Read Birifor, Malba Markɩ Sɛbɛ 5 Bible Online

Markɩ Sɛbɛ 5 - Birifor, Malba bible

Markɩ Sɛbɛ 5

¹Ba ta na a man gaan na ɩ a Jerasɛn nɩbɛ tẽw.

²A lɛ a *Jeeju na yire a gbor pʋɔ, a be a jie naan, daba kãw yi na a yar sɔ̃w ɩ̃ wa a ʋ tuorfʋ jie. A daba ʋlɔ, kɔ̃tɔn bier dãa na tɛrɛ ʋ,

³ʋ ma gana a yar sɔ̃w. Nɩrɛ maa lɛ dãa tʋɔ lũ ʋ tɛɛlɛ wa, a ala saarɩ̃ nʋ ba lũ nɩ ʋ bɔ̃jɔrɩ̃

⁴A-na-ɩ ba ma dãa na kpal ʋ a kure a gbɛɛ pʋɔ, ɩ̃ lũ ʋ a nur nɩ a bɔ̃jɔrɩ̃sɩ, ɩ̃-cɛ ʋ ma ŋma na a bɔ̃jɔrɩ̃sɩ, ɩ̃ kar a kure bar. Nɩrɛ ma dãa be be tɛrɛ fãgã maala ʋ ʋ bala wa.

⁵A tɩsɔw nɩ a mɔtɔ̃w, a daar a jaa, ʋ ma be na a yar sɔ̃w nɩ a tan jur, na ʋ wuure ɩ̃ ma ŋmara ŋmara a ʋ ɩ̃gan nɩ a kʋsɩɛ.

⁶A mɩnɛ ʋ na gbã nyɛ a Jeeju a nɩdaa, ʋ jɔ na tuor, na ʋ lo gburĩ dume a ʋ nii-sɔw,

⁷ɩ̃ wuurʼɩ̃ kpɛ̃w ɩ̃ yel: “Bõ fʋ nyɛ nɩ ma, saa juu Naaŋmɩn Bie Jeeju? Ɩ̃ sʋɔr fʋ na nɩ a Naaŋmɩn yuor bɩlɛ, taa hʋɔlɔ ma wa.”

⁸Ʋ yelʼã a lɛ a-na-ɩ a Jeeju dãa na yel: “A fʋna kɔ̃tɔn bierʼãa, yi ɩ̃ cɛ a daba na.”

⁹Ɩ̃ ʋ soorʼã a kɔ̃tɔn: “A fʋ yuorʼɩ̃ bõ?” “Kɔ̃-bɔ̃w-nʋɔr ɩ̃ dɩ, a-na-ɩ sɩ waa na,”

¹⁰ɩ̃ nyɔw ɩ̃ sʋɔrɔ a Jeeju tɔ̃tɔ̃tɔ̃ a ʋ taa ɩ a ba yi a wɩɛrʼã wa.

¹¹Do-yayaw dãa na be a tãw loor, bʋɔrɔ a ba yel-dɩrɩsɩ,

¹²a kɔ̃tɔnsɩ sʋɔrɔ a Jeeju yele: “Kʋ sɩ sɔr bɩlɛ a sɩ yi cen na kpɛ a dor basɩmɛ jie”,

¹³ʋ kʋ ba a sɔr, a kɔ̃tɔn-bebe yi cen na kpɛ a dor, a ba yi a be a tãw sɩɛ pʋɔ, ɩ̃ kaal taa suu lo a man kʋ̃ɔ pʋɔ. A dor bala na lo a lɛ mʋr a man kʋ̃ɔ pʋɔ, tara na dor ture ayi.

¹⁴A nɩbɛ bala na dãa cɩɩnɛ a dor lɩɛbʼã jɔ kulʼɩ̃ hier a ala na ta ꞌlʋɔrɩ̃ taa a tẽ-kpɛ̃ɛ pʋɔ wa ta nɩ a tẽ-bil pʋʋr, a nɩbɛ cen na nyɛ a ala na ta.

¹⁵Ba wɩ na a Jeeju sɛ̃, na ba nyɛ a daba ʋlɔ a kɔ̃tɔn “Kɔ̃-bɔ̃w-nʋɔr” na dãa tɛrɛ, ʋ su cẽcene jɩnaa nɩ, lɛ ɩ nɩsaa-son, a dãbɩ̃ɛ nyɔw ba.

¹⁶A bala na dãa nyɛ a mɩnɛ a yele na maal, mana na kʋrɔ a nɩbɛ a ala na dãa ta a daba ʋlɔ a kɔ̃tɔn na dãa tɛrɛ, nɩ a dor.

¹⁷A mɩnɛ a na be a lɛ, a nɩbɛ nyɔw na ɩ̃ sʋɔrɔ a Jeeju a ʋ yi a ba tẽw bɩlɛ.

¹⁸A mɩnɛ a Jeeju na kpɛɛrɛ a gbor pʋɔ, a daba ʋlɔ a kɔ̃tɔn na dãa tɛrɛ sʋɔr ʋ na a ʋ kʋ ʋ sɔr ʋ pɔw ʋ a ba lãa cen.

¹⁹Ɩ̃ a Jeeju mɔ̃w ʋ na a sɔr ɩ̃ yel: “Lɩɛb kul a fʋ yir deme jie, man ba a ala a jaa a Nɩ-kpɛ̃ɛ na maal fʋ nɩ a mɩnɛ ʋ na bɔ̃w fʋ a nãw.”

²⁰Ʋ cen na nyɔw ɩ̃ man pɔw a Ten-Pie tẽ-daa pʋɔ a ala a jaa a Jeeju na maal ʋ, a nɩbɛ ba jaa ha nɔɛ.

