Read Birifor, Malba Markɩ Sɛbɛ 12 Bible Online

Markɩ Sɛbɛ 12 - Birifor, Malba bible

Markɩ Sɛbɛ 12

¹A *Jeeju de na a sʋkpar lɔbɔ kʋrɔ ba, na ʋ yele: “Daba kãw sɛlʼã dɩvɛ̃-tɩɩr a ʋ puo pʋɔ, ɩ̃ wɔw kolĩ. Ʋ mɩ lãa na tuu nɩ a tɩɩr ala wɔmɔ nɛbfʋ jie, mɛ nɩ a yel-gure jaajie, ɩ̃ pãa de kʋ a po-ꞌwuorbo ɩ̃ yɔ cen a jie.

²A lɛ a tɩ-wɔmɔ daar na ta, ʋ tʋ̃ na a ʋ tʋ̃tʋnɔ a po-ꞌwuorbo bala jie, a ʋ cen a ba kʋ ʋ a dɩvɛ̃-tɩɩr wɔmɔ ala na ɩ a ʋ ben, ʋ wa nɩ,

³ɩ̃-cɛ a ba nyɔw ʋ fɔb, ɩ̃ cɛ ʋ bar ʋ kulʼɩ̃ nu-jaala.

⁴Ʋ lɛ tʋ̃ a ʋ tʋ̃tʋnɔ ƴen-sʋbɔ, ɩ̃ a ʋlɔ mɩ, ba nar ʋ na a juu puo, ɩ̃ tʋ tʋ ʋ.

⁵Ʋ lɛ tʋ̃ na tʋ̃tʋnɔ ƴen-sʋbɔ a ba jie go. A ʋlɔ ʋlɔ, ba kú ʋ na. Lɛ ba mɩ maal a tʋ̃tʋnbɔ yaw jie. Ba pɔbʼã a nɩŋmɛɛ ɩ̃ kú a nɩŋmɛɛ.

⁶A bõ-ƴen cãa na be a ʋ jie na ɩ a ʋ bi-nʋnaa. Ʋ baarʼã tʋ̃ ʋ a ba jie ɩ̃ yel: ‘Ba na jɔ na a ɩ̃ bie ʋlɔ.’

⁷Ɩ̃-cɛ a po-ꞌwuorbo yele na taa: ‘Nyɛ! A naa ɩ̃ ɩ a gã-diere. Nyɩ́ ɩ a sɩ kú ʋ bar, ɩ̃ de a gãw.’

⁸Ba nyɔw na a ʋ bie kú lɔb bar a puo cɛ̃cɛ̃w.”

⁹A Jeeju soorʼã: “Bõ a dɩvɛ̃-tɩɩr nɩ-kpɛ̃ɛ na pãa maal? Ʋ na wa na na kú a po-ꞌwuorbo bala bar, ɩ̃ de a puo kʋ nɩ-kpeesɩ.

¹⁰Nyaa dãa ꞌwuor a ƴɛr-birʼãa a Naaŋmin Sɛbɛ pʋɔ wa? ‘A kubir ʋlɔ a dacin-mɩɛrbɛ na dãa jaar bar, lɛ lɩɛbʼã ɩ a kubir ʋlɔ ba na de ƴɔ̃w a dacin gbɛr pʋɔ.

¹¹A Nɩ-kpɛ̃ɛ ɩ̃ maal a lɛ, a sɩ na nyɛ a nyɩrɩ̃ vɩɛlɛ.’ ”

¹²A mɩnɛ a Jufisɩ nɩ-bɛrɛ na bɔ̃w ka bala a Jeeju lɔbɔ nɩ a sʋkpa, ba bʋɔrɔ na sɔr a ʋ nyɔwfʋ. Ɩ̃-cɛ ba dãa na jɔ a nɩbɛ a dãbɩ̃ɛ, ɩ̃ bar ʋ ɩ̃ cen.

