Read Birifor, Malba Matie Sɛbɛ 9 Bible Online

Matie Sɛbɛ 9 - Birifor, Malba bible

Matie Sɛbɛ 9

¹A *Jeeju lɛ lɩɛbʼã kpɛ a gbor pʋɔ gãw a man, ɩ̃ kul a ʋ tẽw.

²Ba ɓɔw na gbɛr nɩ a ʋ gaajie wɩ nɩ a ʋ sɛ̃. Ɩ̃ a mɩnɛ ʋ na nyɛ a ƴɔ̃w-nyãa ba na tɛrɛ, ʋ yelʼã a gbɛr: “Ɩ̃ bie, tɛrɛ nũɔ! Ɩ̃ de na a fʋ maal-faar bar kʋ fʋ!”

³Ɩ̃ a *ƴɛr-kpɛn-bɔɔnbɔ ŋmɛɛ yele na taa: “A daba na tʋrɔ na a Naaŋmɩn,”

⁴a Jeeju bɔ̃w a ba tɩɛrɩ̃sɩ ɩ̃ yel ba: “Bõ ɩ a nyɩ tɛrɛ a tɩɛrʋ̃-faar a nyɩ sube pʋʋr a lɛ?

⁵Buor ɩ̃ yɔw gãw ɩ̃ na yel: ‘A fʋ maal-faar de na bar kʋ fʋ’ mɩɩ ‘A fʋ ir cere?’

⁶Ɩ̃-cɛ ɩ̃ bʋɔrɔ na nyɩ bɔ̃w áa *Nɩbɛ Bie tɛrɛ na a tʋɔfʋ a tẽw pʋɔ na de a nɩbɛ maal-faar bar ba.” Ɩ̃ ʋ yelʼã a gbɛr: “Ir de a fʋ gaajie kule nɩ,”

⁸A mɩnɛ a nɩbɛ na nyɛ a lɛ, dãbɩ̃ɛ nyɔw ba na, a ba pɛwrɛ a Naaŋmɩn a mɩnɛ ʋ na kʋ a nɩbɛ a ʋna tʋɔfʋ bʋrɔ.

⁹A lɛ a *Jeeju na yi a be ɩ̃ cere, ʋ nyɛ na a daba na jɛ a lãpo defʋ jie a ba bʋɔlɔ a Matie, ʋ yel ʋ: “Ir wa tuure ma!” ɩ̃ ʋ ir cen na tuure ʋ.

¹⁰Ɩ̃ a mɩnɛ ba na jɛ a dɩb pulẽe a Matie yir pʋɔ, a lãpo-dierbe nɩ a maal-faar deme yaw wɩ na lãa jɛ nɩ a Jeeju nɩ a ʋ *par-tuurbe.

¹¹A mɩnɛ a *Farɩsɩ nɩbɛ na nyɛ a lɛ, ba yelʼã a ʋ par-tuurbe: “Bõ ɩnɛ a nyɩ jãjaana lãa dɩrɛ nɩ a lãpo-dierbe nɩ a maal-faar deme?”

¹²A lɛ a Jeeju na wõ a ala, ʋ yel ba na: “Aa ɩ a bala na kpɛmɛ, bala ɩ̃ bʋɔrɔ a dɔɔtɔrɔ wa, ɩ̃-cɛ a baalsɩ ɩ̃ ma bʋɔrɔ ʋ.

¹³Nyɩ́ cen na jaan a Naaŋmɩn ƴɛr-bir nanɩ par na yel: ‘Maa bʋɔrɔ baar lofʋ wa, ɩ̃-cɛ a nã-bɔ̃wfʋ ɩ̃ bʋɔrɔ.’ A-na-ɩ maa wa a nɩ-torisɩ bʋɔlfʋ wa, ɩ̃-cɛ a maal-faar deme bʋɔlfʋ ɩ̃ wa.”

¹⁴A Jã-Batii *par-tuurbe taw na ta a *Jeeju ɩ̃ soor ʋ: “Bõ ɩnɛ a sɩmɩ nɩ a *Farɩsɩ nɩbɛ ma lũ a nʋɔr, ɩ̃-cɛ a fʋ par-tuurbe maa lũ wa?”

¹⁵A Jeeju yel ba: “Nyɩ tɩɛrʼã bɔ̃w ka a bala ba na bʋɔl a kul-taa jie, ba na tʋɔ na kono a lɛdaar a kul-taa sʋbɔ na cãa be nɩ ba mɩ? Ɩ̃-cɛ a daar nɔɔ ta na a ba ir a kul-taa sʋbɔ cenʼɩ̃, ɩ̃ a ba pãa lũ a nʋɔr.

¹⁶Nɩrɛ ma diere cẽcen paalaa sɛbɛ nɩ kpar-kʋraa bɔw wa, a-na-ɩ ʋ na taw na a kparʋ, ɩ̃ a ʋ ɓerfʋ na nyɩrɩ̃ na bɛlɩ̃.

¹⁷Nɩrɛ ma mɩ diere dã-paalaa ƴɔnɔ a dʋʋ jaw pʋɔ wa, a-na-ɩ a ʋ na wɛlʼã, a dãa deer, a jaa sãw. Ɩ̃ a dʋʋ paalaa pʋɔ ba ma mɩ ƴɔ̃w a dã-paalaa, a ba jaa ayi nyɔɔr taa.”

