a anuu ɩ a yɛ̃ deme.

³A-na-ɩ a dãbolo bala de na a ba lãpar ɩ̃ ma tɛrɛ a kãa cenʼɩ̃ wa.

⁴Ɩ̃-cɛ a yɛ̃ deme de na a ba lãpar, ɩ̃ mɩ tɛrɛ a kãa nɩ a butulsɩ lãa cenʼɩ̃.

⁵Ɩ̃ a mɩnɛ a sɩrɛ na kama a wɩfʋ, a gʋ̃ɔ nyɔw ba na ba jaa a ba gur.

⁶“A lɛ a wɩɛr na po jɛ̃ taa, ba wõ na a nɩrɛ na wuur yel: ‘Nyɩ́ nyɛ a sɩrɛ na waara. Nyɩ́ ir cen na tuor ʋ.’

⁷A lɛ, a pɔsabil bala ba jaa jaw na gbɛɛrɛ a ba lãpar.

⁸A dãbolo bala yelʼã a yɛ̃ deme: ‘Nyɩ́ pʋr a nyɩ kãa fɩ̃ɩ ƴɔ̃w sɩ, a-na-ɩ a sɩ lãpar kpiine na.’

⁹A yɛ̃ deme yel ba: ‘Aa tʋɔrɔ tara sɩ nɩ a nyɩmɩ wa. Nyɩ́ cen a ƴaƴaba jie na da.’

¹⁰A lɛ a dãbolo bala na cere a dafʋ jie, a sɩrɛ ta na, ɩ̃ a bala na gbɛɛrɩ̃ lãa na kpɛ nɩ a sɩrɛ a kulfʋ fɛtɩ die pʋɔ, ɩ̃ a ba kpal a pan.

¹¹A ɩ na fɩ̃ɩ a pɔsabil bala na cɛ ta ŋmeere a pan yele nɩ: ‘Nɩ-kpɛ̃ɛ! Nɩ-kpɛ̃ɛ! Yuo sɩ a pan.’

¹²Ɩ̃-cɛ a sɩrɛ yel ba: ‘Yel-mɩ̃ɛ ɩ̃ yele nyɩ, Maa bɔ̃w nyɩ wa.’ ”

¹³Ɩ̃ a *Jeeju pãa yel ba: “Ala-ɩ̃-sɔ nyɩ́ jʋʋrɔ, a-na-ɩ nyaa bɔ̃w a *Nɩbɛ Bie waa bibir nɩ a daar wa.

¹⁴“A na mɩ wɔ̃ na taa nɩ a nɩrɛ na bʋɔrɔ ʋ cen a yɔfʋ jie, ɩ̃ bʋɔl a ʋ tʋ̃tʋnbɔ naa ʋ de a ʋ yele kʋ ba.

¹⁵Ʋ kʋ na a bõ-ƴen a sɛlmɛ bie kɔɔr anuu, ɩ̃ kʋ a ƴen sʋbɔ kɔɔr ayi, ɩ̃ mɩ kʋ a kãw kʋbaa, tu nɩ a mɩnɛ a ba yɛ̃ na be, ɩ̃ pãa cen a ʋ yɔfʋ jie.

¹⁶A tʋtʋnɔ ʋlɔ na pɔw a sɛlmɛ bie kɔɔr anuu cenʼã a jie naan na ƴabʼɩ̃, ɩ̃ pɔw a dɔɔlaa a kɔɔr anuu mɩ.

¹⁷A lɛ mɩ, a ʋlɔ na pɔw a sɛlmɛ bie kɔɔr ayi, ʋ ƴabʼɩ̃ na pɔw a dɔɔlaa a kɔɔr ayi mɩ.

¹⁸Ɩ̃-cɛ a ʋlɔ na pɔw a sɛlmɛ bie kʋbaa, ʋ cenʼã na tuu bɔw, ɩ̃ ũu a ʋ nɩ-kpɛ̃ɛ libie.

¹⁹“A kamʼã ɩ̃-cɛ a tʋ̃tʋnbɔ nɩ-kpɛ̃ɛ lɛ wa, naa ʋ gbɛɛrɛ a libie ala ʋ na dãa kʋ ba.

²⁰A ʋlɔ na dãa pɔw a sɛlmɛ bie kɔɔr anuu, ʋ ta na kpɛ, ɩ̃ de a kɔɔr anuu na ɩ a dɔɔlaa kʋ a nɩ-kpɛ̃ɛ, ɩ̃ yel ʋ: ‘Nɩ-kpɛ̃ɛ, fʋ dãa na kʋ ma a sɛlmɛ bie kɔɔr anuu. Nyɛ! Ɩ̃ pɔw na a dɔɔlaa a kɔɔr anuu mɩ.’