¹³Ba tʋ̃ na a *Farɩsɩ nɩbɛ ŋmɛɛ nɩ a jamana *Ɛrɔdɩ nɩbɛ banʋmɔ a *Jeeju sɛ̃, a ba gu ʋ nyɔw a ʋ nʋɔr ƴɛrɩ̃sɩ pʋɔ.

¹⁴A ba cen na yel ʋ: “Jãjaana, sɩ bɔ̃w ka yel-mɩ̃ɛ sʋbɔ fʋ ɩ. Faa ꞌwuoro a nɩbɛ kpee kpee wa, a-na-ɩ fʋ maa ꞌwuor a ala a nɩrɛ na ɩ wa, ɩ̃-cɛ fʋ ma jaana na a nɩbɛ a Naaŋmɩn sɔr a yel-mɩ̃ɛ pʋɔ. Sɔr be na be a sɩ na ya a lãpo kʋ a Orom jaman-kpɛ̃ɛ mɩɩ sɔr ma be be wa? Sɩ sɛw na sɩ ma ya, mɩɩ sɩ taa ma ya wa?”

¹⁵Ɩ̃ a Jeeju bɔ̃w nɩ ba a poe ayi ba na tɛrɛ, ɩ̃ yel: “Bõ ɩnɛ nyɩ bɩɩrɛ ma a lɛ? Nyɩ́ wa nɩ libi-kur kʋ ma ɩ̃ je kãa.”

¹⁶Ba wa nɩ na kʋ ʋ, ʋ lɩɛb soorʼɩ̃ ba: “Ala nii-sɔw nɩ ala yuor ɩ̃ be tɔ?” A ba yel ʋ: “A Orom jaman-kpɛ̃ɛ ʋ.”

¹⁷A be jie, a Jeeju yel ba: “Nyɩ lɩɛb kʋ a Orom jaman-kpɛ̃ɛ a ala na ɩ a Orom jaman-kpɛ̃ɛ ben, ɩ̃ mɩ kʋ a Naaŋmɩn a ala na ɩ a Naaŋmɩn ben.” A nɔɛ ko ba a ʋ ɩnɛ.

¹⁸A Saduse bala na yel áa kũu-pʋɔ-irfʋ ma be be wa, a ba ŋmɛɛ wa na a *Jeeju sɛ̃, ɩ̃ soor ʋ:

¹⁹“Jãjaana, a Mowisi sɛbʼã a ʋ sɛbɛ pʋɔ yel sɩ, a ala ɩ a nɩrɛ kãw yɛbɛ wa kpi na ɩ̃ cɛ a ʋ pɔw bar a ꞌwaa tɛrɛ bibiir wa, áa ʋ yɛbɛ ú de a pɔw dɔw a bibiir a ʋ yɛbɛ ʋlɔ yuor ɩnɛ.

²⁰Yɛɛr anuu-nʼayi dãa na be be, a ba kpɛ̃ɛ kulʼã pɔw ma dɔw bie wa ɩ̃ kpi,

²¹a ʋ tuuraa de a kpɩ̃ɩ-pɔw ma mɩ dɔw bie wa ɩ̃ kpi. A lɛ a mɩ wɔ̃ nɩ a ata sʋbɔ.

²²A yɛɛr anuu-nʼayi bala ba jaa ma tʋɔ dɔw bie a ba yɛbɛ yuor ɩnɛ wa. Ba kpi na ba jaa, ɩ̃ a pɔw wa pãa bɩɛr kpi.

²³A kũusɩ irfʋ daar, bala wa ir a kũu pʋɔ, buor sʋbɔ ɩ̃ na sɔ a pɔw? A-na-ɩ a ba jaa anuu-nʼayi dãa na kul ʋ.”

²⁴A Jeeju yel ba: “Nyɩ bɔrʼã. Bõ ɩnɛ? A-na-ɩ nyaa bɔ̃w a Naaŋmin Sɛbɛ ƴɛrɩ̃sɩ par nɩ a Naaŋmɩn tʋɔfʋ wa.

