Read Birifor, Malba Markɩ Sɛbɛ 4 Bible Online

Markɩ Sɛbɛ 4 - Birifor, Malba bible

Markɩ Sɛbɛ 4

¹A *Jeeju lɛ nyɔw na a ƴɛrɩ̃ mana a man gbẽgbere nʋɔr. A nɩ-yaw tiw na kolĩ ʋ, ʋ kpɛ a gbor pʋɔ jɛ be a kʋ̃ɔ pʋɔ, ɩ̃ a nɩbɛ ba jaa be a man gbẽgbere nʋɔr.

²A sʋkpar ʋ lɔbɔ mana nɩ ba a ƴɛrɩ̃sɩ yayaw. Ʋ mana ba na yele:

³“Nyɩ́ cɛlɛ! Daba kãw yi na a ci yaarɩ̃fʋ jie.

⁴A mɩnɛ ʋ na yaara, a ci ŋmɛɛ lo na a sɔr nʋɔr, a lili wa nɩɩr dɩ.

⁵A ci ŋmɛɛ lo a gbãgbanɩ̃, a jie a tana na ma bɔ̃w be wa. A jie naan a bulʼã a-na-ɩ a tana ma bɔ̃w be a jie ʋlɔ wa.

⁶Ɩ̃ a lɛ a mɔtɔ̃w na nyɩ̃ɛ vuul a ci, a jʋɔlɩ̃ na, a-na-ɩ a nyɩbɛ ma kpɛ pʋɔ wa.

⁷A ci ŋmɛɛ go lo na a gʋʋr pʋɔ, a gʋʋr karɩ̃ piw ba a baa tʋɔ wɔ̃ wa.

⁸Ɩ̃ a ci ŋmɛɛ lo a tan-vɩlaa pʋɔ, bul karɩ̃ wɔ̃. A ŋmɛɛ wɔ̃ na lɩjɛrʼɩ̃-pie, ŋmɛɛ lɩjaata, a ŋmɛɛ kʋbaa.”

⁹A ala ɩ̃ baar, a Jeeju yel ba na: “A ʋlɔ na tɛrɛ a tobo wono nɩ, ú bɔ̃w cɛlɛ.”

¹⁰A lɛ a *Jeeju na be nɩ a ʋ lãa-yʋɔrbɔ, nɩ a ʋ *par-tuurbe pie-nʼayi tɛw a kpee, ba sooro ʋ na a sʋkpar par.

¹¹Ʋ yel ba: “A ala ɩ̃ ɩ nyɩmɩ ʋ, a Naaŋmɩn fãw ƴɛr-bɔ̃w-faarsɩ par nyɩrʼã a nyɩ jie, ɩ̃-cɛ a nɩ-kpeesɩ jie, a yele a jaa par sɔɔlɩ̃ na a sʋkpar pʋɔ,

¹²a mɩnɛ ‘a ba na nyɛrɛ ꞌwuoro a sɩrɛ ɩ̃ ma nyɛrɛ wa, ɩ̃ mɩ cɛlɛ wono a sɩrɛ, ɩ̃ ma bɔ̃wnɔ a par wa, a mɩnɛ ba kɔ̃ɔ lɩɛb a ba yɛ̃ a Naaŋmɩn bar a ba maal-faar kʋ ba wa.’ ”

¹³A *Jeeju lɛ soor ba: “Nyaa bɔ̃w a sʋkpa naa par wa? Ɩ̃ mɩnɛ nyɩ na ɩ ɩ̃ bɔ̃w a sʋkpar ala na cɛ par?

¹⁴A ci-yaara ʋlɔ, a Naaŋmɩn ƴɛrɩ̃ ʋ yaara.

¹⁵A nɩbɛ ŋmɛɛ na wõ a Naaŋmɩn ƴɛrɩ̃, ba wɔ̃ na taa nɩ a ci ala na lo a sɔr nʋɔr. A lɛ ba na wõ a ƴɛrɩ̃, a Satã wa na a jie naan na ir a ƴɛrɩ̃ ʋlɔ a ba sube pʋʋr.

¹⁶A lɛ ʋ mɩ, a ci ala na lo a gbãgban pʋɔ, a ɩ na a bala na wõ a ƴɛrɩ̃ ɩ̃ sɔw a jie naan nɩ nũɔ,

¹⁷ɩ̃-cɛ aa kpɛ a ba pʋɔ a tɩɛ nyɩbɛ kaarɩ̃ wa. Ba maa yaarɩ̃ bal wa. A won, mɩɩ a hʋɔlfʋ ɩ̃ wa ta ba a ʋna ƴɛrɩ̃ ɩnɛ, a ma tɔ ba na a ba ŋmaa yi.

¹⁸A nɩŋmɛɛ go na wõ a ƴɛrɩ̃, ba wɔ̃ na a ci ala ba na yaarɩ̃ a gʋʋr pʋɔ.

¹⁹Ba ma wõ na a ƴɛrɩ̃, ɩ̃ a tẽw naa yele dɛn nɩ a naalʋ̃ʋ bɔfʋ nɩ a yel-kpee vɩláa kpɛ pɔw ba, piw a ƴɛrɩ̃ a aa wɔnɔ wa.

²⁰A nɩbɛ ŋmɛɛ go wɔ̃ na a ci ala ba na yaarɩ̃ a tan-vɩlaa pʋɔ. Ba ma wõ na a ƴɛrɩ̃ ɩ̃ sɔw de a wɔ̃ a wɔmɔ. A ŋmɛɛ ma wɔ̃ na lɩjɛrʼɩ̃-pie, ŋmɛɛ lɩjaata, a ŋmɛɛ kʋbaa.”

