Read Birifor, Malba Matie Sɛbɛ 7 Bible Online

Matie Sɛbɛ 7 - Birifor, Malba bible

Matie Sɛbɛ 7

¹“Nyɩ taa koro nɩrɛ wa, a mɩnɛ a Naaŋmɩn kɔ̃ wa guor a nyɩ ƴɛrɩ̃ wa.

²A-na-ɩ a Naaŋmɩn nɔɔ guorʼã a nyɩ ƴɛrɩ̃ a mɩnɛ nyɩ na mɩ guoro a nɩbɛ ƴɛrɩ̃sɩ, ɩ̃ a bom lɛ nyɩ na de mana nɩ a yele, a ʋna bom a Naaŋmɩn na mɩ de manɩ̃ a nyɩ ben.

³Bõ ɩ a fʋ ꞌwuoro a mobir na be a fʋ yɛbɛ mimir pʋɔ ɩ̃ ma tɩɛrɛ nɩ a dakpur na be a fʋ mimir pʋɔ wa?

⁴Mɩnɛ fʋ na tʋɔ ɩ ɩ̃ yel a fʋ yɛbɛ: ‘Ɩra lɛ, ɩ̃ pɛɛl fʋ mobir na be a fʋ mimirɩ̃’ ɩ̃-cɛ a dakpur cãa be a fʋ mimir pʋɔ?

⁵Fʋ ɩ na bɛbɛlɛ! A sɛw na fʋ de nĩe ir a dakpur na be a fʋ mimir pʋɔ baar, ɩ̃ pãa tʋɔ nyɛ a mɩnɛ fʋ na ɩrɛ ɩ̃ pɛɛlɛ a mobir na be a fʋ yɛbɛ mimirɩ̃.

⁶“Nyɩ taa de a Naaŋmɩn yel-ciirsɩ ƴɔnɔ a baar wa a mɩnɛ a ba nɔɔ wa lɩɛb dʋ̃ nyɩ wa. Ɩ̃ nyɩ taa mɩ de a nyɩ yel-sono na kpɛmɛ a dafʋ lɔbɔ ƴɔnɔ a dor a mɩnɛ a ba nɔɔ wa nɛbɛ nɩ gbɛɛ wa.

⁷“Nyɩ́ sʋɔrɔ, ɩ̃ ba na kʋ nyɩ na. Nyɩ́ bʋɔrɔ, ɩ̃ nyɩ na nyaa na. Nyɩ́ ŋmeere a pan, ɩ̃ ba na yuo nyɩ na.

⁸A-na-ɩ a nɩrɛ lɛ na sʋɔrɔ, ʋ na pɔw na, ɩ̃ a ʋlɔ na bʋɔrɔ, ʋ na nyɛ na. A ʋlɔ mɩ na mɩ ŋmeere, ba na yuo ʋ na a pan.

⁹Sãa buor be ka a nyɩ pʋɔ a ʋ bie wa sʋɔr ʋ a bõ-son, ʋ de kubir kʋ ʋ?

¹⁰Mɩɩ a jɩm ʋ sʋɔr ʋ, ʋ nyɔw waab kʋ ʋ?

¹¹A nyɩmɩ na ɩ a nɩ-faar ɩ̃ bɔ̃w a yel-sono kʋrɔ a nyɩ bibiir, wa yele nɩ a nyɩ Sãa na be a saa juu, ʋ kɔ̃ kʋ a bala na sʋɔrɔ ʋ a yel-sono wa?

¹²“A bom jaa lɛ nyɩ na bʋɔrɔ a nɩbɛ ba maal kʋ nyɩ, nyɩ́ mɩ maal a lɛ kʋ ba. A-na-ɩ a Mowisi ƴɛr-kpɛn nɩ a ƴɛr-hierbe ƴɛrɩ̃sɩ par nɩ a lɛ.

¹³“Nyɩ́ de a sɔr ʋlɔ na yire a dɔ̃dɔr nɔ-bile pʋɔ, a-na-ɩ a dɔ̃dɔr nɔ-yalaa be na be, a ʋ sɔr mɩ yɔw ɩ̃ cere a wɛfʋ jie, ɩ̃ a yaw jie de na a ʋna sɔr.

¹⁴Ɩ̃-cɛ a dɔ̃dɔr nɔ-bile be na be, a ʋ sɔr mɩ kpɛmɛ a defʋ, ɩ̃ cere a baafʋ pʋɔ, ɩ̃ a bala na nyɛ a ʋna sɔr, baa jɛ̃ bom wa.

