Read Birifor, Malba Matie Sɛbɛ 27 Bible Online

Matie Sɛbɛ 27 - Birifor, Malba bible

Matie Sɛbɛ 27

¹A dʋ̃ꞌwʋlɩ̃ ɓaaraa a Jufisɩ *baar-lo-nɩ-bɛrɛ nɩ a ba ni-dierbe guorʼã taa a *Jeeju kʋfʋ,

²ɩ̃ ƴɔ̃w a ba lũ ʋ, taw cenʼɩ̃ kʋ a jamana *Pɩlatɩ.

³A mɩnɛ a Judasɩ ʋlɔ na de a *Jeeju a juu, na nyɛ a ɩ ba na kú na a Jeeju, a dama ʋ na, ʋ de a libi-kure lɩjɛrʼɩ̃-pie ala, lɩɛb cenʼɩ̃ na kʋrɔ a *baar-lo-nɩ-bɛrɛ nɩ a ni-dierbe

⁴yele nɩ: “Ɩ̃ maalʼã fãa a mɩnɛ ɩ̃ na de a nɩ-cɛcɛ a juu a ba na kú ʋ.” A ba yel ʋ: “Aa bá sɩ wa. A fʋ jie a be.”

⁵A Judasɩ de a libie lɔb bar a be a Naaŋmɩn puor-yir kpɛ̃ɛ, ɩ̃ yi cen na yaal miir kpi.

⁶A baar-lo-nɩ-bɛrɛ woor a libie ɩ̃ yel: “A sɩ ƴɛr-kpɛn ma kʋ sɩ sɔr a sɩ na ƴɔ̃w a libie asɩmɛ a Naaŋmɩn puor-yir kpɛ̃ɛ libie pʋɔ wa, a-na-ɩ kũu libie ʋ.”

⁷A mɩnɛ ba na guor taa baar, ba da na lakpo-mɩɛrɛ puo nɩ a ana libie, ʋ ɩ sáanba ũufʋ jie.

⁸Ala-ɩ̃-sɔ a ba bʋɔlɔ a ʋna puo wa ta nɩ a dɩnaa, á “Jɩ̃ɩ puo.”

⁹Nɔhɔ̃ a wɔ̃ a mɩnɛ a Naaŋmɩn ƴɛr-hiere Jeremi na dãa yel: “Ba de na a libie ala a *Ɩsɩrayɛl nɩbɛ na dãa man taa a ʋ yafʋ ɩnɛ, a libi-kure lɩjɛrʼɩ̃-pie ala,

¹⁰da nɩ a lakpo-mɩɛrɛ puo, tu nɩ a mɩnɛ a Nɩ-kpɛ̃ɛ na dãa man ma.”

¹¹A *Jeeju ɩraa na a *Pɩlatɩ nii-sɔw, ʋ sooro ʋ: “Fʋ̃ʋ ɩ a Jufisɩ jamana mɩɩ?” A Jeeju yel: “A mɩnɛ fʋ na yel, a lɛ ʋ.”

¹²Ɩ̃ a mɩnɛ a Jufisɩ *baar-lo-nɩ-bɛrɛ nɩ a ni-dierbe na ɩraa mana a ʋ maal-bebe, ꞌwaa yel bom wa.

¹³A Pɩlatɩ yel ʋ: “Faa wonaa a fʋ maal-bebe ba na mana wa?”

¹⁴Ɩ̃-cɛ ꞌwaa mɩ haa nʋɔr cɔw ʋ wa, a nʋɔr ko a jamana.

¹⁵A yomo a jaa, a *Pakɩ fɛtɩ daar, a jamana ma irʼã a kasu nɩrɛ ʋlɔ a nɩbɛ na bʋɔrɔ bar.

¹⁶Ɩ̃ a lɛdaar, kasu nɩrɛ kãw dãa na be be ɩ̃ dɩ a Barabasɩ ba na nyɩrɩ̃ bɔ̃w.

¹⁷A be jie a *Pɩlatɩ soor a nɩbɛ na duo: “Ala nyɩ bʋɔrɔ ɩ̃ bar kʋ nyɩ? A Barabasɩ ʋ, mɩɩ a *Jeeju ʋlɔ ba na bʋɔlɔ a *Kirisi ʋ?”

¹⁸A-na-ɩ a Pɩlatɩ bɔ̃w na áa ba nyuur ɩ̃ saa a ba nyɔw a Jeeju wɩ nɩ kʋ ʋ.

