Read Birifor, Malba Luki Sɛbɛ 1 Bible Online

Luki Sɛbɛ 1 - Birifor, Malba bible

Luki Sɛbɛ 1

¹Ɩ̃ araa Towfɩl! Nɩ-yaw dɩ na tuo ɩ̃ sɛb a yele ala na maal a sɩ sɔ̃w.

²A be na a lɛ a mɩnɛ a yel-mɩ̃ɛ ƴɛr-manba na man kʋ sɩ a wɔ̃, na ɩ a bala na dãa nyɛ nɩ a ba mimir, wa nyɔw nɩ a nyɔwfʋ daar, ɩ̃ mɩ ɩ a Naaŋmɩn ƴɛr-son tʋ̃tʋnbɔ.

³Ala-ɩ̃-sɔ a maa mɩ, ɩ̃ mɩ bɔ̃w na ꞌlo a yele a jaa, cenʼɩ̃ na ta a nyɔwfʋ jie, ɩ̃ bʋɔrɔ ɩ̃ sɛb fʋ a mɩnɛ a yele na tu taa,

⁴a fʋ na tʋɔ bɔ̃w ka a jaanfʋ ala fʋ na pɔw ɩ na yel-mɩ̃ɛ.

⁵A lɛdaar a *Ɛrɔdɩ na dãa ɩ a Jude jamana, a Naaŋmɩn baar-loro ƴen sʋbɔ be na be na dɩ a Jakarɩ, na be a baar-lorbo bala ba na bʋɔlɔ a Abiya ji-gbulĩ pʋɔ. A ʋ pɔw ba bʋɔlɔ a Elijabɛtɩ na mɩ ɩ a Naaŋmɩn baar-loro bi-pɔw.

⁶A ba jaa ayi ɩ na nɩ-torisɩ a Naaŋmɩn nii-sɔw, ɩ̃ jɔrɔ a Nɩ-kpɛ̃ɛ ƴɛr-kpɛn nɩ a ʋ ƴɛrɩ̃sɩ a jaa.

⁷Ɩ̃-cɛ baa dãa tɛrɛ bie wa, a-na-ɩ a Elijabɛtɩ ɩ na pɔw ab, ɩ̃ a ʋlɔ nɩ a Jakarɩ yomo dãa tɔl.

⁸A daar ta na a Jakarɩ nɩ a ʋ lãa-tʋnbɔ jew taa a tʋmɔ, ʋ be a Naaŋmɩn nii-sɔw a lɛ, tʋnɔ a ʋ baar-lo-tʋmɔ.

⁹Gbãbie ba lɔb vɛl ʋ ir tu nɩ a mɩnɛ a ba baar-lo-tʋmɔ na be, ʋ kpɛ a Nɩ-kpɛ̃ɛ puor-yir kpɛ̃ɛ na ʋ ƴɔ̃w a *tɩ̃ɩ-nyu-vɩlaa a vũu pʋɔ a dɩ.

¹⁰A nɩ-yaw ɩraa na be a yẽw sʋɔrɔ a Naaŋmɩn a tɩ̃ɩ-nyu-vɩlaa dɩfʋ daar.

¹¹A Nɩ-kpɛ̃ɛ sɩ-tʋnaa nyɩrʼã a Jakarɩ, na ʋ ɩraa a tɩ̃ɩ-nyu-vɩlaa dɩfʋ jie a dʋrɩ̃ loor.

¹²A lɛ a Jakarɩ na nyɛ ʋ, a ʋ suur dama ʋ na, ɩ̃ a pʋlɩ̃nyɛ vʋ̃ɔnɔ ʋ.

¹³Ɩ̃-cɛ a sɩ-tʋnaa yelʼã: “Jakarɩ! Taa jɔrɔ dãbɩ̃ɛ wa. A-na-ɩ a Naaŋmɩn sɔw na a fʋ sʋɔrfʋ. A fʋ pɔw Elijabɛtɩ na dɔw na dabile, fú pʋr ʋ a yuor Jã.

¹⁴Nʋ̃ɔ na nyɔw fʋ na a fʋ cɩlɛ, ɩ̃ a na mɩ nʋmɔ na a nɩ-yaw a ʋ dɔwfʋ ɩnɛ.

