Read Birifor, Malba Markɩ Sɛbɛ 10 Bible Online

Markɩ Sɛbɛ 10 - Birifor, Malba bible

Markɩ Sɛbɛ 10

¹A *Jeeju yi na a be ɩ̃ cen a Jude wɩɛr na ʋ tɔl gãw a Jʋrdɛ̃ man gaan, a nɩ-yaw lɛ bɔ̃w tiw taa a ʋ sɛ̃, ʋ nyɔw ɩ̃ jaana ba a mɩnɛ ʋ na mɩlɩ̃ nɩ.

²A *Farɩsɩ nɩbɛ taw ta ʋ, bʋɔrɔ ba jʋʋr ʋ, bɔ̃w a ʋ tɛw, ɩ̃ na ba soor ʋ, á sɔr be na be a daba na diw a ʋ pɔw bar mɩɩ?

³Ʋ mɩ lɩɛb soor ba: “Bõ a Mowisi ƴɔ̃w a nyɩ maal?”

⁴A ba yel: “A Mowisi kʋ sɩ na a sɔr a sɩ na sɛb kul-taa ŋmafʋ sɛbɛ kʋ a sɩ pɔw ɩ̃ bar ʋ.”

⁵A be jie, a Jeeju yel ba: “A nyɩ sube kpɛmɛfʋ ɩnɛ a Mowisi ƴɔ̃w a nyɩ maala a lɛ.

⁶A ala ma ɩ lɛ ʋ wa, a tẽw nyɔwfʋ daar, a Naaŋmɩn irʼã a daba nɩ a pɔw.

⁷Ala-ɩ̃-sɔ a daba na yi na a ʋ sãa nɩ a ʋ mã nuumɩ na ʋ mar taa nɩ a ʋ pɔw,

⁸a ba jaa ayi ɓã taa lɩɛb ɩ ɩ̃gan bõ-ƴen. A lɛ, baa lɛ cãa ɩ nɩbɛ ayi wa, ɩ̃gan bõ-ƴen ba lɩɛb ɩ.

⁹Ala-ɩ̃-sɔ, nɩrɛ ʋ taa wa ŋma a ala a Naaŋmɩn na ɓã taa wa.”

¹⁰A lɛ ba na lɩɛb kul a yir, a Jeeju *par-tuurbe lɛ sooro ʋ na a ƴɛr-bir ʋlɔ naa,

¹¹ʋ yel ba: “A ala ɩ̃ ɩ nɩrɛ barʼã a ʋ pɔw ɩ̃ lɛ de pɔw kpee, ʋ sãw na a kul-taa bar.

¹²A lɛ ʋ mɩ, a ala ɩ a pɔw barʼã a ʋ sɩrɛ ɩ̃ jɔ de dab-kpee, ʋ mɩ sãw na a kul-taa bar.”

¹³A nɩbɛ taw na a bibiir wɩɛrɛ nɩ a *Jeeju sɛ̃ a ʋ sɩɩr ba, ɩ̃ a *par-tuurbe tana ba.

¹⁴A mɩnɛ a Jeeju na nyɛ a lɛ, suur nyɔw ʋ na ʋ yel a ʋ par-tuurbe: “Nyɩ́ bar a bibiir a ba wa a ɩ̃ sɛ̃. Nyɩ taa vara ba bara wa, a-na-ɩ a bala na wɔ̃ a bibiirʼã kaarɩ̃, bala ɩ̃ sɔ a Naaŋmɩn fãw.

¹⁵Yel-mɩ̃ɛ ɩ̃ yele nyɩ, a ʋlɔ na ma sɔw a Naaŋmɩn ʋ tɛrɛ ʋ a bibile kaarɩ̃ wa, ꞌwaa tʋɔrɔ kpɛɛrɛ be fɩ̃ɩ wa.”

¹⁶A mɩnɛ ʋ na ƴɛr a lɛ baar, ʋ de na a bibiir ƴɔ̃w a ʋ nur pʋɔ, ɩ̃ bʋɔlɔ a ʋ Sãa sũofʋ ƴɔnɔ ba, dɔɔlɔ nɩ ba a ʋ nur.