²⁵A lɛdaar ba na ire a kũu pʋɔ, a dabsɩ nɩ a pɔɔbɔ ma lɛ kule taa wa, ɩ̃-cɛ ba na wɔ̃ na a saa juu sɩ-tʋnɩsɩ kaarɩ̃.

²⁶A ala ɩ̃ ɩ a kũusɩ irfʋ ʋ, nyaa ꞌwuor a Mowisi sɛbɛ pʋɔ a jie ʋlɔ na mana a Tɩ-bile a vũu na ꞌlere ƴɛrɩ̃, a mɩnɛ a Naaŋmɩn na yel a Mowisi wa? ‘Maa ɩ̃ ɩ a Abʋraham nɩ a Ɩjakɩ nɩ a Jakɔb Naaŋmɩn.’

²⁷ꞌWaa ɩ kũusɩ Naaŋmɩn wa, nɩ-mimie Naaŋmɩn ʋ ɩ. Nyɩ tɩɩ na nyɩrɩ̃ bɔr.”

²⁸A *ƴɛr-kpɛn-bɔ̃wnɔ kãw dãa na wõ a mɩnɛ ba na cɩɩrɛ taa, ɩ̃ mɩ nyɛ a mɩnɛ a *Jeeju na tɩɩr a sɔwfʋ nɩ yɛ̃, ɩ̃ na ʋ taw ta ʋ ɩ̃ soor “A ƴɛr-kpɛn a jaa pʋɔ, buor ɩ̃ ɩ a bõ-kpɛ̃ɛ?”

²⁹A Jeeju yel: “A ʋlɔ na ɩ a kpɛ̃ɛ ɩ na: ‘*Ɩsɩrayɛl nɩbɛ, nyɩ́ cɛlɛ! A Nɩ-kpɛ̃ɛ na ɩ a sɩ Naaŋmɩn, ʋlɔ ʋ yẽ tɛw ɩ̃ ɩ a Nɩ-kpɛ̃ɛ.

³⁰Nʋnɔ a Nɩ-kpɛ̃ɛ na ɩ a fʋ Naaŋmɩn nɩ a fʋ suur ʋ jaa, nɩ a fʋ pʋɔ ʋ jaa, nɩ a fʋ tɩɛrʋ̃ ʋ jaa, nɩ a fʋ fãgã ʋ jaa.’

³¹Nyɛ a ʋlɔ na tuure: ‘Nʋnɔ a fʋ tɔ sʋbɔ a fʋ mɩ̃ɛ kaarɩ̃.’ Ƴɛr-kpɛ̃w ma be be na lɛ gãw a ƴɛr-kpɛn asɩmɛ wa.”

³²A ƴɛr-kpɛn-bɔ̃wnɔ yel ʋ: “Jãjaana, a vɩɛlɛ na. Yel-mɩ̃ɛ fʋ yel áa Naaŋmɩn ɩ na bõ-ƴen tẽtẽ, á Naaŋmɩn kpee ma be ɩ̃ a ala ma ɩ a ʋlɔ tɛw ʋ wa.

³³A Naaŋmɩn fʋ na nʋnɔ nɩ a fʋ suur ʋ jaa, nɩ a fʋ tɩɛrʋ̃ ʋ jaa, nɩ a fʋ fãgã ʋ jaa, nɩ a fʋ tɔ sʋbɔ fʋ na nunɔ a fʋ mɩ̃ɛ kaarɩ̃, a ala gãw na a dʋn ba jaa fʋ na ma kú lo nɩ a baar, kʋ a Naaŋmɩn, ɩ̃ su a vũu a dɩ, nɩ a baar-lo-yele a jaa.”

