Read Birifor, Malba Markɩ Sɛbɛ 14 Bible Online

Markɩ Sɛbɛ 14 - Birifor, Malba bible

Markɩ Sɛbɛ 14

¹A Pakɩ nɩ a Bur-Pʋɔr Fɛtɩ dãa na cɛ bibie ayi. A *baar-lo-nɩ-bɛrɛ nɩ a *ƴɛr-kpɛn-bɔɔnbɔ bʋɔrɔ na a mɩnɛ ba na ɩrɛ ɩ̃ sɔɔlɔ nyɔwrɔ a *Jeeju kúrɔ.

²A-na-ɩ ba dãa na yele taa: “A taa ɩ a fɛtɩ daar wa. A ala ma ɩ lɛ ʋ wa, a nɩbɛ na irʼã dama a tẽw.”

³A mɩnɛ a *Jeeju na be a Betani, a Sɩmɔ̃ ʋlɔ na ɩ a kɔ̃w yir, na ʋ jɛ a dɩb par, pɔw kãw wɩ nɩ na a kã-nyu-vɩlaa na ma kpɛmɛ a dafʋ ɩɛ wa, ba na bʋɔlɔ a *naar na sɛw a kubir yole, na ʋ ŋme a yole puo ɩ̃ kpaar a kãa ƴɔnɔ a Jeeju juumɩ.

⁴A nɩbɛ bala na be a be, a ŋmɛɛ nyɛ na suur ɩ̃ yele taa: “Bõ ɩ a ba de a kãa sãw bar a lɛ?

⁵A-na-ɩ ʋ naa tʋɔ na de a ʋna kã-nyu-vɩlaa da war ture lɩjaata nɩ dɔɔlaa, ɩ̃ de a libie kʋ a nãw deme,” ɩ̃ na ba vavire a jur ƴɔnɔ a pɔw.

⁶Ɩ̃-cɛ a Jeeju yel: “Nyɩ́ bar ʋ. Bõ ɩnɛ nyɩ dama ʋ a lɛ? Ʋ maalʼã vɩlaa a ɩ̃ jie.

⁷A-na-ɩ nyɩ lãa na be taa nɩ a nãw deme a daar a jaa, ɩ̃ nyɩ na tʋɔ na maal ba a vɩlaa a daar lɛ nyɩ na bʋɔrɔ, ɩ̃-cɛ a maa, maa beree a nyɩ sɔ̃w a daar a jaa wa.

⁸A pɔw naa maalʼã a ala ʋ na dãa tʋɔrɔ maala. Ʋ gɔrʼã jɛ ma a kãa gbɛɛrɩ̃ a ɩ̃ ɩ̃gan a ũufʋ ɩnɛ.

⁹Yel-mɩ̃ɛ ɩ̃ yele nyɩ, a lɛ ba nɔɔ mana a ƴɛr-son naa a jiir a jaa, ba nɔɔ mɩ manʼã a ala a pɔw na na maal, a ba kɔ̃ wa hiin ʋ wa.”

¹⁰A Judasɩ Isikaryɔtɩ na ɩ a *Jeeju *par-tuurbe pie-nʼayi ƴen sʋbɔ cenʼã a *baar-lo-nɩ-bɛrɛ sɛ̃ a Jeeju juu defʋ.

¹¹A mɩnɛ ba na wõ a lɛ, a nʋmɔ ba na a ba pʋlɩ̃ yel a ba na kʋ ʋ na libie, ʋ nyɔw ɩ̃ bʋɔrɔ a mɩnɛ ʋ na ɩrɛ ɩ̃ ƴɔnɔ ʋ a ba nuumɩ.

¹²A *Bur-Pʋɔr fɛtɩ bibir dãdãw, a mɩnɛ ba na kúrɔ a Pakɩ peli, a *Jeeju *par-tuurbe soor ʋ na: “Nyɩnɛ jie fʋ bʋɔrɔ sɩ cen na gbɛɛrɩ̃ fʋ a *Pakɩ fɛtɩ dɩb?”

¹³Ʋ tʋ na a ʋ par-tuurbe ayi ɩ̃ yel ba: “Nyɩ́ cen a tẽw pʋɔ; nyɩ na tuorʼɩ̃ na daba kãw na tuo kʋ̃ɔ nɩ yuor. Nyɩ́ tuure ʋ,

¹⁴ɩ̃ a jie ʋlɔ ʋ na wa kpɛɛrɛ, nyɩ́ yel a yir sʋbɔ: A jãjaana yelʼã a sɩ soor fʋ á nyɩnɛ a die be, áa jie ʋlɔ ʋ na dɩrɛ a Pakɩ Fɛtɩ dɩb nɩ a ʋ par-tuurbe.