¹⁷A mɩnɛ a *Jeeju na de a sɔr cere, a daba jɔ na wɩ na lo gburĩ a dume a ʋ nii-sɔw ɩ̃ soor ʋ: “Jãjaan-son! Bõ ɩ̃ na maal wa pɔw a baa-kɔ̃-tɛw?”

¹⁸A Jeeju yel ʋ: “Bõ ɩ̃ ɩ a fʋ bʋɔl ma a nɩ-son? Nɩ-son ma be ɩ̃ a ala ma ɩ a Naaŋmɩn tɛw ʋ wa.

¹⁹Fʋ bɔ̃w na a *Naaŋmɩn ƴɛr-kpɛn: ‘Taa wa kúrɔ nɩrɛ wa; taa wa bʋɔrɔ pɔw kpee wa; taa wa jure wa; taa wa ŋmara jir-kara ƴɔnɔ nɩrɛ wa; taa wa bɛlɛ nɩrɛ bom diere wa; jɔrɔ a fʋ sãa nɩ a fʋ mã.’ ”

²⁰A daba yel ʋ: “Jãjaana, ɩ̃ maalʼã a ana ƴɛr-kpɛn a jaa, a ɩ̃ bibile daar wa ta nɩ a dɩnaa.”

²¹A Jeeju ꞌwuor ʋ nɩ nʋfʋ, ɩ̃ yel ʋ: “Bom bõ-ƴen cɛ fʋ na. Cen na da a fʋ yele a jaa fʋ na tɛrɛ, de a libie po a nãw deme, ɩ̃ fʋ na pɔw na a na-yele a Naaŋmɩn tẽw, ɩ̃ na fʋ wa tuure ma.”

²²Ɩ̃ a lɛ a daba na wõ a ʋna ƴɛrɩ̃, ʋ sãw na nii-sɔw ɩ̃ tɩɛrɛ kule nɩ, a-na-ɩ ʋ sɩrɩ̃ na le.

²³A Jeeju ꞌwuorʼã a ʋ *par-tuurbe na tiw kolĩ ʋ, ɩ̃ yel ba áa kpɛmɛ na a nɩ-leraa na kpɛɛrɛ a Naaŋmɩn fãw pʋɔ.

²⁴A ʋ par-tuurbe nɔɛ ko ba a ʋna ƴɛrɩ̃ ɩnɛ, ɩ̃ a Jeeju lɛ yel ba: “Ɩ̃ bibiir! A Naaŋmɩn fãw pʋɔ kpɛfʋ kpɛmɛ na ma ɩ wa.

²⁵A yɔw na a nyʋɔmɩ na kpɛɛrɛ a mɩsɩn bɔw pʋɔ gãw a naaba na kpɛɛrɛ a Naaŋmɩn fãw pʋɔ”,

²⁶a kpal a par-tuurbe nɔɛ a ƴɛrɩ̃ ʋlɔ ɩnɛ, a ba sooro taa: “A ala ɩ̃ ɩ lɛ ʋ, ala ɩ̃ na tʋɔ pɔw a faafʋ?”

²⁷A Jeeju ꞌwuor ba ɩ̃ yel: “A gãw na a nɩbɛ tʋɔfʋ; ɩ̃-cɛ aa gãw a Naaŋmɩn tʋɔfʋ wa, a-na-ɩ a Naaŋmɩn tʋɔ na a yele a jaa.”

²⁸A Pɩɛr yel ʋ: “ꞌWuor nyɛ a sɩmɩ, sɩ barʼã a yele a jaa ɩ̃ tuure fʋ.”

