Read Birifor, Malba Matie Sɛbɛ 8 Bible Online

Matie Sɛbɛ 8 - Birifor, Malba bible

Matie Sɛbɛ 8

¹A lɛ a *Jeeju na suure a tãw juu, nɩ-yayaw tuure ʋ na

²a kɔ̃w wa taw ta ʋ ɩ̃ lo gburĩ a dume puor ʋ, ɩ̃ yel: “Nɩ-kpɛ̃ɛ, a ala ɩ fʋ sɔw na fʋ na tʋɔ na pɔlɩ̃ ma.”

³A Jeeju ir a nuu sɩɩrʼɩ̃ ʋ ɩ̃ yel: “Ɩ̃ sɔw na. Pɔlɩ̃!” A jie naan a kɔ̃w pɔlɩ̃ na,

⁴ɩ̃ a Jeeju yel ʋ: “Tɛrɛ fʋ mɩ̃ɛ kɔ̃ yel kʋ nɩrɛ wa. Cen na miilʼɩ̃ a fʋ mɩ̃ɛ a Naaŋmɩn baar-loro, ɩ̃ tɩɩr a baar-lo-yele ala a Mowisi na dãa ƴɔ̃w, a nɩbɛ na bɔ̃w ka fʋ sɩrɩ̃ na pɔlɩ̃.”

⁵A lɛ a *Jeeju na kpɛ a Kapɛɛnam-tẽw, a sɔdaal-nɩ-kpɛ̃ɛ na ɩ a Orom nɩrɛ wɩ na a ʋ sɛ̃ na sʋɔrɔ ʋ waala nɩ:

⁶“Nɩ-kpɛ̃ɛ, a ɩ̃ tʋtʋnɔ gã na be a yir a ꞌwɔbɔ ʋ a ꞌwaa tʋɔrɔ dama wa; ʋ nyɛrɛ na hʋʋr yaw.”

⁷A Jeeju yel ʋ: “Ɩ̃ na wɩ na kpaar ʋ,”

⁸ɩ̃-cɛ a sɔdaal-nɩ-kpɛ̃ɛ yel ʋ: “Nɩ-kpɛ̃ɛ, maa ɩ nɩrɛ na sɛw a fʋ na kpɛ a ɩ̃ yir wa, ɩ̃-cɛ ƴɛr a ƴɛrɩ̃ tɛw, ɩ̃ a ɩ̃ tʋtʋnɔ na kpaarʼã.

⁹A-na-ɩ a maa mɩ, ɩ̃ tɛrɛ na a ɩ̃ nɩ-bɛrɛ, ɩ̃ mɩ tɛrɛ a sɔdaalsɩ a ba jɔrɔ a ɩ̃ ƴɛrɩ̃sɩ. A maa yel a kãw ú cen, ʋ na cenʼã. Ɩ̃ a maa mɩ yel a ƴen sʋbɔ ú wa, ʋ na wa na. A maa mɩ lɛ yel a ɩ̃ tʋtʋnɔ á ʋ maal a asɩmɛ, ʋ na maalʼã.”

¹⁰A lɛ a Jeeju na wõ a ʋna ƴɛrɩ̃, nʋɔr ko ʋ na, ʋ yel a bala na tuure ʋ: “Yel-mɩ̃ɛ ɩ̃ yele nyɩ, maa dãa nyɛ a *Ɩsɩrayɛl nɩbɛ pʋɔ a nɩrɛ ʋ tɛrɛ a ƴɔ̃w-nyãa a nɔhɔ̃ wa.

¹¹Ɩ̃ yele nyɩ na, a nɩ-yaw nɔɔ yi na a tẽw parɩ̃ nɩ a tẽw ju-sɔ̃w, na ba pɔw a Abʋraham nɩ a Ɩjakɩ nɩ a Jakɔb lãa jɛ nɩ a dɩb pulẽe a saa juu fãw pʋɔ.

¹²Ɩ̃-cɛ a bala na dãa sɛw ba kpɛ a be, bala ba na lɔb ƴɔ̃w a libe pʋɔ a yene, a jie ba na kono nyɩrɛ nɩ a nyɩmɛ.”

¹³Ɩ̃ a Jeeju yelʼã a sɔdaal-nɩ-kpɛ̃ɛ: “Kule. A mɩnɛ a fʋ ƴɔ̃w-nyãa na be, a na maalʼã a lɛ.” Ɩ̃ a daar ʋlɔ pʋɔ a ʋ tʋtʋnɔ kpaarʼã.

¹⁴A *Jeeju cenʼã a Pɩɛr yir, ɩ̃ a mɩnɛ ʋ na kpɛ a diem, ʋ nyɛ na a Pɩɛr dɩ̃ɛ-mã a ĩgan na tʋlɔ, ʋ gã.

¹⁵A Jeeju sɩɩr ʋ a nuu, a jie naan a ĩgan ɓãa ʋ, ʋ ir, ir ʋ a saan.

