Read Birifor, Malba Matie Sɛbɛ 5 Bible Online

Matie Sɛbɛ 5 - Birifor, Malba bible

Matie Sɛbɛ 5

¹A mɩnɛ a *Jeeju na nyɛ a bana nɩ-yaw a ba tuure ʋ, ʋ do na a tãw juu jɛ, a ʋ *par-tuurbe wɩ a ʋ sɛ,

²ʋ nyɔw a jaanfʋ ɩ̃ jaana ba, yele nɩ:

³“Nʋ̃ɔ ma be na a bala jie na tɛrɛ a nãw a sɩɛ pʋɔ, a-na-ɩ bala sɔ a saa juu fãw.

⁴Nũɔ ma be na a bala jie a sube na sãw, a-na-ɩ a Naaŋmɩn nɔɔ ƴɛw ba na.

⁵Nũɔ ma be na a bala jie na tɛrɛ a su-ɓaara, a-na-ɩ bala wa sɔrɛɛ a tẽw.

⁶Nũɔ ma be na a bala jie na nyɩrɩ̃ bʋɔrɔ a torfʋ a kɔ̃ nɩ a kʋ̃ɔ-nyuur kaarɩ̃, a-na-ɩ ba nɔɔ pɔw ʋ na.

⁷Nũɔ ma be na a bala jie na tɛrɛ a nã-bɔ̃wfʋ a-na-ɩ a Naaŋmɩn nɔɔ mɩ bɔ̃w na a ba nãw.

⁸Nũɔ ma be na a bala jie na tɛrɛ a su-pɩlaa, a-na-ɩ ba nɔɔ nyɛ na a Naaŋmɩn.

⁹Nũɔ ma be na a bala jie na bʋɔrɔ a nɩbɛ pɩɛnfʋ, a-na-ɩ a Naaŋmɩn nɔɔ bʋɔl ba na a ʋ bibiir.

¹⁰Nũɔ ma be na a bala jie ba na hʋɔlɔ a torfʋ ɩnɛ, a-na-ɩ bala sɔ a saa juu fãw.

¹¹“A na ɩ nyɩ na nũɔ a lɛ ba nɔɔ tʋrɔ nyɩ, ɩ̃ hʋɔlɔ nyɩ, ɩ̃ mɩ ŋmara a jir-kara ƴɔnɔ nyɩ a ɩ̃ ɩnɛ.

¹²Nyɩ́ tɛrɛ nũɔ cɩlɛ nɩ, a-na-ɩ a nyɩ yar nɔɔ bɛrmɛ na a saa juu. Nyɩ bɔ̃w na ka a lɛ ba mɩ dãa hʋɔl a Naaŋmɩn ƴɛr-hierbe na dãa de nyɩ a nĩe.

¹³“Nyɩmɩ ɩ a nasõ a tẽw pʋɔ deme jie, ɩ̃-cɛ a nasõ tomofʋ wa baar, bõ a nɩrɛ na nyɛ ƴɔ̃w ʋ ʋ lɛ tomo? ꞌWaa lɛ ɩ bom go wa. Ba na de ʋ na lɔb bar, a ba nɛbɛ nɩ gbɛɛ.

¹⁴“Nyɩmɩ ɩ a cãa a tẽw pʋɔ deme jie. A tẽw na be a tãw juu ma tʋɔrɔ sɔɔlɔ wa.

¹⁵Nɩrɛ ma ƴɔnɔ a lãpa a vũu, ɩ̃ lɛ diere pɔwrɔ a lakpow pʋɔ wa, ɩ̃-cɛ a gbẽgbere juu ʋ na dɔɔl ʋ, ʋ caara a nɩbɛ jaa na be a yir pʋɔ.

¹⁶A lɛ ʋ mɩ, a sɛw na a nyɩ na ɩ a nyɩ cãa ʋ caara a nɩbɛ nii-sɔw, a mɩnɛ a ba na tʋɔ nyɛ a nyɩ tʋ̃-sono, ɩ̃ kʋrɔ a nyɩ Sãa na be a saa juu a ju-kpɛ̃ɛ.

¹⁷“Nyɩ taa tɩɛr beeka ɩ̃ wa na a Mowisi ƴɛr-kpɛn sãwfʋ ɩnɛ wa, mɩɩ a ƴɛr-hierbe ƴɛrɩ̃sɩ sãwfʋ ɩnɛ wa. Maa wa a ana ƴɛrɩ̃sɩ sãwfʋ ɩnɛ wa, ɩ̃-cɛ ɩ̃ wa na a mɩnɛ ɩ̃ na tʋɔ maal a jaa baar.

¹⁸Yel-mɩ̃ɛ ɩ̃ yele nyɩ, a lɛdaar a saꞌlon nɩ a tẽw na ma tɔl sɛr wa, a sɛb-bir ŋmãa mɩɩ a sɛb-bir pabaa na be a *Naaŋmɩn ƴɛr-kpɛn pʋɔ ma tʋɔrɔ ire bara wa. A jaa na maalʼã wa baar.