²⁹A Jeeju yel ʋ: “Yel-mɩ̃ɛ ɩ̃ yele nyɩ, a ala ɩ̃ ɩ a nɩrɛ barʼã a ʋ yir, mɩɩ a ʋ yɛɛr, nɩ a ʋ yɛ-pɔɔbɔ, nɩ a ʋ mã, nɩ a ʋ sãa, nɩ a ʋ bibiir, nɩ a ʋ por a maa ɩnɛ nɩ a ƴɛr-son ɩnɛ,

³⁰ʋ na pɔw na a dɔɔlaa gbɛɛ kʋbaa, a daarʼã pʋɔ sɩ na be a ƴɛ̃ƴɛrɩ̃; ʋ na pɔw na a yie, nɩ a yɛɛr, nɩ a yɛ-pɔɔbɔ, nɩ a mã nʋmɔ, nɩ a bibiir, nɩ a por, ɓã taa nɩ a hʋɔlfʋ mɩ. Ɩ̃ a daar ʋlɔ na be a puo-sɔw waara, ʋ na pɔw na a baa-kɔ̃-tɛw.

³¹Ɩ̃ a yaw jie na ɩ a ni-dierbe nɔɔ ɩ na a par-pɔɔrbɔ, ɩ̃ a bala na ɩ a par-pɔɔrbɔ nɔɔ lɩɛbʼã ɩ a ni-dierbe.”

³²Ba be na a sɔr juu cere a Jerujalɛm, a *Jeeju de nĩe a ba tuure. A nɔɛ ko a ʋ *par-tuurbe, ɩ̃ a dãbɩ̃ɛ nyɔw a bala na dãa bɩɛrɛ tuure ba. A Jeeju lɛ bɔ̃w kpaarɩ̃ a ʋ par-tuurbe pie-nʼayi a ʋ pulẽe, ɩ̃ nyɔw ɩ̃ mana ba a ala na wa tara ʋ.

³³Ʋ yele ba na: “Nyɩ́ nyɛ, sɩ cere na a Jerujalɛm. A be, ba na nyɔw na a *Nɩbɛ Bie ƴɔ̃w a *baar-lo-nɩ-bɛrɛ nɩ a *ƴɛr-kpɛn-bɔɔnbɔ nuu pʋɔ. Ba na ƴɔ̃w ʋ na a yel ɩ̃ de ʋ kʋ a nɩ-bʋlsɩ

³⁴a ba la ʋ pʋʋrʼɩ̃ a natɛɛr ƴɔ̃w ʋ, ɩ̃ fɔbʼɩ̃ ʋ a kpaara, ɩ̃ cɛ ʋ, na ba kú. Ɩ̃ a bibie ata dayen ʋ na irʼã a kũu pʋɔ.”

³⁵A Jebede bi-dabsɩ Jakɩ nɩ a Jã wɩ na a *Jeeju sɛ̃ na yel ʋ: “Jãjaana! Bom be na be sɩ na bʋɔrɔ sɩ sʋɔr fʋ a fʋ maal kʋ sɩ.”

³⁶A Jeeju soor ba: “Bõ nyɩ bʋɔrɔ ɩ̃ maal kʋ nyɩ?”

³⁷A ba yel ʋ: “Sɩ bʋɔrɔ na á fʋ̃ʋ wa jɛ a naa-dakɔw juu a fʋ yo-yifʋ daar, a sɩmɩ ayi, bõ-ƴen ʋ jɛ a fʋ dʋrɩ̃ loor ɩ̃ a kãw mɩ jɛ a fʋ gʋbaa loor.”

³⁸A Jeeju yel ba: “Nyaa bɔ̃w a ala nyɩ na sʋɔrɔ wa. Nyɩ na tʋɔ na nyu nɩ a ŋman tuo ʋlɔ ɩ̃ nɔɔ nyuure nɩ, mɩɩ nyɩ na mɩ tʋɔ na kpɛ a tuo dɩfʋ pʋɔ ɩ̃ nɔɔ kpɛɛrɛ a kʋ̃ɔ mʋrfʋ kaarɩ̃?”

