Read Birifor, Malba Markɩ Sɛbɛ 11 Bible Online

Markɩ Sɛbɛ 11 - Birifor, Malba bible

Markɩ Sɛbɛ 11

¹A lɛ ba na pɩɛlɛ a Jerujalɛm na ba tara a Bɛfaje nɩ a Betani na be a *Olivi-tɩɩr tãw loor, a *Jeeju tʋ̃ na a ʋ *par-tuurbe ayi

²ɩ̃ yel ba: “Nyɩ́ cen a tẽw ʋlɔ na be a nyɩ nii-sɔw. Nyɩmɩ wa tɔ̃ɔ ta kpɛ, nyɩ na nyɛ na bʋ̃-bile kãw nɩrɛ na ma do a ʋ juu sɛr wa, a ba lũ bar. Nyɩ́ ꞌlor ʋ wa nɩ.

³A ala ɩ a nɩrɛ wa soor nyɩ na a bõ nɩ a ala nyɩ na maala a lɛ, nyɩ́ yel ʋ, a Nɩ-kpɛ̃ɛ ɩ̃ bʋɔrɔ ʋ, ɩ̃ ʋ na bar nyɩ na a jie naan a nyɩ taw ʋ lɩɛb wa nɩ a ka.”

⁴Ba cenʼã na nyɛ bʋ̃-bile a ba lũ be a yẽw pan nʋɔr a sɔr pʋɔ, a ba ta ꞌlor.

⁵A nɩbɛ bala na dãa be a be ŋmɛɛ soor ba na: “Bõ ɩnɛ nyɩ ꞌloro a bʋ̃-bile?”

⁶A ba man a mɩnɛ a Jeeju na dãa yel, a ba bar ba a ba cen.

⁷Ba taw na a bʋ̃-bile cenʼɩ̃ a Jeeju sɛ̃, na ba yɛr a ba cẽcene dɔɔl a ʋ juu, a Jeeju do jɛ.

⁸Nɩ-yaw yɛrʼã a ba cẽcene a sɔr juu, a ŋmɛɛ kar a vɛɛ a por pʋɔ pɩɛrɩ̃ pɔw a sɔr.

⁹A nɩbɛ bala na dãa de a Jeeju nĩe nɩ a bala na tuure ʋ cɩlɛ na yele nɩ: “*Oojana, a Nɩ-kpɛ̃ɛ Naaŋmɩn ú be nɩ a ʋlɔ na waara nɩ a ʋ yuor!”

¹⁰“A Naaŋmɩn ú be nɩ a jamana tẽw ʋlɔ na waara, na ɩrɛɛ a sɩ sãa-kʋmɔ Davɩtɩ ben.” “A Naaŋmɩn na be a saꞌlon iin, Oojana!”

¹¹A Jeeju cenʼã na kpɛ a Naaŋmɩn puor-yir kpɛ̃ɛ pʋɔ be a Jerujalɛm. A mɩnɛ ʋ na ꞌwuor a yele a jaa kolĩ na tuor, ʋ yi na cere a Betani nɩ a ʋ par-tuurbe pie-nʼayi, a-na-ɩ a wɩɛr dãa na faa ba.

¹²A dɩvɩɛ bio, a mɩnɛ ba na yi a Betani ɩ̃ de a sɔr cere, kɔ̃ nyɔw na a *Jeeju.

¹³Ʋ gbã na nyɛ tɩɛ kãw ba na bʋɔlɔ fɩgɩ, ʋ tɛrɛ vɛɛ, ʋ cen na ꞌwuor a ala ɩ̃ ɩ ʋ na nyɛ na wɔmɔ a ʋ juu. Ɩ̃ a lɛ ʋ na taw pɩɛl a tɩɛ, va-jaala tɛw ʋ nyɛ, a-na-ɩ aa dãa ɩ a fɩgɩ wɔ̃fʋ daar wa.

¹⁴Ʋ yel a fɩgɩ tɩɛ: “Aa be a nɩrɛ na lɛ ꞌwɔb a fʋ wɔmɔ wa!” A ʋ par-tuurbe wõ a ala ʋ na yel.

¹⁵Ba ta na a Jerujalɛm, a *Jeeju kpɛ a Naaŋmɩn puor-yir kpɛ̃ɛ pʋɔ, na ʋ nyɔw ɩ̃ diwre a ƴaƴabsɩ nɩ a bala na daara a yele a ƴaƴabsɩ jie a be. Ʋ cãgbalɩ̃ na a libi-tɛwrbɛ tabalsɩ lɔb, cãgbalɩ̃ nɩ a naŋmam-daarba dakɔɔr bar,

¹⁶ɩ̃ ma kʋrɔ nɩrɛ sɔr ʋ na de bom tɔl yi nɩ a Naaŋmɩn puor-yir kpɛ̃ɛ pʋɔ wa.

¹⁷Ʋ jaana na a nɩbɛ yele: “A sɛbʼã a Naaŋmɩn Sɛbɛ pʋɔ a ba na bʋɔlɔ na a ɩ̃ yir a ta-ten nɩbɛ ba jaa *puorfʋ yir, ɩ̃-cɛ nyɩ de ʋ na maal ʋ lɩɛb ɩ nyanyube sɔɔlɩ̃fʋ jie.”