¹⁵A-na-ɩ ʋ na ɩ na gãdaa a Nɩ-kpɛ̃ɛ nii-sɔw. Ʋ kɔ̃ wa nyu a dɩvɛ̃ nɩ a dã-tuo fɩ̃ɩ wa; ɩ̃ wa nyɔw nɩ a bile ʋlɔ pʋɔ tɛrɛfʋ daar, ʋ na sɛw nɩ na a Naaŋmɩn Sɩɛ.

¹⁶Ʋ na maalʼã a *Ɩsɩrayɛl nɩbɛ yaw jie a ba lɛ lɩɛb wa a ba Nɩ-kpɛ̃ɛ Naaŋmɩn jie.

¹⁷Ʋ na de na a Nɩ-kpɛ̃ɛ nĩe cenʼɩ̃ a Naaŋmɩn Sɩɛ ʋlɔ nɩ a fãgã ʋlɔ a Eli na dãa tɛrɛ. Ʋ na lɩɛbʼã a saanba sube a ba ɩ bõ-ƴen nɩ a ba bibiir, ɩ̃ mɩ lɩɛb a to-wownbo yɛ̃, a ba na tɛrɛ a nɩ-torisɩ yɛ̃; ʋ na maalʼã a nɩbɛ a ba gbɛɛrɩ̃ a ba mɩ̃ɛ a Nɩ-kpɛ̃ɛ ɩnɛ.”

¹⁸A Jakarɩ soor a sɩ-tʋnaa: “Mɩnɛ ɩ̃ na ɩ ɩ̃ bɔ̃w ka a ɩ na yel-mɩ̃ɛ? A-na-ɩ ɩ̃ korʼã, ɩ̃ a ɩ̃ pɔw yomo mɩ tɔl.”

¹⁹A sɩ-tʋnaa yel ʋ: “Maa ɩ̃ ɩ a Gabɩyɛl[1] na ma ɩraa a Naaŋmɩn nii-sɔw. A ʋlɔ ɩ̃ tʋ ma a ɩ̃ wa ƴɛrʼɩ̃ fʋ, ɩ̃ man fʋ a ƴɛr-son na.

²⁰Nyɛ! A nʋɔr na kpal fʋ na, fʋ kɔ̃ tʋɔ ƴɛr ƴɛrɩ̃ wa ta nɩ a bibir ʋlɔ a ana yele na maala wa. A-na-ɩ faa sɔw nɩ puor a ɩ̃ ƴɛrɩ̃sɩ na sɛw a maal a daar ɩ̃ wa ta wa.”

²¹A nɩbɛ bala cãa na ɩraa gu a Jakarɩ, a nɔɛ ko ba a mɩnɛ ʋ na kam a Naaŋmɩn puor-yir kpɛ̃ɛ pʋɔ a lɛ.

²²A lɛ ʋ na yi, ꞌwaa dãa tʋɔrɔ ƴɛrɛ nɩ ba wa, a ba bɔ̃w ka bom nyɩr ʋ na a Naaŋmɩn puor-yir kpɛ̃ɛ pʋɔ. A nur ʋ mɩɩnɛ nɩ ba, ɩ̃ ꞌwaa tʋɔrɔ ƴɛrɛ wa.

²³A lɛ a ʋ Naaŋmɩn puor-yir kpɛ̃ɛ tʋmɔ jewfʋ bibir na ta, ʋ yi na kul a ʋ yir.

²⁴A ɩ na fɩ̃ɩ ɩ̃ a ʋ pɔw Elijabɛtɩ tɛrɛ pʋɔ na ʋ sɔɔlɩ̃ nɩ cur anuu,

²⁵yele nɩ: “Nyɛ a ala a Nɩ-kpɛ̃ɛ na maal a ɩ̃ jie. A daar ta na, ʋ ꞌwuor ma, ɩ̃ ir a ɩ̃ vĩ ʋlɔ ɩ̃ na dãa tɛrɛ a nɩbɛ nii-sɔw.”

²⁶A lɛ a Elijabɛtɩ na tɛrɛ a ʋ pʋɔ maalʼɩ̃ cur ayʋɔb, a Naaŋmɩn tʋ na a ʋ sɩ-tʋnaa Gabɩyɛl a Galile, tẽw kãw pʋɔ na dɩ a Najarɛtɩ,

²⁷be a pɔsabile kãw sɛ̃, na ɩ a Jojɛfʋ baraa. A Jojɛfʋ sãa-kʋmɔ nɩ a Davɩtɩ na dãa ɩ a jamana. Ɩ̃ a pɔsabile ʋlɔ yuor ɩ̃ dɩ a Maarɩɩ.