¹⁹Ala-ɩ̃-sɔ a nɩrɛ ʋlɔ na jaar a ƴɛr-kpɛ̃w kãw, a ala saarɩ̃ ɩ a ƴɛr-bir bile ʋ, ɩ̃ mɩ miile a nɩbɛ a ba maala a ʋ kaarɩ̃, a ʋna nɩrɛ naa na nyɩrɩ̃ na pab a saa juu fãw pʋɔ. Ɩ̃-cɛ a nɩrɛ ʋlɔ na sɔw ɩ̃ mɩ miile a nɩbɛ a ba maala a lɛ, a ʋna nɩrɛ naa na nyɩrɩ̃ na ɩ kpee a saa juu fãw pʋɔ.

²⁰Ɩ̃-cɛ ɩ̃ yele nyɩ na, a nyɩmɩ ma ɩ dẽdẽ a Naaŋmɩn ƴɛrɩ̃ jɔfʋ pʋɔ gãw a *ƴɛr-kpɛn-bɔɔnbɔ nɩ a *Farɩsɩ nɩbɛ wa, nyaa tʋɔrɔ kpɛɛrɛ a saa juu fãw pʋɔ wa.

²¹“Nyɩ wõ na a mɩnɛ ba na dãa yel kʋ a korĩ-cɛ deme, a ba taa kúrɔ nɩrɛ wa. Áa nɩrɛ wa kú nɩrɛ, a ba na cenʼɩ̃ ʋ na a ƴɛr-guorbo jie.

²²Ɩ̃-cɛ a maa, ɩ̃ yele nyɩ na, a nɩrɛ lɛ na nyɛrɛ a suur ƴɔnɔ a ʋ yɛbɛ, ba na mɩ cenʼɩ̃ ʋ na a ƴɛr-guorbo jie. Ɩ̃ a ʋlɔ na yel a ʋ yɛbɛ á dãbol, ba na cenʼɩ̃ ʋ na a *ƴɛr-guor-nɩ-bɛrɛ nii-sɔw, ɩ̃ a ʋlɔ na yel a ʋ yɛbɛ á ʋ yaara na, ʋ na tʋɔ na kpɛ a wɛfʋ vũu pʋɔ.

²³A fʋ̃ʋ tɛrɛ a bom bʋɔrɔ fʋ kʋ a Naaŋmɩn, ɩ̃ wa tɩɛr yuo be a baar lofʋ jie a fʋ yɛbɛ na tɛrɛ nɩ fʋ a ƴɛrɩ̃,

²⁴bar a bom ʋlɔ a be a baar lofʋ jie, ɩ̃ cen na cɔɔrɩ̃ a ʋna ƴɛrɩ̃ nɩ a fʋ yɛbɛ baar, ɩ̃ pãa lɛ wa de a fʋ bom kʋ a Naaŋmɩn.

²⁵“A ala ɩ a nɩrɛ tɛrɛ nɩ fʋ na ƴɛrɩ̃ a ʋ bom fʋ na sãw ɩnɛ, ɩ̃ cere nɩ fʋ a ƴɛr-guorbo jie, ɓaalɩ̃ ʋ fɔfɔw a lɛ nyɩ na cãa a sɔr pʋɔ cere, a-na-ɩ a ʋlɔ ta nɩ fʋ a be, ʋ na ƴɔ̃w fʋ na a ƴɛr-guorbo nuumɩ ʋ de fʋ kʋ a parsãde ʋ ƴɔ̃w fʋ a kasu pʋɔ.

²⁶Yel-mɩ̃ɛ ɩ̃ yele fʋ, faa yire a be ɩ̃-cɛ a ala ma ɩ fʋ ya na a fʋ san a jaa wa.

²⁷“Nyɩ wõ na a mɩnɛ ba na dãa yel a nɩrɛ ʋ taa wa gana nɩ a ʋ tɔ sʋbɔ pɔw wa,

²⁸Ɩ̃-cɛ a maa, ɩ̃ yele nyɩ na, a nɩrɛ lɛ na ꞌwuoro a pɔw a ꞌwuor-fãa, ʋ gɔrʼã gã nɩ ʋ a ʋ suur pʋɔ.

²⁹A ala ɩ a fʋ dʋrɩ̃ mimir ɩ̃ ƴɔnɔ fʋ a fãa pʋɔ, ir ʋ lɔb bar, a-na-ɩ a sa na a fʋ ɩ̃gan ji-bõ-ƴen na bɔr gãw a fʋ ɩ̃gan ʋ jaa ba na diere lɔbɔ ƴɔnɔ a vũu pʋɔ.

³⁰A ala mɩ ɩ a fʋ dʋrɩ̃ nuu wa mɩ ƴɔnɔ fʋ a fãa pʋɔ, fú ŋmaa ʋ lɔb bar, a-na-ɩ a sa na a fʋ ɩ̃gan jie kãw na bɔr, gãw a fʋ ɩ̃gan ʋ jaa na kpɛɛrɛ a vũu pʋɔ.

³¹“Ba mɩ dãa na yel, aa nɩrɛ wa diwre a ʋ pɔw bara, ú kʋ ʋ a barfʋ sɛbɛ.