²¹A ʋ nɩ-kpɛ̃ɛ yel ʋ: ‘Fʋ maalʼã vɩlaa. Fʋ ɩ na tʋ̃tʋ̃-dẽdẽ nɩ nɩ-son. A mɩnɛ fʋ na ɩ a dẽdẽ a yel-bil maalfʋ pʋɔ, ɩ̃ na ƴɔ̃w fʋ na a yel-bɛrɛ ꞌwuorfʋ pʋɔ. Wa mɩ pɔw a ɩ̃ nʋɔ̃.’

²²A ʋlɔ na mɩ dãa pɔw a sɛlmɛ bie kɔɔr ayi, ʋ mɩ ta na kpɛ ɩ̃ yel: ‘Nɩ-kpɛ̃ɛ, fʋ dãa na kʋ ma a sɛlmɛ bie kɔɔr ayi. Nyɛ! Ɩ̃ pɔw na a dɔɔlaa a kɔɔr ayi mɩ.’

²³A ʋ nɩ-kpɛ̃ɛ yel ʋ: ‘Fʋ maalʼã vɩlaa. Fʋ ɩ na tʋ̃tʋ̃-dẽdẽ nɩ nɩ-son. A mɩnɛ fʋ na ɩ a dẽdẽ a yel-bil maalfʋ pʋɔ, ɩ̃ na ƴɔ̃w fʋ na a yel-bɛrɛ ꞌwuorfʋ pʋɔ. Wa mɩ pɔw a ɩ̃ nʋɔ̃.’

²⁴Ɩ̃-cɛ a ʋlɔ na dãa pɔw a sɛlmɛ bie kʋbaa, ʋ mɩ ta na kpɛ, ɩ̃ yel: ‘Nɩ-kpɛ̃ɛ, ɩ̃ bɔ̃w fʋ na. A fʋ ƴɛrɩ̃ kpɛmɛ na, a-na-ɩ fʋ ma ŋma na a ci ala fʋ na maa bʋr wa, ɩ̃ ma mɩ nɩɩr a wɔmɔ ala fʋ na maa yaarɩ̃ a bie wa.

²⁵Dãbɩ̃ɛ nyɔw ma na, ɩ̃ de a fʋ libie cenʼɩ̃ na ũu. Nyɛ! De a fʋ libie nʋɔr.’

²⁶A ʋ nɩ-kpɛ̃ɛ yel ʋ: ‘Fʋna tʋ̃tʋ-fãa naa, tõtol sʋbɔ fʋ ɩ! Fʋ bɔ̃w na bɔ̃w ka ɩ̃ ma ŋma na a ci ala ɩ̃ na ma bʋr wa, ɩ̃ mɩ nɩɩr a wɔmɔ ala ɩ̃ na maa yaarɩ̃ a bie wa.

²⁷Fʋ na bɔ̃w a lɛ, a dãa na sɛw a fʋ naa de a ɩ̃ libie kʋ a ƴaƴaba ʋ ƴaba nɩ, a maa wa wa, ɩ̃ de a ɩ̃ libie nɩ a dɔɔlaa.

²⁸Nyɩ́ faa a ʋ sɛlmɛ bie kʋbaa, kʋ a ʋlɔ na tɛrɛ a tur.

²⁹A-na-ɩ a nɩrɛ ʋlɔ na tɛrɛ, ba na lɛ kʋ ʋ na dɔɔl, a waa. Ɩ̃-cɛ a ʋlɔ na ma tɛrɛ wa, ɩ̃ saarɩ̃ tɛrɛ a fɩ̃ɩ, ba na faa na a fɩ̃ɩ ala ʋ na tɛrɛ.

³⁰Nyɩ́ nyɔw a tʋ̃tʋ̃-pɔrɔ na, lɔb bar a yẽw a libe pʋɔ. A be ba na kono, nyɩrɛ nɩ a nyɩmɛ.’

³¹“A lɛdaar a *Nɩbɛ Bie na waara nɩ a ʋ yo-yifʋ nɩ a ʋ sɩ-tʋnɩsɩ jaa, ʋ na jɛ na a ʋ yo-yifʋ naa-dakɔw juu,

³²ɩ̃ a nɩ-bʋrɔ bʋrɔ ba jaa na duo na taa a ʋ nii-sɔw, ɩ̃ ʋ na ŋma ba na ji-gbulĩsɩ ayi, wɔ̃ taa nɩ a mɩnɛ a dɔ-cɩɩnaa na ma ŋma a piir nɩ a bʋʋr a kpee kpee.

³³Ʋ na tɛrɛ na a piir a ʋ dʋrɩ̃ loor, ɩ̃ tɛrɛ a bʋʋr a ʋ gʋbaa loor.

³⁴A ala ɩ̃ baar a jamana na yelʼã a bala na be a ʋ dʋrɩ̃ loor: ‘Ɩ̃ Sãa nɩ-nʋnɩsɩ! Nyɩ́ wa kpɛ a Naaŋmɩn fãw pʋɔ, de a gã-yele ala ba na dãa gbɛɛrɩ̃ a nyɩ ɩnɛ a tẽw nyɔwfʋ daar.