¹⁹A lɛ a Pɩlatɩ na cãa jɛ a ƴɛrɩ̃ guorfʋ dakɔw juu, a ʋ pɔw tʋ̃ na yel ʋ: “Taa wa maala a ʋna nɩ-cɛcɛ bom wa, a-na-ɩ a tɩsɔw, ɩ̃ nyɛ na nãw a jãasʋlɩ̃ pʋɔ a ʋ ɩnɛ.”

²⁰Ɩ̃ cɛ a *baar-lo-nɩ-bɛrɛ nɩ a ni-dierbe kpãa na a nɩbɛ a ba sʋɔr a ba bar a Barabasɩ, ɩ̃ kú a Jeeju.

²¹A Pɩlatɩ lɛ soor ba: “Buor nyɩ bʋɔrɔ ɩ̃ bar a basɩmɛ ayi pʋɔ?” A ba yel, áa Barabasɩ.

²²A Pɩlatɩ lɛ soor ba go: “Ɩ̃ bõ ɩ̃ na maalʼɩ̃ a Jeeju ba na bʋɔlɔ a Kirisi?” A ba jaa yel: “Kpa ʋ a nɩ-kʋ-daa juu!”

²³Ʋ lɛ bɔ̃w soor: “Bõ ɩnɛ? Bõ fãa ʋ maal?” Ɩ̃-cɛ ba lɛ nyɩrɩ̃ na wuure nɩ kpɛ̃w yele nɩ: “Kpa ʋ a nɩ-kʋ-daa juu!”

²⁴A mɩnɛ a Pɩlatɩ na nyɛ bɔ̃w ka ꞌwaa tʋɔrɔ maala bom wa, ɩ̃ a mɩnɛ a tẽw na mɩ nyɔw ɩ̃ dama, ʋ ꞌwɔ̃w na a kʋ̃ɔ pɛw a nur a nɩbɛ nii-sɔw ɩ̃ yel: “Maa be tɔ a daba na kʋfʋ ɩnɛ wa. Nyɩ jie a be.”

²⁵A nɩbɛ ba jaa yel ʋ: “A ʋ kũu ƴɛrɩ̃, á mar sɩ, sɩmɩ nɩ a sɩ bibiir.”

²⁶A Pɩlatɩ irʼã a Barabasɩ a kasu pʋɔ bar a ba ɩnɛ, ɩ̃ a mɩnɛ ʋ na ƴɔ̃w a ba fɔb a Jeeju nɩ a kpaara, ʋ turʼã a sɔr a ba taw ʋ cere nɩ a kpafʋ jie a nɩ-kʋ-daa juu.

²⁷A jamana sɔdaalsɩ taw na a *Jeeju kulʼɩ̃ a jamana yir, ɩ̃ bʋɔl a sɔdaalsɩ ba jaa a ba wɩ tiw kolĩ ʋ.

²⁸Ba yaw ʋ na a yele, ɩ̃ su ʋ kpar-jɩ̃ɛw,

²⁹ɩ̃ wob a gʋʋr sapi kpa ʋ a juumɩ, ɩ̃ ƴɔ̃w ʋ a kakɩr a dʋrɩ̃ nuumɩ, ɩ̃ gburĩ a dume a ʋ nii-sɔw laara wuolo nɩ ʋ yele nɩ: “Jufisɩ jamana yaa, yaanɩ!”

³⁰Ɩ̃ pʋʋrɔ a natɛɛr ƴɔnɔ ʋ, ɩ̃ de a kakɩr ŋmeere nɩ ʋ a juumɩ.

³¹A mɩnɛ ba na la ʋ baar, ba yaw ʋ na a kpar-jɩ̃ɛw ʋlɔ, ɩ̃ lɛ su ʋ a ʋ yele, ɩ̃ taw ʋ cere nɩ a kpafʋ jie.

³²A mɩnɛ ba na yire a tẽw pʋɔ, ba tuorʼɩ̃ na a daba na yi a Sɩɩrɛn, ba na bʋɔlɔ a Sɩmɔ̃, a sɔdaalsɩ fɛr ʋ ʋ de a *Jeeju nɩ-kʋ-daa tuo.

