Read Birifor, Malba Matie Sɛbɛ 4 Bible Online

Matie Sɛbɛ 4 - Birifor, Malba bible

Matie Sɛbɛ 4

¹A ala ɩ̃ baar, a Naaŋmɩn Sɩɛ tɔw na a *Jeeju kpɛ nɩ a wɛkar pʋɔ a Satã na bɩɩr ʋ.

²Ɩ̃ a mɩnɛ ʋ na lũ a nʋɔr a bibie lɩjaayi, a kɔ̃ nyɔw ʋ na.

³A Bɩbɩɩrɛ wɩ na a ʋ sɛ ɩ̃ yel ʋ: “A ala ɩ fʋ ɩ na a Naaŋmɩn Bie, yel a kubie na a ba lɩɛb ɩ a dɩb.”

⁴A Jeeju yel ʋ: “A yelʼã a Naaŋmɩn Sɛbɛ pʋɔ: ‘Aa ɩ a dɩb tɛw na baa a nɩrɛ wa, ɩ̃-cɛ a ƴɛrɩ̃sɩ a jaa na yire a Naaŋmɩn nʋɔr pʋɔ, ala a nɩrɛ na baa nɩ.’ ”

⁵Ɩ̃ a Satã taw na a Jeeju cenʼɩ̃ a Jerujalɛm na ɩ a ba tẽ-son, ɩ̃ ɩ ʋ do ɩraa a Naaŋmɩn puor-yir kpɛ̃ɛ ju-sɔ̃w

⁶ɩ̃ ʋ yel ʋ: “A ala ɩ fʋ ɩ na a Naaŋmɩn Bie, aw lo a tene, a-na-ɩ a yelʼã a Naaŋmɩn Sɛbɛ pʋɔ: ‘A Naaŋmɩn na kʋ na a nɩ-tʋnɩsɩ a ƴɛrɩ̃ a fʋ ɩnɛ, a ba cɔw fʋ nɩ a ba nur a mɩnɛ fʋ kɔ̃ wa ŋme gbɛr wa.’ ”

⁷A Jeeju yel ʋ: “A lɛ yelʼã a Naaŋmɩn Sɛbɛ pʋɔ: ‘Taa bɩɩrɛ a Nɩ-kpɛ̃ɛ na ɩ a fʋ Naaŋmɩn wa.’ ”

⁸A Satã lɛ taw na a Jeeju do nɩ a tã-kpɛ̃ɛ juu na miil ʋ a ten ten a jaa nɩ a ba yo-yifʋ yele

⁹ɩ̃ yel ʋ: “A fʋ̃ʋ gburĩ a dume ɩ̃ puor ma, ɩ̃ na kʋ fʋ na a ana yele a jaa.”

¹⁰A Jeeju yel ʋ: “Satã, cen be ɩ̃ cɛ ma! A-na-ɩ a yelʼã a Naaŋmɩn Sɛbɛ pʋɔ: ‘A Nɩ-kpɛ̃ɛ na ɩ a fʋ Naaŋmɩn, ʋlɔ fʋ na puoro, ɩ̃ a ʋlɔ tʋn tɛw fʋ na mɩ tʋnɔ.’ ”

¹¹A lɛ, a Satã bar ʋ na ɩ̃ a sɩ-tʋnɩsɩ wɩ sũono ʋ.

¹²A lɛ a *Jeeju na wõ a ba nyɔw a Jã ƴɔ̃w a kasu pʋɔ, ʋ lɛ lɩɛbʼã cen a Galile.

¹³A mɩnɛ ʋ na yi a Najarɛtɩ-tẽw, ʋ cenʼã na jɛ a Kapɛɛnam-tẽw na be a man nʋɔr, a Jabʋlɔ̃ nɩ a Nɛbtalɩ wɩɛr.

¹⁴A ta na a lɛ, a na ɩ a ƴɛr-hiere Ejayi ƴɛrɩ̃ na dãa yel:

¹⁵“A Jabʋlɔ̃ nɩ a Nɛbtalɩ wɛɛ na be a man sɔɛ pʋʋr a Jʋrdɛ̃ man gaan, a Galile ʋlɔ na ɩ a nɩ-bʋlsɩ tẽw,

¹⁶a bana nɩbɛ naa na dãa jɛ a libe pʋɔ nyɛ na a cãa kpee; a bala na mɩ dãa jɛ a kũu nʋɔr libe pʋɔ, mɩ nyɛ na a cãa ʋ pur caarɩ̃ ba.”

¹⁷Wa nyɔw nɩ a daar ʋlɔ pʋɔ a Jeeju hiere na yele nɩ: “Nyɩ́ lɩɛb a nyɩ yɛ̃, a-na-ɩ a saa juu fãw pɩɛlʼã.”

¹⁸A mɩnɛ a *Jeeju na lara a Galile man gbẽgbere, ʋ nyɛ na a yɛɛr ayi, a Sɩmɔ̃ ʋlɔ na mɩ dɩ a Pɩɛr nɩ a Ãdire, a ba bɛrɛ a jɩmɛ a manɩ̃ a-na-ɩ jɩ̃-nyɔɔrbɔ ba ɩ.

¹⁹A Jeeju yel ba: “Nyɩ́ wa tuure ma, ɩ̃ ɩ̃ na lɩɛb nyɩ na a nyɩ na bʋɔrɔ a nɩbɛ kʋrɔ ma a jɩ̃-bɛrɛ kaarɩ̃.”

²⁰A jie naan ba barʼã a ba jʋʋr ɩ̃ tuure ʋ.

²¹Ɩ̃ a lɛ ʋ na po a nii-sɔw, ʋ nyɛ na yɛɛr ayi go na ɩ a Jakɩ nɩ a Jã na ɩ a Jebede bi-dabsɩ, a ba be taa nɩ a ba sãa a gbor pʋɔ cɔɔrɔ a ba jʋʋr, ʋ mɩ bʋɔl ba.

²²Ɩ̃ a jie naan ba barʼã a ba sãa nɩ a gbor ɩ̃ tuure ʋ.

²³A *Jeeju yʋɔrɔ na a Galile-tẽw ʋ jaa jaana a Jufisɩ a ba *puorfʋ yie pʋʋr, hiere nɩ a saa juu fãw ƴɛr-son, kpaara nɩ a wʋlɩ̃-bʋrɔ bʋrɔ deme.

²⁴A ʋ yuor yɛrʼã pɔw a Sɩrɩ-tẽw ʋ jaa, a nɩbɛ wɩɛrɛ nɩ a bala ba jaa na tɛrɛ a wʋlɩ̃-bʋrɔ bʋrɔ, a bala na nyɛrɛ a hʋʋr, a kɔ̃tɔn-irbe, a ŋme-kpar deme, nɩ a bala na sãw a ɩ̃gana, ʋ kpaara ba.

²⁵A nɩ-yayaw yi na a Galile, a Ten-Pie tẽ-daa, a Jerujalɛm, a Jude, nɩ a Jʋrdɛ̃ man gaan ɩ̃ wa tuure ʋ.