²¹A lɛ a *Jeeju na lɛ gãw nɩ a gbor a gaan kpee pʋɔ, a nɩ-yaw lɛ tiw na kolĩ ʋ a man gbẽgbere nʋɔr.

²²A *puorfʋ yir ni-diere na dɩ a Jaarisi ta na nyɛ a Jeeju ɩ̃ lo gburĩ a dume,

²³ɩ̃ sʋɔrɔ ʋ waala nɩ a ʋ sũo ʋ, yele nɩ: “A ɩ̃ bi-pɔw be na be kpiire. Ɩ̃ sʋɔrɔ fʋ na, wa dɔɔl ʋ a fʋ nuu ʋ kpɛmɛ ir”,

²⁴a Jeeju pɔw ʋ cenʼɩ̃, a nɩ-yaw tuure ʋ fʋrɔ ʋ.

²⁵Pɔw be na be na tɛrɛ a sɩɛ na ma baara wa maalʼɩ̃ yomo pie-nʼayi.

²⁶Ʋ nyɛ na won yaw a dɔɔtɔrsɩ yayaw jie, sãw nɩ a ʋ libie a jaa. Ɩ̃ ꞌwaa nyɛ kpɛ̃w wa; a wʋlɩ̃ lɛ ɛ̃ɛ na dɔɔlɔ cere.

²⁷Ʋ wõ na a ba bʋ a Jeeju ƴɛrɩ̃, ʋ cen a nɩ-yaw pʋɔ a ʋ puo-sɔw, ɩ̃ sɩɩr a ʋ fu.

²⁸A-na-ɩ ʋ yelʼã: “Maa saarɩ̃ sɩɩr a ʋ fu tɛw, ɩ̃ na kpɛmɛ na.”

²⁹A mɩnɛ ʋ na sɩɩr a Jeeju fu, a jie naan a ʋ jɩ̃ɩ barfʋ baarʼã, ʋ bɔ̃wnaa a ʋ mɩ̃ɛ, bɔ̃w ka ʋ kpɛmɛ na.

³⁰A ʋna daarʼãa pʋɔ, a Jeeju bɔ̃wnaa a fãgã kãw yi ʋ na, ɩ̃ lɩɛb a nɩ-yaw pʋɔ soor: “Ala ɩ̃ sɩɩr ma a fu?”

³¹A ʋ *par-tuurbe yel ʋ: “Fʋ nyɛ na a nɩbɛ na fʋr fʋ a lõbobo a jaa, ɩ̃ na fʋ lɛ bɔ̃w nɩ sooro a ala ɩ̃ sɩɩr fʋ?”

³²Ɩ̃ a Jeeju ꞌwuoro a lõbobo pʋʋr kolo nɩ, bʋɔrɔ ʋ nyɛ a ʋlɔ na maal a lɛ.

³³A dãbɩ̃ɛ nyɔw a pɔw, ʋ mine, a-na-ɩ ʋ bɔ̃w na a ala na maal a ʋ jie, ʋ wa lo gburĩ dume a Jeeju nii-sɔw, ɩ̃ yel a ʋ yel-mɩ̃ɛ a jaa kʋ ʋ.

³⁴A Jeeju yel ʋ: “Ɩ̃ bi-pɔw! A fʋ ƴɔ̃w-nyãa faa fʋ na. Cere nɩ su-ɓaar tɛrɛ nɩ a ɩ̃gan kpɛ̃w.”

³⁵Ɩ̃ a mɩnɛ a Jeeju na cãa ƴɛrɛ, a nɩbɛ yi na a Jufisɩ nɩ-kpɛ̃ɛ Jaarisi yir, ɩ̃ wa yel ʋ: “A fʋ bi-pɔw kpi na. Bõ fʋ lɛ vɔwrɔ a Jãjaana ɩrɛ nɩ?”

³⁶Ɩ̃-cɛ a Jeeju ma mɩ cɛlɛ ba be wa, ɩ̃ yel a Jaarisi: “Taa jɔrɔ dãbɩ̃ɛ wa. Tɛrɛ a ƴɔ̃w-nyãa tɛw.”

³⁷Ɩ̃ ꞌwaa sɔw a nɩrɛ bɩɛl ʋ wa, ɩ̃ a ala ma ɩ a Pɩɛr nɩ a Jakɩ nɩ a ʋ yɛbɛ Jã ʋ wa.

³⁸Ʋ ta na a puorfʋ nɩ-kpɛ̃ɛ yir, nyɛ a nɩbɛ a ba kono wuure nɩ kpɛ̃w,

³⁹ʋ po kpɛɛrɛ a diem ɩ̃ yel ba: “Bõ gɔmɔ nɩ a asɩmɛ nyɩ pɔɔrɔ kono nɩ a nɔhɔ̃? A bibile ma kpi wa, ʋ gurʼã”,

⁴⁰a ba laara ʋ, ʋ diw ba bar yẽw ba jaa, ɩ̃ taw a bibile sãa, nɩ a ʋ mã, nɩ a ʋ par-tuurbe ata, kpɛ nɩ a die ʋlɔ pʋɔ a bibile na be.

⁴¹Ʋ nyɔw na a bibile nuu ɩ̃ yel ʋ: “Talita kum.” A lɛ yelʼã: “Poole, a fʋ̃ʋ ɩ̃ yele, ir!”

⁴²A jie naan a poole irʼã cere, a-na-ɩ ʋ tɛrɛ na yomo pie-nʼayi. A lɛ ba na nyɛ a ala, a ɩ ba na nɔ-kofʋ yaw.

⁴³Ɩ̃-cɛ a Jeeju kpãa ba na a ba taa ɩ nɩrɛ ʋ bɔ̃wnaa wa, ɩ̃ na ʋ yel ba: “Nyɩ́ kʋ ʋ bõ-dɩraa ʋ dɩ.”