¹⁵Ʋ na miil nyɩ na bɔɔpɩɛn die ba na bɔ̃w gbɛɛrɩ̃ vɩlaa. A be nyɩ na maal a dɩb a sɩ ɩnɛ.”

¹⁶A ʋ par-tuurbe bala cenʼã a tẽw pʋɔ na ba nyɛ a yele a be a mɩnɛ ʋ na dãa yel ba, ɩ̃ na ba maal a Pakɩ fɛtɩ dɩb.

¹⁷A jaanʋɔr, a Jeeju nɩ a ʋ par-tuurbe pie-nʼayi ta na a be.

¹⁸Ɩ̃ a mɩnɛ ba na jɛ dɩrɛ a dɩb, a Jeeju yel ba na: “Yel-mɩ̃ɛ ɩ̃ yele nyɩ, a nyɩmɩ na dɩrɛ nɩ ma a dɩb, bõ-ƴen be na a nyɩ sɔ̃w nɔɔ diere ma a juu.”

¹⁹A sube sãw na a ʋ par-tuurbe a ba nyɔw ɩ̃ sooro ʋ bõ-ƴene-ƴene: “Maa ʋ mɩɩ?”

²⁰Ʋ yel ba: “A nɩrɛ ʋlɔ be na a nyɩmɩ pie-nʼayi sɔ̃w, a ʋlɔ na tune ɓara nɩ ma a laa pʋɔ.

²¹A *Nɩbɛ Bie na kpi na tu nɩ a mɩnɛ a na dãa sɛb a Naaŋmin Sɛbɛ pʋɔ a ʋ ɩnɛ. Ɩ̃-cɛ nabier na pɔw na a ʋna nɩrɛ na diere a Nɩbɛ Bie juu. A nɩrɛ ʋlɔ, a bala ma dãa dɔw ʋ wa, a naa sa ʋ na.”

²²A lɛ ba na cãa be a dɩb juu, a *Jeeju de na a buru puor a Naaŋmɩn ƴɔ̃w, ɩ̃ kʋ a ʋ *par-tuurbe ɩ̃ yel ba: “Nyɩ́ de ꞌwɔb. A naa ɩ̃ ɩ a ɩ̃ ɩ̃gan.”

²³A lɛ ʋ mɩ de a dɩvɛ̃ nɩ a ŋman puor a Naaŋmɩn ƴɔ̃w, ɩ̃ de kʋ ba a ba nyu ba jaa.

²⁴A Jeeju yel ba: “A naa ɩ̃ ɩ a ɩ̃ jɩ̃ɩ, a jɩ̃ɩ ala nɔɔ cire cɔɔrɔ a *pʋlɩ̃-taa a Naaŋmɩn na pʋlɩ̃ nɩ a nɩ-yaw.

²⁵Yel-mɩ̃ɛ ɩ̃ yele nyɩ, maa be na lɛ nyu a dɩvɛ̃ wa tara nɩ a bibir ʋlɔ ɩ̃ nɔɔ nyuure a dɩvɛ̃ paalaa a Naaŋmɩn fãw pʋɔ wa.”

²⁶Ɩ̃ a lɛ ba na cɛ a puorfʋ fɛtɩ yele baar, ba yi na cen a *Olivi-tɩɩr tãw juu.

²⁷A *Jeeju yelʼã a ʋ *par-tuurbe: “Nyɩ na bɩlʼã faa nyɩ jaa ɩ̃ jɔ ɩ̃ cɛ ma, a-na-ɩ a sɛbʼã a Naaŋmɩn Sɛbɛ pʋɔ: ‘Ɩ̃ na ŋme na a dɔ-cɩɩnaa kú, ɩ̃ a piir jɔ yaarɩ̃.’

²⁸Ɩ̃-cɛ a maa wa ir a kũu pʋɔ, ɩ̃ na de nyɩ na nĩe cen na gu nyɩ a Galile.”

²⁹A Pɩɛr yel ʋ: “A ala saarɩ̃ ɩ a ba jaa na bɩlʼã faa ɩ̃ jɔ, a maa, maa be na jɔ wa!”

