Read Birifor, Malba Luki Sɛbɛ 15 Bible Online

Luki Sɛbɛ 15 - Birifor, Malba bible

Luki Sɛbɛ 15

¹A lãpo-dierbe nɩ a nɩ-faar ba jaa taw na pɩɛl a *Jeeju cɛlɛ a ʋ ƴɛrɩ̃,

²a *Farɩsɩ nɩbɛ nɩ a *ƴɛr-kpɛn-bɔɔnbɔ hũhune ɩ̃ yele: “A daba na sɔw na de a nɩ-faar a ba lãa dɩrɛ a dɩb.”

³A Jeeju lɔb a sʋkpa na kʋ ba:

⁴“A ala ɩ a nɩrɛ a nyɩ sɔ̃w tɛrɛ na piir kʋbaa, ɩ̃ a bõ-ƴen wa bɔr, ʋ kɔ̃ bar a kʋbaa for bir bala na cɛ be a dɔ-cɩɩn-bãa ɩ̃ yɔ bɔ a ʋlɔ na bɔr, wa ta nɩ a lɛ ʋ na nyɛrɛ ʋ wa mɩɩ?

⁵A lɛ ʋ na wa nyɛ ʋ, nʋ̃ɔ nyɔw ʋ na ʋ ɓɔw ʋ dɔɔl bɔ̃w juu

⁶kulʼɩ̃ ɩ̃ bʋɔl a ʋ badɛɛ nɩ a ʋ tɔ deme tiw ɩ̃ yel ba: ‘Nyɩ́ ɩ a nʋmɔ nyɩ a ɩ̃ kaarɩ̃, a-na-ɩ ɩ̃ nyɛ na a ɩ̃ pɛr ʋlɔ na dãa bɔr.’ ”

⁷A Jeeju yel ba na: “Lɛ a nʋɔ kpɛ̃ɛ na mɩ be a Naaŋmɩn tẽw a maal-fãa sʋbɔ bõ-ƴen ɩnɛ na lɩɛb a v yɛ̃, gãw a nɩ-torisɩ kʋbaa for bir na ma lɛ sɛw a *yɛ̃ lɩɛbfʋ wa.

⁸“Mɩɩ a ala ɩ a pɔw tɛrɛ na libi-kure pie ɩ̃ a bõ-ƴen wa bɔr, ʋ kɔ̃ ƴɔ̃w lãpa ɩ̃ de a saar pɩɩrʼɩ̃ a dir ɩ̃ bɔ̃w bɔ ʋ wa nyɛ ʋ wa?

⁹A lɛ ʋ na nyɛ ʋ, ʋ ma bʋɔlʼã a ʋ badɛɛ nɩ a ʋ tɔ deme tiw ɩ̃ yel ba: ‘Nyɩ́ ɩ a nʋmɔ nyɩ a ɩ̃ kaarɩ̃, a-na-ɩ ɩ̃ nyɛ na a ɩ̃ libi-kur ʋlɔ na dãa bɔ̃r.’ ”

¹⁰A *Jeeju lɛ yel ba na: “A lɛ ʋ, nũɔ ma be na a Naaŋmɩn sɩ-tʋnɩsɩ jie a maal-fãa sʋbɔ bõ-ƴen ɩnɛ na lɩɛb a ʋ yɛ̃.”

¹¹A *Jeeju lɛ yelʼã go: “Daba kãw dãa na tɛrɛ bi-dabsɩ ayi,

¹²a bidab-bile yel a sãa: ‘Ɩ̃ sãa wee! Kʋ ma a fʋ yele ala na ɩrɛ a ɩ̃ ben,’ a ʋ sãa de a ʋ yele po ba ba jaa ayi.

¹³A ɩ na fɩ̃ɩ, a bidab-bile woor a ʋ yele a jaa yi cenʼɩ̃ nɩdaa tẽ-kpee pʋɔ, na ʋ bũburĩ bar a burbur maalfʋ pʋɔ.

¹⁴A lɛdaar ʋ na sãw a ʋ yele a jaa baar, kɔ̃ tuo lo na a ʋna tẽw pʋɔ ɩ̃ a nãw nyɔw ɩ̃ kpɛɛrɛ ʋ.

¹⁵Ʋ cenʼã a ʋna tẽw naa nɩrɛ kãw jie, na ɩ ʋ tʋtʋnɔ, ʋ de ʋ ƴɔ̃w a ʋ puo pʋɔ ʋ cɩɩnɛ dor.

¹⁶Ʋ ma bʋɔrɔ na ʋ mɩ ꞌwɔb a jɔ̃-pɔbɔ ala a dor na ꞌwɔbɔ ɩ̃-cɛ nɩrɛ maa dãa kʋ ʋ wa.

