Read Birifor, Malba Luki Sɛbɛ 12 Bible Online

Luki Sɛbɛ 12 - Birifor, Malba bible

Luki Sɛbɛ 12

¹A daar ʋlɔ pʋɔ, a nɩbɛ tiw na taa ture-ture, fʋrɔ taa nɛbɛ taa, a *Jeeju ƴɛrʼɩ̃ a ʋ *par-tuurbe na ʋ yel ba: “A dãdãw bom ɩ na: nyɩ́ gu nyɩ mɩ̃ɛ a *Farɩsɩ nɩbɛ tabɩr ɩnɛ na ɩ a ba poe ayi tɛrɛfʋ.

²Bom ma be be na sɔɔlɩ̃ ɩ̃ mɔɔ yire cãa pʋɔ wa.

³Ala-ɩ̃-sɔ a ala a jaa nyɩ na yele a libe pʋɔ na yi na cãa pʋɔ a ba bɔ̃wnaa, ɩ̃ a ala nyɩ na hũhune a di-bile pʋɔ ba na hierʼã a ala a gara jur.

⁴“A nyɩmɩ na ɩ a ɩ̃ badɛɛ, ɩ̃ yele na kʋrɔ nyɩ, nyɩ taa jɔrɔ dãbɩ̃ɛ a bala ɩnɛ na ma kú a ɩ̃gan baar, ɩ̃ ma lɛ tʋɔrɔ maala bom kãw wa.

⁵Ɩ̃ na miil nyɩ na a ʋlɔ na sɛw a nyɩ na jɔrɔ: nyɩ́ jɔrɔ a ʋlɔ na tʋɔrɔ diere a nɩrɛ baafʋ ɩ̃ mɩ tɛrɛ a tʋɔfʋ lɔbɔ nɩ ʋ ƴɔnɔ a wɛfʋ jie. Yel-mɩ̃ɛ ɩ̃ yele nyɩ, ʋlɔ nyɩ sɛw na jɔrɔ.

⁶“A tɩ̃ɩtɩ̃ɩ, má a libie pie ba ma da nɩ a ba bõ-bie anuu. Ɩ̃-cɛ a Naaŋmɩn maa hiin bõ-ƴen a ba pʋɔ bar wa.

⁷Ɩ̃ aa ɩ a ala tɛw ʋ wa; ʋ sɔrʼã a nyɩ jukɔbɔ tɩɛ jaa bɔ̃w a nʋɔr. Ala-ɩ̃-sɔ nyɩ taa ɩ a dãbɩ̃ɛ nyɔw nyɩ wa: nyɩ sa na a tɩ̃ɩtɩ̃ɩ-yayaw.

⁸“Ɩ̃ yele nyɩ na, a nɩrɛ lɛ na cã yel a nɩbɛ nii-sɔw á ɩ̃ ben ʋ ɩ, a maa *Nɩbɛ Bie na mɩ yelʼã a Naaŋmɩn sɩ-tʋnɩsɩ nii-sɔw a ɩ̃ ben a sʋbɔ ʋlɔ ɩ.

⁹Ɩ̃-cɛ a nɩrɛ lɛ na cɩɩrɛ a nɩbɛ nii-sɔw a ꞌwaa bɔ̃w ma wa, a maa Nɩbɛ Bie na mɩ cɩɩrɩ̃ na a Naaŋmɩn sɩ-tʋnɩsɩ nii-sɔw a maa bɔ̃w a sʋbɔ ʋlɔ wa.

¹⁰“A nɩrɛ lɛ na kpɛrɛ a maa, Nɩbɛ Bie, a Naaŋmɩn na de na a ʋ fãa bar kʋ ʋ; ɩ̃-cɛ a nɩrɛ lɛ na sãwna a Naaŋmɩn Sɩɛ yuor, a Naaŋmɩn ma be na de a ʋ fãa bar kʋ ʋ wa.

