Read Birifor, Malba Markɩ Sɛbɛ 3 Bible Online

Markɩ Sɛbɛ 3 - Birifor, Malba bible

Markɩ Sɛbɛ 3

¹A *Jeeju lɛ kpɛ na a *puorfʋ yir pʋɔ. A be, daba kãw be na be a nuu na kpi.

²A bala na be a be jʋʋrɔ na a Jeeju ala ɩ̃ ɩ ʋ na kpɛmɛ na a daba nuu a *bibi-ciiraa dayen, a-na-ɩ ba dãa na bʋɔrɔ ba ƴɔ̃w ʋ ƴɛrɩ̃.

³A Jeeju yel a daba ʋlɔ a nuu na kpi: “Ir ɩraa a nɩbɛ nii-sɔw.”

⁴A ala ɩ̃ baar ʋ yel ba: “A bibi-ciiraa dayen, sɔr be na be a nɩrɛ na maal vɩlaa, mɩɩ a bier? Sɔr mɩ be na be ʋ na faa nɩrɛ, mɩɩ ʋ na kú ʋ?” Ɩ̃-cɛ baa haa nʋɔr wa.

⁵Ʋ ꞌwuor ba na kpa ba jaa, a suur nyɔw ʋ lãa ɩ nɩ ʋ ni-sɔbaa a ba pʋʋr tomofʋ ɩnɛ, ʋ yel a daba: “Dɔl a fʋ nuu,” ʋ dɔl, a nuu lɛ kpɛmɛ a mɩnɛ ʋ na dãa be.

⁶A *Farɩsɩ nɩbɛ yi na goro taa a jie naan nɩ a *Ɛrɔdɩ nɩbɛ a mɩnɛ ba na ɩrɛ ɩ̃ kúrɔ a Jeeju.

⁷A *Jeeju cenʼɩ̃ na a ʋ *par-tuurbe a Galile man nʋɔr, ɩ̃ a nɩ-yaw pɔw ʋ na cenʼɩ̃ a be. A nɩbɛ bala yi na a Galile nɩ a Jude,

⁸a Jerujalɛm nɩ a Idume, a Jʋrdɛ̃ man gaan nɩ a Tɩɩr nɩ a Sɩdɔ̃ wɩɛr. Ba wa na yayaw a ʋ jie a lɛ, a-na-ɩ ba wõ na a ala ʋ na maala.

⁹A Jeeju ƴɔ̃w na a ʋ par-tuurbe á bá bin ʋ gbor a mɩnɛ a nɩbɛ kɔ̃ wa fʋr ʋ wa,

¹⁰a-na-ɩ a nɩ-yaw wʋlɩ̃sɩ ʋ na kpaara, a nɩbɛ bala ba jaa a wʋlɩ̃sɩ na vɔwrɔ dara na taa wɩɛrɛ a ʋ sɛ̃ a ʋ sɩɩrfʋ ɩnɛ.

¹¹Ɩ̃ a kɔ̃tɔn-bebe wa nyɛ ʋ, ba ma lo na a ʋ nii-sɔw ɩ̃ wuure yele: “Fʋ ɩ na a Naaŋmɩn Bie.”

¹²Ɩ̃-cɛ a Jeeju kpãa ba na kpãkpan á bá taa yele a sʋbɔ ʋlɔ ʋ na ɩ wa.

¹³A ala ɩ̃ baar, a *Jeeju do na a tãw juu. Ʋ bʋɔlʼã a nɩbɛ bala ʋ na bʋɔrɔ a ba wɩ a ʋ sɛ̃,

¹⁴ʋ biin nɩbɛ pie-nʼayi a ba na lãa be nɩ ʋ, ɩ̃ a ʋ na tʋ̃ ba a ba cen na hier a Naaŋmɩn ƴɛrɩ̃,

¹⁵ɩ̃ mɩ tɛrɛ a tʋɔfʋ na ba diw nɩ a kɔ̃tɔnsɩ.

¹⁶A nɩbɛ pie-nʼayi bala ʋ na biin ɩ na: a Sɩmɔ̃ a Jeeju na pʋr a yuor Pɩɛr,

¹⁷nɩ a Jebede bi-dabsɩ Jakɩ nɩ a Jã, a Jeeju na mɩ pʋr a Bɔɔnɛjɛsɩ, a lɛ yelʼã “A gɔ̃-pɔɔrbɔ.”

