Read Birifor, Malba Luki Sɛbɛ 17 Bible Online

Luki Sɛbɛ 17 - Birifor, Malba bible

Luki Sɛbɛ 17

¹A ala na yi tɔ a *Jeeju yelʼã a ʋ *par-tuurbe: “Yele na be na be a daar a jaa maala a nɩbɛ a ba kpɛɛrɛ a tule pʋɔ. Ɩ̃-cɛ nabier na pɔw na a ʋlɔ na saa a wa tara.

²A nɛ-kpɛ̃ɛ ba na luure yara a nɩrɛ ʋlɔ nyɩɩmɩ ɩ̃ lɔbɔ ʋ ƴɔnɔ a man kʋ̃ɔmɩ, a na cãa na sa ʋ gãw ʋ na wa maala a nɩ-kɔmsɩ basɩmɛ ƴen sʋbɔ ʋ kpɛɛrɛ a tule pʋɔ.

³Nyɩ́ bɔ̃w tɛrɛ nyɩ mɩ̃ɛ! “A ala ɩ a fʋ yɛbɛ wa maal fʋ na a fãa, fú gal ʋ, a ʋlɔ ɩ̃ lɩɛb a ʋ yɛ̃, de bar kʋ ʋ.

⁴A ala saarɩ̃ ɩ ʋ maal fʋ na bier gbɛɛ anuu-nʼayi a bibir bõ-ƴen pʋɔ, ɩ̃ mɩ lɩɛb wa a gbɛɛ anuu-nʼayi yel fʋ á ʋ lɩɛbʼã a ʋ yɛ̃, fú de bar kʋ ʋ.”

⁵A *nɩ-tʋnɩsɩ yelʼã a Nɩ-kpɛ̃ɛ: “Maal a sɩ ƴɔ̃w-nyãa ʋ bɛrmɛ dɔɔl.”

⁶A Nɩ-kpɛ̃ɛ yel: “A ala ɩ nyɩ dãa na tɛrɛ a ƴɔ̃w-nyãa ʋ jɛ̃ a muta-tɩɛ bir kaarɩ̃, nyɩ naa tʋɔ na yel a tɩɛ na a ʋ eli cen na ba a man kʋ̃ɔmɩ, ɩ̃ ʋ na maalʼã a lɛ nyɩ na yel.

⁷“A ala ɩ nɩrɛ kãw a nyɩ sɔ̃w tɛrɛ na tʋtʋnɔ ʋ kʋɔrɔ ʋ, mɩɩ ʋ ŋmaara ʋ a dʋn, ɩ̃ wa yi a puo pʋɔ wa, ʋ na yel ʋ na á ʋ wa fɔfɔw jɛ dɩ dɩb mɩɩ?

⁸Má ʋ na ɛ̃ɛ na yel ʋ: ‘Maal ma bõ-dɩraa ɩ̃ gbɛɛrɩ̃ de bin ma, a maa wa dɩ nyu nɩ sɛw baar, fú pãa mɩ dɩ nyu nɩ.’

⁹Ʋ na puorʼã a ʋ tʋtʋnɔ a-na-ɩ ʋ maalʼã a ala ʋ na ƴɔ̃w ʋ ʋ maal mɩɩ?

¹⁰Lɛ a mɩ wɔ̃ a nyɩ jie. A nyɩmɩ wa maal a ala ba na ƴɔ̃w nyɩ baar, nyɩ́ yel: ‘Sɩ ɩ na tʋ̃tʋ̃-pɔrsɩ. A ala na sɛw sɩ maal, ala tɛw sɩ maal.’ ”

¹¹A *Jeeju cere na a Jerujalɛm na ʋ tɔl yi a Samari nɩ a Galile cara pʋɔ.

¹²Ʋ cenʼã na kpɛɛrɛ tẽ-bile kãw pʋɔ a kɔn pie jɔ tuor ʋ ta sɔ̃w ɩraa[4]

¹³ɩ̃ bʋɔlɔ ʋ nɩ kpɛ̃w yele: “Jeeju, Jãjaana, bɔ̃w sɩ nãw bɩlɛ!”

¹⁴A Jeeju nyɛ ba ɩ̃ yel ba: “Nyɩ́ cen na de a nyɩ mɩ̃ɛ miilʼɩ̃ a Naaŋmɩn baar-lorbo.” Ɩ̃ a lɛ ba na cãa be a sɔr juu cere, ba pɔlɩ̃ na.

¹⁵A bõ-ƴen a ba sɔ̃w nyɛ na a ɩ ʋ pɔlɩ̃ na ɩ̃ lɛ lɩɛb de a ʋ gbɛ-tule pɛwrɛ a Naaŋmɩn nɩ kpɛ̃w cere nɩ.

¹⁶Ʋ lo na kpa vɔɔl a nii-sɔw a Jeeju gbɛɛ par ɩ̃ puoro ʋ. A daba ʋlɔ ɩ na *Samari-tẽw nɩrɛ.

¹⁷A be jie, a Jeeju yel: “Aa ɩ nɩbɛ pie ba ɩ na pɔlɩ̃ wa? Ɩ̃ a pie for bir bala, nyɩnɛ ba be?