³³A lɛ ba na ta a jie ʋlɔ ba na bʋɔlɔ a Gɔlgɔta, a lɛ-ƴelʼã a “Juŋman Jie”,

³⁴ba kʋ ʋ na a dɩvɛ̃ ba na nyakarɩ̃ a tɩ̃ɩ. Ɩ̃ a mɩnɛ ʋ na ꞌlɛm nyɛ a lɛ, ꞌwaa bʋɔrɔ a nyufʋ wa.

³⁵A lɛ ba na kpa ʋ yaal baar, ba ŋme na a gbã po nɩ a ʋ cẽcẽne,

³⁶ɩ̃ jɛ a be gu ʋ.

³⁷Ba sɛbʼã a sɛbɛ kpa a ʋ ju-sɔ̃w na miile a ʋ kpafʋ par. A yelʼã a be: “A Jufisɩ Jamana Jeeju nɩ a nanɩ”.

³⁸Ba mɩ kpa na nyanyube ayi a be, a bõ-ƴen a ʋ dʋrɩ̃ loor, ɩ̃ a kãw a ʋ gʋbaa loor.

³⁹A nɩbɛ bala na dãa tɔlɔ a be vavire na a jur, tʋrɔ nɩ ʋ

⁴⁰yele nɩ: “A fʋ̃ʋ na dãa yel á fʋ na wɛlʼã a Naaŋmɩn puor-yir kpɛ̃ɛ, ɩ̃ lɛ mɛ ʋ a bibie ata pʋɔ, a ala ɩ a Naaŋmɩn Bie fʋ ɩ, faa a fʋ mɩ̃ɛ suu nɩ a nɩ-kʋ-daa juu.”

⁴¹A *baar-lo-nɩ-bɛrɛ nɩ a *ƴɛr-kpɛn-bɔɔnbɔ nɩ a bala na ɩ a ni-dierbe, mɩ laara ʋ na a lɛ yele nɩ:

⁴²“Ʋ faa na nɩŋmɛɛ, ɩ̃ ma lɛ tʋɔrɔ faara a ʋ mɩ̃ɛ wa. Ʋ ɩ na a *Ɩsɩrayɛl jamana! ṹ suu a ƴɛ̃ƴɛrɩ̃ na a nɩ-kʋ-daa juu, ɩ̃ sɩ na tɩɛrɛ ʋ na.

⁴³Ʋ barʼã a ʋ mɩ̃ɛ kʋ a Naaŋmɩn. A ala ɩ a Naaŋmɩn bʋɔrɔ ʋ na, ú faa ʋ a ƴɛ̃ƴɛrɩ̃ na, a-na-ɩ ʋ yelʼã á Naaŋmɩn Bie ʋ ɩ.”

⁴⁴Ɩ̃ a nyanyube bala ba na mɩ kpa a be, kpɛrɛ ʋ na a lɛ.

⁴⁵A mɔtɔ̃-tuo daar a wɩɛr liw na a tẽw pʋɔ ʋ jaa wa ta nɩ a mɔtɔ̃w gɔrfʋ daar.

⁴⁶Ɩ̃ a mɩnɛ a mɔtɔ̃w na gɔr, a *Jeeju wuurʼã nɩ kɔkɩr kpɛ̃w yele: “Eli, Eli, lɛma sabatanɩ?” A lɛ yelʼã: “Ɩ̃ Naaŋmɩn, ɩ̃ Naaŋmɩn, bõ ɩ a fʋ bar ma?”

⁴⁷A bala na dãa ɩraa a be, a nɩŋmɛɛ wõ na a ʋ wuurfʋ ɩ̃ yel: “A Eli a nanɩ bʋɔlɔ”.

⁴⁸Ɩ̃ a jie naan a bõ-ƴen jɔ na cen na de cẽcen kãw ƴɔ̃w dã-ɓiirũ pʋɔ, ɩ̃ ir tʋ̃ ƴɔ̃w kakɩr pʋɔ, tur a Jeeju a ʋ nyu.

⁴⁹Ɩ̃-cɛ a nɩŋmɛɛ yel, á ú ɩra-lɛ. Á ba ꞌwuor je kãa, a ala ɩ a Eli na wa na faa ʋ.

⁵⁰Ɩ̃ a Jeeju lɛ wuurʼã nɩ kɔkɩr kpɛ̃w, ɩ̃ kpi.