¹¹“A lɛ ba nɔɔ tawra nyɩ cere nɩ a *puorfʋ yie pʋɔ, mɩɩ a tẽw nɩ-bɛrɛ nɩ a fãgã deme nii-sɔw, nyɩ taa ɩ a ɩ nyɩ tɩɛrʋ̃ a mɩnɛ nyɩ na ɩrɛ ɩ̃ mana a nyɩ ben, mɩɩ a ala nyɩ na sɛw nyɩ yel wa,

¹²a-na-ɩ a Naaŋmɩn Sɩɛ na mɩɩn nyɩ na a daar ʋlɔ pʋɔ a ala nyɩ na sɛw nyɩ yel.”

¹³Daba dãa na be be a nɩbɛ sɔ̃w ɩ̃ yel a *Jeeju: “Jãjaana, yel a ɩ̃ yɛbɛ ʋ ɩ a sɩ po a sɩ gã-yele.”

¹⁴A Jeeju yel ʋ: “Daba wee! Ala ɩ̃ ƴɔ̃w ma ɩ̃ ɩ a nyɩ ƴɛr-guoro, mɩɩ ɩ̃ na poro nyɩ a nyɩ gã-yele?”

¹⁵Ɩ̃ na ʋ yel a nɩbɛ: “Nyɩ́ tɛrɛ jɩmɛ ɩ̃ mɩ tɛrɛ a nyɩ mɩ̃ɛ a yel-yaw bɔfʋ ɩnɛ, a-na-ɩ a nɩrɛ baafʋ ma yi a ʋ yel-yaw tɛrɛfʋ ɩnɛ wa.”

¹⁶Ala-ɩ̃-sɔ a Jeeju lɔb a sʋkpa na kʋ ba. Ʋ yelʼã: “Daba dãa na be be na ɩ naaba, na ma pɔw yel-yayaw a ʋ por pʋɔ.

¹⁷Ʋ nyɔw na ɩ̃ pɛrɛ a ʋ suur pʋɔ yele nɩ: ‘Mɩnɛ ɩ̃ na ɩ? A-na-ɩ maa tɛrɛ a jie ɩ̃ na bine a ɩ̃ yele wa.’

¹⁸Ɩ̃ na ʋ yel: ‘Nɔhɔ̃ ɩ̃ na maal: Ɩ̃ na wɛlʼã a ɩ̃ bobo ɩ̃ lɛ mɛ bõ-bɛrɛ, na ɩ̃ woor a ɩ̃ ci nɩ a ɩ̃ yele a jaa ƴɔ̃w,

¹⁹ɩ̃ na ɩ̃ pãa yel a ɩ̃ mɩ̃ɛ: Daba wee! Fʋ tɛrɛ na yele yayaw na fʋ bin yomo yayaw ɩnɛ. Tɛrɛ nʋ̃ɔ jɛ nɩ, dɩrɛ nyuure nɩ.’

²⁰Ɩ̃-cɛ a Naaŋmɩn yelʼã a daba ʋlɔ: ‘Fʋ ɩ na dãbol! A dɩnaa tɩsɔw na, ba na de na a fʋ baafʋ ɩ̃ a ana yele fʋ na gbɛɛrɩ̃ bin, ala na sɔ?’ ”

²¹Ɩ̃ a Jeeju yel ba: “A lɛ a mɩ wɔ̃ nɩ a ʋlɔ na wobo a yel-yaw bine a ʋ mɩ̃ɛ ɩnɛ ɩ̃ ma ɩ naaba a Naaŋmɩn nii-sɔw wa.”

²²A ala ɩ̃ baar, a *Jeeju yelʼã a ʋ *par-tuurbe: “Ala-ɩ̃-sɔ ɩ̃ yele nyɩ, nyɩ taa waala a nyɩ baafʋ ɩnɛ yele nɩ a bõ nyɩ na dɩrɛ, mɩɩ waala nɩ a nyɩ ɩ̃gan ɩnɛ a bõ nyɩ na nyɛ su wa.

²³Má a baafʋ gãw na a bõ-dɩraa ɩ̃ má a ɩ̃gan mɩ gãw na a cẽcen.