¹⁸A mɩnɛ a *Jeeju na cãa mana ba a ana ƴɛrɩ̃sɩ, a Jufisɩ nɩ-kpɛ̃ɛ ta na ɩ̃ lo gburĩ a dume a ʋ nii-sɔw ɩ̃ yel ʋ: “Ɩ̃ bi-pɔw kpi na a ƴɛ̃ƴɛrɩ̃ na, ɩ̃ a fʋ̃ʋ waa dɔɔl ʋ a fʋ nuu, ʋ na jaw na.”

¹⁹A Jeeju irʼã nɩ a ʋ *par-tuurbe ɩ̃ tuure ʋ.

²⁰Pɔw be na be na tɛrɛ a sɩɛ na ma baara wa, yara nɩ a yaan maalʼɩ̃ yomo pie-nʼayi. Ʋ taw na ta a Jeeju puo-sɔw ɩ̃ sɩɩr a ʋ fu nʋɔr,

²¹a-na-ɩ ʋ yelʼã a ʋ mɩ̃ɛ: “A maa wa tʋɔ sɩɩr a ʋ fu tɛw, a ɩ̃ sɩɛ na baarʼã.”

²²A Jeeju lɩɛb nyɛ ʋ, ɩ̃ yel ʋ: “Ɩ̃ bi-pɔw, tɛrɛ nʋ̃ɔ! A fʋ ƴɔ̃w-nyãa faa fʋ na,” ɩ̃ a daar ʋlɔ pʋɔ a pɔw sɩɛ baarʼã.

²³A mɩnɛ a Jeeju na ta a nɩ-kpɛ̃ɛ ʋlɔ yir, ʋ nyɛ na a ɩl-pɛɛlbɛ nɩ a nɩbɛ na kono maala nɩ a nã-yele,

²⁴ʋ yel: “Nyɩ́ yi be! A poole ma kpi wa, ɩ̃-cɛ ʋ gurʼã,” a ba laara ʋ.

²⁵A lɛ ba na diw a nɩbɛ bar a yẽw, a Jeeju kpɛ na a diem ɩ̃ nyɔw a poole nuu, ʋ ir.

²⁶A ƴɛrɩ̃ ʋlɔ yɛrʼã pɔw a tẽw ʋ jaa.

²⁷A mɩnɛ a *Jeeju na yi cere, jɔn ayi wuure na tuure nɩ ʋ yele nɩ: “*Davɩtɩ Bie yaa! Waalɩ̃ nãw ƴɔ̃w sɩ bɩlɛ!”

²⁸A lɛ a Jeeju na ta a yir kpɛ a diem, a jɔn bala taw na ta ʋ, ʋ soor ba: “Nyɩ tɩɛrʼã bɔ̃w ka ɩ̃ na tʋɔ na maal nyɩ a lɛ mɩɩ?” A ba yel: “Ɔɔ, Nɩ-kpɛ̃ɛ!”

²⁹Ʋ sɩɩr ba a mimie ɩ̃ yel: “Á maal a lɛ, tu nɩ a nyɩ ƴɔ̃w-nyãa,”

³⁰ɩ̃ a ba mimie yuo na. A Jeeju kpãa ba, kpãkpanʼɩ̃ ba: “Nyɩ́ tɛrɛ nyɩ mɩ̃ɛ, a nɩrɛ kɔ̃ bɔ̃wnaa wa.”

³¹Ɩ̃-cɛ ba yi na ƴɛrɛ a ʋ ƴɛrɩ̃, a pɔw a ʋna tẽw ʋ jaa.

³²A mɩnɛ ba na cãa yi cere, ba taw na wõw a kɔ̃tɔn na ire wɩ nɩ a ʋ sɛ̃.

³³Ɩ̃ a lɛ a *Jeeju na diw a kɔ̃tɔn bar ʋ yi, a wõw nyɔw na a ƴɛrɩ̃sɩ ɩ̃ ƴɛrɛ, a nɩbɛ nɔɛ ko ba a ba yele taa: “Saa dãa nyɛ bom nɔhɔ̃ a *Ɩsɩrayɛl-tẽw pʋɔ fɩ̃ɩ wa!”

³⁴Ɩ̃-cɛ a *Farɩsɩ nɩbɛ ʋlɔ yelʼã: “A kɔ̃tɔn nɩ-kpɛ̃ɛ fãw ʋ diwre nɩ a kɔ̃tɔnsɩ!”

³⁵A *Jeeju cʋbʼã a tẽ-bɛrɛ nɩ a tẽ-bil a jaa jaana a Jufisɩ a ba *puorfʋ yie pʋʋr, hiere nɩ a Naaŋmɩn fãw ƴɛrɩ̃, mɩ kpaara nɩ a wʋlɩ̃-bʋrɔ bʋrɔ deme ba jaa.

³⁶A mɩnɛ ʋ na nyɛ a nɩbɛ na waa, nãw nyɔw ʋ na a-na-ɩ ba ɩ na nɩbɛ na giem, a sube na mɩ sãw wɔ̃ taa nɩ piir na ma tɛrɛ dɔ-cɩɩnaa wa.

³⁷Ʋ yel a ʋ *par-tuurbe: “A puo bɛrmɛ na, ɩ̃-cɛ a cɩ-ŋmarba ma jɛ̃ bom wa.

³⁸Ala-ɩ̃-sɔ, nyɩ́ sʋɔr a puo sʋbɔ ʋ ƴɔ̃w a tʋ̃tʋnbɔ a ba cen na ŋma a ci.”