Read Birifor, Malba Markɩ Sɛbɛ 8 Bible Online

Markɩ Sɛbɛ 8 - Birifor, Malba bible

Markɩ Sɛbɛ 8

¹A bibie ala pʋɔ, nɩ-yaw lɛ bɔ̃w na kpaarɩ̃ taa a *Jeeju sɛ̃ go, ɩ̃ a bom ma dãa be be a ba dɩrɛ wa, a Jeeju bʋɔl a ʋ *par-tuurbe ɩ̃ yel ba:

²“Nãw nyɔw ma na a nɩbɛ basɩmɛ ɩnɛ, a-na-ɩ bibie ata nɩ a dɩnaa ba na maal a ka a ɩ̃ sɛ̃, ɩ̃ a dɩb ma cãa be a ba dɩrɛ wa.

³Maa wɛl ba bar a ba kule nɩ a kɔ̃ a lɛ, ba na faa na lo a sɔr juu, a-na-ɩ a ŋmɛɛ a ba sɔ̃w yi na nɩdaa.”

⁴A ʋ par-tuurbe soor ʋ: “Nyɩnɛ nɩrɛ na pɔw a buru ka a wɛkarʼãa pʋɔ, kʋ a nɩ-yaw basɩmɛ a ba wa ꞌwɔb pi?”

⁵A Jeeju lɛ soor ba: “Bur-bie amɩnɛ nyɩ tɛrɛ?” A ba yel ʋ: “Anuu-nʼayi ʋ.”

⁶A lɛ, a Jeeju ɩ na a nɩbɛ a ba jɛ, ɩ̃ ʋ de a bur-bie anuu-nʼayi puor a Naaŋmɩn ƴɔ̃w, ɩ̃ nyɔw ŋma ŋma kʋ a ʋ par-tuurbe a ba de po a nɩbɛ, a ba de po ba.

⁷Ba mɩ dãa na tɛrɛ jɩ̃-bie fɩ̃ɩ, ʋ puor a Naaŋmɩn ƴɔ̃w, ɩ̃ yel a ʋ par-tuurbe a ba mɩ de po a nɩbɛ,

⁸a ba ꞌwɔb pi ɩ̃ cãa cɛ bõ-ŋmara a ba woor sɛɛr pɩɩr anuu-nʼayi.

⁹A bala na ꞌwɔb a buru ala tara na nɩbɛ ture anaan. A ala ɩ̃ baar, a Jeeju pãa na wɛl ba bar,

¹⁰ɩ̃ kpɛ a gbor pʋɔ, ʋlɔ nɩ a ʋ par-tuurbe, cere a Damanuta wɩɛr.

¹¹A *Farɩsɩ nɩbɛ ta na ɩ̃ nyɔw nɩ a *Jeeju a cɩɩrɩ̃fʋ, bʋɔrɔ ba jʋʋr ʋ bɔ̃w a ʋ tɛw. Ba sʋɔr ʋ na a ʋ maal bom miilʼɩ̃ ba, a ba bɔ̃w ka a ʋ fãw yi na a Naaŋmɩn jie.

¹²A Jeeju hʋʋn a ʋ suur pʋɔ ɩ̃ yel: “Bõ ɩ̃ tɛrɛ a dɩnaa nɩbɛ a ba bʋɔrɔ bõ-miilaa? Yel-mɩ̃ɛ ɩ̃ yele nyɩ: bõ-miilaa ma be na maal a ba nyɛ wa”,

¹³ɩ̃ na ʋ bar ba a be, ɩ̃ lɛ kpɛ a gbor pʋɔ gãwna a man gaan.

¹⁴A *Jeeju *par-tuurbe dãa na hiin a bõ-dɩraa defʋ. Bur-bir bõ-ƴen tɛw ba dãa tɛrɛ a be a gbor pʋɔ.

¹⁵A Jeeju kpãkpan ba yel ba: “Nyɩ́ bɔ̃w yuo mimie ɩ̃ tɛrɛ nyɩ mɩ̃ɛ a *Farɩsɩ nɩbɛ nɩ a *Ɛrɔdɩ tabɩr ɩnɛ.”

¹⁶A ʋ par-tuurbe lɩɛb yele taa a ba nɩ̃ɛ: “A buru sɩ na ma tɛrɛ wa, ala ɩnɛ ʋ ƴɛrɛ a lɛ.”

¹⁷A Jeeju bɔ̃wnaa ɩ̃ soor ba: “Bõ ɩnɛ nyɩ ƴɛrɛ taa áa buru nyɩ na ma tɛrɛ ʋ wa? Mɩnɛ! Nyaa bɔ̃w a par sɛr wa? Aa caarɩ̃ nyɩ sɛr wa? A yɛ̃ ɓɔr nyɩ na mɩɩ?

¹⁸Mɩnɛ nyɩ tɛrɛ a mimie ɩ̃ ma nyɛrɛ wa? Nɩ a tobo ɩ̃ ma wono wa? Nyaa lɛ cãa bɔ̃w nɩ a daar ʋlɔ ɩ̃ na de a bur-bie anuu ŋma ŋma kʋ a dabsɩ ture anuu wa? Pɩɩr amɩnɛ nyɩ woor a bõ-ŋmara sɛɛr?” A ba yel ʋ: “Pɩɩr pie-nʼayi ʋ.”

²⁰“Ɩ̃ a daar ʋlɔ ɩ̃ na ŋma ŋma a bur-bie anuu-nʼayi kʋ a nɩbɛ ture anaan, pɩɩr amɩnɛ nyɩ woor a bõ-ŋmara sɛɛr?” A ba yel ʋ: “Pɩɩr anuu-nʼayi ʋ.”