¹⁷A be jie, ʋ pɛ na a ʋ suur pʋɔ ɩ̃ yel: ‘A ɩ̃ sãa tʋ̃tʋnbɔ ba jaa tɛrɛ na bõ-dɩraa a ƴɔ ba, ɩ̃-cɛ ɩ̃ be ka kpiire nɩ kɔ̃.

¹⁸Ɩ̃ na irʼã lɩɛb kul a ɩ̃ sãa sɛ̃, na ɩ̃ yel ʋ: Ɩ̃ sãa, ɩ̃ maalʼã fãa a Naaŋmɩn jie nɩ a fʋ jie.

¹⁹Maa lɛ sɛw a fʋ na bʋɔl ma a fʋ bi-daba wa. De ma ɩ̃ wɔ̃ taa nɩ a fʋ tʋ̃tʋnɔ ƴen sʋbɔ,’

²⁰ɩ̃ na ʋ ir lɩɛb kule a ʋ sãa sɛ̃. “A lɛ ʋ na cãa be a nɩdaa waara, a ʋ sãa gbã na nyɛ ʋ a nãw nyɔw ʋ, ʋ jɔ tuor worĩ ʋ.

²¹A bi-daba yel ʋ: ‘Ɩ̃ sãa, ɩ̃ maalʼã fãa a Naaŋmɩn jie nɩ a fʋ jie. Maa lɛ sɛw a fʋ na bʋɔl ma a fʋ bi-daba wa.’

²²Ɩ̃-cɛ a sãa yelʼã a ʋ tʋ̃tʋnbɔ: ‘Nyɩ́ cen fɔfɔw na de a fu ʋlɔ na nyɩrɩ̃ vɩɛlɛ wa nɩ su ʋ. Nyɩ́ mɩ de a nubi-suuraa su ʋ, ɩ̃ su ʋ a nafaba.

²³Nyɩ́ nyɔw a nale ꞌwɔr wa nɩ kú a sɩ ꞌwɔbɔ cɩlɛ nɩ,

²⁴a-na-ɩ a ɩ̃ bie na, ʋ dãa na kpi, ɩ̃ ʋ lɩɛbʼã ɩ nɩ-mimir. Ʋ dãa na bɔr, ɩ̃ sɩ lɛ nyɛ ʋ na,’ ɩ̃ na ba nyɔw ɩ̃ cɩlɛ.

²⁵“A bidab-kpɛ̃ɛ ʋlɔ dãa na be a puo pʋɔ. A lɛ ʋ na lɩɛb wa pɩɛlɛ a yir, ʋ wõ na a bɩnɛ ba na sɛbɛ hele nɩ,

²⁶ɩ̃ bʋɔl a tʋ̃tʋnɔ ƴen sʋbɔ soor a ala na be be,

²⁷ʋ yel ʋ: ‘A fʋ yɛ-bile lɩɛbʼã wa, a fʋ sãa ɩ a ba kú a nale ꞌwɔr, a-na-ɩ ʋ lɛ nyɛ na a ʋ bie nɩ ɩ̃gan kpɛ̃w.’

²⁸A bidab-kpɛ̃ɛ nyɛ suur ɩ̃ jaar a yir pʋɔ kpɛfʋ, a ʋ sãa yire á ʋ ɓaalɩ̃ ʋ ʋ wa kpɛ.

²⁹Ɩ̃-cɛ ʋ yelʼã a sãa: ‘Nyɛ, a yomo waa na ɩ̃ na tʋnɔ fʋ a tʋn ɩ̃ maa dãa wõw toor a fʋ ƴɛrɩ̃ kãw pʋɔ wa, ɩ̃-cɛ faa mɩ kʋ ma bule gbɛ-bõ-ƴen sɛr ɩ̃ ɓolĩ a ɩ̃ badɛɛ wa.

³⁰Ɩ̃-cɛ a fʋ bie na na sãw a fʋ yele nɩ a pɔɔ-baar, ɩ̃ lɩɛb wa, a fʋ ɩ a ba kú a nale ꞌwɔr ƴɔ̃w ʋ!’

³¹A sãa yel ʋ: ‘Ɩ̃ bie, fʋ be na ka a ɩ̃ sɛ̃ a daar a jaa. A yele a jaa ɩ̃ na tɛrɛ a mɩ ɩ na a fʋ ben,

³²ɩ̃-cɛ a sɛw na a sɩ na ɓolo cɩlɛ nɩ, a-na-ɩ a fʋ yɛbɛ na, ʋ dãa na kpi, ɩ̃ ʋ lɛ lɩɛbʼã ɩ nɩ-mimir. Ʋ dãa na bɔr, ɩ̃ sɩ lɛ nyɛ ʋ na.’ ”