³⁰A Jeeju yel ʋ: “Yel-mɩ̃ɛ ɩ̃ yele fʋ, a dɩnaa tɩsɔw naa, a nɔraa kɔ̃ kõ gbɛɛ ayi sɛr wa, ɩ̃ fʋ na gɔrʼã cɩɩrɩ̃ gbɛɛ ata á faa bɔ̃w ma wa.”

³¹A Pɩɛr lɛ bɔ̃w yelʼɩ̃ kpɛ̃w: “A ala saarɩ̃ ɩ a sɛw na ɩ̃ na lãa kpi nɩ fʋ, aa be ɩ̃ na cɩɩrɩ̃ fʋ wa.” Ɩ̃ a par-tuurbe ba jaa mɩ yel a lɛ.

³²Ba cenʼã na ta a jie ʋlɔ ba na bʋɔlɔ a Jesemane, ʋ yel a ʋ *par-tuurbe: “Nyɩ́ jɛ a ka, ɩ̃ ɩ̃ cen na sʋɔr a Naaŋmɩn.”

³³Ɩ̃ na ʋ tɛrɛ a Pɩɛr nɩ a Jakɩ nɩ a Jã cenʼɩ̃ a nii-sɔw, a pʋlɩ̃nyɛ nyɔw ɩ̃ vʋ̃ɔnɔ ʋ, lãa nyɩrɩ̃ dama nɩ ʋ a tɩɛrɩ̃sɩ,

³⁴ʋ yel ba: “Ni-sɔbaa nyɩrɩ̃ na kpɛ ma wɔ̃ taa nɩ ɩ̃ na kpi na. Nyɩ́ ɩraa a ka; nyɩ taa wa gure wa.”

³⁵Ɩ̃ na ʋ taw jãa fɩ̃ɩ, ɩ̃ kpa pɔw a nii-sɔw a tene, ɩ̃ sʋɔr a Naaŋmɩn, a ala ɩ a na tʋɔ na, ú ɩ a won ʋlɔ ʋ tɔl, ɩ̃ cɛ ʋ bar.

³⁶Ʋ yelʼã: “Ɩ̃ Sãa, fʋ tʋɔ na a yele a jaa. Ɩ a tuo ŋman na ʋ na jãa nɩ ma, ɩ̃ a taa ɩ a mɩnɛ ɩ̃ na bʋɔrɔ wa, ɩ̃-cɛ a ɩ a mɩnɛ fʋ na bʋɔrɔ.”

³⁷Ʋ lɩɛbʼã wa a ʋ par-tuurbe ata jie, na ʋ nyɛ ba a ba gure, ʋ yel a Pɩɛr: “Sɩmɔ̃, fʋ gure na? Faa tʋɔ jɛ nɩ mimir lɛɛr-bõ-ƴen wa?

³⁸Nyɩ taa gure wa. Nyɩ́ sʋɔrɔ a Naaŋmɩn, kɔ̃ wa kpɛ a bɩɩrfʋ pʋɔ wa. A nɩrɛ sɩɛ bʋɔrɔ na a son maalfʋ, ɩ̃-cɛ a ɩ̃gan balʼã.”

³⁹Ɩ̃ na ʋ lɛ cen ɩ̃ sʋɔr a Naaŋmɩn, na ʋ lɛ bɔ̃w ƴɛr a ƴɛrɩ̃ ʋlɔ naa.

⁴⁰Ʋ lɛ lɩɛbʼã wa a ba jie, na ʋ nyɛ ba a ba gur, a-na-ɩ a gʋ̃ɔ dãa na nyɩrɩ̃ tɛrɛ ba; a baa dãa bɔ̃w a ala ba na yele ʋ wa.

⁴¹Ʋ lɛ lɩɛbʼã wa a gbɛɛ ata ɩnɛ na ʋ yel ba: “Nyɩ cãa na be tɔ a gʋ̃ɔ pʋɔ? A baarʼã! A daar ta na. Nyɩ́ nyɛ! Ba na nyɔw na a *Nɩbɛ Bie ƴɔ̃w a maal-faar deme nuumɩ.

⁴²Nyɩ́ ir a sɩ cen! A ʋlɔ na diere ma a juu tara na ka.”

⁴³A lɛ a *Jeeju na cãa ƴɛrɛ, a Judasɩ na ɩ a ʋ *par-tuurbe pie-nʼayi ƴen sʋbɔ ta na a be, ɩ̃ lãa be nɩ nɩbɛ na tɛrɛ bãjɩnsɩ nɩ gʋdɛɛ, a *baar-lo-nɩ-bɛrɛ nɩ a *ƴɛr-kpɛn-bɔɔnbɔ nɩ a ni-dierbe na tʋ̃.