³⁴A Jeeju nyɛ̃ na a mɩnɛ ʋ na ƴɛrʼɩ̃ a kpaarfʋ ɩ̃ yel ʋ á ꞌwaa jãa nɩ a Naaŋmɩn fãw wa. A ala na yi tɔ, nɩrɛ ma lɛ ꞌla soor ʋ soorfʋ wa.

³⁵A *Jeeju nyɔw na ɩ̃ jaana a nɩbɛ be a Naaŋmɩn puor-yir kpɛ̃ɛ pʋɔ yele: “Mɩnɛ ɩ̃ ɩ a *ƴɛr-kpɛn-bɔɔnbɔ ma yel áa Davɩtɩ bie a *Kirisi ɩ?

³⁶A Davɩtɩ mɩ̃ɛ a Naaŋmɩn Sɩɛ dãa tɔw ʋ yel: ‘A Nɩ-kpɛ̃ɛ Naaŋmɩn yelʼã a ɩ̃ Nɩ-kpɛ̃ɛ: Jɛ a ɩ̃ dʋrɩ̃ loor wa ta nɩ a daar ʋlɔ ɩ̃ nɔɔ ƴɔnɔ a fʋ sama-deme a fʋ pulẽe.’

³⁷A Davɩtɩ mɩ̃ɛ buɔlɔ ʋ na a ʋ Nɩ-kpɛ̃ɛ. Mɩnɛ ʋ na lɛ tʋɔ ɩ a ʋ bie?” A nɩ-yaw cɛlɛ na a Jeeju ƴɛrɩ̃sɩ a nʋmɔ ba.

³⁸Ʋ mɩ dãa na jaana ba yele: “Nyɩ́ gu nyɩ mɩ̃ɛ a *ƴɛr-kpɛn-bɔɔnbɔ ɩnɛ, na ma su a cẽcẽ-bɛrɛ yʋɔrɔ nɩ, bʋɔrɔ nɩ a nɩbɛ ba jaa ba puoro ba a dar pʋɔ.

³⁹Ba nʋ na a nii-sɔw jaajiir a ba *puorfʋ yie pʋʋr, mɩ nʋ nɩ a nɩ-bɛrɛ dakɔɔr jur jɩnaafʋ a fɛtɩsɩ jie.

⁴⁰Bala ɩ̃ ma bɛlɛ a kpɩ̃ɩ-pɔɔbɔ yele fara dɩrɛ, ɩ̃ ma bɔ̃w nɩ sʋɔr a Naaŋmɩn kamʼɩ̃ bʋɔrɔ a nɩbɛ ba ꞌwuoro ba. Ƴɛrɩ̃ na dɔɔlʼã a ba juumɩ, bɛrmɛ.”

⁴¹A *Jeeju jɩnaa na a libie ƴɔ̃wfʋ jie par, ɩ̃ ꞌwuoro a mɩnɛ a nɩbɛ na waara nɩ a libie ƴɔnɔ. A tɛraa deme yaw jie ƴɔnɔ na libie yayaw.

⁴²Kpɩ̃ɩ-pɔw, na nyɛrɛ nãw, wɩ na ƴɔ̃w libi-kure ayi na wɔ̃ tama ayi kaarɩ̃, na ma tara warbir wa.

⁴³A Jeeju bʋɔl a ʋ *par-tuurbe na ʋ yel ba: “Yel-mɩ̃ɛ ɩ̃ yele nyɩ, a kpɩ̃ɩ-pɔw na na nyɛrɛ a nãw, ƴɔ̃w na gãw a bala ba jaa na ƴɔnɔ a libie a libie ƴɔ̃wfʋ jie.

⁴⁴A-na-ɩ a bala ba jaa, a ala ba na dɩ ɩ̃ cɛ ba ƴɔ̃w, ɩ̃-cɛ a pɔw ʋlɔ nɩ a ʋ nãw jaa, ʋ ƴɔ̃w na a ala a jaa ʋ na dãa tɛrɛ bin, gu nɩ a ʋ mɩ̃ɛ.”