²⁸A sɩ-tʋnaa kpɛ na a ʋ sɛ̃ ɩ̃ yel ʋ: “Ɩ̃ puor fʋ na, a fʋ̃ʋ a Naaŋmɩn na vɛl ir maal a vɩlaa. A Nɩ-kpɛ̃ɛ be nɩ fʋ na.”

²⁹A ƴɛrɩ̃ ʋlɔ dama na a Maarɩɩ suur, ʋ sooro a ʋ mɩ̃ɛ a puorfʋ ʋlɔ par.

³⁰A sɩ-tʋnaa yel ʋ: “Maarɩɩ! Taa jɔrɔ dãbɩ̃ɛ wa. A-na-ɩ a Naaŋmɩn vɛl fʋ na ir maal a vɩlaa.

³¹Nyɛ, fʋ na tɛrɛ na a pʋɔ, dɔw dabile, na fʋ pʋr ʋ a yuor *Jeeju.

³²Ʋ na ɩ na nɩ-kpɛ̃ɛ, ɩ̃ ba na bʋɔlɔ ʋ na a saa juu Naaŋmɩn Bie. A Nɩ-kpɛ̃ɛ Naaŋmɩn na biin ʋ na ʋ ɩ a jamana a ʋ sãa-kʋmɔ Davɩtɩ kaarɩ̃.

³³Ʋ na ɩ na a Jakɔb yir deme jamana a daar a jaa, ɩ̃ a ʋ fãw kɔ̃ tɛrɛ baarfʋ daar wa.”

³⁴A Maarɩɩ soor a sɩ-tʋnaa: “Mɩnɛ a na tʋɔ ɩ a lɛ? A-na-ɩ maa bɔ̃w daba sɛr wa.”

³⁵A sɩ-tʋnaa yel ʋ: “A Naaŋmɩn Sɩɛ na suu na a fʋ jie ɩ̃ a saa juu Naaŋmɩn fãw na piw fʋ na. Ala-ɩ̃-sɔ a bie ʋlɔ fʋ na dɔwrɔ na ɩ na cɛcɛ, ɩ̃ ba na bʋɔlɔ ʋ na a Naaŋmɩn Bie.

³⁶Nyɛ, a fʋ yɛbɛ Elijabɛtɩ ba na dãa bʋɔlɔ a pɔw ab, ʋ tɛrɛ na pʋɔ a ʋ korfʋ daar a ɩ cur ayʋɔb a dɩnaa.

³⁷A-na-ɩ bom ma be be a Naaŋmɩn maala faara wa.”

³⁸A Maarɩɩ yel: “Ɩ̃ ɩ na a Nɩ-kpɛ̃ɛ tʋ̃tʋnɔ. Á maal a lɛ a ɩ̃ jie a mɩnɛ fʋ na yel.” A sɩ-tʋnaa bar ʋ na ɩ̃ yi cen.

³⁹A ʋna daarʼãa, a Maarɩɩ yi na pɔɔrɔ cere a Jude wɩɛr kãw pʋɔ na be a tan loor.

⁴⁰Ʋ ta na kpɛ a Jakarɩ yir, puor a Elijabɛtɩ.

⁴¹A mɩnɛ a Elijabɛtɩ na wõ a Maarɩɩ puorfʋ, a ʋ bie lɩɛbɛ na a ʋ puorɩ̃, ɩ̃ ʋ sɛw nɩ a Naaŋmɩn Sɩɛ,

⁴²ɩ̃ ʋ wuurʼɩ̃ kpɛ̃w yele: “A Naaŋmɩn be nɩ fʋ na gãw a pɔɔbɔ ba jaa, ɩ̃ ʋ mɩ be nɩ na a bie ʋlɔ na be a fʋ puorɩ̃.

⁴³Bõ ɩ mɩ ɩ a ɩ̃ Nɩ-kpɛ̃ɛ mã mɩ wa a ɩ̃ sɛ̃?