⁴⁴A ʋlɔ na diere a Jeeju a juu dãa na miil a nɩbɛ bala a jɩmɛ ʋlɔ ba na bɔ̃wnɔ nɩ a Jeeju. Ʋ yelʼã: “A ʋlɔ ɩ nɔɔ worĩ, ʋlɔ ʋ. Nyɩ́ nyɔw ʋ na nyɩ bɔ̃w tɛrɛ ʋ cenʼɩ̃.”

⁴⁵A lɛ a Judasɩ na tɔ̃ɔ cãa ta, ʋ taw na gbʋr a Jeeju, ɩ̃ yel ʋ: “Jãjaana!” ɩ̃ na ʋ worĩ ʋ,

⁴⁶a nɩbɛ bala ta nyɔw ʋ.

⁴⁷Ɩ̃-cɛ a nɩrɛ kãw na be a be vʋ̃ɔ na a ʋ bãjɩnɛ cɛ nɩ a *baar-lo-nɩ-kpɛ̃ɛ tʋ̃tʋnɔ toor ŋmaa bar.

⁴⁸A Jeeju lɩɛb yel a nɩbɛ: “Nyanyuur ɩ̃ ɩ a nyɩ wa nɩ a bãjɩnsɩ nɩ a gʋdɛɛ na nyɔwrɔ nɩ ma mɩɩ?

⁴⁹A bibie a jaa ɩ̃ ma dãa na be be a Naaŋmɩn puor-yir kpɛ̃ɛ pʋɔ mana nyɩ a Naaŋmɩn ƴɛrɩ̃, ɩ̃ nyaa dãa nyɔw ma wa. Ɩ̃-cɛ a ala ta na a na ɩ a mɩnɛ a Naaŋmɩn ƴɛrɩ̃ na dãa yel.”

⁵⁰A ʋ par-tuurbe ba jaa bar ʋ a be ɩ̃ jɔ.

⁵¹Polbile kãw dãa na tuure ʋ ɩ̃ vaar gãw tɛw, a ba nyɔw ʋ,

⁵²ʋ mɩr a gãw bar ɩ̃ jɔ nɩ ɩ̃gan ɓãɓuol.

⁵³Ba taw na a *Jeeju cenʼɩ̃ a *baar-lo-nɩ-kpɛ̃ɛ jie. A be a *baar-lo-nɩ-bɛrɛ nɩ a Jufisɩ ni-dierbe nɩ a *ƴɛr-kpɛn-bɔɔnbɔ ba jaa na kpaarɩ̃ taa.

⁵⁴A Pɩɛr bɩɛrʼã tu a Jeeju na ʋ cen na ta kpɛ a baar-lo-nɩ-kpɛ̃ɛ yir gbalɩ̃ pʋɔ, na ʋ lãa jɛ nɩ a tʋ̃tʋnbɔ ꞌwuoro a vũu.

⁵⁵A baar-lo-nɩ-bɛrɛ nɩ a *ƴɛr-guor-nɩ-bɛrɛ ba jaa bʋɔrɔ na ƴɛrɩ̃ ba na dɔɔlɔ a Jeeju juu, ɩ̃ tʋɔrɔ nyɛrɛ a sɔr kúrɔ ʋ, ɩ̃ ba bɔ na faa.

⁵⁶A-na-ɩ a nɩ-yaw dãa na ŋmara a jir-kara ƴɔnɔ ʋ, ɩ̃ a ba ƴɛrɩ̃sɩ ma dãa tuure taa wa.

⁵⁷A nɩbɛ ŋmɛɛ pãa ir ŋma jir-kara ƴɔ̃w a Jeeju, na ba yel:

⁵⁸“Sɩ wõ na ʋ yel á ʋ na wɛlʼã a Naaŋmɩn puor-yir kpɛ̃ɛ na bar a nɩbɛ na mɛ, ɩ̃ a bibie ata sɔ̃w, ʋ na lɛ mɛ na bõ-kpee a nɩrɛ na ma maal wa.”

⁵⁹Ba saarɩ̃ na yele a lɛ, ɩ̃ a ba ƴɛrɩ̃sɩ ma dãa tuure taa wa.