³²Ɩ̃-cɛ a maa, ɩ̃ yele nyɩ na, a ʋlɔ na diwre a ʋ pɔw bara ɩ̃-cɛ a pɔw ʋlɔ ma dãa maala a burbur wa, ʋ ƴɔ̃w ʋ na a dab-kpee ganifʋ pʋɔ, ɩ̃ a daba ʋlɔ na kule a ʋna pɔw naa na mɩ maalʼã a ʋna fãa.

³³“Nyɩ mɩ wõ na a mɩnɛ ba na dãa yel kʋ a korĩ-cɛ deme: ‘Taa mɔ̃wnɔ a fʋ pʋlɩ̃fʋ bom wa. Maal kʋ a Naaŋmɩn a ala fʋ na dãa pɔ nɩ ʋ.’

³⁴Ɩ̃-cɛ a maa, ɩ̃ yele nyɩ na, nyɩ taa wa pɔrɔ fɩ̃ɩ wa. A ala ɩ a saa juu ʋ mɩɩ, taa pɔrɔ nɩ ʋ wa, a-na-ɩ a Naaŋmɩn jaajie ʋ.

³⁵A tẽw ʋ mɩɩ, taa mɩ pɔrɔ nɩ ʋ wa, a-na-ɩ a Naaŋmɩn gbɛɛ dɔɔlfʋ jie ʋ. A Jerujalɛm ʋ mɩɩ, taa mɩ lɛ pɔrɔ nɩ ʋ wa, a-na-ɩ a Jaman-kpɛ̃ɛ tẽw ʋ.

³⁶Taa mɩ lɔɔ pɔrɔ nɩ a fʋ juu wa, a-na-ɩ faa tʋɔrɔ lɩɛbɛ a fʋ jukɔɔr ʋ pɛlɛɛ mɩɩ ʋ sɔbɔ wa.

³⁷A nyɩ ƴɛrɩ̃sɩ a ɩ a ‘ɔɔ’ mɩɩ a ‘kpee’. A ƴɛrɩ̃sɩ ala nyɩ na ƴɛrɛ dɔɔlɔ, a yi na a Fãa Sʋbɔ jie.

³⁸“Nyɩ wõ na a mɩnɛ ba na dãa yel: ‘A mimir ba na de ya a mimir, a nyɩm ba ba mɩ de ya a nyɩm’.

³⁹Ɩ̃-cɛ a maa, ɩ̃ yele nyɩ na, taa lɩɛb a fãa ya a fãa wa. A ala ɩ a nɩrɛ ba fʋ na a dʋrĩ tʋkpalɩ̃, cɔw ʋ a gʋbaa tʋkpal ʋ lɛ ba.

⁴⁰Ɩ̃ a nɩrɛ bʋɔrɔ ʋ cenʼĩ fʋ a ƴɛr-guorbo jie, na de a fʋ kparle, de a fʋ fu ɓã taa nɩ ʋ.

⁴¹Ɩ̃ a nɩrɛ wa fɛr fʋ a fʋ de a ʋ tuor cenʼĩ fĩɩ kʋ ʋ, de cenʼĩ a jãa a fʋ ku ʋ.

⁴²Ku a ʋlɔ na sʋɔrɔ; taa mɩ mɔ̃wnɔ a ʋlɔ na pɛ̃wnɛ wa.

⁴³“Nyɩ wõ na a mɩnɛ ba na dãa yel: ‘Nʋnɔ a fʋ tɔ sʋbɔ ɩ̃ ꞌlaar a fʋ san-sʋbɔ.’

⁴⁴Ɩ̃-cɛ a maa, ɩ̃ yele nyɩ na, nyɩ nʋnɔ a nyɩ dɔ̃-deme, ɩ̃ sʋɔrɔ a Naaŋmɩn ƴɔnɔ a bala na hʋɔlɔ nyɩ,

⁴⁵a mɩnɛ nyɩ na tʋɔrɔ ɩrɛ a nyɩ Sãa na be a saa juu bibiir. A-na-ɩ ʋ ma purʼã a ʋ mɔtɔ̃w ƴɔ̃w a nɩ-faar nɩ a nɩ-sono, ɩ̃ mɩ ɩ a ʋ saa ʋ wa a nɩ-torisɩ nɩ a bala na maala a burbur jaa ɩnɛ.

⁴⁶A ala ɩ nyɩ nʋnɔ na a bala tɛw na nʋnɔ nyɩ, bõ yar nyɩ na lɛ pɔw? A lãpo-dierbe maa mɩ maal a lɛ wa mɩɩ?

⁴⁷A ala ɩ a nyɩ nɩ-nʋnɩsɩ tɛw nyɩ puoro, a nyɩ maalfʋ sa na a nɩŋmɛɛ maalfʋ mɩɩ? A tɩbɛ deme maa mɩ maal a lɛ wa mɩɩ?

⁴⁸Ala-ɩ̃-sɔ, nyɩ́ ɩ cɛcɛ a mɩnɛ a nyɩ Sãa na be a saa juu na ɩ a cɛcɛ.