²⁴Nyɩ́ ꞌwuor nyɛ a gbagbar: ba maa bʋr wa, ba maa ŋma wa, baa mɩ tɛrɛ gar mɩɩ boor ma bin ci wa, ɩ̃-cɛ a Naaŋmɩn ɩ̃ guolo ba. Ɩ̃ a nyɩmɩ, má nyɩ sa na a lili.

²⁵A nyɩ waalɩ̃fʋ pʋɔ, ala a nyɩ pʋɔ na tʋɔ tɔ a ʋ baafʋ bibie dɔɔl fɩ̃ɩ?

²⁶A ala ɩ nyaa tʋɔrɔ maala a ala na ɩ a fɩ̃ɩ wa, bõ ɩ a nyɩ waala a ala ɩnɛ na cɛ?

²⁷Nyɩ́ ꞌwuor a tɩ-pube: ba maa tʋ tʋn wa, ba maa wob cẽcen su wa, ɩ̃-cɛ ɩ̃ yele nyɩ na, a Salʋmɔ̃ mɩ̃ɛ nɩ a ʋ na-yele a jaa ma dãa su cẽcen ʋ vɩlaa ta a tɩ-pube asɩmɛ bõ-ƴen wa.

²⁸A ala ɩ a Naaŋmɩn ma yaarɩ̃ na a tɩ-pube ala a lɛ, na be a mɔɔ pʋɔ a dɩnaa ɩ̃ a ba lɔbɔ ƴɔnɔ a vũu pʋɔ a bio, ʋ kɔ̃ tʋɔ maal nyɩ a gãw a lɛ wa mɩɩ? A nyɩ ƴɔ̃w-nyãa pabʼã a Naaŋmɩn jie.

²⁹Ɩ̃ a nyɩmɩ, nyɩ taa bʋɔrɔ a ala nyɩ na dɩrɛɛ wa, mɩɩ a ala nyɩ na nyuure wa, ɩ̃ nyɩ taa ɩ a pʋlɩ̃nyɛ vʋ̃ɔnɔ nyɩ a ala ɩnɛ wa.

³⁰A-na-ɩ a bala na ma bɔ̃w a Naaŋmɩn wa ɩ̃ ma bʋɔrɔ a yele ala a jaa, ɩ̃ a nyɩmɩ, a nyɩ Sãa bɔ̃w ka nyɩ bʋɔrɔ na a ana yele.

³¹Nyɩ́ ɛ̃ɛ bʋɔrɔ a Naaŋmɩn fãw ɩ̃-cɛ ʋ na kʋ nyɩ na a yele ala dɔɔl.

³²“Ɩ̃ piir, nyaa jɛ̃ bom wa, ɩ̃ nyɩ taa jɔrɔ dãbɩ̃ɛ wa, a-na-ɩ a nyɩ Sãa, a nʋmɔ ʋ na ʋ de nyɩ ƴɔ̃w a ʋ fãw pʋɔ.

³³Nyɩ́ da a nyɩ yele de a libie po a nãw deme; nyɩ́ bʋɔrɔ a libie wʋʋr ala na ma sãwna wa, ɩ̃ kaala a na-yele na ma be baarfʋ jie wa bine a saa juu, a-na-ɩ a nyanyuur ma pɩɛlɛ be wa, ɩ̃ a kpolo ma be be mɔɔrɔ wa.

³⁴Nyɩ́ bɔ̃wnaa, a jie a nyɩ na-yele na be, be a nyɩ tɩɛrɩ̃sɩ na mɩ be.

³⁵“Nyɩ́ gbɛɛrɩ̃ a nyɩ mɩ̃ɛ ɩ̃ ƴɔ̃w a nyɩ lãpar,

³⁶ɩ̃ wɔ̃ taa nɩ a tʋ̃tʋnbɔ na gure a ba nɩ-kpɛ̃ɛ, a daar ʋlɔ ʋ na yire a kul-taa fɛtɩ jie waara, a mɩnɛ a ʋlɔ wa wa ta ŋmeere a pan, ba yuo ʋ a jie naan.