²¹A *Jeeju lɛ soor ba na: “A lãpa ba na ma kpɛ nɩ a diem, dʋʋ pʋɔ pɔwfʋ ɩnɛ ba ma kpɛ nɩ, mɩɩ gaajie pulẽe ba ma kpɛ nɩ su? Má a gbere juu ba ma kpɛ nɩ dɔɔl.

²²A-na-ɩ a bom jaa lɛ na sɔɔlɩ̃, a na yi na cãa pʋɔ.

²³A ʋlɔ na tɛrɛ a tobo wono nɩ, ú bɔ̃w cɛlɛ!”

²⁴A Jeeju lɛ bɔ̃w na yel ba: “Nyɩ́ tɛrɛ nyɩ mɩ̃ɛ a ala nyɩ na wono ɩnɛ. A mɩnɛ nyɩ na maala kʋrɔ a nɩbɛ, a Naaŋmɩn nɔɔ mɩ maalʼã a lɛ kʋ nyɩ, ɩ̃ lɛ dɔɔl nyɩ.

²⁵A-na-ɩ a ʋlɔ na tɛraa, ba na lɛ kʋ ʋ na dɔɔl, ɩ̃ a ʋlɔ na ma tɛraa wa, ɩ̃ tɛrɛ a fɩ̃ɩ, ba na de na a fɩ̃ɩ ala a ʋ jie.”

²⁶A *Jeeju lɛ yelʼã: “A Naaŋmɩn fãw wɔ̃ na taa nɩ daba na yaara a ci a tene.

²⁷A ʋlɔ saarɩ̃ nʋ ʋ gure a tɩsɔw mɩɩ ʋ ir a mɔtɔ̃w yʋɔrɔ, ɩ̃ a ci bule na karɛɛ, ɩ̃ ꞌwaa bɔ̃w a par wa.

²⁸A ci bulʼã a ʋ yẽ. A dãdãw a ɩ na a vaar, tuure ɩ a juu, na a pãa wɔ̃ a bie.

²⁹A lɛ a ci na bɩ, ʋ ƴɔ̃w na a tʋ̃tʋnbɔ a ba kpɛ a ci a-na-ɩ a ŋmafʋ daar ta na.”

³⁰A *Jeeju lɛ yelʼã: “Bõ sɩ na manʼɩ̃ a mɩnɛ a Naaŋmɩn fãw na wɔ̃? Sʋkpa buor sɩ na de miilʼɩ̃ a mɩnɛ ʋ na wɔ̃?

³¹Ʋ wɔ̃ na taa nɩ a *muta-tɩɛ bir. A mɩnɛ ba na bʋr ʋ, ʋ pabʼã gãw a bie a jaa na be a ka a tẽw pʋɔ,

³²ɩ̃-cɛ a lɛ ba na bʋr ʋ ʋ bul, ʋ karɩ̃ na gãw a mʋʋr a jaa, ɩ̃ ɓol wulbi-bɛrɛ a mɔɔ pʋɔ lili na tʋɔ ƴɔ̃w a ba cor a be.”

³³A Jeeju lɔbʼã sʋkpar yaw a nɔhɔ̃ mana nɩ a nɩbɛ bala na cɛlɛ a ʋ ƴɛrɩ̃sɩ a mɩnɛ ba na tʋɔrɔ cɛlɛ.

³⁴ꞌWaa ƴɛrɛ nɩ ba ɩ̃ ma ɩ sʋkpa ʋ lɔb wa; ɩ̃-cɛ a lɛ ʋ na be a ji-kpee nɩ a ʋ *par-tuurbe, ʋ miil ba na a sʋkpar par a jaa.

³⁵A ʋna bibirʼãa jaanʋɔr, a *Jeeju yelʼã a ʋ *par-tuurbe: “Nyɩ́ ɩ a sɩ gãw a man gaan.”

³⁶Ba barʼã a nɩbɛ, ɩ̃ a Jeeju par-tuurbe de ʋ nɩ a gbor ʋlɔ pʋɔ ʋ na dãa be. A nɩŋmɛɛ mɩ dãa na tɛrɛ a gboro na ba lãa gãwna nɩ ba.

³⁷Sɛsɛb kpɛ̃ɛ nyɔw na ɩ̃ fure, a kʋ̃ɔ awra ŋmeere a gbor, loro a gbor pʋɔ, ʋ gɔr paala nɩ a kʋ̃ɔ.

³⁸Ɩ̃ a Jeeju gure a gbor parɩ̃ jew a juu nɩ a ju-jewraa, a ʋ par-tuurbe nyɔw ʋ sɩ̃w ɩ̃ yel: “Jãjaana, sɩ wɛrɛ na! Aa bá fʋ wa mɩɩ?”

³⁹Ʋ irʼã tan a sɛsɛb ɩ̃ yel a man kʋ̃ɔ: “Bar a gɔn ɩ̃ ŋmaa vʋʋrɩ̃!” a sɛsɛb ŋmaa, ɩ̃ a wɩɛr ŋmaa gboor.

⁴⁰Ʋ yel ba: “Bõ ɩ̃ ɩ a dãbɩ̃ɛ nyɔw nyɩ a lɛ? Mɩnɛ a ɩ a nyaa tɛrɛ a ƴɔ̃w-nyãa sɛr wa?”

⁴¹Ɩ̃-cɛ a dãbɩ̃ɛ nyɩrɩ̃ na tɛrɛ ba a ba yele taa: “Ala nɩ a nyaa tɔr, a sɛsɛb nɩ a man na jɔrɔ a lɛ?”