⁴⁴A-na-ɩ a mɩnɛ ɩ̃ na tɔɔ wõ a fʋ puorfʋ, a nʋmɔ na a bie ʋ lɩɛbɛ a ɩ̃ puorɩ̃.

⁴⁵Anʋmɔ fʋ na a-na-ɩ fʋ sɔw nɩ na puor, áa ala a jaa a Nɩ-kpɛ̃ɛ na yel fʋ na maalʼã a lɛ.”

⁴⁶A Maarɩɩ yel: “Ɩ̃ pɛwrɛ na a Nɩ-kpɛ̃ɛ a ɩ̃ pʋɔ pʋɔ,

⁴⁷ɩ̃ a ɩ̃ sɩɛ mɩ cɩlɛ na a ɩ̃ Fafaara Naaŋmɩn ɩnɛ,

⁴⁸a-na-ɩ ʋ ꞌwuorʼã a ʋ tʋtʋ̃-poole na pab. Wa nyɔw nɩ a ƴɛ̃ƴɛrɩ̃, a bal par bʋrɔ bʋrɔ ba jaa na yelʼã a nʋ̃ɔ ƴala ma na,

⁴⁹a-na-ɩ a Fãw Sʋbɔ maalʼã tʋ̃-bɛrɛ a ɩ̃ jie. A ʋ yuor ɩ na cɛcɛ.

⁵⁰A ʋ nã-bɔ̃wfʋ ma be nɩ na a bal par bʋrɔ bʋrɔ ba jaa na jɔrɔ ʋ.

⁵¹Ʋ miilʼã a mɩnɛ a ʋ nuu fãgã na wɔ̃, ʋ yɛ̃yɛlɩ̃ na a bala na dãa tɛrɛ a yo-bɔfʋ tɩɛrɩ̃sɩ a ba suur pʋɔ bar.

⁵²Ʋ irʼã a jamansɩ a ba jaajiir bar, ɩ̃ maal a bala na pab a ba lɩɛb ɩ nɩ-bɛrɛ.

⁵³Ʋ kʋ na a kɔ̃ deme a yel-sono a sɛw ba, ɩ̃ diw a tɛraa deme bar a ba cenʼɩ̃ nu-jaalsɩ.

⁵⁴Ʋ wa na sũo a ʋ tʋ̃tʋnɔ *Ɩsɩrayɛl a mɩnɛ ʋ na dãa pʋlɩ̃ nɩ a sɩ sãa-kʋnbɔ, ɩ̃ ꞌwaa hiin a ʋ nã-bɔ̃wfʋ ʋ na tɛrɛ nɩ a Abʋraham nɩ a ʋ bal par deme a daar a jaa wa.”

⁵⁵

⁵⁶A Maarɩɩ maalʼã cur ata a Elijabɛtɩ sɛ̃, ɩ̃ wa pãa kul.

⁵⁷A Elijabɛtɩ bie dɔwfʋ daar ta na, ʋ dɔw dabile.

⁵⁸A ʋ taarba nɩ a ʋ yir deme wõ na a mɩnɛ a Naaŋmɩn na sɩrɩ̃ maal ʋ a vɩlaa, ɩ̃ na ba mɩ tɛrɛ a nʋ̃ɔ a ʋ kaarɩ̃.

⁵⁹A bibie anuu-nʼata dayen ba wɩ na a bie yʋɔr ŋmaafʋ ɩnɛ, ɩ̃ bʋɔrɔ ba pʋr ʋ a yuor a Jakarɩ na ɩ a ʋ sãa yuor.

⁶⁰Ɩ̃-cɛ a ʋ mã yelʼã a ꞌwaa dɩrɛ a lɛ wa, á Jã ba na bʋɔlɔ ʋ.

⁶¹A ba yel ʋ: “Nɩrɛ ma be be a fʋ yir deme sɔ̃w na dɩ a ʋna yuor wa.”

⁶²Ɩ̃ na ba mɩɩn a sãa nɩ a nur bʋɔrɔ ba bɔ̃w a yo-buor ʋ na bʋɔrɔ ba pʋr ʋ.

⁶³A Jakarɩ ɩ a ba kʋ ʋ sɛbɛ, ʋ sɛb ƴɔ̃w yel áa ʋ yuor dɩ na Jã. A nɔɛ ko a nɩbɛ ba jaa.