¹⁶A mɩnɛ a jaanʋɔr na ta, ba taw na a kɔ̃tɔn-irbe yaw wɩ nɩ a ʋ sɛ̃, ʋ diw a kɔ̃tɔnsɩ bar nɩ a ʋ ƴɛrɩ̃ ɩ̃ kpaar a wʋlɩ̃sɩ deme ba jaa.

¹⁷Ʋ maalʼã a lɛ a na ɩ a mɩnɛ a ƴɛr-hiere Ejayi ƴɛrɩ̃ na dãa yel: “Ʋ de na a sɩ ɩ̃gan saansɩ, ɩ̃ mɩ ir a sɩ wʋlɩ̃sɩ bar.”

¹⁸A mɩnɛ a *Jeeju na nyɛ a nɩ-yaw na tiw kolĩ ʋ, ʋ yelʼã a ba gãw a gaan kpee pʋɔ.

¹⁹Ɩ̃ a *ƴɛr-kpɛn-bɔ̃wnɔ taw na ta ʋ ɩ̃ yel ʋ: “Jãjaana, ɩ̃ na tuure fʋ na a jie-oo-jie fʋ na cere.”

²⁰A Jeeju yel ʋ: “A sɛ́nɛ tɛrɛ na a ba bɔɔr, ɩ̃ a wɛ-lili mɩ tɛrɛ a ba cor, ɩ̃-cɛ a *Nɩbɛ Bie ma mɩ tɛrɛ jie ʋlɔ ʋ na gaala a ʋ juu wa.”

²¹A ʋ *par-tuure kãw mɩ taw ta ʋ ɩ̃ mɩ yel ʋ: “Nɩ-kpɛ̃ɛ, kʋ ma sɔr ɩ̃ kulʼɩ̃ ũu a ɩ̃ sãa baar.”

²²A Jeeju yel ʋ: “Wa tuure ma, ɩ̃ bar a nɩ-kũusɩ a ba uune a ba kũusɩ.”

²³A ala ɩ̃ baar a *Jeeju *par-tuurbe tu ʋ na kpɛ nɩ a gbor pʋɔ.

²⁴Ɩ̃ a mɩnɛ ba na be a man sɔ̃w, sɛsɛb kpɛ̃ɛ nyɔw na ɩ̃ fure a man pʋɔ, a kʋ̃ɔ duoro pɔwrɔ a gbor, ɩ̃ a Jeeju gur,

²⁵a ba taw ta sɩ̃wnɛ ʋ, yele nɩ: “Nɩ-kpɛ̃ɛ, sɩ wɛrɛ na! Ir faa sɩ!”

²⁶A Jeeju yel ba: “Bõ nyɩ kpɛ dãbɩ̃ɛ lɛ? Nyɩ ɩ na ƴɔ̃w-nyãa pabaa deme”, ɩ̃ ir tan a sɛsɛb nɩ a kʋ̃ɔ, a ŋma vʋʋrʋ̃ cici.

²⁷A nʋɔr ko a ʋ par-tuurbe ba jaa, a ba yele taa: “Bõ nɩ-bʋrɔ nɩ a nyanɩ, a sɛsɛb nɩ a kʋ̃ɔ jaa jɔrɔ ʋ?”

²⁸A mɩnɛ ba na gãw a man gaan a Gadarɩ-tẽw, kɔ̃tɔn-irbe ayi yi na a yar par ɩ̃ tuor ʋ. Ba nyɩrɩ̃ na bier, a nɩrɛ maa ꞌla de a sɔr ʋlɔ ba na be pʋɔ wa.

²⁹Ba wuure na yele nɩ: “Bõ a sɩmɩ nɩ a fʋ̃ʋ Naaŋmɩn Bie be taa? Fʋ de na nĩe wa ka a sɩ hʋɔlfʋ jie ɩ̃-cɛ a daar ma ta sɛr wa?”

³⁰Ɩ̃ dor yaw dãa na ꞌwɔbɔ mʋ̃ɔ yʋɔrɔ nɩ be jie kãw,

³¹a kɔ̃tɔnsɩ sʋɔrɔ a *Jeeju yele nɩ: “A ala ɩ fʋ diwre sɩ na bara, ƴɔ̃w a sɩ kpɛ a dor basɩmɛ pʋʋr.”

³²A Jeeju yel ba: “Nyɩ́ yi cen!” A ba yi cen na kpɛ a dor pʋɔ, a dor dar taa suu a tãw fʋɔlaa lo a man kʋ̃ɔ pʋɔ ba jaa kpi,

³³a dɔ-cɩɩnbɛ jɔ kul na man a ala na ta a dor, nɩ a kɔ̃tɔn-irbe ayi ƴɛrɩ̃.

³⁴A tẽ-deme ba jaa yi na cere a Jeeju nyɛfʋ ɩnɛ, ɩ̃ a lɛ ba na nyɛ ʋ, ba sʋɔr ʋ na, á ʋ yi a ba tẽw pʋɔ.