Read Birifor, Malba Markɩ Sɛbɛ 16 Bible Online

Markɩ Sɛbɛ 16 - Birifor, Malba bible

Markɩ Sɛbɛ 16

¹A lɛ a *bibi-ciiraa dayen na tɔl baar, a Maarɩɩ na yi a Madala nɩ a Maarɩɩ ʋlɔ na ɩ a Jakɩ mã, nɩ a Salome da na a kã-nyu-vɩlaa cere nɩ a kũu jɛfʋ ɩnɛ.

²A jɩmaasɩ bibir dʋ̃ꞌwʋlɩ̃ ɓaaraa, a lɛ a mɔtɔ̃w na cãa pure, ba cenʼã a yaa pʋɔ.

³Ba dãa na sooro taa yele: “Ala na bilĩ sɩ a kubir a yaa nʋɔrɩ̃ bar?”

⁴Ɩ̃ a lɛ ba na dʋɔ ꞌwuor, ba nyɛ na a kubir ʋlɔ na dãa bɛrmɛ ma ɩ wa ʋ bilĩ gã a lõboorɩ̃.

⁵A lɛ ba na kpɛ a yaa pʋɔ, ba nyɛ na polbile kãw na su kpar-pɩlaa ʋ jɛ be a dʋrɩ̃ loor, a pʋlɩ̃nyɛ vʋ̃ɔ ba.

⁶Ɩ̃-cɛ ʋ yel ba na: “Nyɩ taa ɩ a pʋlɩ̃nyɛ vʋ̃ɔnɔ nyɩ wa. Má a Najarɛtɩ *Jeeju ʋlɔ ba na kpa yaal a nɩ-kʋ-daa juu nyɩ bʋɔrɔ. ꞌWaa cãa a ka wa. Ʋ irʼã a kũu pʋɔ. Nyɩ́ ꞌwuor nyɛ a jie ʋlɔ ba na dãa gaal ʋ.

⁷Ɩ̃ a ƴɛ̃ƴɛrɩ̃ na, nyɩ́ cen na yel a ʋ *par-tuurbe lãa nɩ a Pɩɛr á ʋ na de na nĩe cen na gu nyɩ a Galile. Be nyɩ na nyɛ ʋ a mɩnɛ ʋ na dãa yel nyɩ.”

⁸Ba yi na a yaa pʋɔ, a nʋɔr ko ba a ba ɓine, ɩ̃ na ba ƴɔ̃w gbɛɛ jɔ. Baa yel bom kʋ nɩrɛ wa, a-na-ɩ dãbɩ̃ɛ dãa na gãw ba. [

⁹A *Jeeju irʼã a kũu pʋɔ a jɩmaasɩ dʋ̃ꞌwʋlɩ̃ ɓaaraa, na ʋ de nĩe nyɩr a Madala Maarɩɩ ʋlɔ ʋ na dãa diw a kɔ̃tɔnsɩ anuu-nʼayi a ʋ pʋɔ bar.

¹⁰A Maarɩɩ cenʼã na man kʋ a bala na dãa ɩ a Jeeju lãa-yʋɔrbɔ, na be a ni-sɔbaa pʋɔ kono nɩ.

¹¹Ɩ̃-cɛ a lɛ ba na wõ ʋ yel áa Jeeju irʼã ɩ nɩ-mimir ʋ nyɛ ʋ, baa dãa sɔw wa.

¹²A ala na yi tɔ, a ʋ *par-tuurbe ayi be na a sɔr juu cere a tẽ-bile kãw pʋɔ, ʋ nyɩr ba a be, be kpee.

¹³Ba lɩɛbʼã wa na man a ba tɔ deme a lɛ, ɩ̃ a baa cãa sɔw wa.

¹⁴A Jeeju pãa na bɩɛr nyɩr a ʋ par-tuurbe pie-nɩ-bõ-ƴen a lɛ ba na be a dɩb par, ɩ̃ na ʋ ful ba a ba ƴɔ̃w-nyãa faafʋ ɩnɛ, nɩ a mɩnɛ a ba suur na kpɛmɛ, a-na-ɩ baa dãa sɔw a mɩnɛ a nɩbɛ bala na dãa nyɛ ʋ ʋ ir a kũu pʋɔ wa.

¹⁵Ɩ̃ na ʋ yel ba: “Nyɩ́ yɔ a tẽ-daa ʋ jaa juu, hier a Naaŋmɩn ƴɛr-son kʋ a nɩbɛ ba jaa.

¹⁶A ʋlɔ na wa sɔw ɩ̃ a ba mʋr ʋ a kʋ̃ɔ, ʋ na pɔw na a faafʋ, ɩ̃ a ʋlɔ na ma sɔw wa, ƴɛrɩ̃ na dɔɔlʼã a ʋ juu.

¹⁷Ɩ̃ nyɩ́ nyɛ a nɔ-kofʋ tʋmɔ ala na wa tuure a bala na sɔw: ba na de na a ɩ̃ yuor diw nɩ a kɔ̃tɔnsɩ bar, ba na ƴɛrɛ na ƴɛr-bʋlsɩ,

¹⁸ba nɔɔ bibʼã a wɩɩr ɩ̃ a ala ɩ ba wa nyu na a bom na tɛrɛ a lɔw, a kɔ̃ maal ba bier wa. Ba na ma dɔɔlʼã a baalsɩ a nur a ba kpɛmɛ.”

¹⁹A mɩnɛ a Nɩ-kpɛ̃ɛ Jeeju na ƴɛrʼɩ̃ ba a lɛ baar, a Naaŋmɩn maal ʋ na ʋ do a saa juu jɛ be a ʋ dʋrɩ̃ loor.

²⁰Ɩ̃ a ʋ par-tuurbe yi yʋɔrɔ a jiir a jaa hiere a ƴɛr-son. A Nɩ-kpɛ̃ɛ dãa na sũono ba a tʋn ʋlɔ pʋɔ ɩ̃ maala a nɔ-kofʋ tʋmɔ miile nɩ a nɩbɛ áa ala ba na yele ɩ na yel-mɩ̃ɛ.]