⁶⁴A jie naan, a Jakarɩ nʋɔr ꞌlaw na, a ʋ dɛlɩ̃bir mɩ ꞌlor, ʋ lɛ ƴɛrɛ a ƴɛrɩ̃ pɛwrɛ nɩ a Naaŋmɩn.

⁶⁵A dãbɩ̃ɛ nyɔw a ba lãa-pɩɛlbɛ ba jaa, ɩ̃ a ba mɩ mana a ala na ta kʋrɔ taa a Jude wɩɛr ʋ jaa pʋɔ na be a tan jur.

⁶⁶A bala ba jaa na wõ a ʋna ƴɛrɩ̃, de ʋ na ƴɔ̃w a ba suur pʋɔ ɩ̃ yele: “Mɩnɛ a bibile na nɔɔ be? A-na-ɩ a Nɩ-kpɛ̃ɛ fãw be nɩ ʋ na sɩrɛ jaa.”

⁶⁷A Jã sãa Jakarɩ sɛw nɩ na a Naaŋmɩn Sɩɛ, ɩ̃ hiere yele nɩ:

⁶⁸“Nyɩ́ pɛwrɛ a Nɩ-kpɛ̃ɛ na ɩ a *Ɩsɩrayɛl Naaŋmɩn, a-na-ɩ ʋ wa na a ʋ nɩbɛ sɛ̃ na ʋ faa ba.

⁶⁹Ʋ ƴɔ̃w sɩ na Fafaar-gãdaa be a ʋ tʋtʋnɔ Davɩtɩ yir deme sɔ̃w,

⁷⁰a mɩnɛ ʋ na dãa ƴɔ̃w a ʋ ƴɛr-hier-sono a ba yel a korĩ-cɛ jaa.

⁷¹Ʋ yel sɩ na á ʋ na faa sɩ na a sɩ sama-deme jie, lãa faa nɩ sɩ a bala ba jaa na ꞌlaar sɩ nuumɩ.

⁷²Lɛ ʋ ma miilʼɩ̃ a ʋ nã-bɔ̃wfʋ a sɩ sãa-kʋnbɔ jie, ɩ̃ ma mɩ tɩɛr bɔ̃w nɩ a ʋ pʋlɩ̃-son,

⁷³tu nɩ a mɩnɛ ʋ na dãa pʋlɩ̃ nɩ a sɩ sãa-kʋmɔ Abʋraham,

⁷⁴a ʋ na faa sɩ na a sɩ sama-deme nuumɩ, a sɩ na tʋɔ tʋnɔ a ʋ tʋmɔ, kɔ̃ jɔrɔ dãbɩ̃ɛ wa,

⁷⁵ɩ̃ na sɩ ow kpee ɩ cɛcɛ, ɩ nɩ nɩ-torisɩ a ʋ nii-sɔw a sɩ baafʋ bibie a jaa pʋɔ.

⁷⁶Ɩ̃ a fʋ̃ʋ ɩ̃ bie, ba na bʋɔlɔ fʋ na a saa juu Naaŋmɩn ƴɛr-hiere a-na-ɩ fʋ na de na a Nɩ-kpɛ̃ɛ nĩe gbɛɛrɛ a ʋ sɔr,

⁷⁷na fʋ miil a ʋ nɩbɛ a ba bɔ̃w a faafʋ sɔr,

⁷⁸a na yi a ba maal-faar a Naaŋmɩn na diere bara kʋrɔ ba ɩnɛ. A-na-ɩ a nã-bɔ̃wfʋ ƴala na a sɩ Naaŋmɩn jie, a ala ɩnɛ a saꞌlon cã́a nɔɔ wa pur caarɩ̃ sɩ,

⁷⁹a mɩnɛ ʋ na tʋɔ caarɩ̃ a bala na be a libe pʋɔ, nɩ a bala na pɩɛlʼɩ̃ a kũu, ɩ̃ tɔwrɔ sɩ ƴɔnɔ a pɩɛnfʋ sɔr pʋɔ.”

⁸⁰A bile nʋ̃ɔnɔ na ɩ̃ a ʋ sɩɛ mɩ pɔwrɔ a fãgã. A wɛkar pʋɔ ʋ be wa ta nɩ a ʋna bibir ʋ na wa yi a Ɩsɩrayɛl nɩbɛ nii-sɔw.