⁵¹A daar ʋlɔ pʋɔ, a cẽcen kpɛ̃ɛ ʋlɔ ba na dãa yaal a Naaŋmɩn puor-yir kpɛ̃ɛ pʋɔ ʋ ŋma a der ayi, nyɔw na a saꞌlon ɩ̃ ɓer wa suu nɩ a pulẽe. A tẽw damʼã, a kʋsɩ-bɛrɛ wɛl,

⁵²a yar yuo, ɩ̃ a *duo-puorbo yaw bala na dãa kpi, irʼã a kũu pʋɔ.

⁵³A mɩnɛ a Jeeju na ir a kũu pʋɔ baar, a bana nɩbɛ yi na a yar pʋʋr ɩ̃ kpɛ a Jerujalɛm-tẽw pʋɔ, a nɩ-yaw nyɛ ba.

⁵⁴A lɛ a Orom sɔdaal-nɩ-kpɛ̃ɛ nɩ a bala na dãa be nɩ ʋ gure a Jeeju na nyɛ a mɩnɛ a tẽw na dam, nɩ a ala a jaa na ta, a dãbɩ̃ɛ nyɩrɩ̃ na nyɔw ba, a ba yel: “Sɩrɛ jaa ʋ! A daba na dãa na ɩ a Naaŋmɩn Bie.”

⁵⁵A pɔɔ-yaw dãa na be be ɩ̃ ɩraa a nɩdaa ꞌwuoro, a pɔɔbɔ bala na dãa tuure a Jeeju sũono ʋ, wa yi nɩ a Galile-tẽw pʋɔ.

⁵⁶A ba pʋɔ, Madala Maarɩɩ dãa na be be, nɩ a Maarɩɩ ʋlɔ na ɩ a Jakɩ nɩ a Jojɛfʋ mã, pɔw nɩ a Jebede bi-dabsɩ ayi mã.

⁵⁷A mɩnɛ a jaanʋɔr na ta, dab-naaba na dɩ a Jojɛfʋ yi na a Arimate-tẽw ɩ̃ wɩ. (A Jojɛfʋ ʋlɔ, ʋ mɩ dãa na ɩ a *Jeeju *par-tuure).

⁵⁸Ʋ cenʼã a *Pɩlatɩ sɛ̃ na sʋɔr a kũu, a Pɩlatɩ sɔw, ɩ̃ yel a ba kʋ ʋ,

⁵⁹ʋ de a kũu vilĩ nɩ ʋ a cẽcen paalaa,

⁶⁰ɩ̃ cenʼɩ̃ ʋ na ƴɔ̃w a ʋ mɩ̃ɛ ya-paalaa pʋɔ ba na dãa kpu a kʋsɩpan pʋɔ, ɩ̃ bilĩ a kʋsɩr kpɛ̃ɛ pɔw a yaa nʋɔr, ɩ̃ kul.

⁶¹A Madala Maarɩɩ nɩ a Maarɩɩ ƴen sʋbɔ jɛ na a be a yaa par.

⁶²A lɛ a *bibi-ciiraa gbɛɛrɩ̃fʋ na vɩɛ, a *baar-lo-nɩ-bɛrɛ nɩ a *Farɩsɩ nɩbɛ cenʼã a *Pɩlatɩ sɛ̃

⁶³na yel ʋ: “Nɩ-kpɛ̃ɛ, sɩ tɩɛrʼã yuo a mɩnɛ a bɛbɛlɛ na na dãa yel a lɛ ʋ na dãa cãa, á bibie ata pʋɔ, á ʋ na irʼã a kũu pʋɔ.

⁶⁴Ala-ɩ̃-sɔ, ƴɔ̃w nɩbɛ a ba cen na gu a yaa, wa ta nɩ a bibie ata dayen, a ʋ *par-tuurbe kɔ̃ɔ wɩ ju a kũu, ɩ̃ yel a nɩbɛ, á ʋ irʼã a kũu pʋɔ wa, a mɩnɛ a ba bɛlɩ̃fʋ kɔ̃ wa gãw a dãdãw ben wa.”

⁶⁵A Pɩlatɩ yel ba: “Nyɩ́ nyɛ a gugurbe. Nyɩ́ taw ba cenʼɩ̃ na ƴɔ̃w a ba gu a mɩnɛ nyɩ na bʋɔrɔ”,

⁶⁶a ba taw ba cenʼɩ̃ na man a mɩnɛ ba na gure a yaa, ɩ̃ maal a ba jɩbaa mar a yaa kubir juu.