³⁷A nʋmɔ a tʋ̃tʋnbɔ bala a ba nɩ-kpɛ̃ɛ na waara nyɛrɛ a ba jɩnɛɛ nɩ a mimir. Yel-mɩ̃ɛ ɩ̃ yele nyɩ, ʋ na gbɛɛrɩ̃ na a ʋ mɩ̃ɛ ɩ̃ ƴɔ̃w ba a ba jɛ a dɩb par ɩ̃ ʋ taw ta po ba a dɩb.

³⁸A ala saarɩ̃ ɩ a tɩsɔw porɩ̃, mɩɩ a nɔdɛɛ kuon daar ʋ wa nyɛ a lɛ, a na nʋmɔ na a ʋ tʋ̃tʋnbɔ bala.

³⁹Nyɩ́ bɔ̃wnaa, a ala ɩ a yir sʋbɔ dãa na bɔ̃w a lɛɛr-buor a nyanyuur na waara, ʋ kɔ̃ bar ʋ ʋ wa kpɛ a yir pʋɔ wa.

⁴⁰A nyɩmɩ mɩ, nyɩ́ gbɛɛrɩ̃ gu, a-na-ɩ a *Nɩbɛ Bie na wa na a daar ʋlɔ pʋɔ nyɩ na ma tɩɛrʼɩ̃ ʋ wa.”

⁴¹A Pɩɛr soor a *Jeeju: “Nɩ-kpɛ̃ɛ, sɩmɩ tɛw fʋ lɔb a sʋkpa na kʋ mɩɩ a nɩbɛ ba jaa fʋ mɩ yele?”

⁴²A Nɩ-kpɛ̃ɛ yel: “Tʋ̃tʋ̃-buor ɩ̃ ɩ a nɩ-dẽdẽ na tɛrɛ a yɛ̃? Ʋ ɩ na a ʋlɔ a ʋ nɩ-kpɛ̃ɛ na ƴɔ̃w a ʋ ꞌwuoro a ʋ yir deme kʋrɔ ba a dɩb a daar ʋlɔ na sɛw.

⁴³Nʋ̃ɔ na be na a ʋna tʋ̃tʋnɔ jie a mɩnɛ a ʋ nɩ-kpɛ̃ɛ na lɩɛbɛ waara nyɛrɛ ʋ ʋ maala a lɛ.

⁴⁴Sɩrɛ jaa ɩ̃ yele nyɩ, a ʋ nɩ-kpɛ̃ɛ na kʋ ʋ na a ʋ yele a jaa ʋ ꞌwuoro.

⁴⁵Ɩ̃ a ala ɩ a tʋ̃tʋnɔ ʋlɔ yelʼã a ʋ mɩ̃ɛ á ʋ nɩ-kpɛ̃ɛ ma waara fɔw wa, ɩ̃ nyɔw ɩ̃ pɔbɔ a tʋ̃tʋnbɔ nɩ a tʋ̃tʋ̃-pooli, na ʋ dɩrɛ nyuure nɩ, a dãa kʋrɔ ʋ,

⁴⁶a ʋ nɩ-kpɛ̃ɛ na wa na a bibir ʋlɔ ʋ na ma tɩɛrʼɩ̃ wa nɩ a daar ʋlɔ ʋ na ma bɔ̃w wa, ɩ̃ ʋ na ŋma ʋ na ayi lɔb ʋ ƴɔ̃w a bala pʋɔ na ma tɛrɛ ƴɔ̃w-nyãa wa.

⁴⁷“A tʋ̃tʋnɔ ʋlɔ na bɔ̃w a ala a ʋ nɩ-kpɛ̃ɛ na bʋɔrɔ ɩ̃ ma gbɛɛrɩ̃ a yele ɩ̃ maal tu nɩ a ʋ nɩ-kpɛ̃ɛ pʋ-tɩɛrʋ̃ wa, ba na nar ʋ na yayaw.