¹⁵“Nyɩ́ tɛrɛ nyɩ mɩ̃ɛ a bala na ƴɛrɛ a Naaŋmɩn ƴɛrɩ̃ bɛlɛ nɩ a nɩbɛ. Ba ma wa na a nyɩ jie wɔ̃ taa nɩ piir, ɩ̃-cɛ a ba pʋʋr, ꞌwʋbsɩ ba ɩ.

¹⁶A ba maal-bie jie nyɩ na bɔ̃w nɩ ba. A gʋ-tɩɛ ma wɔnɔ a aaraa wa; a gʋ-salaa ma mɩ wɔnɔ a ꞌwɔrɔ wa.

¹⁷A tɩ-son wɔnɔ na a bi-sono, a tɩ-kpana mɩ wɔnɔ a bi-kpana.

¹⁸A tɩ-son ma tʋɔrɔ wɔnɔ a bi-kpana wa, a tɩ-kpana mɩ ma mɩ tʋɔrɔ wɔnɔ a bi-son wa.

¹⁹A tɩɛ lɛ na ma wɔnɔ a bi-son wa, ba na ŋmaa ʋ na ƴɔ̃w a vũu pʋɔ ʋ dɩ.

²⁰Ala-ɩ̃-sɔ a nɩbɛ bala, a ba maal-bie jie nyɩ na bɔ̃w nɩ ba.

²¹“Aa ɩ a nɩrɛ lɛ na tɔɔ bʋɔlɔ ma: ‘A Nɩ-kpɛ̃ɛ! Nɩ-kpɛ̃ɛ!’ ɩ̃ wa kpɛɛrɛ a saa juu fãw pʋɔ wa, ɩ̃-cɛ a ʋlɔ na maala a ɩ̃ Sãa na be a saa juu pʋ-tɩɛrʋ̃, ʋlɔ tɛw kpɛɛrɛ.

²²A ʋna bibir nɔɔ tara, a yaw jie na yele ma na: ‘Nɩ-kpɛ̃ɛ! Nɩ-kpɛ̃ɛ! Aa ɩ a fʋ yuor sɩ dãa hiere nɩ a Naaŋmɩn ƴɛrɩ̃ wa? Aa mɩ dãa ɩ a fʋ yuor sɩ dãa diwre nɩ a kɔ̃tɔnsɩ, ɩ̃ mɩ tʋ̃ nɩ a tʋ̃-kpɛn yaw wa?’

²³Ɩ̃-cɛ ɩ̃ na yel ba na cãa pʋɔ: ‘Maa bɔ̃w nyɩ fɩ̃ɩ wa. Nyɩ́ taw yi ma be, a nyɩna maal-fãa deme naa!’

²⁴“Ala-ɩ̃-sɔ a nɩrɛ ʋlɔ na cɛlɛ a ɩ̃ ƴɛrɩ̃sɩ ala ɩ̃ na ƴɛr ɩ̃ sɔw maal, ʋ na wɔ̃ na taa nɩ a nɩrɛ na tɛrɛ a yɛ̃ mɛ nɩ a ʋ yir a kʋsɩpan juu.

²⁵A saa wa na yaw, a kʋlsɩ paal, a sɛsɛb mɩ fure dama nɩ a ʋna yir, ɩ̃-cɛ ꞌwaa lo wa, a-na-ɩ a kʋsɩpan juu ba mɛ ʋ.

²⁶Ɩ̃-cɛ a nɩrɛ ʋlɔ na cɛlɛ a ɩ̃ ƴɛrɩ̃sɩ ala ɩ̃ na ƴɛr ɩ̃ ma sɔw maal wa, ʋ na wɔ̃ na taa nɩ a nɩ-dãbol na mɛ a ʋ yir a biire juu.

²⁷A saa wa na yaw, a kʋlsɩ paal, a sɛsɛb mɩ fure dama nɩ a ʋna yir ʋ faa lo, a ʋ lofʋ nyɩrɩ̃ na bɛlɩ̃.”

²⁸A mɩnɛ a *Jeeju na man a ana ƴɛrɩ̃sɩ baar, nɔɛ ko na a bana nɩbɛ ba jaa na cɛlɛ ʋ

²⁹a-na-ɩ ꞌwaa man a ʋ ƴɛrɩ̃ a wɔ̃ taa nɩ a ba *ƴɛr-kpɛn-bɔɔnbɔ manfʋ wa, ɩ̃-cɛ a ʋ ƴɛrɩ̃ tɛrɛ na a tʋɔfʋ.