²¹A Jeeju yel a ʋ par-tuurbe: “Lɛ ʋ, ɩ̃ a nyaa cãa bɔ̃w a par sɛr wa?”

²²Ba ta na a Bɛsada-tẽw pʋɔ a ba wɩ nɩ jɔ̃w a *Jeeju sɛ̃, ɩ̃ sʋɔrɔ ʋ a ʋ sɩɩr ʋ.

²³A Jeeju nyɔw na a jɔ̃w nuu taw ʋ yi nɩ a tẽw pʋɔ, ɩ̃ pʋʋr a natɛɛr ƴɔ̃w ʋ a mimie pʋɔ. A ala ɩ̃ baar, ʋ dɔɔl ʋ na a nur ɩ̃ soor ʋ, á ʋ nyɛ na bom mɩɩ?

²⁴A jɔ̃w caarɩ̃ a mimie ɩ̃ yel: “Ɩ̃ nyɛ na nɩbɛ, ɩ̃-cɛ tɩɩr kaarɩ̃ ba wɔ̃, ɩ̃ cere.”

²⁵A Jeeju lɛ bɔ̃w sɩɩr ʋ a mimie, ɩ̃ a mɩnɛ a jɔ̃w na ꞌwuor a kir-kir-kir, a mimie yuo ʋ na, ʋ nyɛ a yele a jaa gbelẽgbelẽ.

²⁶A Jeeju ƴɔ̃w a ʋ kul a ʋ yir, ɩ̃ yel ʋ á ʋ taa kpɛɛrɛ a tẽw pʋɔ wa.

²⁷A *Jeeju cenʼɩ̃ na a ʋ *par-tuurbe a tẽ-bil ala na be a Fɩlɩpɩ-Sejare wɩɛr pʋɔ. A mɩnɛ ba na de a sɔr cere, ʋ sooro na a ʋ par-tuurbe: “Ala ʋlɔ a nɩbɛ ma de ma ɩ̃ ɩ?”

²⁸A ba yel ʋ: “A ŋmɛɛ ma yelʼã á Jã-Batii fʋ ɩ, a ŋmɛɛ ma lɛ yel, á Eli fʋ ɩ, a ŋmɛɛ go, á ƴɛr-hiere ƴen sʋbɔ fʋ ɩ.”

²⁹A Jeeju soor ba: “Ɩ̃ a nyɩmɩ, ala ʋlɔ tɔr nyɩ de ma ɩ̃ ɩ?” A Pɩɛr yel ʋ: “Fʋ ɩ na a *Kirisi.”

³⁰A be jie, a Jeeju bɔ̃w kpãkpan ba ɩ̃ yel a ba taa wa diere a ʋ yel, na ƴɛrɛ kʋrɔ nɩrɛ wa.

³¹A ala ɩ̃ baar, a *Jeeju nyɔw na ɩ̃ jaana a ʋ *par-tuurbe áa sɛw na a *Nɩbɛ Bie na nyɛ a won yaw a bɛlɩ̃, áa ni-dierbe nɩ a *baar-lo-nɩ-bɛrɛ nɩ a *ƴɛr-kpɛn-bɔɔnbɔ na jɛ ʋ na bar, á ba na kú ʋ na, ɩ̃ a lɛ a bibie ata na tɔl baar á ʋ na irʼã a kũu pʋɔ.

³²Cãa pʋɔ ʋ dãa mana ba a ƴɛrɩ̃ ʋlɔ a lɛ. A be juumɩ, a Pɩɛr bʋɔl ʋ, yi nɩ cɛ̃cɛ̃w, nyɔw ʋ fule.

³³A Jeeju ŋmelɩ̃ ꞌwuor a ʋ par-tuurbe, ɩ̃ tan a Pɩɛr ɩ̃ yel ʋ: “Taw yi ka a ɩ̃ nii-sɔw Satã! A-na-ɩ faa tɩɛrɛ a Naaŋmɩn kaarɩ̃ wa, ɩ̃-cɛ nɩrɛ kaarɩ̃ fʋ tɩɛrɛ.”

³⁴A Jeeju bʋɔlʼã a nɩbɛ nɩ a ʋ par-tuurbe a ba wɩ a ʋ jie ʋ yel ba: “A ala ɩ nɩrɛ bʋɔrɔ na ʋ tuure ma, ú jɛ a ʋ mɩ̃ɛ bar, ɩ̃ na ʋ tuo a ʋ nɩ-kʋ-daa tuure nɩ ma.

³⁵A nɩrɛ lɛ na bʋɔrɔ ʋ faa a ʋ mɩ̃ɛ, a ʋ baafʋ na bɔrʼã; ɩ̃ a nɩrɛ lɛ na bara a ʋ baafʋ ʋ bɔrɔ a ɩ̃ ɩnɛ nɩ a Naaŋmɩn ƴɛr-son ɩnɛ, a ʋ baafʋ na cɩ̃ɛ na.

³⁶Ɩ̃ a ala ɩ a nɩrɛ pɔw na a tẽw na yele a jaa, ɩ̃-cɛ a ʋ baafʋ sãw, bõ a na kʋ ʋ?

³⁷Bõ a nɩrɛ na tʋɔ de tɛw nɩ a ʋ baafʋ?

³⁸A-na-ɩ a nɩrɛ lɛ na jɔ a vĩ a maa nɩ a ɩ̃ ƴɛrɩ̃sɩ a dɩnaa nɩbɛ sɔ̃w na bar a Naaŋmɩn ɩ̃ maala a burbur, a Nɩbɛ Bie na mɩ jɔ na a vĩ a ʋ ɩnɛ, a lɛdaar ʋ nɔɔ waara a ʋ Sãa yo-yifʋ pʋɔ, nɩ a ʋ sɩ-tʋnɩsɩ na ɩ a cɛcɛ.”