¹⁸A ala ma ɩ a saana na tɛw ʋ wa, nɩ-bõ-ƴen ma be be na tɩɛr a ʋ lɩɛb wa pɛw a Naaŋmɩn wa?”

¹⁹Ɩ̃ na ʋ yel ʋ: “Ir kule. A fʋ ƴɔ̃w-nyãa faa fʋ na.”

²⁰A *Farɩsɩ nɩbɛ soorʼã a *Jeeju a dabor a Naaŋmɩn fãw na waara, ʋ yel ba: “A Naaŋmɩn fãw ma waara a nɩrɛ nyɛrɛ ʋ wa.

²¹Ba kɔ̃ yel a ka ʋ be mɩɩ, a be ka ʋ be wa. Ɩ̃ nyɩ́ bɔ̃wnaa a Naaŋmɩn fãw be na a nyɩ sɔ̃w.”

²²A ala na yi tɔ, a Jeeju lɛ yelʼã a *par-tuurbe: “Daar kãw na ta na a nyɩ na bʋɔrɔ nyɩ nyɛ a *Nɩbɛ Bie bibir ƴen sʋbɔ, ɩ̃ nyɩ kɔ̃ nyɛ wa.

²³Ba na yel nyɩ na: ‘Nyɩ́ nyɛ ʋ ka!’ mɩɩ ‘Nyɩ́ nyɛ ʋ be ka!’ Nyɩ taa cere be wa, nyɩ taa jɔrɔ tuure ba wa.

²⁴A-na-ɩ a mɩnɛ a saa na ma nyɩnyɩl a saꞌlon caarɩ̃ a lõboor bõ-ƴen wa cen na ta nɩ a lõboor kpee, lɛ a Nɩbɛ Bie na be a ʋ bibir.

²⁵Ɩ̃-cɛ a sɛw na ʋ na de nĩe nyɛ hʋʋr yayaw ɩ̃ a dɩnaa nɩbɛ jaar ʋ bar.

²⁶A ala na dãa ta a Nowe daar, na lɛ bɔw na ta a Nɩbɛ Bie daar mɩ.

²⁷A nɩbɛ dãa na dɩrɛ nyuure nɩ kule nɩ taa, ɩ̃ mɩ tɩɩrɛ a ba bibiir a ba kule, wa ta nɩ a bibir ʋlɔ a Nowe na kpɛ a gbor kpɛ̃ɛ pʋɔ, ɩ̃ a kʋ̃ɔ wa ŋme pɔw ba a ba kpi ba jaa.

²⁸A lɛ ʋ mɩ, a ala na dãa ta a lɔtɩ daar na lɛ bɔw na ta go. A nɩbɛ dãa na dɩrɛ nyuure nɩ, daara a yele ƴaba nɩ, bʋrɔ a yele, mɩɛrɛ nɩ a yie.

²⁹Ɩ̃-cɛ a bibir ʋlɔ a Lɔtɩ na yi a *Sɔdɔm-tẽw pʋɔ, Naaŋmɩn ɩ na a vũu nɩ a kʋsɩ-ꞌlerisɩ a yi a saꞌlon ɩ̃ lo pɔw ba a ba kpi ba jaa.

³⁰A lɛ a na mɩ be a bibir ʋlɔ a Nɩbɛ Bie nɔɔ nyɩrɛ.

³¹“A bibir ʋlɔ, a nɩrɛ ʋlɔ na be a gar juu ɩ̃ a ʋ yele be a diem, ʋ taa suure diere wa. A lɛ ʋ mɩ, a ʋlɔ na be a puo pʋɔ, ʋ taa lɩɛbɛ puo-sɔw wa.

³²Nyɩ́ tɩɛrʼɩ̃ a ala na dãa ta a Lɔtɩ pɔw!

³³A ʋlɔ na bʋɔrɔ ʋ faa a ʋ mɩ̃ɛ, ʋ na ɛ̃ɛ na bɔr, ɩ̃ a ʋlɔ na sɔw a ʋ bɔrfʋ, ʋ na baa na.

³⁴Ɩ̃ yele nyɩ na, a ʋna daarʼãa, nɩbɛ ayi na lãa na gã a tɩsɔw a gaajie bõ-ƴen juu, a Naaŋmɩn na de na bõ-ƴen ɩ̃ cɛ a bõ-ƴen bar.

³⁵Pɔɔbɔ ayi na lãa na ƴɛrɛ jɔ, ʋ na de na bõ-ƴen ɩ̃ cɛ a bõ-ƴen bar. [

³⁶Dabsɩ ayi na be na a puo pʋɔ, ɩ̃ ba na de na a bõ-ƴen ɩ̃ cɛ a kãw bar.”]

³⁷A par-tuurbe soor ʋ: “Nɩ-kpɛ̃ɛ, nyɩnɛ a ana yele na maal?” A Nɩ-kpɛ̃ɛ yel ba: “A jie ʋlɔ a bõ-kũu na be, be a sidune na mɩ lo duo.”