³⁵A-na-ɩ kɔ̃ dãa na nyɔw ma, ɩ̃ nyɩ kʋ ma na a bõ-dɩraa, a kʋ̃ɔ-nyuur mɩ dãa nyɔw ma, a nyɩ kʋ ma a kʋ̃ɔ ɩ̃ nyu. Ɩ̃ dãa na ɩ a saana, a nyɩ de ma kulʼɩ̃ ir ma a saan.

³⁶Ɩ̃ mɩ dãa na tɛrɛ a salĩɓuor, a nyɩ kʋ ma a cẽcen ɩ̃ su, ɩ̃ mɩ dãa ɩ a wʋlɩ̃ a nyɩ wɩ na ꞌwuor ma kãa. Ɩ̃ dãa na be a kasu pʋɔ a nyɩ wɩ sũo ma.’

³⁷Ɩ̃ a nɩ-torisɩ bala na soor ʋ na: ‘Nɩ-kpɛ̃ɛ, dabor sɩ dãa nyɛ fʋ, a kɔ̃ nyɔw fʋ a sɩ kʋ fʋ a bõ-dɩraa? Mɩɩ a kʋ̃ɔ-nyuur mɩ nyɔw fʋ a sɩ kʋ fʋ a kʋ̃ɔ a fʋ nyu?

³⁸Dabor sɩ dãa nyɛ fʋ, a fʋ ɩ a saana a sɩ taw fʋ kulʼɩ̃ ir fʋ a saan? Mɩɩ a fʋ tɛrɛ a salĩɓuor a sɩ kʋ fʋ a cẽcen a fʋ su?

³⁹Dabor sɩ lɛ nyɛ fʋ, a fʋ ɩ a wʋlɩ̃, mɩɩ a fʋ be a kasu pʋɔ, a sɩ wɩ na ꞌwuor fʋ kãa?’

⁴⁰A jamana na yel ba na: ‘Yel-mɩ̃ɛ ɩ̃ yele nyɩ, a mɩnɛ nyɩ na ma maal a ala a ɩ̃ yɛbɛ na nyɩrɩ̃ pab jie, a maa nyɩ ma maal kʋ a lɛ.’

⁴¹“Ɩ̃-cɛ a jamana na mɩ yelʼã a bala na be a ʋ gʋbaa loor: ‘Nyɩ́ taw yi ka a ɩ̃ nii-sɔw, nyɩmɩ a Naaŋmɩn na pɔ ƴɔ̃w, naa nyɩ kpɛ a vũu ʋlɔ pʋɔ na ma tɛrɛ a kpiinfʋ daar wa, a vũu ʋlɔ ba na dãa gbɛɛrɩ̃ a Satã nɩ a ʋ sɩ-tʋnɩsɩ ɩnɛ.

⁴²A-na-ɩ a kɔ̃ dãa na nyɔw ma, ɩ̃ nyaa kʋ ma bõ-dɩraa wa. A kʋ̃ɔ-nyuur mɩ dãa na nyɔw ma, ɩ̃ nyaa kʋ ma a kʋ̃ɔ ɩ̃ nyu wa.

⁴³Ɩ̃ dãa na ɩ a saana, ɩ̃ nyaa taw ma kulʼɩ̃ ir ma a saan wa. Ɩ̃ mɩ dãa na tɛrɛ a salĩɓuor, ɩ̃ nyaa kʋ ma cẽcen ɩ̃ su wa. Ɩ̃ dãa na ɩ a wʋlɩ̃, ɩ̃ mɩ dãa be a kasu pʋɔ, ɩ̃ nyaa wɩ ꞌwuor ma kãa wa.’

⁴⁴Ɩ̃ a bala mɩ, ba na mɩ soor ʋ na: ‘Nɩ-kpɛ̃ɛ, dabor sɩ dãa nyɛ fʋ a kɔ̃ nyɔw fʋ, mɩɩ a kʋ̃ɔ-nyuur nyɔw fʋ, mɩɩ a fʋ ɩ a saana, mɩɩ a fʋ tɛrɛ a salĩɓuor, mɩɩ a fʋ ɩ a wʋlɩ̃, mɩɩ a fʋ be a kasu pʋɔ, ɩ̃-cɛ a saa wɩ sũo fʋ wa?’

⁴⁵A jamana na mɩ yel ba na: ‘Yel-mɩ̃ɛ ɩ̃ yele nyɩ, a mɩnɛ nyɩ na ma dãa maal a ala a ɩ̃ yɛbɛ na nyɩrɩ̃ pab jie wa, a ɩ̃ jie nyaa maal wa.’

⁴⁶A bala, ba na cenʼã a kpãafʋ ʋlɔ pʋɔ na ma tɛrɛ a baarfʋ daar wa, ɩ̃-cɛ a nɩ-torisɩ cen a baa-kɔ̃-tɛw pʋɔ.”