¹⁸A bala na tuure ɩ na a Ãdire nɩ a Fɩlɩpɩ, a Batelemi, a Matie, a Tomasɩ, a Alfe bi-daba Jakɩ, a Tade, a Sɩmɔ̃ na ma jɛrɛ,

¹⁹nɩ a Judasɩ Isikaryɔtɩ, a ʋlɔ nɔɔ diere a Jeeju a juu.

²⁰A *Jeeju lɛ lɩɛbʼã kul a yir, ɩ̃ a nɩ-yaw lɛ duo pɔw a yir, a Jeeju nɩ a ʋ *par-tuurbe ma dãa nyɛ nĩe fɩ̃ɩ na dɩ bom wa.

²¹A mɩnɛ a ʋ yir deme na wõ a lɛ, ba irʼã cere a ʋ nyɔwfʋ jie, a-na-ɩ ba yelʼã áa juu bɔr ʋ na.

²²A *ƴɛr-kpɛn-bɔɔnbɔ na dãa yi a Jerujalɛm yelʼã áa *Bɛɛjɛbul na ɩ a Satã ɩ̃ tɛrɛ ʋ, áa kɔ̃tɔnsɩ nɩ-kpɛ̃ɛ ʋlɔ fãw ʋ diwre nɩ a kɔ̃tɔnsɩ bara.

²³A *Jeeju bʋɔl ba ɩ̃ lɔb a sʋkpar yel ba: “Mɩnɛ a Satã na ɩ ɩ̃ diw a Satã bar?

²⁴A ala ɩ̃ ɩ a tẽw varʼã ayi lɩɛb jɛbɛ taa, a tẽw ʋlɔ ma tʋɔrɔ kama wa,

²⁵ɩ̃ a ala ɩ̃ ɩ a yir varʼã ayi ɩ̃ lɩɛb jɛbɛ taa, a yir ʋlɔ ma tʋɔrɔ kama wa.

²⁶A lɛ ʋ, a ala ɩ̃ ɩ a Satã irʼã lɩɛb jɛbɛ nɩ a ʋ mɩ̃ɛ, a ʋ tʋɔfʋ varʼã ayi ɩ̃ ma mɩ tʋɔrɔ kama wa; ʋ ta na a ʋ baarfʋ.

²⁷“Nɩrɛ ma tʋɔrɔ kpɛɛrɛ gãdaa yir wobo a ʋ yele ɩ̃ a ala ma ɩ ʋ dãa na de nĩe nyɔw a gãdaa ʋlɔ lũ wa. A lɛ ʋ na tʋɔ woor a ʋ yele a jaa a yir pʋɔ.

²⁸“Yel-mɩ̃ɛ ɩ̃ yele nyɩ, a maal-faar a nɩbɛ na maal nɩ a Naaŋmɩn yo-sãwfʋ a jaa a ba jie, a Naaŋmɩn na de na bar kʋ ba,

²⁹ɩ̃-cɛ a nɩrɛ ʋlɔ na wa sãwna a Naaŋmɩn Sɩɛ yuor, aa be a Naaŋmɩn na de a ʋ fãa bar kʋ ʋ wa. Ʋ maalʼã a fãa na ma be a barfʋ wa.”

³⁰A Jeeju ƴɛrʼã a lɛ a-na-ɩ ba yelʼã á kɔ̃tɔn bier ɩ̃ tɛrɛ ʋ.

³¹A *Jeeju mã nɩ a ʋ yɛɛr ta na ɩraa a yẽw, ɩ̃ tʋ̃ a ba bʋɔl ʋ.

³²Nɩ-yaw dãa na jɛ jilĩ kolĩ ʋ ɩ̃ a ba yel ʋ: “Nyɛ, a fʋ mã nɩ a fʋ yɛɛr ɩraa na be a yẽw ɩ̃ bʋɔrɔ fʋ.”

³³Ʋ yel ba: “Ala ɩ̃ ɩ a ɩ̃ mã, ɩ̃ ala ɩ̃ ɩ a ɩ̃ yɛɛr?”

³⁴A mɩnɛ ʋ na yel a lɛ; ʋ dʋɔ na ꞌwuor a bala na jɛ jilĩ kolĩ ʋ ɩ̃ yel: “Nyɛ a ɩ̃ mã nɩ a ɩ̃ yɛɛr,

³⁵a-na-ɩ a nɩrɛ ʋlɔ na maala a Naaŋmɩn pʋ-tɩɛrʋ̃, ʋlɔ ɩ̃ ɩ a ɩ̃ yɛbɛ, ʋlɔ ɩ̃ ɩ a ɩ̃ yɛ-pɔw, ʋlɔ ɩ̃ ɩ a ɩ̃ mã.”