¹⁸A *baar-lo-nɩ-bɛrɛ nɩ a *ƴɛr-kpɛn-bɔɔnbɔ wõ na a ala ɩ̃ na ba bʋɔrɔ a mɩnɛ ba na ɩrɛ ɩ̃ kúrɔ ʋ, a-na-ɩ dãbɩ̃ɛ dãa na nyɔw ba a mɩnɛ a ʋ jaanfʋ na kpaw a nɩbɛ ba jaa nɔɛ.

¹⁹A lɛ a jaanʋɔr na ta, a Jeeju nɩ a ʋ *par-tuurbe yi na a ʋna tẽw pʋɔ.

²⁰A mɩnɛ ba na tɔl cere a dʋ̃ꞌwʋlɩ̃, a *Jeeju *par-tuurbe nyɛ na a fɩgɩ tɩɛ ʋ ko wa ta nɩ a nyɩbɛ pʋɔ.

²¹A Pɩɛr tɩɛr yuo a ala na dãa ta, ɩ̃ yel a Jeeju: “Jãjaana, ꞌwuor nyɛ! A fɩgɩ tɩɛ ʋlɔ fʋ na pɔ ƴɔ̃w, ʋ ko na.”

²²A Jeeju yel ba: “Nyɩ́ tɛrɛ ƴɔ̃w-nyãa a Naaŋmɩn jie.

²³Yel-mɩ̃ɛ ɩ̃ yele nyɩ, a ala ɩ̃ ɩ a nɩrɛ yelʼã a tãw na á ú taw yi a ka ɩ̃ cen na lo a man kʋ̃ɔ pʋɔ, ɩ̃ ma baala a ʋ suur pʋɔ wa, ɩ̃ sɔw nɩ puor a ala ʋ na yel áa maal, a na maalʼã kʋ ʋ.

²⁴Ala-ɩ̃-sɔ ɩ̃ yele nyɩ, a bom jaa lɛ nyɩ na wa sʋɔrɔ a Naaŋmɩn jie, nyɩ́ sɔw nɩ puor a nyɩ de na nĩe pɔw, ɩ̃ a na maalʼã kʋ nyɩ.

²⁵Ɩ̃ a lɛ nyɩ na ir ɩraa sʋɔrɔ a Naaŋmɩn, a ala ɩ̃ ɩ nyɩ tɛrɛ na ƴɛrɩ̃ nɩ nɩrɛ, nyɩ́ de bar kʋ ʋ. A lɛ a nyɩ saa juu Sãa na mɩ de na a nyɩ cɛfʋ jiir bar kʋ nyu [

²⁶Ɩ̃ a ala ɩ nyaa de bar ʋ wa, a nyɩ saa juu Sãa ma mɩ diere a nyɩ cɛfʋ jiir bara kʋrɔ nyɩ wa.”]

²⁷Ba lɛ ta na a Jerujalɛm, a *Jeeju kpɛ yʋɔrɔ a be a Naaŋmɩn puor-yir kpɛ̃ɛ pʋɔ, a *baar-lo-nɩ-bɛrɛ, a *ƴɛr-kpɛn-bɔɔnbɔ nɩ a ni-dierbe wɩ a ʋ sɛ̃,

²⁸na soor ʋ: “Nyɩnɛ fʋ pɔw a sɔr maala nɩ a yele asɩmɛ? Ala ɩ̃ kʋ fʋ a sɔr a fʋ maala?”

²⁹A Jeeju yel ba: “Ɩ̃ na soor nyɩ na soorfʋ bõ-ƴen tɛw. Nyɩmɩ wa kʋ ma a sɔwfʋ, ɩ̃ na man nyɩ na a jie ʋlɔ ɩ̃ na pɔw a sɔr maala nɩ a yele ala.

³⁰A Jã-Batii kʋ̃ɔ mʋrfʋ, nyɩnɛ ʋ yi? A Naaŋmɩn jie ʋ, mɩɩ a nɩbɛ jie ʋ? Nyɩ́ kʋ ma a sɔwfʋ.”

³¹A ba nyɔw ɩ̃ pɛrɛ ƴɔnɔ taa a ba nɩ̃ɛ, yele: “A ala ɩ̃ ɩ sɩ yelʼã á Naaŋmɩn jie ʋ yi, ʋ na soor sɩ na á bõ ɩnɛ saa sɔw de a Jã ƴɛrɩ̃ wa?

³²Ɩ̃ a ala ɩ̃ ɩ sɩ yelʼã á nɩbɛ jie ʋ yi,” ba dãa na jɔrɔ a nɩbɛ dãbɩ̃ɛ, a-na-ɩ a nɩbɛ ba jaa dãa na de a Jã ʋ sɩrɩ̃ ɩ a Naaŋmɩn ƴɛr-hiere.

³³A be jie, a ba yel a Jeeju: “Saa bɔ̃w wa.” A Jeeju lɩɛb yel ba: “A maa mɩ, ɩ̃ kɔ̃ mɩ yel nyɩ a jie ʋlɔ ɩ̃ na pɔw a sɔr maala nɩ a yele ala wa.”