⁴⁸Ɩ̃-cɛ a ʋlɔ na ma bɔ̃w buon wa ɩ̃ maal a ala na sɛw a ba na pɔb ʋ, ba na nar ʋ na fɩ̃ɩ tɛw. A ʋlɔ ba na kʋ a yayaw ba na soor ʋ na yaw mɩ, ɩ̃ a ʋlɔ nuumɩ ba na ƴɔ̃w a yayaw, ba na soorʼã a gãw a lɛ.

⁴⁹“Vũu ɩ̃ wa nɩ lɔb ƴɔ̃w a tẽw pʋɔ, ɩ̃ na ɩ̃ tɩɩ bʋɔrɔ ʋ gɔr ꞌle.

⁵⁰Ɩ̃ sɛw na ɩ̃ kpɛ a won pʋɔ a wɔ̃ taa nɩ kʋ̃ɔ pʋɔ ba mʋrɔ ma, ɩ̃ a tɩɩ na kpɛmɛ kʋ ma wa tara nɩ a mɩnɛ a na maala baara.

⁵¹Nyɩ tɩɛrʼã beeka pɩɛnfʋ ɩ̃ wa nɩ ƴɔnɔ a tẽw pʋɔ mɩɩ? Kpee! Ɩ̃ yele nyɩ na, wɛ-taa ɩ̃ ɛ̃ɛ wa nɩ.

⁵²Wa nyɔw nɩ a ƴɛ̃ƴɛrɩ̃, a nɩbɛ anuu na be a yir bõ-ƴen, na wɛrɛ na taa; ata na jɛbɛ nɩ na ayi, ɩ̃ ayi mɩ jɛbɛ nɩ ata.

⁵³A sãa na jɛbɛ nɩ na a ʋ bi-daba ɩ̃ a bi-daba mɩ jɛbɛ nɩ a ʋ sãa; a mã na jɛbɛ nɩ na a ʋ bi-pɔw ɩ̃ a bi-pɔw mɩ jɛbɛ nɩ a ʋ mã; a dɩ̃ɛ-mã na jɛbɛ nɩ na a ʋ bi-daba pɔw, ɩ̃ a bi-daba pɔw mɩ jɛbɛ nɩ a ʋ dɩ̃ɛ-mã.”

⁵⁴A *Jeeju mɩ dãa na yele a nɩbɛ: “A nyɩmɩ wa nyɛ a dɔ̃dɔrɩ̃-salaa a mɔtɔ̃w mʋrfʋ loor[3], nyɩ ma yelʼã a jie naan áa saa na wa na, ɩ̃ a lɛ a ma sɩrɩ̃ maal.

⁵⁵Ɩ̃ a sɛsɛb ɩ̃ wa yi a tẽw parɩ̃ ɩ̃ tɛbɛ, nyɩ ma yelʼã a susuur na kú na, ɩ̃ a lɛ a ma sɩrɩ̃ maal.

⁵⁶Nyɩna poe ayi deme naa! Nyɩ ma tʋɔ na bɔ̃w a mɩnɛ a yele na be a tẽw pʋɔ nɩ a saꞌlon, ɩ̃ mɩnɛ a ɩ a nyɩ maa lɛ ɛ̃ɛ bɔ̃w a mɩnɛ a daar na na be a ƴɛ̃ƴɛrɩ̃ wa?

⁵⁷“Mɩnɛ a ɩ a nyɩ maa tɩɛr nyɛ a nyɩ mɩ̃ɛ a ala na tor sɛw a nyɩ na maal wa?

⁵⁸A ala ɩ a fʋ san-sʋbɔ bʋɔl fʋ na cere nɩ a ƴɛr-guoro jie, dɩ tuo a nyɩ guor a ƴɛrɩ̃ be a sɔr juu a baar. A ala ma ɩ lɛ ʋ wa, ʋ na fɛr fʋ na ta nɩ a ƴɛr-guoro nii-sɔw, a ƴɛr-guoro de fʋ kʋ a kasu-gure, ɩ̃ a kasu-gure de fʋ pɔw a kasu pʋɔ.

⁵⁹Ɩ̃ yele fʋ na, faa be na yi a be, ɩ̃ ma ɩ fʋ ya na a fʋ san a jaa baar wa.”