⁶⁰A baar-lo-nɩ-kpɛ̃ɛ pãa ir ɩraa a nɩbɛ ba jaa nii-sɔw ɩ̃ soor a Jeeju: “Faa yele bom wa? Bõ ƴɛrɩ̃ a nɩbɛ basɩmɛ dɔɔlɔ fʋ a lɛ?”

⁶¹Ɩ̃ a Jeeju sine. ꞌWaa haa nʋɔr ƴɛr ƴɛrɩ̃ fɩ̃ɩ wa. A baar-lo-nɩ-kpɛ̃ɛ lɛ bɔ̃w soor ʋ: “Fʋ̃ʋ ɩ a *Kirisi na ɩ a Naaŋmɩn ʋlɔ sɩ na puoro Bi-daba?”

⁶²A Jeeju yel: “Ɔɔ, maa ʋ. Nyɩ nɔɔ nyɛ na a *Nɩbɛ Bie ʋ jɛ a Fãw Sʋbɔ dʋrɩ̃ loor, ɩ̃ nyɩ nɔɔ mɩ nyɛ ʋ na ʋ be a dɔ̃dɔrɩ̃sɩ pʋɔ waara.”

⁶³A ala ɩnɛ, a baar-lo-nɩ-kpɛ̃ɛ ɓer a ʋ cẽcene[2] bar ɩ̃ yel: “Bõ ɩnɛ sɩ lɛ cãa bʋɔrɔ ƴɛr-manba go?

⁶⁴Nyɩ wõ na a mɩnɛ ʋ na sãw a Naaŋmɩn yuor. Mɩnɛ nyɩ tɩɛrɛ?” A ba jaa yel á ʋ sɛw na na kpi.

⁶⁵A bana nɩbɛ ŋmɛɛ nyɔw ɩ̃ pʋʋrɔ a natɛɛr ƴɔnɔ ʋ, ɩ̃ pɔw ʋ a nii-sɔw, tʋɔrɔ tʋɔrɔ nɩ ʋ a nu-gbule yele nɩ ʋ: “Bɔ̃w a bala na ŋme fʋ,” ɩ̃ cɛ ʋ kʋ a parsãdiele a ba ɓa ɓa ʋ.

⁶⁶A lɛ a Pɩɛr na dãa cãa be a pulẽe a gbalɩ̃ pʋɔ, a *baar-lo-nɩ-kpɛ̃ɛ tʋ̃tʋ-poole kãw ta na nyɛ ʋ na ꞌwuoro a vũu,

⁶⁷ɩ̃ ꞌwuor ʋ bɔ̃w ɩ̃ yel ʋ: “A fʋ̃ʋ, fʋ mɩ dãa na lãa be nɩ a ʋna Najarɛtɩ *Jeeju.”

⁶⁸A Pɩɛr cɩɩrɩ̃ ɩ̃ yel: “Maa bɔ̃w a tɛw wa. Maa bɔ̃w a ala fʋ na bʋɔrɔ fʋ yel wa,” ɩ̃ na ʋ cen yi a yẽw a dɔ̃dɔr nʋɔr par, a nɔraa kokolĩ.

⁶⁹A tʋtʋ̃-poole nyɛ ʋ, ɩ̃ lɛ bɔ̃w mana kʋrɔ a nɩbɛ bala na ɩraa a be yele nɩ: “A daba na ɩ na a ba tɔ sʋbɔ,”

⁷⁰a Pɩɛr lɛ bɔ̃w cɩɩrɩ̃. A ɩ na fɩ̃ɩ, a nɩbɛ bala na be a be yel ʋ: “Yel-mɩ̃ɛ ʋ, fʋ sɩrɩ̃ na ɩ a ba tɔ sʋbɔ, a-na-ɩ fʋ ɩ na a Galile nɩrɛ.”

⁷¹A Pɩɛr nyɔw ɩ̃ pɔrɔ ƴɔnɔ a ʋ mɩ̃ɛ bʋɔlɔ nɩ a Naaŋmɩn yuor yele nɩ: “Maa bɔ̃w a daba ʋlɔ nyɩ na yele wa.”

⁷²A jie naan, a nɔraa lɛ tu na kõ a ɩ gbɛɛ ayi, a Pɩɛr tɩɛr bɔ̃w nɩ a ala a Jeeju na dãa yel ʋ: “A nɔraa kɔ̃ kõ gbɛɛ ayi sɛr wa, ɩ̃ fʋ na gɔrʼã cɩɩrɩ̃ gbɛɛ ata a faa bɔ̃w ma wa.” A Pɩɛr tɔ̃ɔ cɛ a kuon.