³⁹A ba yel ʋ: “Sɩ na tʋɔ na.” A Jeeju yel ba: “Nyɩ na sɩrɩ̃ na nyu nɩ a ŋman ʋlɔ ɩ̃ nɔɔ nyuure nɩ, ɩ̃ mɩ mʋrɔ a kʋ̃ɔ mʋrfʋ ʋlɔ ɩ̃ nɔɔ mʋrɔ,

⁴⁰ɩ̃-cɛ, a ɩ̃ dʋrɩ̃ loor jɛfʋ, nɩ a ɩ̃ gʋbaa loor jɛfʋ, aa ɩ a ɩ̃ jie a ala yire wa, ɩ̃ a na ɩ na a bala ɩnɛ a Naaŋmɩn na dãa gbɛɛrɩ̃.”

⁴¹A mɩnɛ a *par-tuurbe pie na wõ a ʋna ƴɛrɩ̃, ba nyɛ na suur ƴɔ̃w a Jakɩ nɩ a Jã.

⁴²A Jeeju bʋɔl ba a ba wɩ, ʋ yel ba: “Nyɩ bɔ̃w ka a bala ba na bʋɔlɔ a jamansɩ a tẽ-bʋrɔ bʋrɔ pʋʋr ma fɛrɛ na a ba nɩbɛ, ɩ̃ a ten nɩ-bɛrɛ ma fule ba na.

⁴³Aa ɩ lɛ a be a nyɩ jie wa. A ʋlɔ na bʋɔrɔ ʋ ɩ a kpɛ̃ɛ a nyɩ sɔ̃w, ú ɛ̃ɛ ɩ a nyɩ tʋ̃tʋnɔ,

⁴⁴ɩ̃ a ʋlɔ na bʋɔrɔ ʋ ɩ a ni-diere a nyɩ sɔ̃w, ú ɩ a nyɩ jaa gbãgbaa.

⁴⁵A-na-ɩ a *Nɩbɛ Bie mɩ̃ɛ ma wa a nɩbɛ na tʋnɔ kʋrɔ ʋ wa, ɩ̃ ʋ wa na tʋnɔ kʋrɔ a nɩbɛ, ɩ̃ na ʋ tɩɩr a ʋ baafʋ tɛw nɩ a nɩ-yaw baafʋ.”

⁴⁶A *Jeeju ta na a Jeriko, ɩ̃ a lɛ ʋ na yire a ʋna tẽw pʋɔ nɩ a ʋ *par-tuurbe nɩ a nɩ-yaw, a jɔ̃w ba na bʋɔlɔ Batime (a lɛ yelʼã, a Time bie ʋ) jɛ na be a sɔr nʋɔr sʋɔrɔ a yele.

⁴⁷A mɩnɛ ʋ na wõ áa Najarɛtɩ Jeeju ɩ̃ waara, ʋ nyɔw na ɩ̃ wuure: “*Davɩtɩ Bie Jeeju yaa, bɔ̃w ma nãw!”

⁴⁸Ɩ a nɩbɛ yaw jie tana ʋ na a ʋ sine; ʋ pãa lɛ bɔ̃w nyɩrɩ̃ wuurʼɩ̃ kpɛ̃w: “Davɩtɩ Bie, bɔ̃w ma nãw!”

⁴⁹A Jeeju ɩraa ɩ̃ yel: “Nyɩ́ bʋɔl ʋ,” a ba bʋɔl a jɔ̃w ɩ̃ yel ʋ: “Ɓãa suur ɩ̃ ir. Ʋ bʋɔlɔ fʋ na,”

⁵⁰ʋ lɔb a ʋ cẽcen bar ɩ̃ aw ir wɩɛrɛ a Jeeju sɛ̃,

⁵¹a Jeeju soor ʋ: “Bõ fʋ bʋɔrɔ ɩ̃ maal fʋ?” A jɔ̃w yel ʋ: “Jãjaana! Maal ma ɩ̃ lɛ nyɛrɛ.”

⁵²A Jeeju yel ʋ: “Cere. A fʋ ƴɔ̃w-nyãa faa fʋ na.” A jie naan ʋ lɛ nyɛrɛ na, na ʋ pɔw a Jeeju cere nɩ.